Tystiolaethu’n Drylwyr
1.Pa esiampl dda a osododd yr apostol Paul yn ei weinidogaeth?
1 Dywedodd Paul wrth Timotheus y dylai gyflawni “holl ofynion” ei weinidogaeth. (2 Tim. 4:5) Roedd gan Paul bob hawl i annog Timotheus yn hyn o beth. Yn wir, rhwng 47 a 56 OG, roedd Paul wedi bod ar dair taith genhadol. Mae llyfr yr Actau’n sôn yn aml am y ffordd drylwyr y bu Paul yn tystiolaethu. (Act. 23:11; 28:23) Sut gallwn ni dystiolaethu’n drylwyr heddiw?
2.Sut gallwn ni fod yn drylwyr wrth bregethu o dŷ i dŷ?
2 O Dŷ i Dŷ: Er mwyn siarad â phobl nad ydyn nhw erioed wedi clywed y newyddion da, efallai y bydd rhaid inni alw ar amser gwahanol. Mae’n bosibl y bydd mwy o ddynion gartref gyda’r nos neu ar y penwythnos. Dylen ni geisio siarad â rhywun ym mhob tŷ, gan ddychwelyd dro ar ôl tro i’r tai lle nad oedd neb gartref. Os ydyn ni’n dal yn methu siarad â rhywun, rhaid inni gofio bod Jehofah yn defnyddio’r ‘angylion yng nghanol y nef’ i hyrwyddo’r gwaith.—Dat. 14:6.
3.Pa gyfle sydd gennych chi i dystiolaethu’n gyhoeddus ac yn anffurfiol?
3 Yn Gyhoeddus ac yn Anffurfiol: Mae gweision Jehofah yn cyhoeddi “doethineb” i bawb sy’n fodlon gwrando. Weithiau maen nhw’n gwneud hyn “yn y stryd” neu “yn y sgwâr.” (Diar. 1:20, 21) Yn ein bywydau bob dydd, ydyn ni’n edrych am gyfle i dystiolaethu? Ydyn ni’n “ymroi yn llwyr i bregethu’r Gair”? (Act. 18:5) Os felly, rydyn ni’n tystiolaethu’n drylwyr.—Act. 10:42; 17:17; 20:20, 21, 24.
4. Sut mae gweddïo a myfyrio yn ein helpu ni i dystiolaethu’n drylwyr?
4 Weithiau, oherwydd diffyg hyder, fe allwn ni ymatal rhag tystiolaethu. Wrth gwrs, mae Jehofah yn deall bod terfyn ar ein gallu. (Salm 103:14) Serch hynny, pan gawn ni’r cyfle i dystiolaethu, fe allwn ni weddïo am help Jehofah i siarad yn ddewr. (Act. 4:29, 31) Hefyd, wrth astudio Gair Duw a myfyrio arno, rydyn ni’n dod i werthfawrogi rhagoriaeth y newyddion da. (Phil. 3:8) Yna, fe fyddwn ni’n awyddus i’w cyhoeddi’n selog!
5. Sut gallwn ni gael rhan yn y gwaith o gyflawni proffwydoliaeth Joel?
5 Rhagfynegodd y proffwyd Joel na fyddai pobl Dduw yn gadael i unrhyw beth eu hatal rhag pregethu yn y cyfnod cyn i ddydd mawr Jehofah ddod. (Joel 2:2, 7-9) Chawn ni byth mo’r cyfle i gymryd rhan yn y gwaith hwn eto. Felly, gadewch inni wneud popeth y gallwn ni nawr!