Mae llawer wedi rhoi’r gorau i fynychu gwasanaethau crefyddol oherwydd nad ydyn nhw’n cael cysur nac arweiniad. Pam, felly, y dylech chi fynychu cyfarfodydd Cristnogol sydd wedi eu trefnu gan Dystion Jehofa? Beth gallwch chi ei ddisgwyl?

Cwmni pobl gariadus. Fe wnaeth Cristnogion y ganrif gyntaf ffurfio cynulleidfaoedd a chynnal cyfarfodydd er mwyn addoli Duw, astudio’r Ysgrythurau, ac annog ei gilydd. (Hebreaid 10:24, 25) Oherwydd awyrgylch cynnes eu cyfarfodydd, roedden nhw’n teimlo’n hapus ymhlith gwir ffrindiau—eu brodyr ysbrydol. (2 Thesaloniaid 1:3; 3 Ioan 14) Rydyn ni’n dilyn yr un patrwm, ac yn teimlo’r un llawenydd.

Dysgu rhoi egwyddorion y Beibl ar waith. Fel yr oedd yn digwydd yn adeg y Beibl, mae dynion, merched, a phlant i gyd yn cyfarfod gyda’i gilydd. Mae athrawon cymwys yn defnyddio’r Beibl i’n helpu ni i ddeall sut gallwn ni roi egwyddorion y Beibl ar waith yn ein bywydau bob dydd. (Deuteronomium 31:12; Nehemeia 8:8) Gall pawb fynegi eu gobaith Cristnogol drwy gymryd rhan yn y trafodaethau a’r canu.—Hebreaid 10:23.

Cryfhau eich ffydd yn Nuw. Dywedodd yr apostol Paul wrth un o gynulleidfaoedd ei gyfnod ef: “Y mae hiraeth arnaf am eich gweld, er mwyn . . . [i mi] gael fy nghalonogi ynghyd â chwi trwy’r ffydd sy’n gyffredin i’r naill a’r llall ohonom.” (Rhufeiniaid 1:11, 12) Wrth gyfarfod yn rheolaidd â’n cyd-addolwyr, bydd ein ffydd yn cryfhau ac fe fyddwn ni’n fwy penderfynol o fyw bywyd Cristnogol.

Beth am ichi dderbyn y gwahoddiad hwn i fynychu’r cyfarfod nesaf a gweld y pethau hyn â’ch llygaid eich hun? Mae’r cyfarfodydd yn rhad ac am ddim—does dim casgliad, a bydd croeso cynnes ichi.

• Pa batrwm rydyn ni’n ei ddilyn yn ein cyfarfodydd?

• Pa les sy’n dod o fynychu cyfarfodydd Cristnogol?

Mewn rhai gwledydd, mae Tystion Jehofa yn gorfod teithio drwy’r jyngl neu drwy dywydd garw er mwyn mynychu’r cyfarfodydd Cristnogol. Pam mae Tystion Jehofa yn ymdrechu gymaint i gymdeithasu â’u cyd-addolwyr a hynny er gwaethaf blinder a phroblemau bywyd?

Mae’n gwneud lles inni. Roedd Paul yn siarad am aelodau’r gynulleidfa pan ddywedodd y dylen ni “ystyried sut y gallwn ennyn yn ein gilydd gariad a gweithredoedd da.” (Hebreaid 10:24) Mae hyn yn gofyn inni feddwl am ein gilydd a dod i adnabod ein gilydd yn dda. Gall dod i adnabod teuluoedd Cristnogol eraill ein helpu ni i wynebu ein problemau, oherwydd bod rhai o’r teuluoedd hynny wedi llwyddo i oresgyn problemau tebyg yn y gorffennol.

Mae’n meithrin cyfeillgarwch. Ffrindiau go iawn yw ein cyd-addolwyr nid ffrindiau arwynebol. Rydyn ni’n treulio amser gyda’n gilydd yn y cyfarfodydd ac wrth fwynhau adloniant iach. Sut mae cymdeithasu fel hyn yn ein helpu? Rydyn ni’n dysgu gwerthfawrogi ein gilydd, ac mae hyn yn cryfhau ein cyfeillgarwch. Oherwydd bod perthynas gref rhyngddon ni a’n brodyr, byddwn ni’n barod i’w helpu pan fyddan nhw’n wynebu problemau. (Diarhebion 17:17) Drwy gymdeithasu â phawb yn y gynulleidfa, rydyn ni’n dangos ‘yr un gofal dros ein gilydd.’—1 Corinthiaid 12:25, 26.

Rydyn ni yn eich annog i ddewis  ffrindiau  sy’n  gwneud ewyllys Duw. Fe gewch chi ffrindiau da fel hyn ymhlith Tystion Jehofa. Peidiwch â dal yn ôl rhag cymdeithasu â  ni.

• Pam mae cymdeithasu â’n gilydd yn y cyfarfodydd yn gwneud lles inni?

• Pryd y byddech chi’n hoffi dod i gwrdd â phawb yn y gynulleidfa?

Yn y ganrif gyntaf, roedd y Cristnogion cynnar yn dod at ei gilydd i ddarllen a thrafod yr Ysgrythurau, i weddïo a chanu. Doedd dim defodau’n perthyn i’w haddoli. (1 Corinthiaid 14:26) Dyna sy’n digwydd hefyd yn ein cyfarfodydd ni.

Mae’r arweiniad yn seiliedig ar y Beibl ac yn ymarferol. Ar y penwythnos, mae pob cynulleidfa yn cyfarfod i wrando ar anerchiad Beiblaidd 30 munud o hyd sy’n trafod sut mae’r Beibl yn berthnasol i’n bywydau ac i’n dyddiau ni. Mae pawb yn cael eu hannog i ddilyn y drafodaeth drwy ddefnyddio eu Beiblau eu hunain. Ar ôl yr anerchiad, mae Astudiaeth o’r “Watchtower” yn para am awr. Yn yr astudiaeth hon, mae aelodau’r gynulleidfa yn trafod erthygl yn y rhifyn astudio o’r Watchtower. Mae’r drafodaeth hon yn ein helpu i roi arweiniad y Beibl ar waith yn ein bywydau. Mae’r un wybodaeth yn cael ei thrafod ym mhob un o’r mwy na 110,000 o gynulleidfaoedd ar draws y byd.

Rydyn ni’n cael ein helpu i ddatblygu fel athrawon. Rydyn ni hefyd yn cyfarfod ar un noson ganol wythnos. Mae tair rhan i’r cyfarfod hwn, a elwir Ein Bywyd a’n Gweinidogaeth Gristnogol, sy’n seiliedig ar ddeunydd Gweithlyfr y Cyfarfod misol. Mae’r rhan gyntaf, Trysorau o Air Duw, yn ein helpu ni i ddod yn gyfarwydd â rhan benodol o’r Beibl y mae’r gynulleidfa wedi’i darllen wrth baratoi. Nesaf, mae Rhoi Ein Sylw i’r Weinidogaeth, sy’n cynnwys dangosiadau i’n dysgu ni sut i drafod y Beibl gydag eraill. Mae cynghorwr yn cynnig sylwadau sy’n ein helpu i wella ein sgiliau darllen a siarad. (1 Timotheus 4:13) Mae’r rhan olaf, Ein Bywyd Cristnogol, yn rhoi ar waith egwyddorion y Beibl yn ein bywyd bob dydd. Mae hon yn cynnwys cwestiynau ac atebion i ddyfnhau ein dealltwriaeth o’r Beibl.

Rydyn ni’n hyderus y bydd safon yr addysg Feiblaidd sydd ar gael yn ein cyfarfodydd yn gwneud argraff ffafriol arnoch chi.—Eseia 54:13.

• Beth sy’n digwydd yng nghyfarfodydd Tystion Jehofa?

• Pa un o’n cyfarfodydd wythnosol hoffech chi ei fynychu nesaf?

Ydych chi wedi sylwi ar ba mor smart yw gwisg Tystion Jehofa yn y lluniau sydd yn y llyfryn hwn? Pam rydyn ni’n rhoi sylw i’r ffordd rydyn ni’n gwisgo?

I ddangos parch tuag at ein Duw. Mae’n wir fod Duw yn gweld y tu hwnt i’r hyn sydd ar y tu allan. (1 Samuel 16:7) Er hynny, wrth inni ddod at ein gilydd i addoli, rydyn ni’n awyddus i ddangos parch at Dduw ac at ein cyd-addolwyr. Pe baen ni’n sefyll o flaen barnwr mewn llys, mae’n debyg y bydden ni’n gwisgo’n smart i ddangos parch tuag at ei swydd. Yn yr un modd, mae gwisgo’n smart yn ein cyfarfodydd yn dangos parch tuag at Jehofa, “Barnwr yr holl ddaear,” ac at y lle rydyn ni yn Ei addoli ef.—Genesis 18:25.

I ddangos ein gwerthoedd. Mae’r Beibl yn annog Cristnogion i fod yn “wylaidd a diwair” yn eu gwisg. (1 Timotheus 2:9, 10) Mae hynny’n golygu ein bod ni’n osgoi gwisgo mewn ffordd sy’n tynnu sylw aton ni’n hunain, sy’n bryfoclyd, neu sy’n dangos gormod o gnawd. Hefyd, mae’n ein helpu ni i ddewis dillad deniadol a pharchus yn hytrach na dillad sydd yn flêr neu sy’n dilyn ffasiynau eithafol. Heb ddweud yr un gair, gall gwisgo’n ddeniadol addurno “athrawiaeth Duw” a’i “ogoneddu.” (Titus 2:10; 1 Pedr 2:12) Mae gwisgo’n smart ar gyfer ein cyfarfodydd yn gwneud gwahaniaeth i agwedd pobl eraill tuag at addoli Jehofa.

Bydd croeso cynnes ichi yn y cyfarfodydd hyd yn oed os nad ydych chi’n medru gwisgo’n ffurfiol. Nid oes angen gwisgo’n ddrud nac yn ffansi i’ch dillad fod yn addas, yn lân, ac yn daclus.

• Pa mor bwysig yw ein gwisg wrth addoli Duw?

• Pa egwyddorion sy’n effeithio ar ein dewisiadau ynglŷn â’n gwisg?

Os ydych chi’n astudio’r Beibl ag un o Dystion Jehofa, mae’n debyg eich bod chi’n edrych dros y deunydd o flaen llaw. Er mwyn elwa’n llawn ar y cyfarfodydd, peth da fyddai paratoi yn yr un modd. Bydd astudio’n gyson yn dwyn ffrwyth ichi.

Penderfynwch pa bryd y gallwch astudio ac ym mha le. Pa bryd yw’r amser gorau ichi ganolbwyntio? Ai’n gynnar yn y bore, cyn mynd i’r gwaith neu gyda’r nos ar ôl i’r plant fynd i’w gwelyau? Hyd yn oed os nad ydych chi’n gallu astudio am gyfnod hir, penderfynwch faint o amser y gallwch ei roi o’r neilltu a pheidiwch â gadael i bethau eraill dorri ar eich traws. Dewiswch rywle distaw a diffoddwch y radio, y teledu, y ffôn symudol neu unrhyw beth arall a allai dynnu eich sylw. Bydd gweddïo cyn astudio yn eich helpu chi i anghofio am eich pryderon ac i ganolbwyntio ar Air Duw.—Philipiaid 4:6, 7.

Ysgrifennwch nodiadau a byddwch yn barod i gyfrannu. Dechreuwch drwy fwrw bras olwg dros y deunydd. Ystyriwch deitl yr erthygl neu’r bennod a’r ffordd mae’r isbenawdau’n cysylltu â’r thema. Edrychwch ar y lluniau a’r cwestiynau adolygu i weld beth yw’r prif bwyntiau. Yna, darllenwch bob paragraff a chwiliwch am yr atebion i’r cwestiynau. Darllenwch yr adnodau y cyfeirir atyn nhw, ac ystyriwch sut maen nhw’n cefnogi’r hyn sy’n cael ei ddweud. (Actau 17:11) Ar ôl dod o hyd i’r ateb, tanlinellwch ychydig o eiriau neu ambell frawddeg allweddol a fydd yn dwyn yr ateb yn ôl i’ch cof. Wedyn, fe allwch chi godi eich llaw yn y cyfarfod a gwneud sylw byr yn eich geiriau eich hun.

Bydd astudio’r pynciau sy’n cael eu trafod yn ein cyfarfodydd yn cyfrannu at eich ‘trysorfa’ o wybodaeth Feiblaidd.—Mathew 13:51, 52.

• Sut gallwch drefnu eich amser er mwyn paratoi’n rheolaidd ar gyfer y cyfarfodydd?

• Sut gallwch chi baratoi er mwyn gwneud sylw yn y cyfarfodydd?

Mae Jehofa bob amser wedi annog teuluoedd i dreulio amser gyda’i gilydd er mwyn eu cryfhau eu hunain yn ysbrydol. (Deuteronomium 6:6, 7) Dyna pam mae Tystion Jehofa yn neilltuo amser bob wythnos i addoli fel teuluoedd. Mewn awyrgylch anffurfiol, maen nhw’n trafod pynciau ysbrydol sydd wedi eu teilwra ar gyfer anghenion y teulu. Hyd yn oed os ydych chi’n byw ar eich pen eich hun, gallwch agosáu at Dduw drwy ddewis prosiect Beiblaidd i’w astudio.

Mae’n gyfle i nesáu at Jehofa. “Nesewch at Dduw, ac fe nesâ ef atoch chwi.” (Iago 4:8) Rydyn ni’n dod i adnabod Jehofa yn well drwy ddysgu am ei bersonoliaeth a’i weithgareddau yn ei Air, y Beibl. Ffordd hawdd o ddechrau’r addoliad teuluol yw darllen rhan o’r Beibl yn uchel drwy ddilyn efallai raglen Cyfarfod Ein Bywyd a’n Gweinidogaeth. Gellir aseinio rhai adnodau i bob aelod o’r teulu, a thrafod wedyn yr hyn rydych wedi ei ddysgu.

Mae’n gyfle i glosio at ein gilydd fel teulu. Pan fydd teuluoedd yn astudio’r Beibl, bydd y berthynas rhwng gwŷr a gwragedd, a rhwng rhieni a phlant yn cael ei chryfhau. Dylai’r amser hwn fod yn hapus a heddychlon ac yn rhywbeth y mae pawb yn edrych ymlaen ato. Gall rhieni ddewis pynciau sydd yn ymarferol ac yn addas i oedran eu plant, efallai drwy ddefnyddio erthyglau o’r Watchtower a’r Awake! neu o’n gwefan jw.org. Mae’n gyfle ichi drafod unrhyw broblemau sydd wedi codi yn yr ysgol, a sut i ddelio gyda nhw. Ydych wedi meddwl am wylio rhaglen oddi ar JW Broadcasting (tv.jw.org) ac wedyn ei thrafod fel teulu? Braf fyddai ymarfer efallai rai o’r caneuon ar gyfer y cyfarfodydd, a chael rhywbeth i’w fwyta ar ôl ichi orffen.

Mae’r amser rydyn ni’n ei dreulio bob wythnos yn addoli Jehofa fel teulu yn ein helpu ni i fwynhau astudio Gair Duw. Mae Jehofa yn sicr o fendithio eich ymdrechion!—Salm 1:1-3.

• Pam rydyn ni’n neilltuo amser bob wythnos ar gyfer yr addoliad teuluol?

• Sut gall rhieni sicrhau bod yr addoliad teuluol yn brofiad hapus i bawb?

Pam mae’r bobl yn y llun yn edrych yn hapus? Oherwydd eu bod nhw’n mynychu un o’n cynulliadau. Fel gweision Duw yn y gorffennol a gafodd eu cyfarwyddo i ddod at ei gilydd dair gwaith y flwyddyn, rydyn ninnau hefyd yn edrych ymlaen at ein cynulliadau mawr. (Deuteronomium 16:16) Bob blwyddyn rydyn ni’n cynnal tri digwyddiad: dau gynulliad cylchdaith undydd ac un gynhadledd ranbarthol sy’n para am dridiau. Sut mae mynd i’r cynulliadau hyn yn ein helpu ni?

Maen nhw’n cryfhau’r frawdoliaeth Gristnogol. Roedd yr Israeliaid yn mwynhau moli Jehofa yn un gynulleidfa fawr ac rydyn ninnau hefyd yn mwynhau addoli gyda’n gilydd ar achlysuron arbennig. (Salm 26:12; 111:1) Yn y cynulliadau hyn, rydyn ni’n cael y cyfle i gwrdd â Thystion o gynulleidfaoedd eraill, neu hyd yn oed o wledydd eraill. Rydyn ni hefyd yn gallu bwyta gyda’n gilydd amser cinio ac mae hynny’n ychwanegu at awyrgylch cyfeillgar yr achlysuron ysbrydol hyn. (Actau 2:42) Yn y cynulliadau, rydyn ni’n medru gweld â’n llygaid ein hunain y cariad sy’n uno ‘teulu’r ffydd’ trwy’r byd i gyd.—1 Pedr 2:17.

Maen nhw yn ein helpu i dyfu’n ysbrydol. Roedd “deall yr hyn” a gafodd ei egluro i’r Israeliaid yn gwneud lles iddyn nhw. (Nehemeia 8:8, 12) Rydyn ninnau hefyd yn gwerthfawrogi cael ein hyfforddi o’r Beibl yn ein cynulliadau. Mae gan bob un ei thema Ysgrythurol. Trwy wrando ar anerchiadau diddorol a gwylio cyflwyniadau sydd yn ail-greu gwahanol sefyllfaoedd, rydyn ni’n dysgu gwneud ewyllys Duw yn ein bywydau. Calonogol iawn yw gwrando ar brofiadau rhai sy’n llwyddo i fyw bywyd Cristnogol a hynny er gwaethaf anawsterau y dyddiau anodd hyn. Yn y cynadleddau rhanbarthol, rydyn ni’n dysgu gwersi ymarferol drwy wylio dramâu sy’n dod â hanes y Beibl yn fyw inni. Ym mhob cynulliad, mae cyfle i’r rhai sydd wedi eu hymgysegru i Dduw gael eu bedyddio.

• Pam mae’r cynulliadau yn achlysuron llawen?

• Sut rydyn ni’n elwa ar fynychu cynulliadau?

Ychydig cyn iddo farw, dywedodd Iesu: “Ac fe gyhoeddir yr Efengyl hon am y deyrnas drwy’r byd i gyd fel tystiolaeth i’r holl genhedloedd, ac yna y daw’r diwedd.” (Mathew 24:14) Ond sut byddai’r gwaith pregethu yn cael ei gyflawni drwy’r byd? Trwy ddilyn yr esiampl a osododd Iesu pan oedd ar y ddaear.—Luc 8:1.

Rydyn ni’n ceisio siarad â phobl yn eu cartrefi. Hyfforddodd Iesu ei ddisgyblion i bregethu o dŷ i dŷ. (Mathew 10:11-13; Actau 5:42; 20:20, BC) Yn y ganrif gyntaf, cafodd efengylwyr eu hanfon i ardaloedd penodol i bregethu. (Mathew 10:5, 6; 2 Corinthiaid 10:13) Heddiw, rydyn ninnau hefyd yn pregethu mewn modd trefnus, ac mae gan bob cynulleidfa ei thiriogaeth benodol ei hun. Mae gwneud hyn, yn caniatáu inni fod yn drwyadl wrth “bregethu i’r bobl” yn unol â gorchymyn Iesu.—Actau 10:42.

Rydyn ni’n ceisio dod o hyd i bobl le bynnag y maen nhw. Gosododd Iesu’r esiampl drwy bregethu ar lan y môr, wrth ymyl y ffynnon leol, ac mewn mannau cyhoeddus eraill. (Marc 4:1; Ioan 4:5-15) Rydyn ni hefyd yn siarad â phobl am y Beibl ym mhob man—ar y strydoedd, mewn busnesau, mewn parciau, neu dros y ffôn. Rydyn ni hefyd yn siarad â’n cymdogion, ein cyd-weithwyr, ein cyd-ddisgyblion, a’n perthnasau, pan fydd cyfle’n codi. Oherwydd yr ymdrechion hyn, mae miliynau wedi clywed y newyddion da bod iachawdwriaeth ar gael.—Salm 96:2.

Ydych chi’n adnabod rhywun a fyddai’n hoffi clywed y newyddion da am Deyrnas Dduw? Meddyliwch am yr effaith y bydd hynny yn ei chael ar eu dyfodol nhw. Peidiwch â dal yn ôl rhag rhannu’r neges hyfryd hon ag eraill!

• Pa neges am y Deyrnas sydd angen ei chyhoeddi?

• Sut mae Tystion Jehofa yn efelychu dulliau Iesu o bregethu?

Yn aml, mae’r gair “arloeswr” yn cyfeirio at rywun sy’n mentro i ardaloedd newydd, ac sy’n paratoi’r ffordd i’r rhai sy’n dod ar ei ôl. Ar un olwg, roedd Iesu’n arloeswr oherwydd ei fod wedi dod i’r ddaear er mwyn cyflawni gweinidogaeth a fyddai’n agor y ffordd i eraill gael iachawdwriaeth. (Mathew 20:28) Heddiw, mae ei ddilynwyr yn dilyn ei esiampl drwy dreulio cymaint o amser ag sy’n bosibl yn ‘gwneud disgyblion.’ (Mathew 28:19, 20) Ymhlith Tystion Jehofa, mae rhai’n gallu gwasanaethu fel arloeswyr.

Mae arloeswr yn pregethu’n llawn amser. Mae Tystion Jehofa i gyd yn cyhoeddi’r newyddion da. Ond mae rhai wedi trefnu eu hamser, fel arfer drwy wneud llai o waith cyflogedig, er mwyn bod yn rhydd i bregethu am 70 awr y mis fel arloeswyr parhaol. Mae eraill yn cael eu dewis i fod yn arloeswyr arbennig mewn ardaloedd lle mae angen mawr am gyhoeddwyr y Deyrnas. Maen nhw’n treulio 130 o oriau neu fwy yn y weinidogaeth bob mis. Mae arloeswyr yn fodlon byw bywyd syml oherwydd eu bod yn hyderus y bydd Jehofa yn gofalu amdanyn nhw. (Mathew 6:31-33; 1 Timotheus 6:6-8) Nid pawb sy’n gallu arloesi’n llawn amser, ond mae rhai’n medru bod yn arloeswyr cynorthwyol drwy dreulio 30 neu 50 awr y mis yn y gwaith pregethu.

Cariad at Dduw a chariad at bobl eraill sy’n ysgogi arloeswyr. Fel Iesu, rydyn ni’n sylweddoli bod gwir angen i bobl glywed am Dduw a’i fwriadau. (Marc 6:34) Ond mae gennyn ni wybodaeth a all helpu pobl heddiw yn ogystal â rhoi gobaith pendant iddyn nhw ar gyfer y dyfodol. Oherwydd cariad tuag at eu cymdogion, mae arloeswyr yn rhoi’n hael o’u hamser a’u hegni er mwyn helpu eraill yn ysbrydol. (Mathew 22:39; 1 Thesaloniaid 2:8) O wneud hyn, mae ffydd yr arloeswyr yn cael ei chryfhau ac maen nhw’n teimlo’n hapusach ac yn agosach at Dduw.—Actau 20:35.

• Beth yw gwaith arloeswr?

• Beth sy’n ysgogi rhai i arloesi’n llawn-amser?

Mae addysg Gristnogol wedi bod yn bwysig i Dystion Jehofa erioed. Mae hyfforddiant arbennig ar gael i helpu’r rhai sy’n pregethu’n llawn amser i ‘gyflawni holl ofynion eu gweinidogaeth.’—2 Timotheus 4:5.

Ysgol Arloesi: Ar ôl gwasanaethu am flwyddyn, mae arloeswyr yn mynd ar gwrs chwe diwrnod, sydd fel arfer yn cael ei gynnal mewn Neuadd y Deyrnas yn yr ardal. Bwriad yr ysgol yw helpu arloeswyr i glosio at Jehofa, i fod yn fwy effeithiol ym mhob agwedd ar y weinidogaeth, ac i ddal ati’n ffyddlon.

Ysgol ar Gyfer Pregethwyr y Deyrnas: Bwriad y cwrs deufis hwn yw hyfforddi arloeswyr profiadol sydd yn fodlon symud i ardal arall lle bynnag mae angen. Maen nhw’n dilyn y Pregethwr gorau erioed a oedd ar y ddaear, Iesu Grist, ac yn dweud, “Dyma fi, anfon fi.” (Eseia 6:8; Ioan 7:29) Weithiau mae symud i ardal arall yn golygu dod i arfer â safonau byw symlach, ynghyd â diwylliant, hinsawdd, a bwyd gwahanol. Efallai bydd rhaid dysgu iaith newydd. Mae’r cwrs hwn yn hyfforddi brodyr a chwiorydd sengl, a pharau priod rhwng 23 a 65 mlwydd oed. Maen nhw’n cael y cyfle i feithrin priodoleddau ysbrydol a dysgu sgiliau a fydd yn eu helpu i wasanaethu Jehofa a’i gyfundrefn yn fwy effeithiol.

Ysgol Feiblaidd Gilead y Watchtower: Yn Hebraeg, mae’r gair “Gilead” yn golygu “Carnedd y dystiolaeth.” Mae Ysgol Gilead wedi bod yn llwyddiant mawr. Er 1943, mae mwy nag 8,000 o genhadon Gilead wedi cael eu hanfon i dystiolaethu “hyd eithaf y ddaear.” (Actau 13:47) Cyn i genhadon gyrraedd Periw, doedd dim un gynulleidfa yno, ond heddiw mae mwy na 1,000 ohonyn nhw. Pan ddechreuodd ein cenhadon wasanaethu yn Japan, llai na deg Tyst oedd yno. Heddiw, mae mwy na 200,000. Mae Ysgol Gilead yn para am bum mis ac yn ystod y cwrs mae myfyrwyr yn astudio Gair Duw yn drwyadl. Mae arloeswyr arbennig, cenhadon yn y maes, y rhai sy’n gweithio mewn swyddfeydd cangen, arolygwyr cylchdaith a’u gwragedd yn cael gwahoddiad i’r ysgol hon. Yno, maen nhw’n derbyn hyfforddiant arbennig i’w helpu nhw i sefydlu a chryfhau y gwaith byd-eang.

• Beth yw bwriad yr Ysgol Arloesi?

• Pwy sy’n cael mynd i’r Ysgol ar Gyfer Pregethwyr y Deyrnas?