Jiñi xpejcaya juñob miʼ cʼajtibeñob i bʌ
¿Jala mi caj laj cʌy lac sub jiñi wen tʼan?
Jesús tsiʼ yʌlʌ: «Jiñi wen tʼan chaʼan bʌ Yumʌntel mi caj i sujbel tiʼ pejtelel pañimil chaʼan miʼ yubiñob jiñi tejclum tac, cheʼ jiñi mi caj i tilel jiñi i jilibal» (Mat. 24:14). Jiñi tʼan «i jilibal» muʼ bʌ i tilel ti ili versículo yicʼot ti versículo 6, tsaʼ cʼʌjñi jumpʼejl tʼan am bʌ ti griego woli bʌ (choncol bʌ) i taj ti tʼan cheʼ baʼ ora mi caj i jisʌntel i pañimil Satanás ti Armagedón (Apoc. 16:14, 16). Ili miʼ pʌsbeñonla chaʼan mi caj lac bej sub jiñi wen tʼan cʼʌlʌl cheʼ bʌ tsʼitaʼ jachix yom chaʼan miʼ tejchel Armagedón. Iliyi jiñʌch jumpʼejl cambio chaʼan bajcheʼ mi lac chʼʌmben i sujm ti ñaxan.
Ti ñaxan mi lac ñaʼtan chaʼan mi caj laj cʌy lac sub jiñi wen tʼan cheʼ bʌ miʼ jisʌntel jiñi Ñuc bʌ Babilonia yicʼot cheʼ miʼ tejchel jiñi ñuc bʌ wocol (Apoc. 17:3, 5, 15, 16). Tsaʼ lac ñaʼta chaʼan cheʼ baʼ ora miʼ tejchel jiñi ñuc bʌ wocol maʼañix mi caj i coltʌntelob lac piʼʌlob (Is. 61:2). I chaʼan jin jach mi caj i coltʌntelob jiñi xucʼul bʌ tsaʼ ajñiyob ti Jehová cheʼ bʌ maxto tejchi jiñi ñuc bʌ wocol. Tsaʼ lac ñaʼta jaʼel chaʼan cheʼ mi caj i yujtel cheʼ bajcheʼ jiñi judíojob cuxul bʌ tsaʼ cʌleyob cheʼ bʌ tsaʼ jisʌnti Jerusalén cheʼ ti jabil 607 come miʼ chʼujutesañob Jehová yicʼot miʼ tsʼaʼleñob jiñi jontolil. Ili judíojob lajal bajcheʼ tsaʼ aqʼuentiyob i marcajlel chaʼan cuxul miʼ yajñelob (Ez. 5:11; 9:4). Pero iliyi maʼañic miʼ taj i bʌ yicʼot muʼ bʌ i yʌl Mateo 24:14, come jiñi tsaʼ bʌ i yʌlʌ Jesús miʼ yʌcʼ ti ñaʼtʌntel chaʼan tajol anto lac piʼʌlob muʼ bʌ caj i jacʼob jiñi wen tʼan cheʼ bʌ tsʼitaʼ jachix yom miʼ tejchel jiñi Armagedón.
Come tsaʼix laj qʼuexta bajcheʼ mi lac chʼʌmben i sujm Mateo 24:14, yom mi laj qʼuextan jaʼel bajcheʼ mi lac chʼʌmben i sujm Apocalipsis 16:21, muʼ bʌ i taj ti tʼan ñuqui tuñijaʼ. Cheʼ bʌ mi lac wen qʼuel chuqui miʼ yʌl ili chaʼpʼejl texto, mi laj qʼuel chaʼan lajal jach chuqui woli (yʌquel) i taj ti tʼan. ¿Chucoch mi la cʌl bajcheʼ ili? Come mach junlajalic bajcheʼ mi caj i jacʼob jiñi wen tʼan jiñi lac piʼʌlob. Cheʼ bajcheʼ tsiʼ yʌlʌ Pablo, tiʼ tojlel jiñi «majlel bʌ mucʼob i taj i coltʌntel», jiñi wen tʼan «i yujtsʼilʌch cuxtʌlel». Pero tiʼ tojlel jiñi i contrajob Dios, jiñi wen tʼan muʼ bʌ lac sub lajalʌch bajcheʼ i yujtsʼil chʌmel (2 Cor. 2:15, 16). Maʼañic miʼ mulañob jiñi muʼ bʌ lac sub come mi la cʌcʼ ti cʌñol chaʼan jontolob (mañajob), añob tiʼ cʼʌb Satanás i tsʼitaʼ jachix yom chaʼan miʼ jisʌntelob (Juan 7:7; 1 Juan 2:17; 5:19).
Cheʼ jaʼel, Apocalipsis 16:21 miʼ yʌl chaʼan mi caj i yajlel «ñuqui tuñijaʼ». Tajol ili yom i yʌl chaʼan cheʼ bʌ wolix jiñi ñuc bʌ wocol muʼto caj i ñumen sujbel jiñi wen tʼan. Cheʼ bajcheʼ jiñi muʼto caj i ñumen cʌjñel i cʼabaʼ Jehová (Ez. 39:7). ¿Yom ba i yʌl iliyi chaʼan anto muʼ bʌ caj i jacʼob jiñi wen tʼan cheʼ miʼ jisʌntel jiñi Ñuc bʌ Babilonia? Tajol an mucʼʌch bʌ caj i jacʼob. Tajol an muʼ bʌ caj i cʼajtesañob chaʼan jiñi i testigojob Jehová añix ora cajel i subob ñumel chaʼan mi caj i jisʌntel jiñi mach tac bʌ i sujmic ñopbalʌl.
Jiñʌch tsaʼ bʌ ujti ti Egipto cheʼ bʌ tsaʼ ñumi jiñi 10 wocol. Cheʼ bʌ Jehová tsiʼ jisa «pejtel jini diosteʼ tac i chaʼan egiptojob», cabʌl «winicob xʼixicob» mach bʌ israelitajobic tsaʼ loqʼuiyob majlel yicʼot jiñi i tejclum Jehová (Éx. 12:12, 37, 38). Tajol ili mach bʌ israelitajobic tsaʼ caji i mulan i chʼujutesañob Jehová cheʼ bʌ tsiʼ qʼueleyob chaʼan tsaʼʌch tsʼʌctiyi jiñi 10 wocol tsaʼ bʌ i yʌlʌ Moisés.
Jiñi lac piʼʌlob muʼ bʌ i tech i chʼujutesañob Jehová cheʼ bʌ miʼ jisʌntel jiñi Ñuc bʌ Babilonia mi caj i mejlel i coltañob jiñi yerañob Cristo, cheʼ bajcheʼ jiñi miʼ cʼotelob ti cʌjñel bajcheʼ tʌñʌmeʼ (Mat. 25:34-36, 40). Pero cojach mi caj i mejlel i melob iliyi cheʼ bʌ tsʼitaʼ jachix yom chaʼan miʼ tejchel jiñi Armagedón, cheʼ bʌ jiñi ungidojob cʌylemobto bʌ ila ti lum miʼ majlelob ti panchan.
Ili tsaʼ bʌ qʼuextʌyi chaʼan bajcheʼ mi lac ñaʼtan ti ñaxan, miʼ pʌs i cʼuxbiya yicʼot i pʼuntaya Jehová «come mach yomic chaʼan mi juntiquilic miʼ jisʌntel, yom chaʼan pejtelel lac piʼʌlob miʼ chaʼ ñaʼtañob i bʌ» (2 Ped. 3:9).