Parte 2 cristo sordagan ibmar imagged

Bibliag be durdasad ibu imagged Jehova be abemai. Be durdasbalid, be Jehova sogedba igar imagbiele ibu be imagger gebe. Aagala, bad be na be daed ogwasmogad. Emidi be Jehova sogedba igar imagdimosoggua, nabir be dulemarga Jehova igargi sunmagdii gumogoed.

Weg ibmar soglenaid be bendaggoed, mer be iegega, igi Jehova igarmar mamai; be nue Jehova sordaga gubimogale, ibu be imagmogar gebe. Wegi ibmar durdaglegoed be bendagbaloed be nueggwa Jehovaga arbadii guega, nabir be Jehova nug odummodi gumogaga (2 Cor. 1:12; 1 Tim. 1:19; 1 Ped. 3:16, 21).

Bad be we ibmar wisgussoggua, emidi be Jehova sordaganba nagubimogar gebed, Jehova gobiernob be igar imagbibalir gebed. Nabir be Jehova sogedba igar imagmogagala, urba ibmar soglenanaid be bendaggoed nueggwa be mag iddo guega, igi ibmar imaglegoye Jehova igar mesisa: anmar yaurgi, neguyagi, gobiernomar ibmar egissalir. Wegine be daggoed igi Jehova na e sordagan odurdagmai e sogedba nueggwa igar imagdi gumalaga. Degsoggu, emidi be bar igar iddogedse iggubisur gudamogoed, igar iddogedse nadele, be ibmar sogbidamogoed.

Wegine beg soglebaloed ibigala nii irba Bab igargi sunmagged abelege, ibigala dulemarga Jehova ibmar nuegan imaggoed soged abelemoga (Mat. 24:14; 28:19, 20). Weg ibmar soglenaid be bendagbaloed mer be iegega, ibigala nue bautizar salege, ibigala Jehovaga soged abelebali an begarbi arbadi guoye. Mer iego, be ega arbasoggalidbali Jehova bebali yeer iddomamogad.

1. ¿Doamarbi unnila nabir na niggumarye Bab Dummad sogmai? ¿Ibu ularbi unnila dulemar nabir na meddemarye Bibliagi soglenai?

   • “¿Ar bemarde Bab Dummad gardagi absodisurmarsi? Gebe saglagi Bab Dummad we nabneg nasiggargu, massered ome ebo abirgunagwar ogwisnoniggid. [...] Aa ulale, massered ome niggusale, e babgi bangudoed, e nangi bangudoed. Geb massered e ome ebo garmagdii guoed. Ebogwadi, san wargwennagwadga gunoniggoed”. “Dule unnila e ome e diggarba nosardi, nabir medded. Ar degisulirdi, we massered ome baid niggusale, ome diggarba neg sissigi diggarba yolediid. Ar doa dule, ome melleded niggusale, we dule, neg sissigi yoledimogad” (Mat. 19:4-6, 9).

2. Dule abirgin niggubiele, ¿ibigala gardagi na niggumalar gebe? Be abirgin niggale, ¿bule nue registro civilgi be garda madibe?

   • “Gwenadganga gannar be sogo, insamaloye: Dule neg semamaid urbaligwa be nanamaloye” (Tito 3:1).

   • “Bela ome niggued igargi binsaed nigga nanamalo [...]. Ar dulemar neg sissigi yoledimaladi, abirgin nigga diggarba yolemaladi, Bab Dummadse sabsur odurdaglegoed” (Heb. 13:4).

3. Neguyagi ¿be ibu imagged abelemoga?

   • “Massi, be bab be unaed nue be iddogo. Be nan be odurdaggedba be dao” (Prov. 1:​8).

   • “Sui, ome e dummadga gued. Deyobi, Cristo na eba nanaimalad e dummadga gumogad”. “Massergan be ome na be sabgumar” (Efes. 5:23, 25).

   • “Babgan bemarmoga, mer binsa be mimmigan ourwed be sao. [...] Bur be Bab Dummad [...] igar nuedgi unadii be imaggo” (Efes. 6:4).

   • “Mimmigan be babganba bela be ibsamalo, ar deyob be damalale, Bab Dummad yeer iddodaed” (Col. 3:20).

   • “Omegan bemar be sui urbaligwa be nanamar” (1 Ped. 3:1).

4. ¿Doa dula anmar sediidi?

   • “[Bab Dummad] bunnoged ugmaid, degi, belagwabba ibmar ugmaibalid” (Gus. 17:25, 28).

5. ¿Ibigar anmar emar oburgwed abelesuli? ¿Ibiga goemar osuloged abelesurbali?

   • “Massergan urwenaidgi ome gurgin niggad nagbi sasale, [...] ome burgwisar dule oburgwilemogoed” (Éx. 21:22, 23).

   • “An sabbi duggugi maigua, bedi an dagsad. Anba yoo an we nabnegse agdedage, birga bigwa an dula gudiguoe, bela baddo be gardagi narmaggar maid” (Sal. 139:16).

   • “Jehova sae dagged, [...] dule binsaarsunna aimar gindagged” (Prov. 6:​16, 17).

6. ¿Igi mer abe imagmaloye Jehova sogmai?

   • “Ibmar gammu gaar oburgwilesmalad melle gunmarbalo, degi, melle ibmar abebi gunmarbalo” (Gus. 15:29).

7. ¿Ibigar anmar na sordagan sabgued abelege?

   • “Igar binid an bemarga ugmarsunnad. Na be mussub mussub sabgumalo. Ar igi an be sabgusmarmoga, deyob be mussub mussub sabgumarmogo. Ar na be mussub mussub nue sabgumalale, bela dulemar mag be dagmaloed, bemar an sabbingan gumalad” (Juan 13:34, 35).

8. a) Abar bonigan gadi gwagsoggua, dule boni degiid niggale ¿ibiga nuedsuli emar wagar ued, emargi maadda nagubalid? b)  ¿Ibiga isdar iddogedsurbali dule e negse e sedbisulir? c) Be na wissundibe ebbenne be galagwensur gudigusadba sun be boni amisale, ¿ibiga nuedile abirgin niggued idu be abe sued? d) Be na wissundibe boni gadi gwaged be nigga, ¿ibiga nuedile be bautizar saed idu gwenadgan idudimalad owisoged?

   • “Na be mussub mussub sabgued oyodi gumar. [...] Ar igi na be san sabgue, deyobi dule baid be sabgumogoed. Ar be dule baid sabele, geg egi be ibmar isgana imagged” (Rom. 13:8-10).

   • “Mer be na be sanginbi binsamalo, gwenadgan baigangi be binsamogoed” (Filip. 2:4).

9. ¿Ibig Jehova abege dule wis aggar be imasale, be ibmar ies imagged?

   • “Ibmar aggalar, baisur iddoged be imagmar. Ar dule wargwen dule baidgi aggar ibmar sogele, igi bar saye be sogmar. Ar igi Cristo be isgued bega osulosa, deyobi, bemar na be mussub mussub igi barsaye sogmarmo” (Col. 3:13).

10. Gwenad wargwen be ogaggansasdibe, be yardasdibe, ¿ibu be imaggoe?

    • “Be gwenad begi nosale, be ese nao. Unnila bebo abbinni siidgi nue ega be sogo, nue be angi nosye. Ar be gwenad nabir be iddosale, be gwenad be aiga gannar gunoniggoed. Ar be gwenad be iddosulile, dule wargwendibe, dule warbodibe, beba be nidoed, adi, bela be ibmar sogoed, wemar be iddomarmogoed. Ar be gwenad wemar wagab be iddosulile, geb bela Jesusba nanaimalad abargi ega be ibmar sogoed. Ar be gwenad anba aamar abargi be iddosulile, dule Bab Dummad wissurmaladyob be we gwenad dagsunnoed” (Mat. 18:15-17).

11. ¿Wegi daed Jehova igi dagge?

    • ▪ Neg sissigi galagwensur gudigued

    • ▪ Nussumarse goled

    • ▪ Omegiid

    • ▪ Addursaed

    • ▪ Manibin dodoged

    • ▪ Mumgued

    • “Dulemar yoo abirgin niggu neg sissigi yoledimalad, ibmar sobarmalad e bab dummadga imagmalad, [...] massergan na massered e omega imagmalad, omegan na ome e masseredga imagmalad. Addursamalad, dogdar maniginbi binsamalad, mumguerbamalad, gadi dulemar uggabsamalad, dule yardaggar mani addursamalad. Dulemar wegidamalad, Bab Dummad e neg dagmaidse gwen dogosurmalad” (1 Cor. 6:9, 10).

12. Be neg sissigi galagwensur gudiguedgi binsaalile, ¿ibu be imaggoe?

    • “Neg sissigi yolegedgi be bangumarsun” (1 Cor. 6:18).

13. ¿Ibiga nuedsuli doctor sogedbarsuli yogsaar inamar ebuged?

    • “Ib durgan Bab Dummadga ogummaggar uglegedyob na be san gudiid, ega be ugmar, be san swilidiggidgi ega be ugmar. [...] Dulemar Bab wissurmalad daedba mer be damar. Agga bur bemar be binsaed gwagmaidba be daed be ogwamai imagmar, adi bemar mag daggega, Bab Dummad [...] igi ibmar abemai” (Rom. 12:1, 2).

14. ¿Ibu ibmar imagged Jehova anmar abesuli?

    • “Melle, dule, nermar igarba, dule ina isganagi arbamalad igarba, ibmar yoo guoed sogmalad igarba, niamar igargi nanamaladba, ibmar imagdii gumalo. [...] Melle ibmar burbaled oyoged duleg guo, melle dule irwa burba isganase goledga guo, melle burgwarmaladse idagged dulega guo” (Deut. 18:10, 11).

15. Dule ibmar isgana imasar mer Jehova igargi banguegala, ¿ibu imagger gebe?

    • “An isgued na bega barsognoniggid, gwen an begi an isgued oduggussulid. Weyob an sogsad: Emi, Bab Jehovaga an isgued an barsogoye” (Sal. 32:5).

    • “¿Ar bemar abargi dule uelegele? Jesusba nanaimalad e idudimaladse be gole, adi, aamar Bab Dummadse ega golega, [...] Bab nuggi ega olivo gwallu magmalagar. [...] Bab Dummadse goled dule uelemaid nudaggoed. [...] Ar dule isgusale e isgued ega elilenoniggoed, isgussuliyob gunoniggoed” (Sant. 5:14, 15).

16. Be iddossundibe gwenad wargwen ibmar isgana imasye, ¿ibu be imaggoe?

    • “Dule gwensagse gorlenoniggile, be ibmar dagsad, be ibmar iddosad sogdaye. Ar we dule yabba sogdagele, we dule, dummad nosad, degisoggu, sabsur odurdagleger gebed” (Lev. 5:1).

17. Anmar sorda wargwen onolesale, ¿igi be aa dule imaggoe?

    • “Dule wargwen [...] Jesusba naiye sogdiid, degidde, dule neg sissigi yolediid, maniginbi binsadiid, [...] gadi gaggan berbeged, gadi mumgued, gadi emar yardaggar addursaed, aamar dulemarba mer be aggamarye” (1 Cor. 5:11).

    • “Dule wargwen be negse daniggile, degi, we igar maidyob be odurdagdanisulile, mer be abingao, [...] mer ega be sogbalo, wese be noniggid nuedye” (2 Juan 10).

18. ¿Ibig anmar, dulemar gadi Jehova igar binarmaladba aggaed abelege?

    • “Dule, dule binsaed [...] niggadba aggaele, binsaed [...] nigga gumogoed. Dule, dule binsaedsulidba aggaele, na duggin boni amied” (Prov. 13:20).

    • “Mer be yardaglemar: Dulemar nuegan, dulemar isganaba aggaele, isguddamalad” (1 Cor. 15:33).

19. ¿Ibigar anmardi politica igarba aggasuli?

    • “Ar wemarde we nabnegginedsurmalad, ar igi an we nabnegginedsurmoga” (Juan 17:16).

20. ¿Ibig dummaganba igar imagged abelege?

    • “Bela dulemar dummagan neg dagmamaidba nanae wilubmalad. Ar ade, Bab Dummad belagwabba na dummagan mesed. Ar dummagan neg dagmamaidi, Bab Dummad sogedba mamaid” (Rom. 13:1).

21. Dulemar igar mesed Bab igargi yolegele, ¿doab bur be igar imaggoe?

    • “Anmar dulemarba ibsaed iduale, bur Bab Dummad sogedba anmar ibsaer gebed” (Gus. 5:29).

22. ¿Arbaed igiid amied nuedsurye Bibliagi soglenai?

    • “Yar baid baidginmalad, bar abin abin urwosurmalad. Bila onogega, bar guagwar gudi guosurmalad” (Miq. 4:3).

    • “An dulamar, we Babilonia abargi gudiid be nomar. Mer be we isgudiidba galemalaga, mer be we bonimarba wilemogaga, be nomar” (Apoc. 18:4).

23. Anmar dodosoggalir, pelicula dagsoggalirdibe, ¿ibiga Bibliagi igarmar mamaidgi binsaed abelege?

    • “Jehova, dule sabsur emar imagdiidgi wergudiid isdar dagged” (Sal. 11:5).

    • “Ibmar isgana sae be dagmar, unnila ibmar nuedbarbi be nanamar” (Rom. 12:​9).

    • “Gwenadgan, bela ibmar nabbiragwadgi, bela nug nued nigguedgi, bela igar inniggigwadgi, bela ibmar swilidiggidgi, bela sabguedgi, degi, bela ibmar nued egi soglegedgi be binsamala. Degine, bela igar nued mamaidgi, degi, egi nabir nug odummolegedgi be binsamala” (Filip. 4:8).

24. ¿Ibig anmardi bamalad iglesiamarse nanasuli, onmagged negsedibe?

    • “Ar bemar geg Bab [...] nog gobnai, degi, nia nog gobnai gued” (1 Cor. 10:21).

    • Jehova soged, “ibmar isgana mer ebumalo, geb degiir an be abingamaloed” (2 Cor. 6:17).

25. ¿Igi be wisguoe iba soggwen onolealir nabir be eba ibmar imasmogardibe?

    • “Agga e dulesurmaladba abburudmalad, aa ibmar imagmaladba aggadmalad. Dule baigan e bab dummagan e nug odummodmalad. [...] We ibmar egi agbinnonisunnad” (Sal. 106:35, 36).

    • “Dule burgwismaladdina bar ibmar abemaisurmalad” (Ecl. 9:5).

    • “Ar wemarde we nabnegginedsurmalad, ar igi an we nabnegginedsurmoga” (Juan 17:16).

    • “Ar bemar we ibmar isgana imagdii gusmalad: Be abganagi galagwensuli nisaed, ibmar isgana imaggedbina soged, mumguedginbi nanaed, agumaggar iba onoged, bular galagwensuli yeer iddo[ged]” (1 Ped. 4:3).

26. ¿Igi be nabir wisgusale, gwaluleged iba onoged nueddibe?

    • “Aa ibabbaagwadgi, Faraon gwalulesad iba noniggid [...]. Faraon, e ibase nonimalad asabin, ega nog dagged e dummad mellesiid sedagega, degi, madu sobed e dummad mellesiid sedagega imagsad. Faraon, nog dagged e dummad gannar e arbaedgi odosad. [...] Madu sobeddi sabbigi gammu gaale oburgwisad” (Gén. 40:20-22).

    • “Herodes gwalulesad ibagi iba ononanaigua, Herodias e sisgwa emar abargi dodosgua, Herodes nue yeer dagsa gusad. [...] Herodesde bunagwaga sogdesunnad: “[...] Ar ibu be anse egisbie, an bega uggoed.” Geb aa bunagwade, e nan ega sogedba Herodesga sogded: Diigi dule oged Juanye nugad e nono baddegi be anga udaye. [...] Herodes, [...] Juan esgaryagi mellesiid e duggar egwanega igar ugsasunnad” (Mat. 14:6-8, 10).

27. ¿Ibigala gwenagan idudimaladba igar imagged abelege?

    • “Idudimalad [...] bega sunmagmaladba be uaya nigga damar. [...] Ar ade, igi be aggwismala, aagi Bab Dummadga sunmaggwissi gumaloed. [...] Ar bemar dummagan buggib iddo imaggele, bemarga ib nuedga guosurmalad” (Heb. 13:17).

28. ¿Ibigar nue abelege be na be gwenagan buragwa Biblia absoged, nueggwa Biblia durdagbalid?

    • “We dule Bab Jehova igar maidgi bur wergudisunnad. Aa igargi, muddiggidbali, ibginedbali, egi binsadisunnad. We dule, igi sabbi diwar naba aramaggwisdae, e iba sogedba sanmagdedae, deyobi gued. Bela na e ibmar imagged ega nueganbi naddaed” (Sal. 1:​2, 3).

29. ¿Ibigar be igar iddogedse nabidamoga? ¿Ibig be igar iddogedse nader ibmar sogbidamoga?

    • “An gwenadganga an begi sunmaggoed. Dulemar onmagged abargi an be nug odummogoed” (Sal. 22:22).

    • “Igi anmar saer gebe, adi, mussub mussub na gaddig sabgumalagar [...]. Melle dulemar baigan damaladyobi, bular onmagsuli be gumalo. [...] Bab Dummad ibagan warmagdani be daggarmalar, bur bule be onmagbuggwa gumalo” (Heb. 10:​24, 25).

30. ¿Ibu arbaed Jesus anmarga ugsa?

    • “Bela dulemar yar baid baidgi buggwamalad an sabbinganga gued be imagnamar, [...] [bautizar] imagnamar. An bemar odurdagsadba nue nanamaloye be aamar odurdaggo” (Mat. 28:​19, 20).

31. ¿Igi iddogedgi anmar egala ibmar ugged Jehova anmar abege? ¿Igi iddogedgi gwenagan bendagged anmar abebali?

    • “Be ibmar niggad Bab Jehovaga uggedgi Bab Jehova nug be odummoge” (Prov. 3:9).

    • “Mer be dule ise bega sogaledgi ibmar uggo. Ar ade, Bab Dummad dule weligwar ibmar ugged yeer dagdaed” (2 Cor. 9:7).

32. ¿Igi dulemar anmar imagdamaloe?

    • “Dulemar igar inniggigwadbina baregilledimalad, aamargi nued binsalesad. Ar ade, Bab Dummad e neg dagmaid aamargadid. Dulemar an nug ular be issoarmalar, be bareginnarmalar, degi, galagwensuli binsa gaggansaar begi sunmaggarmalar, bemargi nued binsalesad. Bemar yeer iddomar, wergumar [...]. Ar aayobi, Bab Dummad gaya burba barsogmalad ebbenne bemar idu baregillesmarmogad” (Mat. 5:10-12).

33. Jehova sordaga guedga bautizar saedi, ¿ibigar igar nuedi?

    • “An be gaya burba iddoargua, yeer iddo an imagsad, ar an begadga gued” (Jer. 15:16).