Cʌntesʌntel 8

Colem bʌ winicob ila ti pañimil

CHEʼ anic majqui miʼ tilel ba añet wen chan bʌ muʼto bʌ i tajben i jol i chanlel a wotot, ¿chuqui maʼ wʌl? ¡Chaʼan jiñʌch juntiquil colem bʌ chan bʌ winic! Ti wajali an tsaʼ bʌ jumucʼ ajñiyob ila ti Pañimil cheʼoʼ bʌ winicob bajcheʼ jini. Jini Biblia miʼ pʌs chaʼan i tatob jiñobʌch ángelob ti panchan. Pero ¿bajcheʼ tsaʼ ujti jini?

Yom cʼajal a chaʼan, Satanás jini jontol bʌ ángel jiñʌch tsaʼ bʌ i pʼolo wocol. Yicʼot tsiʼ ñopo i mel chaʼan jini i yángelob Dios miʼ sujtelob ti xjontolil. Ti wiʼil, an ángelob tsaʼ bʌ caji i jacʼbeñob chuqui mi yʌl Satanás. Tsiʼ cʌyʌyob jini eʼtel subebil bʌ i chaʼan Dios chaʼan miʼ melob yaʼ ti panchan. Tsaʼ tiliyob ila ti Pañimil yicʼot tsiʼ chʼʌmʌyob i cuctal cheʼ bajcheʼ winicob ti pañimil. ¿Awujil ba chucoch?

Jini Biblia mi yʌl chaʼan tsiʼ qʼueleyob i tʼojol jax bʌ xʼixicob ila ti Pañimil i tsaʼ caji i mulañob chumtʌl yicʼotob. Jini chaʼan tsaʼ jubiyob tilel i tsiʼ pʌyʌyob jini xʼixicob. Jini Biblia mi yʌl chaʼan mach wenic jini, come Dios tsiʼ mele jini ángelob chaʼan miʼ chumtʌlob yaʼ ti panchan.

Cheʼ bʌ jini ángelob yicʼot i yijñamob tsiʼ yilayob pañimil i yalobil, wen qʼuexelob. Cheʼ bʌ alʌlob to tajol mach wen qʼuexelobic. Pero tsaʼ cajiyob ti colel bʌ colel majlel, yicʼot tsaʼ cajiyob ti ñumen bʌ ñumen pʼʌtʼan majlel, jinto tsaʼ sujtiyob ti colem bʌ winicob.

Ili colem bʌ winicob wen jontolob jax. Chaʼan wen colemob yicʼot wen pʼʌtʌlob, miʼ ticʼlañob winicob xʼixicob. Tsiʼ laj ñopo i xicʼob winicob xʼixicob chaʼan miʼ melob jontolil cheʼ bajcheʼob.

Tsaʼix chʌmi jini Enoc, pero tsaʼ ajni juntiquil winic ila ti Pañimil tsaʼ bʌ i mele chuqui wen. I cʼabaʼ ili winic jiñʌch Noé. Tsiʼ chʌn mele chuqui yom Dios chaʼan miʼ mel.

Jumpʼejl bʌ qʼuin Dios tsiʼ sube Noé chaʼan tsaʼix cʼoti i yorajlel cheʼ mi caj I jisan tiʼ pejtelel jini jontoloʼ bʌ. Pero Dios mi caj i coltan Noé yicʼot i familia yicʼot cabʌl añimal tac. Laʼ laj qʼuel bajcheʼ tsiʼ mele.

Génesis 6:1-8; Judas 6.