A Rawthung Paw David

Na rivae ohze pawtemou leih na ci oh?— Nae nung nae paw hae kalang khazaw leih na ccue thya oh. Thuasalama a hung ccungccaw laeze ae bung kho hua ohpaw a ung ung. A hung ccungccaw laeze thungnaw a hoy huapaw nynh thua. A hungmou thua cih na nyh oh tou?— Zahova Pachia nynh thua. Baebu kya David aciku paw imoh paw kong lang do tua oh sih. Zahova nynh zungzae ynbung cipaw a ny keiccuze rinaw thinlung hoyboi khyh.

David tuh a ditaraw lya mawte a nung a paw hae nynh Zahova sungsah lang cipaw kha leih ala ccang pya hae. Zahova tuh abang luhkheih hawte athua tuh ynbung maming cih cipaw a ny keiccuze pawpaw raw rinaw thinlung hoy vae khyh. Vaekheih tuh, David nynh tuu hae aring cciamang lya Chiadeih sahkheih nynh tuu kha yntei vae! David pawtemou aci na nyh oh tou? Paw zunghe sang manglei te khahrouh a chia. Tuh hawte Vong nynh bua yntei tuh bua achia ngae thae! David hynh a hung nynh mou a bung?— Zahova nynh abung.

Vaekheih lya mah David a rawthungnaw kha ala langsahboi. Israel haete Filistin hae a tuhku lya hae nynh thua. Filistin rawbawi paw lukheih tuh, myarya hang zah lemah myarya a le! Amin tuh Kawliah a cih ku. E paw nynh Isael rawkaw hae te Zahova kha a sah rya hae. Kawliah nynh Isael rawkaw hae khah tuhku lang pei a hyy hae. A hung nynh sang mah ccianua ngang khyh hae. David nynh he a thae tuh, Kawliah kha: ‘Kae te tuhku lang! Zahova nynh ynbung cih zah, kaetae mahming cih’ a cipya vae! David hynh araw myarya thung kha zaw?— Myarya thung. Pawmou pou bua yn ciku cipaw na ny ry oh tou?

David nynh zaete lungpyng ccangpa ngaw kha khuin ku zah, Kawliah khah tuh lang a ccia nua vae. Kawliah nynh David he a muih tuh nuinse zah a sarya vae. David nynh hynhte a ci: ‘Nang tuh thahloi te nynh naeccia nua, Kae tuh Zahova min te nynh kaeccia nua’ a ci pya! Tetuh David nynh lungpyng kha zae kya khe toi zah Kawliah kha a zae vae. Kawliah a terui ccahccei maw bohkhe tuh ku khuhliaku zah kha roh a chih vae! Filistin rawkaw hae tuh rih hae zah pung ccue vae hae. Kawliah pipi hynh David nynh a hung bungnaw liate mou a tae kho?— Zahova bungnaw liate, Zahova tuh rawbawi paw Kawliah laeze thungnaw a hoy hua!

David kyate pawmou na lawku kho bua?— Zahova tuh hung hung laeze thungnaw a hoy huapaw nynh thua. Bang hoipaw mah a thua. Zahova nynh nangmah aebung kho cipaw ning nang, tezetuh ri naw thinlung na hoy vaelang khyh!