Пионер пулса ӗҫлени Турӑпа ҫывӑхланма пулӑшать
«Хамӑр Туррӑмӑра мухтаса юрламашкӑн ырӑ» (ПС. 146:1).
1, 2. а) Кама эпир юрататпӑр, ҫавӑн ҫинчен шухӑшланӑ, каласа панӑ чухне мӗн пулса пырать? ӑ) Мӗнле ыйтусене эпир пӑхса тухӑпӑр?
ЮРАТНӐ ҫын ҫинчен шухӑшлатпӑр, ун ҫинчен каласа паратпӑр пулсан, пирӗнпе ун хушшинчи хутшӑнусем ҫирӗпленсе пыраҫҫӗ. Иегова Турӑпа пирӗн хушӑмӑрти туслӑх пирки те ҫавнах калама пулать. Кӗтӳҫ пулнӑ чухне Давид каҫсене тӳпери ҫӑлтӑрсем ҫине пӑхса, вӗсен нимпе танлаштарайми Пултараканӗ ҫинчен шухӑшласа ирттернӗ. Вӑл ҫырнӑ: «Тӳпе ҫине, Санӑн аллу пултарнӑ ӗҫ ҫине, Эсӗ лартнӑ уйӑхпа ҫӑлтӑрсем ҫине пӑхатӑп та — ҫын мӗнех вӑл? Эсӗ ӑна ҫавах асӑнтан ямастӑн, мӗнех вара этем ывӑлӗ? Эсӗ ӑна ҫавах пӑхса тӑратӑн» (Пс. 8:4, 5). Святой сывлӑшпа суйласа лартнӑ христиансем тӗлӗшӗнчен Иеговӑн тӗллевӗ мӗнле тӗлӗнмелле пурнӑҫланни ҫинчен шухӑшланӑ май Павел апостол та савӑнса кӑшкӑрнӑ: «Туррӑн ырӑлӑхне, ӑслӑлӑхне, Вӑл пӗлнине пӗлсе ҫитме ҫук!» (Рим 11:17—26, 33.)
2 Сӑваплӑ ӗҫре эпир Иегова ҫинчен шухӑшлатпӑр, каласа паратпӑр. Ҫакӑ пирӗнпе ун хушшинчи хутшӑнусене ҫирӗплетет. Пионерсем нумайӑшӗ сӑваплӑ ӗҫре нумай вӑхӑт ирттерме пултарнӑран Турра тата хытӑрах юратма пуҫларӑмӑр тесе калаҫҫӗ. Халӗ эсӗ пионер пулса ӗҫлетӗн-и е ҫав тӗллеве пурнӑҫа кӗртме тӑрӑшатӑн-и, ҫавӑн пек сӑваплӑ ӗҫ санпа Иегова хушшинчи хутшӑнусене мӗнле ҫирӗплетме пултарни ҫинчен шухӑшласа пӑх. Эсӗ пионер пулсан, хӑвна ҫакӑн пек ыйту пар: «Ҫак пархатарлӑ сӑваплӑ ӗҫе малалла туса тӑма мана мӗн пулӑшӗ?» Эсӗ хальлӗхе пионер мар пулсан, пионер пулас тесе мӗнле улшӑнусем тума пултарни ҫинчен шухӑшласа пӑх. Сӑваплӑ ӗҫе тулли вӑхӑтпа туни Турӑпа пирӗн хушӑмӑрти хутшӑнусене мӗнле ҫирӗплетме пултарнине пӑхса тухар.
ПИОНЕР ПУЛСА ӖҪЛЕНИ ТАТА ТУРӐПА ПИРӖН ХУШӐМӐРТИ ХУТШӐНУСЕМ
3. Сӑваплӑ ӗҫре Патшалӑхӑн пулас пиллӗхӗсем ҫинчен каласа пани пирӗн ҫине мӗнле витӗм кӳрет?
3 Патшалӑхӑн пулас пиллӗхӗсем ҫинчен ыттисене каласа панипе эпир Иеговӑпа ҫывӑхланатпӑр. Килтен киле ырӑ хыпар каласа ҫӳренӗ чухне сана Библири хӑш сӑвӑ йӗркисемпе усӑ курма килӗшет? Тен, Псалом 36:10, 11; Даниил 2:44; Иоанн 5:28, 29; Ӳлӗмхине 21:3, 4-мӗш сӑвӑ йӗркисемпе-и? Ҫакӑн пек сӑмах панисем ҫинчен ыттисене каласа панӑ чухне кашнинче эпир хамӑра «пур аван япала та, пур чӑн пысӑк ырӑлӑх та» пирӗн уҫӑ кӑмӑллӑ Иегова Турӑран пулнине аса илтерсе тӑратпӑр. Ҫакӑ вара пире унпа тата ытларах ҫывӑхлантарать (Иак. 1:17, ҪХ).
4. Ыттисене ырӑ хыпар каласа ҫӳренӗ чухне мӗншӗн эпир Туррӑн ырӑлӑхне тата ытларах хаклама пуҫлатпӑр?
4 Ҫынсем нумайӑшӗ мӗн тери телейсӗр, ним тума пӗлмесӗр аптраса тӑнине курса эпир чӑнлӑха тата ытларах хаклама пуҫлатпӑр. Ҫак тӗнчери ҫынсен ӑнӑҫлӑ та телейлӗ пулма паракан пулӑшу ҫук. Нумайӑшӗ пуласлӑх пирки пӑшӑрханать, вӗсен нимле шанчӑк та ҫук. Вӗсем хӑйсем мӗншӗн пурӑннине пӗлесшӗн. Турра ӗненетӗп текенсем те нумайӑшӗ Библие питӗ сахал пӗлеҫҫӗ. Вӗсене авалхи Ниневи ҫыннисемпе танлаштарма пулать. (Иона 4:11 вуласа пар.) Сӑваплӑ ӗҫре ҫынсемпе мӗн чухлӗ нумайрах калаҫатпӑр, ҫавӑн чухлӗ ытларах Иегова пирӗншӗн питӗ лайӑх тӑрӑшнине куратпӑр (Ис. 65:13). Анчах та Иегова хӑйӗн халӑхне кӑна мар мӗн кирлипе тивӗҫтерсе тӑрать. Вӑл кашнине чун канӑҫлӑхне тупма тата чӑн-чӑн шанчӑк илме май парать. Ҫаксем пире Иегова мӗн тери ырӑ Турӑ пулнине аса илтерсе тӑраҫҫӗ (Ӳлӗм. 22:17).
5. Ыттисене чӑнлӑха вӗрентнӗ чухне эпир хамӑр йывӑрлӑхсем ҫине мӗнле пӑхатпӑр?
5 Ыттисене чӑнлӑха вӗрентнипе эпир хамӑр йывӑрлӑхсем ҫинчен сахалрах пӑшӑрханма вӗренетпӗр. Тулли пионер пулса ӗҫлекен Триша ҫакӑ чӑнах та ҫапла пулнине ашшӗпе амӑшӗ уйрӑлнӑ хыҫҫӑн ӑнланнӑ. Вӑл каласа парать: «Ҫакӑ манӑн пурнӑҫри чуна хурлантаракан самантсенчен чи йывӑрри пулчӗ». Пӗррехинче, хӑйне питӗ тунсӑхлӑ туйнӑ тата килтен тухас килмен чухне, вӑл пурпӗр виҫӗ ача патне Библи вӗренме кайнӑ. Вӗсен ҫемйинче вара нумай йывӑрлӑх пулнӑ. Ашшӗ вӗсене пӑрахса кайнӑ, пиччӗшӗ хӑйне вӗсемпе хаяр тытнӑран вӗсем хӗн курнӑ. Триша калать: «Вӗсемпе танлаштарсан, манӑн йывӑрлӑхсемпе хуйхӑ-суйхӑ ним тӗшне те тӑмасть. Вӗреннӗ чухне вӗсен пӗчӗк куҫӗсем йӑлтӑртатма пуҫларӗҫ те вӗсем савӑнса кулчӗҫ. Ҫак ачасем маншӑн, уйрӑмах ҫав кун, Иегова панӑ парне пулчӗҫ».
6, 7. а) Эпир ҫынсене Библири чӑнлӑхсене вӗрентнӗ чухне пирӗн ӗненӳ мӗнле ҫирӗпленсе пырать? ӑ) Библи принципӗсене тытса пыни вӗренекенсен пурнӑҫне мӗнле лайӑхлатнине курса эпир мӗн туятпӑр?
6 Библири чӑнлӑхсене вӗрентнипе эпир хамӑр ӗненӗве ҫирӗплететпӗр. Павел апостол хӑйӗнпе пӗр вӑхӑтра пурӑнакан хӑш-пӗр еврейсем, хӑйсем мӗне вӗрентнине тытса тӑманскерсем, ҫинчен ҫапла ҫырнӑ: «Мӗнле-ха эсӗ ҫынна вӗрентетӗн, хӑвна хӑв вӗрентместӗн?» (Рим 2:21.) Хальхи пионерсем хӑйсене пачах урӑхла тытаҫҫӗ! Вӗсен ялан тенӗ пекех ыттисене чӑнлӑха вӗрентме тата Библи вӗрентӗвӗсем ирттерме нумай май пур. Ҫакна лайӑх тӑвас тесен вӗсен кашни Библи вӗрентӗвне ирттерме хатӗрленмелле, тен, вӗренекенӗн ыйтӑвӗсем ҫине хурав парас тесе тӗпчемелле. Пионер пулса ӗҫлекен Жанин ӑнлантарса парать: «Ыттисене чӑнлӑха вӗрентме май сиксе тухсан кашнинче эпӗ ҫав чӑнлӑхсем манӑн пуҫпа чӗре ӑшне тарӑн кӗрсе вырнаҫнине туятӑп. Ҫавна пула манӑн ӗненӳ ҫирӗпленсех-ҫирӗпленсех пырать».
7 Библи принципӗсене тытса пыни вӗренекенсен пурнӑҫне мӗнле лайӑхлатнине курса эпир Туррӑн ӑслӑлӑхне тата ытларах хаклатпӑр (Ис. 48:17, 18). Ҫакӑ вара пире ҫав принципсене хамӑр пурнӑҫра хапӑл тусах тытса тӑма пулӑшать. Тепӗр пионер, Адриана ятлӑскер, ӑнлантарса парать: «Ҫынсем хӑйсен ӑслӑлӑхне шаннӑ чухне вӗсен пурнӑҫӗ кутӑн-пуҫӑн ҫавӑрӑнма пултарать. Анчах та вӗсем Иеговӑн ӑслӑлӑхне шанма тытӑнсан, усси тӳрех курӑнма пуҫлать». Фил ятлӑ пионер калать: «Чӑнах та, хӑйсене хӑйсем улӑштарма пултарайман ҫынсене Иегова мӗнле улӑштарма пултарни питӗ лайӑх курӑнать».
8. Сӑваплӑ ӗҫе пухури тӑвансемпе пӗрле туни пире мӗнле пулӑшать?
8 Сӑваплӑ ӗҫе пухури тӑвансемпе туни пире хавхалантарать (Ытар. 13:21). Пионерсем нумайӑшӗ ытти хыпарҫӑсемпе пӗрле сӑваплӑ ӗҫре нумай вӑхӑт ирттереҫҫӗ. Ҫакӑ «пӗр пек ӗненнипе» савӑнма май парать (Рим 1:12; Ытарӑшсем 27:17 вуласа пар). Лиса ятлӑ пионер хӑй ӗҫлекен вырӑнта ҫынсем пӗр-пӗрне кӗвӗҫеҫҫӗ, мала тухассишӗн пӗр-пӗринпе тупӑшаҫҫӗ тесе каласа парать. Унӑн кашни кун ҫынсен элекне, усал сӑмахӗсене итлеме тивет. Вӑл малалла калать: «Хӑвна христиан пек тытнӑшӑн хӑш-пӗр чухне санран шӳтлесе-тӑрӑхласа кулаҫҫӗ. Анчах та пухури тӑвансемпе сӑваплӑ ӗҫе хутшнӑни вӑй парса тӑрать. Кун вӗҫӗнче тем пек ывӑнсан та киле ҫӗкленӳллӗ кӑмӑлпа таврӑнатӑп».
9. Упӑшкипе арӑмӗ пионер пулса ӗҫлени вӗсен мӑшӑрлӑ пурнӑҫне ҫирӗплетме мӗнле пулӑшать?
9 Мӑшӑрпа пӗрле пионер пулса ӗҫлени мӑшӑрлӑ пурнӑҫа ҫирӗплетет (Еккл. 4:12). Упӑшкипе пӗрле пионер пулса ӗҫлекен Мадлин ӑнлантарса парать: «Эпир пӗр-пӗрне сӑваплӑ ӗҫре мӗн пулса иртни ҫинчен е Библире вуланӑ шухӑшсем, ырӑ хыпар сарнӑ чухне усӑ курма пултаракан шухӑшсем, ҫинчен каласа паратпӑр. Пионер пулса ӗҫленин кашни ҫулӗ пире пӗр-пӗринпе ҫывӑхлантарать». Триша та ҫакна палӑртать: «Эпир иксӗмӗр пӗр-пӗринпе кивҫене кӗмӗпӗр тесе калаҫса татӑлтӑмӑр, ҫавӑнпа та эпир укҫа пирки тавлашмастпӑр. Эпӗ те, упӑшка та сӑваплӑ ӗҫе пӗр графикпа тӑватпӑр, ҫавӑнпа та эпир иксӗмӗр нумай ҫын патне темиҫе хут та кайса килме тата Библи вӗрентӗвӗсем ирттерме пултаратпӑр». Ҫакӑ вара вӗсен мӑшӑрлӑ пурнӑҫне тата ҫирӗпрех пулма пулӑшать.
10. Патшалӑха хамӑр пурнӑҫра мала хуни, Турӑ пулӑшнине туйни эпир Иеговӑна шанни ҫине мӗнле витӗм кӳрет?
10 Патшалӑха хамӑр пурнӑҫра мала хунӑ, Иегова пулӑшнине туйнӑ тата вӑл пирӗн кӗлӗсем ҫине хурав панӑ чухне эпир Иеговӑна тата ытларах шанма пуҫлатпӑр. Турра чунтан парӑнса пурӑнакан пур христиан пирки те ҫавнах калама пулать. Анчах та сӑваплӑ ӗҫе тулли вӑхӑтпа тӑвакансем Иеговӑна шаннӑран кӑна хӑйсем пионер пулса ӗҫлеме пултарнине ӑнланаҫҫӗ. (Матфей 6:30—34 вуласа пар.) Курт, пионер тата район надзирателӗн ҫумӗ пулса ӗҫлекен, пӗр пухӑва кайса килме килӗшнӗ. Унта машинпа ҫитмешкӗн икӗ сехет ҫурӑ каймалла пулнӑ. Унӑн арӑмӗпе иккӗшӗн — арӑмӗ те пионер пулса ӗҫлет — машининче бензин пӗр енне каймалӑх кӑна пулнӑ, ӗҫ укҫине вара вӑл тепӗр эрнере кӑна илме пултарнӑ. Курт калать: «Тӗрӗс йышӑну турӑм-ши тесе шутлама пуҫларӑм эпӗ». Кӗлтунӑ хыҫҫӑн, Турӑ хӑйсемшӗн тӑрӑшассине ӗненсе, вӗсем хӑйсене шанса панӑ тивӗҫе тума килӗшнӗ. Ҫула тухас умӗн кӑшт маларах пӗр хӗрарӑм тӑван вӗсем патне шӑнкӑравланӑ та сирӗн валли парне пур тесе каланӑ. Вӑл вӗсене укҫа парнеленӗ — шӑп каялла килмелӗх. Курт калать: «Хӑвӑнпа ҫавӑн пекки ҫине-ҫинех пулса пырать пулсан, ҫавӑнта Иеговӑн аллине ҫӑмӑллӑнах курма пулать».
11. Пионер пулса ӗҫлени мӗнле пиллӗхсем кӳрет?
11 Мӗн чухлӗ ытларах Турӑпа ҫывӑхланса пыратпӑр, унӑн сӑваплӑ ӗҫне мӗн чухлӗ ытларах тӑватпӑр, ҫавӑн чухлӗ нумайрах пиллӗхсем илетпӗр тесе час-часах калаҫҫӗ пионерсем (Сак. аст. 28:2). Ҫапах та вӗсен сӑваплӑ ӗҫӗнче йывӑрлӑхсем те пулаҫҫӗ. Ҫитменлӗхсене тата ҫак йӗркесӗр тӗнчене пула эпир пурте хӗн куратпӑр. Хӑш-пӗр пионерсем пӗр вӑхӑтлӑха пионер пулса ӗҫлеме пӑрахас теҫҫӗ пулин те, час-часах вӗсен йывӑрлӑхӗсене татса пама пулать, ҫитменнине тата вӗсенчен сыхланма та пулать. Пионерсене ҫав чыслӑ ӗҫе малалла туса тӑма мӗн пулӑшӗ?
СӐВАПЛӐ ӖҪЕ МАЛАЛЛА ТА ТУЛЛИ ВӐХӐТПА ТУСА ТӐРӐР
12, 13. а) Пионера сехет нормине тултарма йывӑр пулсан, унӑн мӗн тумалла? ӑ) Мӗншӗн кашни кун Библи вулама, хамӑр тӗллӗн вӗренме тата шухӑшлама вӑхӑт уйӑрни питӗ кирлӗ?
12 Пионерсенчен нумайӑшӗн пушӑ вӑхӑт ҫукпа пӗрех. Пурне те туса ӗлкӗрме вӗсене йывӑр пулма пултарать, ҫавӑнпа та вӗсенчен кашнин хӑйсен ӗҫне лайӑх йӗркелемелле (1 Кор. 14:33, 40). Пионера сехет нормине тултарма йывӑр пулсан, унӑн хӑйӗн вӑхӑтне мӗнле ирттерни ҫинчен тӗплӗн шухӑшласа пӑхмалла (Эф. 5:15, 16). Вӑл хӑйӗнчен ҫапла ыйтма пултарать: «Канупа вӑйӑ-кулӑ валли манӑн мӗн чухлӗ вӑхӑт каять? Манӑн хама ытларах тытса чармалла мар-и? Хамӑн ӗҫ графикне эпӗ улӑштарма пултаратӑп-и?» Хамӑр пурнӑҫа кирлех мар ӗҫсемпе ҫӑмӑллӑнах йывӑрлатма пулать тенипе кашни христианин килӗшет ӗнтӗ, ҫавӑнпа та пионерсен хӑйсен кун йӗркине тӗрӗслесех тӑмалла, кирлӗ пулсан, улшӑнусем тумалла.
13 Кашни кун Библи вуласси, хӑй тӗллӗн вӗренесси тата шухӑшласси пионерӑн кулленхи пурнӑҫӗн пайӗ пулмалла. Апла пулсан, кирлӗ ӗҫсем валли уйӑрнӑ вӑхӑта кирлех мар ӗҫсем туртса ан илччӗр тесен пионера хӑйне тытса чарма пӗлни кирлӗ (Флп. 1:10). Калӑпӑр, пионер кунӗпе сӑваплӑ ӗҫе тунӑ хыҫҫӑн килне таврӑнать. Вӑл каҫхине пухӑвӑн тӗлпулӑвне хатӗрленӗп тесе палӑртса хурать. Анчах та вӑл малтан почтӑна пӑхса тухать. Унта вӑл компьютер умне ларать те электронлӑ ҫырусене вулать, вӗсем ҫине хуравлать. Ҫав вӑхӑтрах вӑл хӑй туянас текен таварсем йӳнелнипе йӳнелменнине пӗлес тесе сайта кӗрет. Сиссе те юлаймасть, икӗ сехет те иртсе кайнӑ ӗнтӗ, вӑл вара тӗлпулӑва хатӗрленме те пуҫламан. Ҫакӑнта мӗн япӑх пулнине куратӑн-и? Спортсменсем хӑйсен карьери нумая пытӑр теҫҫӗ пулсан, вӗсен хӑйсен ӳт-пӗвне пиҫӗхтерсех, хӑнӑхтарсах тӑмалла. Ҫавӑн пекех пионерсен те, сӑваплӑ ӗҫе малалла та тулли вӑхӑтпа туса тӑрасшӑн пулсан, хӑйсем тӗллӗн вӗренмелли графика пӗр сиктермесӗр тытса тӑмалла (1 Тим. 4:16).
14, 15. а) Мӗншӗн пионерсен ансат пурнӑҫпа пурӑнмалла? ӑ) Йывӑрлӑхсемпе тӗл пулсан пионерӑн мӗн тумалла?
14 Сӑваплӑ ӗҫе малалла та тулли вӑхӑтпа туса тӑрас тесе пионерсем ансат пурнӑҫпа пурӑнма тӑрӑшаҫҫӗ. Иисус хӑйӗн вӗренекенӗсене таса, е ансат, куҫлӑ пулма хавхалантарнӑ (Матф. 6:22). Вӑл хӑй те ансат пурнӑҫпа пурӑннӑ, ҫавӑнпа та вӑл сӑваплӑ ӗҫе нимпе те чӑрманса тӑмасӑр тума пултарнӑ. Вӑл ҫапла та каланӑ: «Тиллӗн те шӑтӑкӗ пур, вӗҫен кайӑкӑн та йӑви пур, Этем Ывӑлӗн вара пуҫне чикме те вырӑнӗ ҫук» (Матф. 8:20). Пионер Иисус кӑтартнӑ тӗслӗхрен мӗне те пулин вӗренесшӗн пулсан, уншӑн ҫакна асра тытни лайӑх пулнӑ пулӗччӗ: унӑн мӗн чухлӗ нумай япала, ҫавӑн чухлӗ ытларах унӑн вӗсене упраса хӑварас, юсас тата улӑштарас тесе чӑрманма тивӗ.
15 Пионерсем хӑйсен сӑваплӑ ӗҫӗ чыслӑ тивӗҫ пулнине ӑнланаҫҫӗ, анчах та вӗсем хӑйсене ыттисенчен лайӑхрах тесе шутламаҫҫӗ. Ун вырӑнне вӗсем пионер пулса ӗҫлесси вӑл Иегова панӑ парне пулнине пӗлеҫҫӗ. Ҫавӑнпа та пионер пулса ӗҫлес тесен кашнин Иеговӑна шанмалла (Пс. 120:1, 2). Йывӑрлӑхсем пулаҫҫех (Пс. 33:20). Вӗсем сиксе тухсан пионерсен, хӑйсен чыслӑ ӗҫне тӳрех хӑварас вырӑнне, Иеговӑран мӗн тумаллине ыйтмалла та ӑна хӑйсене пулӑшма ирӗк памалла. (Псалом 36:5 вуласа пар.) Вӗсем хӑйсене Иегова мӗнле юратса пулӑшнине курса тӑнӑ май хӑйсен ҫӳлти Ашшӗпе тата ытларах ҫывӑхланма пуҫлӗҫ (Ис. 41:10).
ЭСӖ ПИОНЕР ПУЛСА ӖҪЛЕМЕ ПУЛТАРАТӐН-И?
16. Эсӗ пионер пуласшӑн пулсан, санӑн мӗн тумалла?
16 Эсӗ пионер пуласшӑн пулсан, вӗсем илекен пиллӗхсене илесшӗн пулсан, ҫавӑн ҫинчен кӗлӗре Иеговӑна каласа пар (1 Иоанн 5:14, 15). Ҫакӑн пирки пионерсемпе те калаҫса пӑх. Хӑвӑн умна пионер пулма пулӑшакан тӗллевсем ларт. Китпа Эрика шӑп ҫапла тунӑ та. Вӗсем кунӗпе ӗҫленӗ, вара, хӑйсем ҫулӗнчи мӑшӑрсем пекех, туй хыҫҫӑн кӑшт вӑхӑт иртсен ҫуртпа ҫӗнӗ машина илнӗ. Вӗсем калаҫҫӗ: «Ҫак япаласем кӑмӑла ҫырлахтарӗҫ тесе шутланӑччӗ, анчах ун пекки пулмарӗ». Кит ӗҫне ҫухатсан пулӑшакан пионер пулса ӗҫлеме пуҫланӑ. Вӑл аса илет: «Пионер пулса ӗҫлесси мана сӑваплӑ ӗҫе туни мӗнле савӑнӑҫ панине аса илтерчӗ». Вӗсем пионер пулса ӗҫлекен мӑшӑрпа туслашнӑ, лешӗсем вара вӗсене ансат пурнӑҫпа пурӑнни тата сӑваплӑ ӗҫе тулли вӑхӑтпа туни нумай савӑнӑҫ панине ӑнланса илме пулӑшнӑ. Китпа Эрика вара мӗн тунӑ? Вӗсем хӑйсем умне лартнӑ тӗллевсене хут ҫине ҫырнӑ та ӑна холодильник ҫине ҫакса хунӑ, унтан вара хӑш тӗллевне пурнӑҫа кӗртнине палӑртса тӑнӑ. Вӑхӑт иртнӗҫемӗн вӗсем тулли пионерсем пулса ӗҫлеме пуҫланӑ.
17. Мӗншӗн пионер пулас тесе тӗплӗн шухӑшлани тӗрӗс пулнӑ пулӗччӗ?
17 Эсӗ пионер пулса ӗҫлеме пултаратӑн-и? Санӑн халӗ ун пек май ҫук пулсан, сӑваплӑ ӗҫе туллин хутшӑннипе Иеговӑпа ҫывӑхланас тесе вӑй ҫитнӗ таран пурне те ту. Кӗлтуса шухӑшланӑ хыҫҫӑн эсӗ хӑвӑн пурнӑҫунта пӗр-пӗр улшӑнусем туни сана пионер пулса ӗҫлеме май панине, тен, курӑн. Пионер пулса ӗҫлеме тытӑнсан санӑн савӑнӑҫу эсӗ тӳсме пултаракан кирек мӗнле ҫухатуран та пысӑкрах пулӗ. Эсӗ хӑвӑн ҫинчен шутлассинчен ытларах Турӑ Патшалӑхне пурнӑҫра мала хуни санӑн кӑмӑлна ытларах ҫырлахтарӗ (Матф. 6:33). Ыттисене парса тӑни сана телейлӗрех тӑвӗ. Унсӑр пуҫне санӑн Иегова ҫинчен шухӑшлама, каласа пама нумай май пулӗ, ҫакӑ вара сана ӑна хытӑрах юратма, савӑнтарма пулӑшӗ.