Nabbi ibmar egislegoed

Igar iddoged bulaled gualir bur dulemar bautizar imasdamalad. Bautismo igargi sunmaggoedi, bautizar samaloedga sogoed wis gwisgumarye, we ibmar ese egisoed:

1. ¿Bar be ibmar isgana imaggedgi binsasuli, bad be Jehovaga sogsabali an begarbi arbadi gumogoye, be bensurbali Jesucristobi unnila anmar bendaggoedi?

2. ¿Mag be iddoge, be bautizar imaggoedbali dulemar dagmaloed emidi be Jehovagi sunmaggedga gusmoga, be Jehova neggwebur sordaga gusmoga?

“Eyeye” sogmaloedba bautizar imagsoggarmaladi soggwissiyob gumaloed, Jesus an anar bugwisad an bensurye, bad an Jehovaga sogsabarye, an begarbi arbadi gumogoye (Rom. 10:9, 10). We ibmar dodogaggwa daglegedsursoggua, eyeye soged idu nueggwa binsamalo, Jehovas gormarbalo, mer yogsaar eyeye sogega.

¿Bad be Jehovaga sogsa unnila an begarbi arbadi gumogoye, bur begar inso an ibmar imagdaoye?

¿Bad be guaggwagwa bautizar saega?

¿Bautizar imagsoggalir be mor igiid yooe? (1 Tim. 2:9, 10; Juan 15:19; Filip. 1:10).

Dogdar mor daddara yoed abelesulid, mag daglegega, be, Bab Dummad sordamoga. Doggus mor dassag yoed abelesurbalid, mor ibmar narmaggagwaled yoed abelesurbalid. Degsoggu, mor nued yoed abeleged.

¿Igi be daosuli bautizar imagsoggalir? (Luc. 3:21, 22).

Ebbenne Jesus bautizar imasayobi emi ibagi bautizar imaglemogad. Jesus wisinsoggua bautizar saed igar dodoaggwa daglegedsuli, aagala dodoaggwa we ibmar dagsasulid. Degsoggu, be bautizar imagsoggalile, piscinayaggi dodoleged abelesulid, piscinayaggi dommumagnai gued abelesurbalid, mer bautizar saed igar dodoaggwa daglegega. Be bautizar imasar yeer iddogo inigwale, abelesurbalid, be doggus yeer iddogedba yogsaar ibmar imagged, degiile, dodoaggwa daglegoed.

Igar iddogedse nanaed, ¿igi be bendaggoe be nueggwa Jehovaga arbadi guega?

¿Ibig nue abelege be bautizar imasad sorba anba nueggwa Biblia durdagdii gued? ¿Ibig nue abelebali be Bab igargi sunmagged mer indagged?

IDUDIMALADGA

Dule bemarga soggalile an bautizar sabiye, ega sogmalo we gardagi ibmar soglenaid absogoye, pagina 12-49 se; absobaloye, “Bautizar sabimaladse ibmar egislegoed” (pagina 7). Aagine soglenaid, we dule bemarbo sunmagged iduale ibu ibmar imagged abelegoe. Soglenabalid, we dule bemarbo sunmaggalile, cuadernogi na ibmar narmasad nabir dagsi guye, nabir garda argaar gani sigbarye. Bemarbo sunmagged idu, dule baid ebo we garda durdagsulir aggarsulid.

Dule bautizar sabiye soggalile, idudimaladga igar amidiid owisolegoed. Dule bela we gardagi “Bautizar sabimaladse ibmar egislegoed” naid absosye sogele, idudimaladga igar amidiid we dulese egisoed, bad be Jehovaga sogsasogeye, an begarbi arbadi gumogoye. Eyeye ega sogele, idudimalad warbo amigoed, we dulebo sunmagmalaga. Parte soggwen soggwen imagmaloye ga sogoed. Anba bemar wissulile sana igar iddoged bulaled guoe, aggarsulid dule bautizar sabiedbo bemar gwae sunmagger.

Parte soggwen nabir wassi irgwen imagleged, auggi, aggarsurbalid wassi obidsa imagbalir. Nue abeleged bautizar sabiedbo sunmaglesoggalile, Babse gorleged, bergusale, Babse gorlebalid. Auggi, gwae gwae gubuggwa gueddi abelesulid. Beg soglesale, bee be ebo sunmaggoye, yog igar amiar sao gwae ebo sunmaggega.

Buggidar dulemar bautizar sabimalale bur nuediled mer bular wemarbo sunmagged. Bebo abin sunmagsiile bur nuedid, degiile be mag daggoed bule we dule nue Jehova igar mag iddoge, degiile, mag be dagbaloed we dule nabir bautizar saodibe, wis nabbi odurdagleged abeledibe. Bebo abin sisundibe we dule bingesur beg ibmar sogdemogoed. Abirgin nigmaladbodi nabir ebobersii sunmagleged.

Ome bautizar sabierdina nuedsulid gwenagan idudiidi ebo abin sunmagsii gued. Degiile, sun nabir baid gwenagan idudimogadga soged, e bardagnaye, idudimalad bendaggedgi arbadiidgardibe, auggi iduaggwa bin daggweler gebed ibu igargi sunmaglegoe.

Bemar yaurgi gwenagan idudimalad merbasulile, idudimalad bendaggedgi arbadimalad nabir bemar bendasmogaled, parte 1 imaggega, “Bibliagi ibmar durdaglesad”. Parte 2 gi sunmaglesoggalirdina, “Cristo sordagan ibmar imaggedgi” adi bur gwenagan idudimalad imagged abeleged. Bemar yaurgi gwenagan idumalad merbasulile, nabir bemar gwenad circuitogi arbaedga soged, baidsig gwenagan idudimalad bemar bendagdagega.

Mimmi bautizar sabiedirdina, e sergan anmar sordamogale, ebo sunmaglealile, nabir e sergan iddosii gumarmogad. Sulirdina, gwenagan idudimalad ebogwa mimmibo sunmagmaloed (walagwendibe, idudimalad bendaggedgi arbaeddibe, auggi, bin daglegweler gebed ibu igargi sunmaglegoe).

Idudimalad daggosurmalad, we dule bela Bibliagi ibmar soglenaid nueggwa wisdibe. Bur dagmaloed, we dule bule Jehova igar binar daglege, Jehova sordaganba igar imagbi dagledibe. Dagmarsundibe anba wis aggusaar Jehova igar iddoge, igar amimaloed nabbi wis odurdaglegega, sorba nabir bautizar saega. Auggi dagmarbarsunibe anba we dule doggus Bab igargi sunmagged binarsuli, anba idudimaladba igar sabisurdabali. Degiirdina, idudimalad na daggoedid wassi irgwen we dulebo sunmagsii guodibe, wis bibbi obinodibe daggega bule nabir we dule bautizar saoe. Auggi, we gardag ibmar soglenaid bela ebo daglegeddi daglegoed.

Bautizar sabiedbo sunmaglesad sorbali, idudimalad we dulebo sunmasmaladi, na igar iddomaloed daggega bule nabir we dule bautizar saoe. Dagmarbaloed, gebbe Bab igargi sunmaded aggar igi gudigusa, auggi, mer iemarbalo, bela dulemar emarbisurbalid. Bur dagged abeleged, bule nue dule Jehovaga arbabimo daglege, bule nue Jehova igarmar mag iddobali. Bemala, dulemar bautizar sabimalad bendaggoed, nabir nueggwa Jehovaga arbadi gumarmogaga.

Sorba, gwenagan idudiid, wargwendibe, ebodibe dule bautizar sabiedbo sunmaggoed, ega sogega nabir bautizar saodibe, surdibe. Nabir bautizar saoele idudimalad we dulebo, we gardagi “Nabbi ibmar egislegoed absomaloed” (pagina 51-53 se). Dule anba yoo libro ¡Nabir be sadegu yeer iddodi gusaled! durdagnaid obelogele, ega sogmalo bautizar sasad sorba we libromar durdaggedse imaggoye. Ega sogmarbalo, ibu ibagi be bautizar imaggoe, aa iba, Idudimalad walig be garda maidgi narmaglegoye. Ega sogmarbalo, nabir Jehova sordagan igar nigga arbabuggwa guegala, nabir be bendagmarbaligala be nueggwa Jehovaga arbadi gumogaga, idudimalad bes ibmar wegimalad egisdamaloye: be nuga, bia be mai, ingu be gwalulesa, ibu gayaba be sunmagge. Ega sogmarbalo, be ibmar sogoedi, jw.org gi weyob soglenaidba imaglegoye, “Be ibmar narmasad igi imaglegoe”. Unnila diez minutossaar nabbi ebo sunmaglegoed.

Birga gwengus dule bautizar imasadgine, idudimalad gannar we dulebo sunmagmarbaloed, ega wis binsaed daggega. Sordaganga igar amidiid sii gued abelemogoed. Mimmirdina, e sergan sii gued abelemogoed, e sergan anmar sordar. Yeer iddogedgi ebo sunmagbuggwa gumalo. Ega sogmalo, Jehova igar durdagged mer indaggoye, Biblia absoged mer indagbaloye, gwenagan buraggwa Bab igar durdagged mer indagbaloye, igar iddogedse nanaed mer indagbaloye, iddoged irba Bab igargi sunmagdabaloye (Efes. 5:15, 16). Anba yoo libro Bibliagine durdagged obelogele, yoo anba libro Bab be sabgumai guega durdagbalile, bemar igar amioed dule wargwen we librogi odurdaggega. Ibu ibmar nued imagnai bemar dagge bur aa ibmargi ega sunmagmalo. Be igar nued imagnaye ega sogmalo.