Aimar Nigguegala, Anmar Emar Ai Gala Guer Gebe

Ai nigguegala sabed anmar nigguer gebed. Bur bule be Jehová siggi ibmar durdagsundibe, bur bule egi be sabed nigguoe, geb bur bule ega be arbabie guoe. We be imaggoe Jesucristo sordagala be gubie gumogadi (Mateo 28:19). Jehová gine sunmagmaladi na gwenadgan yobi gumala, dule weligwar iddomaladi. Be aamarbali aggasundibe, Babdummad bogwa be aigwale gudigusale na sadegua. ¿Ibu be saer gebsunna wemarbali be naguegala?

Babdummad sabe na be oyoge e igarmar bali ibsaed gine. “Ar anmar Babdummad-saber, anmar e-igar-mamaidba nanaed, ar ade e-igar-mamaid duddusursulid” (1 Juan 5:3).

Be ibmar durdagnaidi eba be imagbali. Jesús ibmar soggwen sogsadi anmar bendagge mag we ibmar iddo guegala. Dule wargwen binsaed niggaa daedi na neg sobsa aggwa birgi, geb dule wargwen binsaed suli daeddina na neg sobsa uggub birgine. Diiburwa dummad gornonigua, neg aggwa birgi sobar siidi aggar gussuli, auggine neg uggub birgi sobar siiddina ayarisa. Jesús sogsa dulemar e ibmar odurdagged iddosdibe geb eba daele dule binsaed niggaa daed aggwa birgi neg sobsad yobi guye. Anba sogsa bali e ibmar odurdagged iddosdibe geb eba ibmar imagsulile dule binsaed sulid uggub birgi neg sobsad yobi guye. ¿Biddi dule warbogwad yobi be gubie? (Mateo 7:24-27.)

Babdummadga be soge an be garbii arbamogoye. Nabir sun be Jehová gala soge ese goled gine, E ibmar abeged be imagdii sabiye na sadegua. Babdummad ibmar abeged anmar imagsundibe, anmar na oyogoe Jesucristo e sordamoye (Mateo 11:29).

Be bautizar sao. “Be bautizar sae geb be isgudiid be enugge e nug odummoed gine” (Hechos 22:16, NM).

Belabela Babdummad gala be arbae. “Ibu ibmar be imagnai sogele, belabela be egi alamaggo Jehová gala imagnai yobi, dulemar gala imagnasuli yobi” (Colosenses 3: 23, NM).