Турра пуҫҫапма пулӑшакан ҫӗнӗ юрӑсем!
1 Хурал башнин, Библин тата трактатсен обществин кашни ҫул иртекен тӗлпулӑвӗнче (вӑл 2014 ҫулхи октябрӗн 4-мӗшӗнче пулнӑ) юрӑ кӗнекине тепӗр хут пӑхса тухасси пирки пӗлтернӗччӗ. Чӑннипе те ҫакӑ савӑнӑҫлӑ хыпар! Ҫав тӗлпулӑва пынисене пурне те Турра пуҫҫапассинче Патшалӑх юррисем питӗ пысӑк вырӑн йышӑннине аса илтерчӗҫ (Пс. 95:2).
2 Тен, эсир ыйтӑр: «Мӗншӗн юрӑ кӗнекине тепӗр хут пӑхса тухмалла?» Ҫакна тума темиҫе сӑлтав пур. Чи малтан, Ҫырӑва тӗрӗсрех те тӗрӗсрех ӑнланса пыратпӑр, ҫавӑнпа та ҫакӑ юрӑсен тексчӗ ҫине витӗм кӳме пултарӗ (Ытар. 4:18). Унсӑр пуҫне, юрӑсенчи нумай сӑмахсене тата сӑмах ҫаврӑнӑшӗсене «Ҫӗнӗ Тӗнче куҫарӑвӗн» (акӑл.) малтанхи кӑларӑмӗнчен илнӗ. Халӗ вара вӗсем ҫӗнӗ кӑларӑмпа килӗшӳллӗ пулччӑр тесе улшӑнусем тумалла. Ҫакна тӑвас тесен нумай ӗҫлеме тивӗ, ҫавӑнпа та ҫав хушӑрах ҫӗнӗ юрӑ кӗнекине темиҫе ҫӗнӗ юрӑ кӗртме йышӑннӑ.
3 Ҫӗнӗ юрӑсене юрлас тесе ҫӗнӗ юрӑ кӗнекин кӑларӑмне кӗтмелле-и? Ҫук. Ҫӗнӗ юрӑсем ҫитес уйӑхсенче jw.org сайтра тухасси ҫинчен сире пӗлтерме питӗ хавас. Ҫӗнӗ юрӑ тухсассӑн ӑна сӑваплӑ ӗҫӗн тӗлпулӑвӗн графикне кашнинчех «ҫӗнӗ юрӑ» тесе паллӑ туса кӗртӗҫ.
4 Ҫӗнӗ юрӑсене мӗнле вӗренмелле. Ҫӗнӗ юрра вӗренме, тен, ҫӑмӑлах мар. Апла пулсан та, эпир, псалом юрлакан пекех, пуху тӗлпулӑвӗсенче чӗнмесӗр ларасшӑн мар, юрласшӑн (Пс. 29:13). Акӑ темиҫе ансат канаш.
Сайта кӗртнӗ фортепьяно аккомпанеменчӗпе ҫырнӑ кӗвве темиҫе хут итле. Кӗвве мӗн чухлӗ нумайрах итлен, ҫавӑн чухлӗ хӑвӑртрах эсӗ ӑна астуса юлӑн.
Юррӑн сӑмахӗсене пӑхса тух та астуса юлма тӑрӑш.
Юрра кӗвӗпе пӗрле юрла. Лайӑх юрлама вӗрениччен ҫине-ҫинех юрла.
Ҫемьепе пӗрле Турра пуҫҫапнӑ чухне ҫӗнӗ юрӑсене темиҫе хут, ҫемьерисем пурте ӑна лайӑх юрлама вӗрениччен, юрлӑр.
5 Ҫӗнӗ юрра тепӗр уйӑхри ҫитес сӑваплӑ ӗҫӗн тӗлпулӑвӗн графикне кӗртсен, пуху ӑна малтан фортепьяно аккомпанеменчӗпе ҫырнине пӗр хут итлӗ. Кайран пурте ӑна, яланхи пекех, кӗвӗпе юрлӗҫ.
6 Шутласа пӑхсан, пуху тӗлпулӑвӗсенче пурте пӗрле пӗр харӑссӑн юрӑсем юрласа эпир Иеговӑна мухтава кӑларатпӑр, ҫакӑ вара пире савӑнӑҫ кӳрет. Ҫавӑнпа та айтӑр юрӑ юрласси пирки пӗлтернӗ чухне залран, пит кирлех мар чухнех, тухассине йӑлана кӗртер мар.
7 Кӗвӗ-юрӑшӑн пархатарлӑ пулнине эпир тата мӗнле майпа кӑтартма пултаратпӑр? Конгрессенче программа пайӗсем пуҫламӑшӗнче кӗвӗ яраҫҫӗ. Ҫулталӑкра икӗ хут пӗтӗм тӗнчери тӑвансем Паттерсона (Нью-Йорк штатне) пирӗн пухусенче илтӗнекен хитре кӗвӗсене ҫырма пуҫтарӑнаҫҫӗ, ҫул ҫинчи тӑкакӗсене вӗсем хӑйсем саплаштараҫҫӗ. Ҫавӑнпа та, программӑн председателӗ сире хӑвӑрӑн вырӑна ларса ҫак оркестр хатӗрленӗ кӗвве итлеме чӗнсен, айтӑр вӑл каланӑ пек тӑвар. Ҫапла эпир хамӑр чӗресене программӑна итлеме хатӗрлӗпӗр (Езд. 7:10).
8 Паянхи тӗлпулӑва эпир эпир «Царство установлено. Пусть оно придет!» ятлӑ ҫӗнӗ юрӑпа вӗҫлеме пултаратпӑр. Кашни ҫул иртекен пухура юрланӑ ҫак юрра ятарласа Турӑ Патшалӑхӗ ертсе пыма пуҫланин 100 ҫуллӑхне халалласа ҫырнӑ.
9 Паллах ӗнтӗ, ҫак ҫӗнӗ юрӑсем — Иеговӑран тухакан ырӑлӑх (Матф. 12:35а). Айтӑр ҫӗнӗ юрӑсене вӗренсе вӗсене хамӑрӑн Турра мухтаса-чысласа чунтан юрлар! (Пс. 146:1.)