Datguddiad i Ioan
20 Ac fe welais angel yn dod i lawr allan o’r nef gydag allwedd y dyfnder a chadwyn fawr yn ei law. 2 Gafaelodd yn y ddraig, y neidr* wreiddiol, sef y Diafol a Satan, a’i rhwymo am 1,000 o flynyddoedd. 3 A dyma’n hyrddio’r ddraig i mewn i’r dyfnder a’i gau a’i selio drosti, fel na fyddai’n camarwain y cenhedloedd bellach nes i’r 1,000 o flynyddoedd ddod i ben. Ar ôl hyn, mae’n rhaid iddi gael ei rhyddhau am ychydig o amser.
4 Ac fe welais orseddau, a chafodd y rhai oedd yn eistedd arnyn nhw awdurdod i farnu. Yn wir, fe welais eneidiau’r* rhai a gafodd eu dienyddio oherwydd y dystiolaeth a roddon nhw am Iesu ac oherwydd iddyn nhw siarad am Dduw, a’r rhai nad oedden nhw wedi addoli’r bwystfil gwyllt na’i ddelw a heb dderbyn y marc ar eu talcen ac ar eu llaw. Ac fe ddaethon nhw’n fyw a rheoli’n frenhinoedd gyda’r Crist am 1,000 o flynyddoedd. 5 (Ni ddaeth gweddill y meirw yn fyw nes i’r 1,000 o flynyddoedd ddod i ben.) Dyma’r atgyfodiad cyntaf. 6 Hapus a sanctaidd yw unrhyw un sy’n cael ei godi yn yr atgyfodiad cyntaf; does gan yr ail farwolaeth ddim awdurdod dros y rhain, ond fe fyddan nhw’n offeiriaid i Dduw ac i’r Crist, a byddan nhw’n rheoli’n frenhinoedd gydag ef am y 1,000 o flynyddoedd.
7 Nawr cyn gynted ag y mae’r 1,000 o flynyddoedd wedi dod i ben, bydd Satan yn cael ei ryddhau o’i garchar, 8 ac fe fydd yn mynd allan i gamarwain y cenhedloedd hynny sydd ym mhedair cornel y ddaear, Gog a Magog, i’w casglu nhw at ei gilydd ar gyfer y rhyfel. Mae’r rhain mor niferus â thywod y môr. 9 A gwnaethon nhw ledaenu dros y ddaear gyfan ac amgylchynu gwersyll y rhai sanctaidd a’r ddinas sy’n annwyl gan Dduw. Ond daeth tân i lawr o’r nef a’u dinistrio nhw. 10 A dyma’r Diafol a oedd yn eu camarwain nhw yn cael ei hyrddio i mewn i’r llyn o dân a sylffwr, lle roedd y bwystfil gwyllt a’r gau broffwyd wedi cael eu hyrddio’n barod; a byddan nhw’n cael eu poenydio* ddydd a nos am byth bythoedd.
11 Ac fe welais orsedd fawr wen a’r Un oedd yn eistedd arni. Dyma’r ddaear a’r nef yn ffoi oddi wrtho, a doedden nhw ddim i’w gweld yn unman. 12 Ac fe welais y meirw, y rhai mawr a’r rhai bach, yn sefyll o flaen yr orsedd, a chafodd sgroliau eu hagor. Ond cafodd sgrôl arall ei hagor; hynny yw, sgrôl y bywyd. Cafodd y meirw eu barnu ar sail y pethau a oedd wedi cael eu hysgrifennu yn y sgroliau yn ôl eu gweithredoedd. 13 A gwnaeth y môr ildio’r meirw oedd ynddo, a gwnaeth marwolaeth a’r Bedd* ildio’r meirw ynddyn nhw, ac fe gawson nhw eu barnu fel unigolion yn ôl eu gweithredoedd. 14 A chafodd marwolaeth a’r Bedd* eu hyrddio i mewn i’r llyn o dân. Mae hyn yn golygu’r ail farwolaeth, y llyn o dân. 15 Ar ben hynny, cafodd pwy bynnag nad oedd â’i enw wedi ei ysgrifennu yn llyfr y bywyd ei hyrddio i mewn i’r llyn o dân.