CɅNTESɅNTEL 11

Chaʼlen tʼan ti a tijicñʌyel

Romanos 12:11

YOM BɅ MIʼ CɅJÑEL: Chaʼlen tʼan ti a tijicñʌyel chaʼan maʼ ñijcʌbeñob i pusicʼal jiñi woli bʌ i ñʌchʼtañetob.

Chajpan a pusicʼal. Cheʼ bʌ maʼ chajpan a bʌ, wen ñaʼtan chucoch ñuc i cʼʌjñibal jiñi muʼ bʌ caj a pʌs. Wen chajpan muʼ bʌ caj a cʼʌn ti cʌntesa chaʼan maʼ pʌs chaʼan mucʼʌch a ñop jiñi muʼ bʌ caj a wʌl.
Ñaʼtan jiñi muʼ bʌ i ñʌchʼtañetob. Wen ñaʼtan bajcheʼ mi caj i coltan yambʌlob jiñi muʼ bʌ a pejcan o muʼ bʌ caj a pʌs. Ñaʼtan bajcheʼ mi caj a tsictesan chaʼan jiñi muʼ bʌ caj i ñʌchʼtañetob miʼ ñumen cʼuxbiñob chuqui tac miʼ cʌñob.
Aqʼueñob i chumtan woli bʌ wʌl. Chaʼlen tʼan yicʼot a chʼejlel. Ñijcan a cʼʌb, a jol o a ñiʼ a wut cheʼ bajcheʼ ñʌmʌlet chaʼan maʼ pʌs bajcheʼ yubil maʼ wubin.

Yom tsajalet chaʼan maʼañic maʼ yʌmben i pensar jiñi woli bʌ i ñʌchʼtañetob cheʼ junsujm jach bajcheʼ maʼ ñijcan a cʼʌb o a ñiʼ a wut. Yom an i sujmlel bajcheʼ maʼ ñijcan a cʼʌb. Ñumen pʌsʌ a tijicñʌyel cheʼ bʌ woli a tsictesan ñuc tac bʌ i cʼʌjñibal yicʼot cheʼ bʌ woli a suben yambʌlob chuqui yom miʼ melob. Mach yomic cʌlʌx tijicñayet tiʼ pejtelel jiñi a discurso chaʼan maʼañic maʼ lujbʼesan jiñi woli bʌ i ñʌchʼtañetob.