-
¿Chucoch an cabʌl wocol yicʼot jontolil?¡Ubin a tijicñʌyel tiʼ pejtelel ora! Estudio loqʼuem bʌ ti Biblia
-
-
CɅNTESɅNTEL 26
¿Chucoch an cabʌl wocol yicʼot jontolil?
Cheʼ miʼ yujtel jumpʼejl wocol cabʌl muʼ bʌ i cʼajtibeñob i bʌ, «¿pero chucoch?». Miʼ wen tijicñesan lac pusicʼal cheʼ jiñi Biblia miʼ yʌqʼuen i jacʼbal ili cʼajtiya.
1. ¿Chuqui tsiʼ mele Satanás chaʼan miʼ tech cabʌl jontolil ila ti pañimil?
Satanás, jiñi Diablo, tsiʼ contraji Dios. Come yom chaʼan jiñi yambʌlob miʼ yajñelob tiʼ pʼʌtʌlel, jin chaʼan tsiʼ mele chaʼan Adán yicʼot Eva miʼ sujtelob tiʼ contra Dios. I chaʼan miʼ mejlel i mel tsiʼ loti jiñi Eva (Génesis 3:1-5). Satanás tsiʼ yʌqʼue i ñaʼtan jiñi Eva chaʼan Jehová mach tojic come an chuqui wem bʌ woli (choncol) i chʌquiben. Lajal bajcheʼ Satanás tsiʼ yʌlʌ chaʼan ñumen tijicñayonla mi tsaʼ lac ñusʌbe i tʼan Dios. Cheʼ bʌ Satanás tiʼ sube Eva chaʼan maʼañic mi caj i chʌmel (sajtel), tsiʼ yʌlʌ jiñi ñaxam bʌ lot. Jin chaʼan, jiñi Biblia miʼ yʌl chaʼan «juntiquilʌch xlot yicʼot i tatʌch jiñi lot» (Juan 8:44).
2. ¿Chuqui tsiʼ meleyob Adán yicʼot Eva?
Jehová tsiʼ wen pʌsbe i yutslel jiñi Adán yicʼot Eva. Tiʼ subeyob chaʼan miʼ mejlelob i cʼuxben i wut pejtelel jiñi teʼ tac am bʌ yaʼ ti pʌcʼʌbʌl Edén cojach jumpʼejl maʼañic (Génesis 2:15-17). Pero tsiʼ cʼuxuyob i wut jiñi teʼ. Eva tsiʼ tucʼu i wut jiñi teʼ i tsiʼ cʼuxu, cheʼ jiñi tsiʼ yʌqʼue Adán i tsiʼ cʼuxu jaʼel (Génesis 3:6). Cheʼ tsiʼ yʌlol ñusʌbeyob i tʼan Dios, tsiʼ chaʼleyob mulil i jiñix tsaʼ caji i bajñel ñaʼtañob chuqui yom bʌ miʼ melob yicʼot mach bʌ yomic. I tiʼ caj jiñi tsiʼ tajayob cabʌl wocol (Génesis 3:16-19).
3. ¿Bajcheʼ an i ticʼlayonla tsaʼ bʌ i meleyob Adán yicʼot Eva?
Cheʼ bʌ Adán yicʼot Eva tsiʼ ñusʌbeyob i tʼan Dios, tsaʼ sujtiyob ti xmulil i tsiʼ ñusʌbeyob jiñi mulil pejtelel jiñi i pʼolbalob. Jiñi Biblia miʼ yʌl tiʼ tojlel Adán: «Tiʼ tojlel juntiquil wiñic, jiñi mulil tsaʼ ochi ti pañimil i tiʼ caj jiñi mulil tsaʼ ochi jiñi chʌmel, i cheʼʌch tsaʼ pam pujqui jiñi chʌmel tiʼ tojlel pejtelel wiñicob» (Romanos 5:12).
Cheʼ jiñi, ¿chucoch mi lac ñusan wocol? An qʼuiñil come mach weñic chuqui mi lac yajcan lac mel, tiʼ caj mach weñic chuqui miʼ yajcan i melob yambʌlob, i an i tajol come yaʼañonla baqui mach yomic mi la cajñel (pejcan Eclesiastés 9:12).
LAʼ LAC ÑUMEN ÑAʼTAN
Laʼ laj qʼuel chucoch maʼañic miʼ mejlel la cʌl chaʼan i mul Dios pejtelel jiñi jontolil yicʼot wocol am bʌ ila ti pañimil i bajcheʼ miʼ yubin i bʌ Dios cheʼ miʼ qʼuel chaʼan woli lac ñusan wocol.
4. ¿Majqui i mul jiñi lac wocol tac?
Cabʌlob miʼ yʌlob chaʼan Dios an tiʼ cʼʌb ili pañimil. ¿Pero i sujm ba jiñi? Qʼuelela jiñi VIDEO.
Pejcanla Santiago 1:13 yicʼot 1 Juan 5:19, i tem alʌla iliyi:
¿I mul ba Dios cheʼ an wocol tac yicʼot jontolil?
5. Cheʼ bʌ Satanás tsiʼ teche yumʌntel tsaʼ caji wocol tac
Pejcanla Génesis 3:1-6 i tem alʌla iliyi:
¿Chuqui ti lot tsiʼ yʌlʌ Satanás? (Qʼuelela jiñi versículo 4 yicʼot 5).
¿Bajcheʼ tsiʼ yʌcʼʌ ti ñaʼtʌntel Satanás chaʼan Jehová an chuqui wem bʌ woliʼ chʌquibeñonla?
¿I cʼʌjñibal ba miʼ yʌl Satanás chaʼan miʼ yumañonla Jehová?
Pejcanla Eclesiastés 8:9 i tem alʌla iliyi:
¿Bajcheʼ yilal an ili pañimil come mach jiñic Jehová woli ti yumʌntel?
Adán yicʼot Eva tojob yicʼot chumulob yaʼ ti Paraíso, pero tsiʼ jacʼbeyob i tʼan Satanás i tsiʼ contrajiyob Jehová.
Jiñi mulil, jiñi wocol yicʼot jiñi chʌmel tsaʼ pam pujqui tiʼ pejtelel pañimil cheʼ bʌ Adán, Eva yicʼot Satanás ti sujtiyob tiʼ contra Dios.
Jehová mi caj i jisan jiñi mulil, jiñi wocol yicʼot jiñi chʌmel. Chaʼ tojonla mi caj lac sujtel yicʼot mi caj lac chumtʌl ti jumpʼejl Paraíso.
6. Jehová chʼijyem miʼ yubin i bʌ cheʼ mi lac ñusan wocol
¿I wenta ba Dios cheʼ mi lac ñusan wocol? Qʼuele chuqui tiʼ tsʼijbuyob jiñi rey David yicʼot jiñi apóstol Pedro. Pejcanla Salmo 31:7 yicʼot 1 Pedro 5:7, i tem alʌla iliyi:
¿Bajcheʼ yubil maʼ wubin a bʌ cheʼ a wujil chaʼan Jehová miʼ qʼuel jiñi wocol tac woli bʌ lac ñusan yicʼot chaʼan miʼ yʌqʼuen i chʼijyemlel?
7. Dios mi caj i jisan jiñi lac wocol tac
Pejcanla Isaías 65:17 yicʼot Apocalipsis 21:3, 4, i tem alʌla iliyi:
Jehová miʼ yʌcʼ i tʼan chaʼan mi caj i jisan pejtelel jiñi mach bʌ weñic am bʌ i yʌcʼʌyonla ti wocol. ¿Muʼ ba i ñuqʼuesʌbeñet a pusicʼal iliyi? ¿Chucoch?
¿A wujilix ba?
Cheʼ bʌ Satanás tsiʼ yʌlʌ jiñi ñaxam bʌ lot tsiʼ jopʼo tʼan tiʼ contra Jehová. Tsiʼ bibʼesʌbe i cʼabaʼ cheʼ bʌ tsiʼ yʌlʌ chaʼan mach tojic bʌ yumʌl. Tsʼitaʼ jachix yom chaʼan Jehová miʼ jisan jiñi lac wocol tac, i cheʼ jiñi mi caj i sʌqʼuesan jiñi i cʼabaʼ. Ti yambʌ tʼan, Dios mi caj i pʌs chaʼan jiñʌch jiñi ñumen wem bʌ yumʌl. Jiñi i sʌqʼuesʌntel i cʼabaʼ Jehová jiñʌch jiñi ñumen ñuc bʌ i cʼʌjñibal (Mateo 6:9, 10).
AN MUʼ BɅ I YɅLOB: «Dios tsaʼ jach i pʌyʌyonla tilel chaʼan mi lac ñusan wocol».
Ixcu jatet, ¿chuqui maʼ wʌl?
TSAʼ BɅ LAJ CɅÑɅ
Satanás, Adán yicʼot Eva jiñʌch ñumen i mulob cheʼ bʌ an wocol tac ili ora. Pero Jehová chʼijyem miʼ yubin i bʌ cheʼ bʌ mi lac ñusan wocol, i tsʼitaʼ jachix yom chaʼan miʼ jisan jiñi wocol tac.
¿Chuqui tsaʼ cʌñʌ?
¿Chuqui ti lot tiʼ sube jiñi Diablo jiñi Eva?
¿Bajcheʼ an i ticʼlayonla jiñi tsaʼ bʌ i meleyob Adán yicʼot Eva?
¿Chucoch miʼ mejlel la cʌl chaʼan Jehová chʼijyem miʼ yubin i bʌ cheʼ mi lac ñusan wocol?
CɅÑɅ YAN TAC BɅ
Cʌñʌ bajcheʼ miʼ tsictesan jiñi Biblia chuquiyes jiñi mulil.
Ñumen cʌñʌ chaʼan jiñi wocol tsaʼ bʌ i teche Satanás yaʼ ti pʌcʼʌbʌl Edén.
«¿Chucoch Dios woliʼ yʌcʼ ti ujtel jiñi wocol?» (Lac Tsictesʌbentel, 1 i chaʼan enero, 2014)
Qʼuele chaʼan muʼ bʌ i tsictesan ili artículo miʼ ñuqʼuesan lac pusicʼal yicʼot miʼ jacʼ jumpʼejl cʼajtiya wocol bʌ.
Qʼuele chuqui tsiʼ cʌñʌ juntiquil wiñic tsaʼ bʌ i wen ñusa wocol.
-
-
¿Bajcheʼ miʼ coltañonla cheʼ tsaʼ chʌmi Jesús?¡Ubin a tijicñʌyel tiʼ pejtelel ora! Estudio loqʼuem bʌ ti Biblia
-
-
Adán yicʼot Eva tsiʼ ñusʌbeyob i tʼan Dios. Jin chaʼan, xmulilonla, mi lac ñusan wocol yicʼot mi lac chʌmel (sajtel).a Pero Jehová tsiʼ yʌcʼʌ Jesucristo, jiñi i Yalobil, chaʼan miʼ locʼsañonla ti chʌmel yicʼot ti mulil. Jiñi Biblia miʼ yʌl chaʼan cheʼ bʌ tsaʼ chʌmi Jesús tsiʼ yʌcʼʌ i tojol laj coltʌntel, tsiʼ yʌcʼʌ toj bʌ i cuxtʌlel (pejcan Mateo 20:28). Cheʼ bʌ Jesús tsiʼ yila pañimil (chʼocʼa) bajcheʼ juntiquil alʌl toj bʌ, miʼ mejlel ti chumtʌl tiʼ pejtelel ora ila ti Lum, pero tsiʼ cʌyʌ jiñi chaʼan miʼ mejlel lac chaʼ taj pejtelel jiñi tsaʼ bʌ i sʌtʌ Adán yicʼot Eva. Cheʼ jaʼel, tsiʼ pʌsʌ bajcheʼ cʼamel miʼ cʼuxbiñoñobla Jehová yicʼot Jesús. Ili cʌntesʌntel mi caj i coltañet chaʼan maʼ ñumen qʼuel ti ñuc jiñi i cuxtʌlel tsaʼ bʌ i yʌcʼʌ Jesús.
1. ¿Bajcheʼ miʼ coltañonla ili ora cheʼ tsaʼ chʌmi Jesús?
Come xmulilonla, mi lac mel mach tac bʌ weñic maʼañic bʌ miʼ mulan Jehová. Pero mi lac mejlel ti sujtel ti wem bʌ i yamigo Dios mi mucʼʌch laj cʌy lac mul i mi mucʼʌch laj cʼajtiben Jehová tiʼ cʼabaʼ Jesús chaʼan miʼ ñusʌbeñonla. Cheʼ jaʼel, mi mucʼʌch lac chaʼlen wersa chaʼan maʼañix mi lac chʌn mel jiñi mach bʌ weñic (1 Juan 2:1). Jiñi Biblia miʼ yʌl: «Cristo junsujtel jach tsaʼ chʌmi chaʼan jiñi mulil i chaʼañʌch tiʼ pejtelel ora, juntiquil toj bʌ tiʼ tojlel mach bʌ tojobic, chaʼan miʼ mejlel i coltañetla laʼ taj Dios» (1 Pedro 3:18).
2. ¿Bajcheʼ mi caj i coltañonla ti talto bʌ qʼuin cheʼ tsaʼ chʌmi Jesús?
Jehová tsiʼ choco tilel i Yalobil chaʼan miʼ yʌcʼ toj bʌ i cuxtʌlel «chaʼan pejtelel muʼ bʌ i pʌs chaʼan miʼ ñop tiʼ tojlel [Jesús] maʼañic miʼ jisʌntel, miʼ taj i cuxtʌlel mach bʌ añic miʼ jilel» (Juan 3:16). Wocolix i yʌlʌ tsaʼ bʌ i mele Jesús, Jehová lʌcʼʌlix mi caj i jisan pejtelel jiñi mach bʌ weñic tsaʼ bʌ i teche Adán tiʼ caj i ñusatʼan. Ili yom i yʌl chaʼan mi mucʼʌch lac pʌs lac ñopoñel ti jiñi i cuxtʌlel tsaʼ bʌ i yʌcʼʌ Jesús, mi caj lac mejlel ti chumtʌl tiʼ pejtelel ora ila ti Lum cheʼ sujtemix ti jumpʼejl paraíso (Isaías 65:21-23).
LAʼ LAC ÑUMEN ÑAʼTAN
Laʼ lac ñumen chʼʌmben i sujm chucoch Jesús tsiʼ yʌcʼʌ i cuxtʌlel i laʼ laj qʼuel bajcheʼ miʼ coltañet iliyi.
3. Jiñi i cuxtʌlel Jesús miʼ locʼsañonla ti mulil yicʼot ti chʌmel
Qʼuelela jiñi VIDEO i tem alʌla iliyi:
¿Chuqui tiʼ sʌtʌ Adán cheʼ bʌ maʼañic tsiʼ jacʼbe i tʼan Dios?
Pejcanla Romanos 5:12 i tem alʌla iliyi:
¿Bajcheʼ miʼ ticʼlañet i mul jiñi Adán?
Pejcanla Juan 3:16 i tem alʌla iliyi:
¿Chucoch Jehová tsiʼ choco tilel i Yalobil ila ti Pañimil?
Adán juntiquilʌch toj bʌ wiñic, i cheʼ bʌ tsiʼ ñusa tʼan, tsiʼ yotsa jiñi mulil yicʼot jiñi chʌmel.
Jesús juntiquilʌch toj bʌ wiñic, i tsiʼ jacʼbe i tʼan Dios, cheʼ bajcheʼ jiñi tsiʼ jamʌ jiñi bij chaʼan toj mi lac chaʼ sujtel i mi lac mejlel ti chumtʌl tiʼ pejtelel ora.
4. Cheʼ tsaʼ chʌmi Jesús miʼ mejlel i coltañonla
Qʼuelela jiñi VIDEO i tem alʌla iliyi:
¿Chucoch miʼ mejlel i coltañonla ti lac pejtelel cheʼ tsaʼ chʌmi Jesús?
Pejcanla 1 Timoteo 2:5, 6 i tem alʌla iliyi:
Adán juntiquilʌch toj bʌ wiñic, i cheʼ bʌ tsiʼ ñusa tʼan, tsiʼ yotsa jiñi mulil yicʼot jiñi chʌmel. Jesús juntiquilʌch toj bʌ wiñic jaʼel. Jin chaʼan, ¿chuqui tsaʼ mejli i mel Jesús?
5. Jiñi i tojol laj coltʌntel jumpʼejlʌch lac majtan
Jiñi i yamigojob Jehová miʼ qʼuelob jiñi i tojol coltʌntel bajcheʼ jumpʼejl majtañʌl tsaʼ bʌ aqʼuentiyob ti Jehová ti jujuntiquil. Laʼ laj qʼuel jumpʼejl ejemplo, pejcanla Gálatas 2:20 i tem alʌla iliyi:
¿Bajcheʼ miʼ pʌs jiñi apóstol Pablo chaʼan tsiʼ qʼuele jiñi i tojol laj coltʌntel bajcheʼ jumpʼejl majtañʌl tsaʼ bʌ i yʌqʼue Jehová?
Cheʼ bʌ Adán tsiʼ chaʼle mulil, pejtelel jiñi i pʼolbalob yom miʼ chʌmelob jaʼel. Pero Jehová tsiʼ choco tilel i Yalobil ila ti Pañimil chaʼan miʼ chʌmel, i cheʼ jiñi maʼ mejlel ti chumtʌl tiʼ pejtelel ora.
Cheʼ woli a pejcan ili versículo tac, ñopo a ñaʼtan bajcheʼ yubil tsiʼ yubi i bʌ Jehová cheʼ bʌ tsiʼ qʼuele chaʼan woliʼ ñusan wocol i Yalobil. Pejcanla Juan 19:1-7 yicʼot 16-18, i tem alʌla iliyi:
¿Bajcheʼ yubil maʼ wubin a bʌ cheʼ bʌ maʼ ñaʼtan chuqui tsiʼ mele Jehová yicʼot Jesús ti a tojlel?
AN MUʼ BɅ I CʼAJTIBEÑOÑOBLA: «¿Bajcheʼ an i sujmlel cheʼ juntiquil jach wiñic tsaʼ chʌmi chaʼan ti lac pejtelel?».
¿Bajcheʼ mi caj a jacʼ?
TSAʼ BɅ LAJ CɅÑɅ
Come tsaʼ chʌmi Jesús, Jehová miʼ ñusʌbeñonla lac mul i mi lac mejlel ti chumtʌl tiʼ pejtelel ora.
¿Chuqui tsaʼ cʌñʌ?
¿Chucoch tsaʼ chʌmi Jesús?
¿Bajcheʼ tsiʼ locʼsayonla ti mulil yicʼot ti chʌmel jiñi i cuxtʌlel tsaʼ bʌ i yʌcʼʌ Jesús?
¿Bajcheʼ miʼ coltañet cheʼ tsaʼ chʌmi Jesús?
CɅÑɅ YAN TAC BɅ
Qʼuele chucoch jiñi i cuxtʌlel tsaʼ bʌ i yʌcʼʌ Jesús miʼ toj laj coltʌntel.
Qʼuele chuqui yom mi lac mel chaʼan mi laj coltʌntel.
¿Muʼ ba i ñusan Jehová jaʼel jiñi tsʌts tac bʌ mulil?
«Cʼajtiya tac chaʼan bʌ Biblia» (Lac Tsictesʌbentel, 1 i chaʼan mayo, 2013)
Juntiquil wiñic tsiʼ colta i qʼuextan i melbal cheʼ bʌ tsiʼ cʌñʌ chaʼan Jesús tsiʼ yʌcʼʌ i cuxtʌlel ti laj caj. Cʌñʌ jiñi tsaʼ bʌ ujti tiʼ tojlel.
a Jiñi mulil mach jin jach cheʼ mi lac mel mach bʌ weñic, jiñʌch jaʼel cheʼ jiñi lac pusicʼal miʼ ñijcañonla lac mel mach bʌ weñic come tilemonla ti Adán yicʼot Eva.
-