Ame Paw Rya Zungzae Lahtu Samua

Samua tuh adihtaraw lya mawte beihinn kya la ungzah rya la hae. Tuh e beihinn tuh ccungccaw hae nynh Zahova a la beihnaw hae inn nynh thua. Samua tuh pawtemou beihinn kya a la ung cipaw na nyh oh tou? Masaty Samua a nung Hannah kong lang hynh do tua oh sih.

Hannah tuh kum hynh seepi cia ccaw lahoy kho khyh. ccaw luhkheih sang hoylang myarya la ry. Tenynh Zahova kalang ccaw hoy kho nawlang sawsang te bungnaw a la ngia ku. ccaw nae pya lang thuaze na beihinn kya zungzae ryahae lang na maw kaepya paleih cih cite bya a kin pya ku. Zahova nynh saw a sangnaw kha thae paza ccaw luhkheih yn hoy vae. Samua cite min aphu. Zahova kya bya akinku hawte Hannah nynh a ccah paw Samua tuh kum thung, kum pali a ci lya mawte beihinn kya nung zah Pachia rya a hae sa vae.

Eli tuh beihinn kya alehua paw rangpihbawi nynh thua. Eli ma ccaw luhning la hoy za tuinkya nynh rya la hae bua hae. Na syngtaw ung oh tou, tuh e inn tuh Pachia la beihnaw hae inn nynh thua. A hoileipaw rya hae lang zae khyh. Thuasalama Eli a ccaw luhning hae nynh a hoileipaw rya alaw haepaw kha. Samua nynh phe a muih. Samua so Eli a ccaw hae nynh hoileinaw a rae hae hawte rae bua tou?— Rae bua khyh, a nung, a paw hae nynh aho pya hae hawte a hoipaw rya kyalya rou nynh la hae.

A ccaw hae luhning hae kha Eli nynh pawte nynh cilang a ccang cite mou na tua oh?— Mihming kha de tah lang a ccang kha zaw. Pachia beihinn kya a hoileipaw hae nang oh cite hopya lang a ccang kha zaw. Thuasalama Eli tute cih khyh. Tukeiccuze Eli te a ccaw luhning hae tungvaw Zahova athin myarya a ria. Zahova amaw ccahccei maw nynh de tah naw a pya vae cih hae.

Zete kheih tuh Samua a ii theih cciamang lya khe, ‘Samua’ cite kopaw roi a thae! Samua tuh Eli kalang a ccue tuh, Eli nynh: ‘Kae kaeko khyh’ a ci pya. Vae ning cia a ko. Eli nynh Samua kha vaethung naw bua ae ko lang thua ze: ‘Zahova mang ka ngae, yn ho pa’ cite na la khong cih a ci pya. Zahova nynh he bua ynko tuh Samua nynh yn ho pa a ci pya. Zahova nynh: ‘Eli te a innbyng hae nynh hoileinaw arae hae keiccuze de katah cih hae cite la ho pah’ a ci pya. Eli kha Samua nynh aho pa ngang cih cite na tua oh tou?— Hootuh ho ngang khyh. Thuasalama Zahova nynh ho la aci hawte Samua nynh aho pya vae. Eli a ccaw hae luhning a chih hae tuh Eli maw mah achih bua vae.

Samua hynh aening dosuin kulang myarya hoipaw nynh a thua. Ccungccaw hae nynh a hoileipaw rya a law hae paw a muih zema Samua tuh a hoipaw rya rou nynh zungzae alaw. Nang ning soh? Ahoipaw rya hae te Samua na lo buary oh tou? Tuhte na ci bua oh zetuh nae nung nae paw hae te Zahova Pachia mihlung myarya tua cih.