A Paw Te Zahova Lungpawnaw A Rae Paw Nopi Nung Taraw

A zuh kya nopi nung taraw hynh na muih oh tou?— Zefaccah ccahnung nynh thua. A maw min tuh Baebu kya ungkhyh sahlah zemah apaw te Zahova lungpawnaw a rae paw cipaw a ny oh. A maw te apaw kong lang ria tua oh sih.

Zefaccah tuh mihhoipaw thuazah a ccahnung kha Zahova kong lang palei a ccang pya. A maw tuh athawzung myarya hoi zah mahlang te cciakhae kho tu mah a thua. Tuhkiaccuze Israel hae nynh raw tuhnaw kya lupi lang tangpya lang a ngia hae.

Zefaccah nynh raw hae tae kho nawlang Zahova kalang sawsang te bungnaw a ngia. Raw taenaw nae pyaze innlang kaki te mahsahty yn due haw typaw kha na maw kaepya cih cite bya akin pya ku. Pachia kalang pyng a pya kuvae pawtuh a hing lung khu Beihinn kya khe zungzae ryahae langpaw nynh thua vae. Beihinn a cipaw tuh Pachia a beihnaw hae inn kha nynh aho ry. A tu Zefaccah nynh raw a tae vae! Inn lang ynki tuh a hung nynh mou mahsahty yn due haw na nyh oh tou?—

Zefaccah a ccahnung nynh thua! Luh kheih kyalya paw ccahnung athua zema a tu tuh Zefaccah tuh a ccahnung te phiaku langpaw vae. Zefaccah tuh a ngae myarya tha. Thuasalama Pachia kya bakin naw phe apya kuvae cipaw na syngtaw ung oh tou. A ccahnung nynh hynhte aho pya: ‘A Pang, Zahova kya bya phe na kinku vae kha zaw, bya na kinku hawte na rae aho’ aci pya.

Zefaccah a ccahnung tuh a ngae myarya athah cih. Beihnaw inn kya ung tuh vawpaw hoylang mah zae khyh zah ccaw sahkulang mah zae khyh. Thuasalama Zefaccah ccahnung tuh a paw bakin naw kha atyng sah ry, apiaze Zahova lung mah atua sah ry. Vawpaw hoylang zah, ccaw sahku langpaw laeze e hynh azici sa hua. Tetuh a hinglung khu Beihinn kya ryahae lang inn kyate po a pou vae.

A paw te Zahova lungpaw naw kha rae tou?— A rae! Nangning mah Zefaccah ccahnung te na loku bua ry oh ze, Zahova kha sungsah lah a bya kha ngae. Tuhte na ci oh ze tuh nae nung nae paw haete Zahova mihlung myarya atua cih.