Сӑваплӑ ӗҫе тулли вӑхӑтпа туса тӑракансене асра тытӑр
«Сирӗн... ӗненсе тунӑ ӗҫӗре, юратса тунӑ ӗҫӗре... яланах асра тыт[атпӑр]» (1 ФЕС. 1:2, 3).
1. Иеговӑшӑн тӑрӑшса ӗҫлекенсем ҫине Павел мӗнле пӑхнӑ?
ПАВЕЛ апостол ырӑ хыпаршӑн тӑрӑшса ӗҫлекенсене асра тытнӑ. Вӑл ҫырнӑ: «Сирӗн Атте Туррӑмӑр умӗнче ӗненсе тунӑ ӗҫӗре, юратса тунӑ ӗҫӗре, эсир Иисус Христос Ҫӳлхуҫамӑра епле ҫирӗп шанса тӑнине яланах асра тыт[атпӑр]» (1 Фес. 1:2, 3). Унсӑр пуҫне Иегова хӑй те хӑйӗншӗн шанчӑклӑ ӗҫлекенӗсем юратса тунӑ ӗҫне — вӗсем хӑйсен лару-тӑрӑвне пула нумай е сахал тума пултарнине пахмасӑрах — асра тытать (Евр. 6:10).
2. Ҫак статьяра эпир мӗн пӑхса тухӑпӑр?
2 Ӗлӗк пурӑннӑ тата хальхи вӑхӑтра пурӑнакан христиансем нумайӑшӗ Иеговӑшӑн тулли вӑхӑтпа ӗҫлес тесе хӑйсене шеллемесӗр чылай вӑй хунӑ. Ҫак статьяра эпир пӗрремӗш ӗмӗрте хӑш-пӗрисем Иеговӑшӑн мӗнле ӗҫлесе тӑнине пӑхса тухӑпӑр. Ҫавӑн пекех эпир хальхи вӑхӑтра сӑваплӑ ӗҫе тулли вӑхӑтпа тӑвакансем мӗн-мӗн тунине пӗлӗпӗр тата вӗсене мӗнле пулӑшмаллине те сӳтсе явӑпӑр.
ПӖРРЕМӖШ ӖМӖРТИ ХРИСТИАНСЕМ
3, 4. а) Пӗрремӗш ӗмӗрте хӑш-пӗрисем Иеговӑшӑн мӗнле ӗҫлесе тӑнӑ? ӑ) Вӗсем хӑйсен тӑкакӗсене саплаштарма укҫа ӑҫтан тупнӑ?
3 Шыва кӗнӗ хыҫҫӑнах Иисус Патшалӑх ҫинчен калакан хыпара сарма пуҫланӑ тата ыттисене ҫав ӗҫе тума вӗрентнӗ (Лука 3:21—23; 4:14, 15, 43). Вӑл вилнӗ хыҫҫӑн унӑн апостолӗсем ырӑ хыпар сарас ӗҫе ертсе пынӑ та ҫав ӗҫ анлӑ сарӑлма тытӑннӑ (Ап. ӗҫ. 5:42; 6:7). Хӑш-пӗр христиансем, калӑпӑр, Филипп, Палестинӑра ырӑ хыпара саракан тата миссионер пулса ӗҫленӗ (Ап. ӗҫ. 8:5, 40; 21:8). Теприсем, Павел пеккисем, ырӑ хыпара аякри тӗрлӗ вырӑнта пӗлтерсе ҫӳренӗ (Ап. ӗҫ. 13:2—4; 14:26; 2 Кор. 1:19). Тата теприсем, сӑмахран, Марк, Лука тата Силуан (Сила), Библи ҫыракансем е Библи ҫыракансен секретарӗсем пулнӑ (1 Петр 5:12). Шанчӑклӑ арҫын тӑвансемпе ҫума-ҫумӑн сӑваплӑ ӗҫе нумай хӗрарӑм тӑван туса тӑнӑ (Ап. ӗҫ. 18:26; Рим 16:1, 2). Ҫав тӑвансен мӗн пурӑнса ирттерме тивни ҫинчен Христианла Грек Ҫырӑвӗнче вулани кӑмӑла ҫӗклемеллипех ҫӗклет. Вӗсемпе пулса иртнӗ ӗҫсем Иегова хӑйӗн шанчӑклӑ ӗҫлекенӗсене хакланине тата вӗсене мӗн кирлипе тивӗҫтерсе тӑнине ҫирӗплетсе параҫҫӗ.
4 Пӗрремӗш ӗмӗрте сӑваплӑ ӗҫе тулли вӑхӑтпа туса тӑракансем пурӑнмалӑх укҫа ӑҫтан илсе тӑнӑ? Вӑхӑтран вӑхӑта пухури тӑвансем вӗсене хӑнана чӗннӗ тата ытти йышши пулӑшу панӑ, анчах та вӗсем хӑйсене ҫавӑн пек пулӑшу пама ыйтса тӑман (1 Кор. 9:11—15). Уйрӑм христиансем те, пухусем те вӗсене хаваспах пулӑшса тӑнӑ. (Апостолсен ӗҫӗсем 16:14, 15; Филиппӑ 4:15—18 вуласа пар.) Павел тата унпа пӗрле ҫӳрекен юлташӗсем хӑйсен тӑкакӗсене саплаштарас тесе вӑхӑтӑн-вӑхӑтӑн ӗҫленӗ.
ХАЛЬХИ ВӐХӐТРА СӐВАПЛӐ ӖҪЕ ТУЛЛИ ВӐХӐТПА ТУСА ТӐРАКАНСЕМ
5. Сӑваплӑ ӗҫе тулли вӑхӑтпа туса пурӑнни пирки пӗр мӑшӑр мӗн каланӑ?
5 Хальхи вӑхӑтра та нумайӑшӗ сӑваплӑ ӗҫе тулли вӑхӑтпа тӗрлӗ майпа туса тӑрать. («Сӑваплӑ ӗҫе тулли вӑхӑтпа туса тӑмалли майсем» рамкӑна пӑхӑр.) Хӑйсем суйласа илнӗ пурнӑҫ ҫулӗ вӗсене хӑйсене килӗшет-и? Ҫак ыйтӑва вӗсене парсан, ҫакӑншӑн эсир пӗртте ӳкӗнмӗр. Акӑ пӗр тӗслӗх. Тулли тата ятарлӑ пионер, миссионер пулса ӗҫленӗ, халӗ вара ют ҫӗршывра Вефильте ӗҫлекен арҫын тӑван калать: «Сӑваплӑ ӗҫе тулли вӑхӑтпа тума пуҫласан, эпӗ хамӑн пурнӑҫра чи лайӑх йышӑну турӑм тесе шутлатӑп. 18 ҫул тултарсан университета вӗренме кӗмелле-ши, пӗр-пӗр ӗҫе кӗрес-ши е пионер пулса ӗҫлес-ши тесе шутласа тӑраттӑмччӗ. Сӑваплӑ ӗҫе тулли вӑхӑтпа туса тӑмашкӑн санӑн мӗн-мӗн пама тивнине Иегова нихӑҫан та манманнине хам куҫпах курса тӑтӑм. Эпӗ ҫак тӗнчере карьера тӑвас тенӗ пулсан, Иегова мана панӑ талантпа пултарулӑх Турӑшӑн ӗҫленӗ чухнехи пек уҫӑлман пулӗччӗҫ». Унӑн арӑмӗ ҫапла палӑртать: «Тулли вӑхӑтлӑ сӑваплӑ ӗҫӗн кашни енӗ мана Турӑпа тата ытларах ҫывӑхланма пулӑшрӗ. Иегова пире мӗнле хӳтӗленине тата мӗнле ертсе пынине эпир ҫине-ҫинех туяттӑмӑрччӗ, анчах та эпир канлӗ те хӑтлӑ пурнӑҫпа пурӑннӑ пулсан, пирӗнпе ун пекки нихӑҫан та пулман пулӗччӗ. Пире сӑваплӑ ӗҫе тулли вӑхӑтпа туса пурӑнма панӑшӑн эпӗ Иеговӑна кашни кунах тав тӑватӑп». Сирӗн те хӑвӑр пурнӑҫунта ҫавнах туяс килмест-и?
6. Иегова пирӗн сӑваплӑ ӗҫ ҫине мӗнле пӑхать?
6 Хӑш-пӗрисем хӑйсен лару-тӑрӑвне пула сӑваплӑ ӗҫе тулли вӑхӑтпа тума пултараймаҫҫӗ, анчах та вӗсем Иеговӑшӑн мӗн тума пултарнине пурне те тума тӑрӑшаҫҫӗ. Паллах ӗнтӗ, Иегова вӗсем чунне парса вӑй хунине хаклать. Павел Филимон 1—3-мӗшӗсенче ятран каласа тухнӑ тӑвансем ҫинчен, ҫавӑн пекех Колоссӑ пухӑвӗнчи тӑвансем ҫинчен шухӑшласа пӑхӑр-ха. (Вуласа пар.) Павел та, Иегова та вӗсене кашнине хакланӑ. Пирӗн ҫӳлти Аттемӗр сирӗн сӑваплӑ ӗҫе те хаклать. Ҫапах та эсир сӑваплӑ ӗҫе тулли вӑхӑтпа туса тӑракансене мӗнле пулӑшса тӑма пултаратӑр?
ПИОНЕРСЕНЕ ПУЛӐШСА ТӐРӐР
7, 8. Пионер пулса ӗҫлесси шутне мӗн кӗрет тата пухури тӑвансем вӗсене мӗнле пулӑшма пултараҫҫӗ?
7 Пӗрремӗш ӗмӗрти ырӑ хыпар саракансем пекех, хастарлӑ пионерсем пухусене питӗ хавхалантараҫҫӗ. Вӗсенчен нумайӑшӗ сӑваплӑ ӗҫ валли кашни уйӑхра 70 сехет уйӑрма тӑрӑшать. Эсир вӗсене мӗнле пулӑшма пултаратӑр?
8 Пионер пулса ӗҫлекен пӗр хӗрарӑм тӑван, Шари ятлӑскер, каласа парать: «Пионерсем ырӑ хыпара кашни кун сараҫҫӗ. Вӗсем ывӑнма та пӗлмеҫҫӗ пек туйӑнать. Ҫав-ҫавах вӗсене хавхалантарни кирлӗ» (Рим 1:11, 12). Темиҫе ҫул пионер пулса ӗҫленӗ хӗрарӑм тӑван хӑйӗн пухӑвӗнчи пионерсем пирки акӑ мӗн каланӑ: «Вӗсем кунсерен тӑрӑшса ӗҫлеҫҫӗ. Ҫавӑнпа та кам та пулин вӗсене сӑваплӑ ӗҫе тума машинпа илсе кайсан, апат ҫиме хӑнана чӗнсен, бензин илме укҫа парсан е ытти енчен укҫа парса пулӑшсан, вӗсем ҫавӑншӑн питӗ пархатарлӑ. Ҫакӑн пек тунипе эсир вӗсене хакланине кӑтартатӑр».
9, 10. Пухури хӑш-пӗр тӑвансем пионерсене мӗнле пулӑшса тӑраҫҫӗ?
9 Пионерсене пулӑшмалли тепӗр май вӑл — вӗсемпе пӗрле ырӑ хыпар сарма кайни. Пионер пулса ӗҫлекен Бобби ятлӑ хӗрарӑм тӑван каланӑ: «Ӗҫ кунӗсенче ырӑ хыпар сарма пулӑшакансем уйрӑмах кирлӗ». Ҫав пухурах тепӗр хӗрарӑм тӑван каласа парать: «Кӑнтӑрла хыҫҫӑн сӑваплӑ ӗҫе тума каякансене тупма йывӑр». Халӗ Бруклинри Вефильте ӗҫлекен хӗрарӑм тӑван хӑй пионер пулса ӗҫлени ҫинчен ӑшӑ туйӑмпа аса илет: «Пӗр машинӑллӑ хӗрарӑм тӑван мана ҫапла каларӗ: „Сӑваплӑ ӗҫе тума кайма никам та юлмарӗ пулсан, ман пата шӑнкравла, вара эпӗ санпа пӗрле ырӑ хыпар сарма кайӑп“. Вӑл пулман пулсан, пионер пулса ӗҫлессипе манӑн мӗн пулнӑ пулӗччӗ, пӗлместӗп». Шэри ятлӑ хӗрарӑм тӑван палӑртнӑ: «Сӑваплӑ ӗҫе тунӑ хыҫҫӑн авланман е качча кайман пионерсем хӑйсене пӗччен пек туйма пултараҫҫӗ. Ҫавӑн пек тӑвансене хутран-ситрен хӑвӑр пата ҫемьепе пӗрле пуҫҫапма чӗнӗр. Вӗсемпе ытти ӗҫсене пӗрле тунипе те эсир вӗсене тӗреклететӗр».
10 Сӑваплӑ ӗҫе 50 ҫула яхӑн тулли вӑхӑтпа туса тӑракан пӗр хӗрарӑм хӑй тата качча кайман хӗрарӑм тӑвансем пионер пулса ӗҫлени ҫинчен ҫапла каласа парать: «Пирӗн старейшинӑсем темиҫе уйӑхра пӗрре пирӗн пата кӗрсе тухатчӗҫ. Вӗсем пирӗн сывлӑх пирки, ӗҫре пирӗн ӗҫсем мӗнле пыни пирки тата мӗнле йывӑрлӑхсем пурри пирки ыйтатчӗҫ. Ҫавна вӗсем ячӗшӗн ҫеҫ тумастчӗҫ. Пире пулӑшу кирлипе кирлӗ маррине пӗлес тесе вӗсем пирӗн пата киле килетчӗҫ». Ҫакӑ сире, тен, Павел Эфесри пӗр христианина пархатарлӑ пулнипе мӗнле сӑмахсем каланине аса илтерет. Унӑн хӑйӗн ҫемье пулнӑ пулин те, вӑл апостола мӗн кирлипе пулӑшса тӑнӑ (2 Тим. 1:18).
11. Ятарлӑ пионерсем камсем вӗсем?
11 Сӑваплӑ ӗҫе тулли вӑхӑтпа туса тӑмалли тепӗр май вӑл — ятарлӑ пионер пулса ӗҫлесси. Ҫав тӑвансем сӑваплӑ ӗҫе тума кашни уйӑхра 130 сехет уйӑрма тӑрӑшаҫҫӗ. Вӗсем ырӑ хыпара питӗ нумай пӗлтерсе ҫӳреҫҫӗ тата пухури ӗҫсене те туса тӑраҫҫӗ, ҫавӑнпа та ӗҫе ҫӳреме вӗсен вӑхӑт ҫукпа пӗрех е пачах ҫук. Ятарлӑ пионерсем хӑйсен вӑхӑчӗн ытларах пайне сӑваплӑ ӗҫе туса ирттерччӗр тесе филиал вӗсене кашни уйӑхра пысӑках мар пособи парса тӑрать.
12. Старейшинӑсем тата пухури ытти тӑвансем ятарлӑ пионерсене мӗнле пулӑшма пултараҫҫӗ?
12 Эпир ятарлӑ пионерсене мӗнле пулӑшма пултаратпӑр? Филиалра ӗҫлекен тата нумай ятарлӑ пионерпа ҫыхӑну тытакан пӗр старейшина ӑнлантарса парать: «Старейшинӑсен вӗсемпе калаҫмалла, вӗсен ӗҫсем мӗнле пынине пӗлме тӑрӑшмалла. Ҫапла туни старейшинӑсене вӗсене мӗнле пулӑшмаллине ӑнланма май парӗ. Ятарлӑ пионерсем пособи илсе тӑраҫҫӗ пулсан, вӗсене нимле пулӑшу та кирлӗ мар тесе шутлаҫҫӗ хӑш-пӗр Свидетельсем. Анчах та вырӑнти тӑвансем вӗсене нумай енчен пулӑшма пултараҫҫӗ». Тулли пионерсем пекех, ятарлӑ пионерсем те хӑйсемпе пӗрле пухури тӑвансем сӑваплӑ ӗҫе тума кайнишӗн питӗ пархатарлӑ. Ҫав тӗлӗшрен эсир вӗсене пулӑшма пултаратӑр-и?
ҪУЛҪӲРЕКЕН НАДЗИРАТЕЛЬСЕНЕ ПУЛӐШӐР
13, 14. а) Район надзирателӗсемпе вӗсен арӑмӗсем тӗлӗшӗнчен пирӗн мӗне асра тытмалла? ӑ) Ҫулҫӳрекен надзирательсемпе вӗсен арӑмӗсене эсир мӗнле пулӑшма пултарнӑ пулӑттӑр?
13 Район надзирателӗсемпе вӗсен арӑмӗсем ҫине хытӑ ӗненекен, хавас кӑмӑллӑ тата опытлӑ тӑвансем ҫине пӑхнӑ пек пӑхаҫҫӗ. Ку вара чӑнах та ҫапла. Анчах вӗсене те хавхалантарни тата хӑйсемпе пӗрле сӑваплӑ ӗҫе тума каякан тӑвансем кирлӗ. Пухури тӑвансем пӗрле канма чӗнни те вӗсене савӑнӑҫ парать. Вӗсем чирлесе ӳкрӗҫ тата больницӑна лекрӗҫ пулсан, тен, вӗсен йывӑр чиртен сипленмелле е операци тумалла пулсан, мӗн тума пулать? Ҫулҫӳрекен надзирательсемпе вӗсен арӑмӗсене хӑйсем патне вырӑнти тӑвансем килсе кайни тата кирлӗ пулӑшу парса тӑни питӗ хавхалантарать. Апостолсен ӗҫӗсем кӗнекене ҫыракан Лука, «савнӑ тухтӑр», Павелшӑн тата унпа пӗрле ҫӳрекен юлташӗсемшӗн мӗнле тӑрӑшни ҫинчен шухӑшласа пӑхӑр-ха (Кол. 4:14, ҪХ; Ап. ӗҫ. 20:5—21:18).
14 Ҫулҫӳрекен надзирательсемпе вӗсен арӑмӗсене ҫывӑх туссем кирлӗ тата вӗсем хӑйсен тусӗсене питӗ хаклаҫҫӗ. Пӗр район надзирателӗ ҫырнӑ: «Манӑн туссем мана хӑҫан хавхалантармаллине пӗлсех тӑраҫҫӗ тейӗн. Вӗсем манпа чунтан интересленсе ыйтусем параҫҫӗ, ҫакӑ вара мана вӗсемпе хама мӗн пӑшӑрхантарни ҫинчен калаҫма пулӑшать. Вӗсем тимлӗ итлеме пӗлни ҫеҫ мана чӑннипех вӑй парса тӑрать». Район надзирателӗсемпе вӗсен арӑмӗсем пухури тӑвансем хӑйсемпе чунтан интересленнӗшӗн питӗ пархатарлӑ.
ВЕФИЛЕЦСЕНЕ ПУЛӐШӐР
15, 16. Вефильте тата Конгресс залӗсенче ӗҫлекенсем тӑвакан ӗҫ мӗншӗн кирлӗ тата эпир вӗсене мӗнле пулӑшма пултаратпӑр?
15 Вефильте тата Конгресс залӗсенче ӗҫлекенсем ырӑ хыпар сарас тӗлӗшрен питӗ кирлӗ ӗҫ туса тӑраҫҫӗ. Сирӗн пухура е теократи районӗнче вефилецсем пур пулсан, эсир вӗсене асра тытнине мӗнле кӑтартма пултаратӑр?
16 Вефиле килсенех вӗсем хӑйсен ҫемйинчен тата тусӗсенчен аякра пулнӑран тунсӑхлама пултараҫҫӗ. Ытти вефилецсем тата ҫӗнӗ пухури тӑвансем вӗсемпе ҫывӑхрах паллашма, туслашма тӑрӑшни вӗсене, паллах ӗнтӗ, савӑнтарӗ! (Марк 10:29, 30.) Вефильти ӗҫ графикӗ вӗсене кашни эрнере пухӑва ҫӳреме тата ырӑ хыпар сарма май парать. Анчах та хӑш-пӗр чухне вефилецсене хушма ӗҫсем тума ыйтма пултараҫҫӗ. Пухусем ҫакна ӑнланаҫҫӗ, вефилецсене тата вӗсем тӑвакан ӗҫе хаклаҫҫӗ пулсан, ҫакӑ пурне те усӑ парӗ. (1 Фессалоника 2:9 вуласа пар.)
СӐВАПЛӐ ӖҪЕ ЮТ ҪӖРШЫВРА ТУЛЛИ ВӐХӐТПА ТӐВАКАНСЕНЕ ПУЛӐШӐР
17, 18. Сӑваплӑ ӗҫе ют ҫӗршывра тулли вӑхӑтпа тӑвакансем мӗнле ӗҫсем тӑваҫҫӗ?
17 Сӑваплӑ ӗҫе ют ҫӗршывра тулли вӑхӑтпа тӑвакансене ют чӗлхепе калаҫма вӗренме, урӑх апат-ҫимӗҫе ҫиме тата ҫӗнӗ йӑла-йӗркене хӑнӑхма ҫӑмӑлах мар пулма пултарать. Мӗншӗн вӗсем ҫавӑн пек улшӑнусемпе ҫыхӑннӑ йывӑрлӑхсем ҫине пӑхса тӑман?
18 Ҫавӑн пек ӗҫлекенсенчен пӗрисем — миссионерсем. Вӗсем, тӗпрен илсен, ытларах ырӑ хыпар сарас ӗҫе хутшӑнаҫҫӗ, ҫавӑнпа вӗсем илнӗ ятарлӑ пӗлӳрен нумайӑшӗ усӑ илме пултарать. Филиал миссионерсене пурӑнмалли кӗтеспе тивӗҫтерет тата вӗсем хӑйсен тӗп тӑкакӗсене саплаштарма пултарччӑр тесе пособи парса тӑрать. Ҫавӑн пекех тӑвансене ют ҫӗршыва унти филиалра ӗҫлеме е филиал, куҫаракансен аякри офисӗсене, Конгресс тата Патшалӑх залӗсене тума яма пултараҫҫӗ. Филиал е вырӑнти тӑвансем вӗсене мӗн кирлипе, калӑпӑр, апат-ҫимӗҫпе тата пурӑнмалли вырӑнпа, тивӗҫтереҫҫӗ. Вефиль ҫемйинчи тӑвансем пекех, вӗсем вырӑнти пухӑвӑн тӗлпулӑвӗсене ҫӳреҫҫӗ тата ырӑ хыпар сараҫҫӗ, ҫавӑнпа ҫав тӑвансен опычӗ пухӑва самаях усӑ парса тӑрать.
19. Сирӗн ҫӗршыва сӑваплӑ ӗҫе тулли вӑхӑтпа тума килнисене эсир мӗнле пулӑшма пултаратӑр?
19 Сирӗн ҫӗршыва сӑваплӑ ӗҫе тулли вӑхӑтпа тума килнисене эсир мӗнле пулӑшма пултаратӑр? Асра тытӑр: вӗсене, уйрӑмах чи малтан, сирӗн патри апат-ҫимӗҫе хӑнӑхма йывӑр пулма пултарӗ. Ҫавӑнпа вӗсене хӑнана чӗннӗ чухне ҫавна шута илӗр те вӗсем мӗн ҫинине е мӗн тутанса пӑхасшӑн пулнине ыйтса пӗлӗр. Вӗсем сирӗн чӗлхепе калаҫма вӗреннӗ чухне тата сирӗн вырӑнти йӑласемпе паллашнӑ чухне вӗсемпе тӳсӗмлӗ пулӑр. Эсир мӗн каланине пурне те вӗсем тӳрех ӑнланмасан та пултараҫҫӗ, анчах та эсир вӗсене сӑмахсене тӗрӗс калама вӗрентме пултаратӑр. Вӗсен питӗ вӗренес килет!
20. Сӑваплӑ ӗҫе тулли вӑхӑтпа тӑвакансене тата вӗсен ашшӗ-амӑшне эпир мӗнле пулӑшма пултаратпӑр?
20 Вӑхӑт хӑйӗннех тӑвать, ҫавӑнпа та сӑваплӑ ӗҫе тулли вӑхӑтпа тӑвакансем те, вӗсен ашшӗ-амӑшӗсем те ватӑлса пыраҫҫӗ. Ашшӗ-амӑшӗсем Свидетельсем пулсан, вӗсем хӑйсен ачисем сӑваплӑ ӗҫне малалла туса тӑччӑр теҫҫӗ (3 Иоанн 4). Хӑйсен ашшӗ-амӑшне пулӑшу кирлӗ чухне сӑваплӑ ӗҫе тулли вӑхӑтпа туса тӑракансем мӗн тума пултарнине пурне те тӑваҫҫӗ паллах, кирлӗ пулсан, вӗсене пулӑшас тесе вӗсем патне май ҫитнӗ таран кайса килме те тӑрӑшӗҫ. Анчах та пухури тӑвансем те, сӑваплӑ ӗҫе тулли вӑхӑтпа тӑвакансен ашшӗ-амӑшӗпе ҫывӑхра пурӑнаканскерсем, пулӑшу пама пултараҫҫӗ. Асра тытӑр: сӑваплӑ ӗҫе тулли вӑхӑтпа туса тӑракансен ӗҫӗ ҫак тӗнчери чи кирлӗ ӗҫе сарас тӗлӗшрен питӗ кирлӗ (Матф. 28:19, 20). Сӑваплӑ ӗҫе тулли вӑхӑтпа тӑвакансен ашшӗ-амӑшне кирлӗ чухне пулӑшма эсир пултаратӑр-и е сирӗн пуху ҫавна тума пултарать-и?
21. Сӑваплӑ ӗҫе тулли вӑхӑтпа тӑвакансем ыттисем парса тӑракан пулӑшупа хавхалану ҫине мӗнле пӑхаҫҫӗ?
21 Ҫынсем нумайӑшӗ пуясшӑн питӗ хытӑ ӗҫлеҫҫӗ. Анчах та сӑваплӑ ӗҫе тулли вӑхӑтпа тӑвассине суйласа илекенсем Иеговӑна чи лайӑххине парас тата ыттисене пулӑшас килнӗрен тӑрӑшса ӗҫлеҫҫӗ. Эсир парса тӑракан кирек мӗнле пулӑшушӑн та вӗсем питӗ пархатарлӑ. Сӑваплӑ ӗҫе ют ҫӗршывра тӑвакан хӗрарӑм тӑван нумайӑшӗн туйӑмне палӑртса ҫапла каланӑ: «Хут ҫине тав сӑмахӗсем ҫырса яни те ыттисем сан ҫинчен шухӑшланине тата вӗсем эсӗ тӑвакан ӗҫшӗн савӑннине кӑтартса парать».
22. Сӑваплӑ ӗҫе тулли вӑхӑтпа тӑвасси ҫине эсир мӗнле пӑхатӑр?
22 Сӑваплӑ ӗҫе тулли вӑхӑтпа туса тӑракансем кӑмӑла ҫӗклекен тата ҫырлахтаракан пурнӑҫ ҫулне суйласа илнӗ. Ҫакӑ вӑл хальхи вӑхӑтра чи лайӑх пурнӑҫ ҫулӗ. Сӑваплӑ ӗҫе тулли вӑхӑтпа тӑвакансем лайӑх енсем кӑтартма тата ӑса вӗренсе пыраҫҫӗ, ҫакӑ вара халӗ те кирлӗ, ҫӗнӗ тӗнчере те кирлӗ пулӗ. Кӗҫех Иеговӑн ӗҫлекенӗсем пурте чӑннипех кӑмӑла ҫырлахтаракан ӗҫе кашни кунах туса пурӑнӗҫ. Эппин, сӑваплӑ ӗҫе тулли вӑхӑтпа тӑвакансен ӗненсе тунӑ ӗҫне, юратса тунӑ ӗҫне яланах асра тытар (1 Фес. 1:2, 3).