Hogi Ein Sgiliau yn y Weinidogaeth—Hyfforddi Myfyrwyr y Beibl i Ddatblygu Arferion Astudio Da

Pam Mae’n Bwysig? Er mwyn i fyfyrwyr y Beibl aeddfedu’n ysbrydol, nid yw bwydo eu meddyliau a’u calonnau ar ddysgeidiaethau elfennol y Beibl yn ddigon. (Heb. 5:12–6:1) Mae astudio yn mynnu ymdrech. Mae’n gofyn am gysylltu gwybodaeth newydd â’r hyn rydyn ni’n ei wybod yn barod, ac yna gweld y gwerth ymarferol. (Diar. 2:1-6) Bydd dysgu sut i wneud ymchwil bersonol yn galluogi myfyrwyr i ateb eu cwestiynau am y Beibl drwy ddefnyddio ein llenyddiaeth Gristnogol. Bydd yr ymdrech i roi ar waith yr hyn y maen nhw’n ei ddysgu yn eu harfogi nhw i wrthsefyll treialon y bydden nhw’n eu hwynebu fel Cristnogion.—Luc 6:47, 48.

Sut i Fynd Ati?

Pwysleisiwch y pwysigrwydd o geisio help Jehofa drwy weddïo arno cyn pob sesiwn astudio.—Ioan 14:26; 1 Cor. 2:10.
O’r cychwyn, anogwch eich myfyriwr i baratoi ymlaen llaw ar gyfer ei astudiaeth Feiblaidd. Dangoswch iddo eich copi astudio chi, a dysgwch iddo sut i danlinellu’r geiriau neu’r ymadroddion allweddol yn unig.
Gofynnwch i’r myfyriwr ateb yn ei eiriau ei hun. Peidiwch â throi’r astudiaeth yn sesiwn holi ac ateb sych a diflas lle bydd y myfyriwr yn darllen ei atebion yn syth o’r llyfr.
Anogwch eich myfyriwr i ddarllen rhan o Air Duw bob dydd. Dangoswch iddo raglen astudio’r Beibl ar jw.org sy’n dangos ffordd ymarferol o wneud hyn. Mae angen bod yn benderfynol o feithrin yr arfer o ddarllen y Beibl yn ddyddiol, ond bydd yr ymdrech yn werth chweil.—Salm 1:2, 3.
Gan ddefnyddio Watchtower Library neu LLYFRGELL AR-LEIN y Tŵr Gwylio, dangoswch i’ch myfyriwr sut i ddod o hyd i atebion i’w cwestiynau. Eglurwch beth yw ystyr y symbolau mnemonig ar gyfer y llenyddiaeth rydyn ni’n ei defnyddio’n rheolaidd yn ein cyfarfodydd.

Rhowch Gynnig ar Hyn yn Ystod y Mis:

Ar ddiwedd is-bennawd neu bennod, gofynnwch i’ch myfyriwr grynhoi mewn ychydig frawddegau yr hyn y maen nhw newydd ei ddysgu. Os nad ydych yn astudio â rhywun, ceisiwch grynhoi mewn ychydig frawddegau rai adnodau o’r Beibl, neu baragraff o’r Tŵr Gwylio, a hynny er mwyn gwella eich sgiliau darllen a deall.