BYDDWCH YN WYLIADWRUS!

Saethu Ofnadwy ar Draws y Byd—Beth Mae’r Beibl yn ei Ddweud?

DIWEDDARIAD: Ebrill 27, 2023

Mae’r nifer brawychus o bobl sy’n cael eu saethu’n farw o gwmpas y byd yn parhau i godi. Dyma ond ychydig o enghreifftiau diweddar.

“Mae’r Unol Daleithiau yn torri’r record eleni ar gyfer y nifer o achosion o saethu torfol, gydag un yn digwydd bob wythnos bron.”—Ebrill 21, 2023, The Guardian.
“Cafodd deg aelod o’r un teulu, gan gynnwys saith menyw a bachgen 13 oed, eu saethu mewn tŷ yn Ne Affrica.”—Ebrill 21, 2023, AP News.
“Yn yr Almaen, cafodd chwech o bobl eu saethu’n farw mewn addoldy Tystion Jehofa yn Hamburg gan ddyn a laddodd ei hun wedyn.”—Mawrth 10, 2023, Reuters.

Mae’r Beibl yn rhoi cysur i’r rhai sy’n dioddef o ganlyniad i ddigwyddiadau trasig fel hyn. I weld un esiampl, gwyliwch y fideo DeJanerio Brown: Wedi Torri ond Nid yn Llwyr.

Mae’r Beibl hefyd yn ein helpu ni i ddeall pam mae pethau torcalonnus fel hyn yn digwydd. I ddechrau meddwl am yr ateb, gwyliwch y fideo Pam Mae Duw yn Caniatáu Dioddefaint?

Yn ystod mis Gorffennaf 2022, roedd nifer o achosion o saethu ar draws y byd:

“Roedd llofruddiaeth un o wleidyddion mwyaf adnabyddus Japan, [y cyn-Brif Weinidog Shinzo Abe] yn sioc fawr i bobl y wlad, ac i bobl ledled y byd, yn enwedig o ystyried y lefelau isel o drosedd yn Japan a’r deddfau llym yn ymwneud â gynnau.”—Gorffennaf 10, 2022, The Japan Times.
“Mae pobl Denmarc wedi cael braw ar ôl i ddyn saethu tri yn farw mewn canolfan siopa yn Copenhagen.”—Gorffennaf 4, 2022, Reuters.
“De Affrica: 15 wedi marw ar ôl i ddynion ddechrau saethu pobl mewn bar yn Soweto.”—Gorffennaf 10, 2022, The Guardian.
“Dros benwythnos Gorffennaf 4 cafodd fwy na 220 eu saethu’n farw yn UDA.”—Gorffennaf 5, 2022, CBS News.

A oes unrhyw obaith y bydd trais o’r fath yn dod i ben? Beth mae’r Beibl yn ei ddweud?

Diwedd ar Drais

Mae’r Beibl yn disgrifio’r amser rydyn ni’n byw ynddo fel y “dyddiau olaf,” ac yn dweud y byddai pobl yn ymddwyn yn ffyrnig, yn greulon, ac yn wyllt. (2 Timotheus 3:1, 3) Mae pobl yn byw mewn ofn oherwydd y trais. (Luc 21:11) Ond mae’r Beibl yn addo y bydd trais yn dod i ben yn fuan, a bydd pawb “yn byw mewn cymunedau saff, tai diogel, a lleoedd i orffwys yn dawel.” (Eseia 32:18) Sut bydd hynny’n digwydd?

Bydd Duw yn cael gwared ar bobl ddrwg ac yn dinistrio holl arfau’r byd.

“Bydd pobl ddrwg yn cael eu gyrru i ffwrdd . . . o’r tir.”—Diarhebion 2:22.
“[Mae Duw yn] dod â rhyfeloedd i ben drwy’r ddaear gyfan; mae’n malu’r bwa ac yn torri’r waywffon, ac yn llosgi cerbydau rhyfel mewn tân.”—Salm 46:9.

Bydd Duw yn cael gwared ar wraidd y broblem drwy ddysgu pobl i fyw mewn heddwch.

“Fydd neb yn gwneud drwg nac yn dinistrio dim ar y mynydd sydd wedi’i gysegru i mi. Fel mae’r môr yn llawn dop o ddŵr, bydd y ddaear yn llawn pobl sy’n nabod yr ARGLWYDD.”—Eseia 11:9.
Hyd yn oed heddiw, mae Duw yn dysgu pobl ledled y byd i droi eu cefnau ar drais, i stopio defnyddio arfau, ac i guro “eu cleddyfau yn sychau aradr a’u gwaywffyn yn grymanau tocio.”—Micha 4:3.

I ddysgu mwy am addewid y Beibl am fyd heb ofn, darllenwch yr erthygl “Freedom From Fear—Is It Possible?”

I ddysgu mwy am ddiwedd i drais, darllenwch yr erthygl “Peace on Earth at Last!”