Minming Tuh Hunghae Mou?

ZAHOVA ccaecceihae rynawtuh nangte houh nykulang te sahngang kulang nynhthua. Nangte minming khah innpawlopaw kya thuasah, ryalaw kheihnaw kya thuasah, ningtakyh ryalawnaw hangkhahkheih kya natung kuhkho oh. Cciabungthung naw langpi kya magazines ccaw ane haepaw khah nahmui boimaming cih (or) nae thua kahking kya bya nahokuh boi maming cihoh.

Ametetuh, Zahova ccaeccei hae nahanglang hoinaw pe akihae paw nynh athuahae. Nahvaeccah hoipawlang tangryhae. Minming kong, minming zynnaw, mihbu, ccungccaw tungvawte ahbalyng a-ung nawohpaw ee laephivaw e mihmuinaw khah nang hopya aeryhae. Ee enaw accing khonawlang ee ccah-uk taraw hynh nang nahanglang atho hae.

Zahova ccaecceihae alunghua tuh mingccangpawhae te alokuh hae. Hoirungnaw langte (sipuazei), pyngsawlangte, lungthinglang temah piatccanaa ahoibua klanghae. Mimingtuh accinghaepaw, muisaw hoihaepaw, aseiboi leihaepaw athuakhyh haekeiccuze vaekhahkheih seinaw araethyaboi hae. Thuaslahzemah atungboihaepawte Baebu ccaw khah peki te accangkunaw liahae te hawnaw lawkuh haezah ary abou ze rulaekunaw ahoihae. Minming tuh Pachia arypaw ryalawlang pyngpya kuhaepaw thuahaezah, tuh ee hawte hinglang azuakuhae. Miryalawnaw kyakhe Pachia byate thyamuisaw cciakhaenaw khahnynh leihccunghae.

Minming hanglang azicihua tuh mihzyngnawkhah ccungccaw tua naw (or) beihnaw zynnaw kya e thualeite Baebuccawkya e rounynhthua. Thyamuisawte PawLuhnynh ahopaw byahawte minmingmah atuabuahae- “ccungccaw blyng nynh mihbaking kunaw arohaezemah Pachia abakingkunawtuh atyng.” (Rom 3:4, Zudah-ccanga) Amepaw Baebuccaw ccangpyanaw te asekuhte zuitu PawLuh phung hopawbya thaehaezah aliaruhaepaw Biria khua e ccungccawhaehaw khahte ccaecceihae nynh tyngkring thoh akhanghae- “PawLuh byakhah lungtho te ngaehaezah metou mekhyhtou cite nykhylang, Baebuccaw khah ningtahkyhte adokhia hae.” (Zuitu 17:11) Mihmawthuasah, mingccang paw thuasah beihnaw ccangpyakunaw blynghynh Baebuccawte alokuhcihzah a kaih kucih cite Zahova ccaecceihae nynh leihzyn hae. Minming ryte hokheih tualang nangkhah kaetuh ou.

Tunkyate Zahova ccaecceihae tuh Baebuccawhynh Pachia bya ccahccingnynh athua cite azynhae cipaw alang. Baebuccah-uk 66 hynh thyamuisawte pyapawthuazah, phungpawccah-uk, (historically) kya e te mah alokuh cite azynhae. Ccahthaw leihciihaepaw Baebu hynh khrihccaw KrihBaebu cite akohae. Minmingnynh KrihBaebu te Hebru Baebu ukninghaekhah doliakuhte zynhaezah tousenawte hosenawpaw bya laelangtuh ccawkya e thahthyhte zynlangcite atua hae. Baebukya e profek byahae hynh accingbangvae, accingccia mang, abangtuh ccinglouhkhyh cite athaethyahae.

MINMING MIN

Zahova ccaecceihae cite mihmawte mihmaw akokuhae. Zahova, amawtuh Pachia nynhthua ciipawte amaw ah ee nawmiakawkhah accaeccei haenynh athuahae cinawpaw min nynhthua. “Pachia,” “Bawipaw,” “Raetu,” ciipaw hynh “Ccahmadah,” “Siangpahrang,” “Rawbawipaw” ciihawte ryalawmin nynhthua. Thuaslahzemah “Zahova” ciipawtuh apyngmin thuazah tyngremiakaw raetu alesaehuapaw cipawkhahnynh a hory. King James version Baebu nynh Sam 83:18 kyaze hynhte a ccaesah- “Zahova cite min ahoipaw amawlukheihkele nynhthua ciipawkhah ccungccaw miakaw nynh nyhhaesah.”

Zahova (or zavoi cite Roman Catholic Jerusalem Baebu te see thaw e mihawhae nynh aryhua haepaw) amintuh thotakaw naw Hebru Baebu kya avae 7,000 hang a-ung. Baebu alunghuanynh khah ee aminkhah mangleite “Zungzae Pachia” (or) “Bawipaw Pachia” cite a zeiru hae. Tuhpiaze e Baebu haemawkyahing Zahova cite amawmin khah Hebru Baebu kya pawkya hingnynh lahzeiku ciipaw hokho athua. Pawccecilangze azeiruhaepaw ccahfang khah ccahfanglepawte alahzeihae keiccuze nynhthua. Seethaw Baebu leihtuhae alung huatuh Zahova (or) Zavoi cite azeihae. Tuhkeiccuze laephithaw leih naw Baebunynh Isaiah 42:8 kyaze “kaetuh Zahova nynh kathua. Eetuh kamawmin nynh thua” cite accaesah.

Zahova ccaecceihae nynh aphukuhaepaw minkhah Isaiah 43 kya e alawhaepaw nynh thua. Tuh e kya tun laephi pi hynh bapiatuzung ccangkheih te atouse- Mingphun takyh Pachia haenynh a dingnawhae kong langsalang (or) Zahova klangte hopaw byakhah ngaelangzah amepawbya holang ko athuahae. Zahova nynh amaw aminphun haekhah hynhte aciihae- “Nangningnynh kaekhah naenyh naezyn ohzah, kame nawkong athae thyanawlanghae kaccaeccei, kaepo ohpaw se nynh nathua oh. Malangmah kaelaelang Pachia ccangpaw ungkhyh, nuhlangmah ungboikhyh. Kamaw luhkheih kele rounynh Bawipaw Pachia Zahova kahthuazah kaelaelang aekhung khotu ohpaw ungkhyh.”—Isaiah 43:10,11.

Zisu apuimawpite kum hynhsepilungkhu ZahovaPachia ccaeccei hae khaw lah ungvaehae. Abangccungccaw khah Hebru 11 kya (hmah tang) ccaw lahpyaku, Hebru 12:1 nynh hynhte aci- “Tuhkei ccuze, hynhcih alunghaepaw ccaaecceihae nynh aeningkhah ynkoh luihaezah, aening nynh ryalaw miakawthuasah vawsaw ynpyapaw (hoileinaw) thuasah vuate ahmahlang e kuetungkya athuakhonaw langoh thawzyaleite ccue ohsih.” Zisunynh PaeLah siangpharang malangze “(ame) pawphung hokhylang nynh Ee laevaw langhing kaepuizah kaethua” alah ci. Amawkhah “zyngtyngzah amepaw ccaeccei” cite ko athua. (Zan 18:37; Bia 3:14) Zisunynh azuituhae khah hynhte aci hae- “naetungvawkhe thyamuisaw yn ungvaezetuh thungnaw naemuecih ohzah, Zerusalem khuate Zudahrang, samaria rang, laephi khyzaw vawkaw kya cia kaccaeccei naetangcih oh.”—Zuitu 1:18.

Tuhkeiccuze Zisukhrihliate Zahova penaw thehoipaw byakha a tunin Rang 230 lae rangkya ahohaepaw ccungccaw 6,000,000 lae haetuh mihmawte mihmawkhah Zahova ccaecceihae ciikulang a ngae kuh cite atua hae.

[Footnote]

[Hmanthlak biu 3]

Minmingnynh nangkhah pe aeki hae

[Hmanthlak biu 4]

Amawrypaw ryalawlang Pachia klangmihpyng apyakuhae

[Hmanthlak biu 4]

Baebuccawtuh Pachiabyanynh thua cite azynhae

[Hmanthlak biu 4]

Langmaw Hebruccawkya Pachia amawmin

[Hmanthlak biu 5]

Bahpianaw zungkya tousepawte apiakupaw amin

[Hmanthlak biu 5]

Rang 230 lae rangkya ccaecceihae 6,000,000 lae