Ӗҫлӗ территорире ырӑ хыпар сарма ан хӑра
1. Ӗҫлӗ территорире ырӑ хыпар сарас шухӑш хӑратать пулсан мӗншӗн алла усмалла мар?
1 Ҫынсем ӗҫлекен вырӑнсенче ырӑ хыпар сарас шухӑш сана хӑратать-и? Ҫапла пулсан ална ан ус, вӗт Павел апостолӑн та, хӑюллӑ та харсӑр ӗҫлекенӗн, ырӑ хыпар сармашкӑн хӑюланмалла пулнӑ (1 Фес. 2:2). Эпир анлӑ сарӑлнӑ темиҫе ыйтупа усӑллӑ канашсене пӑхса тухӑпӑр.
2. Ҫынсене ӗҫлеме чӑрмантарӑпӑр тесе мӗншӗн шухӑшламалла мар?
2 Ҫынсене ӗҫлеме чӑрмантармӑп-и? Нумай учрежденире килекен ҫынсене пӑхасси-пулӑшасси ӗҫлекенӗн тивӗҫлӗхӗ шутланать, ҫавӑнпа та вӗсем хӑйсенчен мӗн те пулин ыйтасса хатӗр. Ялан тенӗ пекех вӗсем хӑйсене кӑмӑллӑ тытаҫҫӗ, мӗншӗн тесен вӗсем пирӗнте хӑйсен клиенчӗсене кураҫҫӗ. Тирпейлӗ тумлансан, кӑмӑллӑ пулсан, хамӑра йӗркеллӗ тытсан эпир вӗсем хӑйсене пирӗнпе хисеплӗн тытасса кӗтме пултаратпӑр.
3. Тавар илекенсене тарӑхтарас мар тесе мӗн тума пулать?
3 Тавар илекенсем умӗнче калаҫӑва пуҫлама кирлӗ-и? Магазинта хӑҫан ҫын нумай мар, май килсессӗн ҫав вӑхӑта суйласа ил, сӑмахран вӑл уҫӑлнӑ хыҫҫӑн тӳрех кил. Ӗҫлекен патне пыриччен пӑх: ӗҫлӗ-и вӑл е ҫук. Калаҫӑва кӗскен пуҫла.
4. Ӗҫлӗ учрежденисенче ырӑ хыпар сарнӑ чухне мӗн калама пулать?
4 Мӗн калас? Темиҫе ӗҫлекен пулсан малтан администраторпа калаҫни лайӑхрах. Калама пулать: «Ӗҫлекен ҫынсене килте тытма йывӑр пулнӑран эпир сирӗн пата ӗҫе килтӗмӗр. Эпӗ эсир питӗ ӗҫлӗ пулнине пӗлетӗп, ҫавӑнпа та кӗскен калӑп». Пирӗнтен пирӗн ӗҫе тума укҫа-тенкӗ ӑҫтан килсе тӑнине ыйтмаҫҫӗ пулсан, пире сутӑ тӑвакан вырӑнне ан йышӑнччӑр тесе укҫа-тенке кӑмӑлтан пани ҫинчен асӑнманни аван. Учрежденире мӗн ӗҫ тунине шута илсе ытти ӗҫлекенсемпе калаҫма ирӗк ыйтма пулать. Вӗсене администратора каланӑ сӑмахсенех кала. Ӗҫлекен ӗҫлӗ тесе шутлатӑн пулсан, тата та кӗскерех кала та трактат парса хӑвар. Ӗҫлекенсемпе уйрӑммӑн калаҫма юрамасть пулсан, тен, сана канмалли пӳлӗмре е ӗҫлекенсен урӑх пӳлӗмӗнче литература хӑварма ирӗк парӗҫ.
5. Ӗҫлӗ территорире чӑнлӑх ҫинчен пӗлтерме мӗншӗн хӑрама кирлӗ мар?
5 Иисуспа Павел ҫынсемпе вӗсен ӗҫ вырӑнӗсенче калаҫнӑ, эппин, эпир те пултарӑпӑр (Матф. 4:18—21; 9:9; Ап. ӗҫ. 17:17). Иеговӑран лӑпкӑлӑхпа хӑюлӑх ыйт (Ап. ӗҫ. 4:29). Ӗҫлӗ территорире ырӑ хыпар сарнӑ чух эпир ҫынсене яланах тӗл пулӑпӑр, ҫавӑнпа та чӑнлӑх ҫинчен пӗлтермелли ҫак тухӑҫлӑ меслетпе мӗншӗн-ха усӑ курса пӑхас мар?