Nae Makhae Te Na Ungvae Oh Ze Na Rih Boi Oh Tou?

Azuh kya imoh paw taraw hynh dotua oh. Imoh paw hynh dolang ze a makhae te ung zah a rih paw kha zaw lo? Nang ningso tuhte nah tungboi oh tou?— Ccungccaw miakaw a tung boi hae. Baebu kya ze Zahova abang hae hei ze mihmah khaete a ung lya hae tuh a rih hae a ci. Lukheih tuh Eliza nynh thua. A maw kong hynh do tua oh sih.

Eliza tuh Zisu lah pui maw kum hynh seepi lyaze Israel rang kya la ung paw nynh thua. Ahab tuh Israel siapharang la thua zah Zahova la beih khyh. Ahab te azu Zezabel tuh amelei paw Baal Pachia kha nynh lah beih hae. Israel ccungccaw abang mah amelei paw Baal pachia kha lah beih bua vae hae. Siapharang nung Zezabel nynh Zahova abeih paw miakaw chia ala ry vae, tuin kya tuh Eliza mah la pa bua! Eliza pawmou a ci vae na nyh oh tou?—

Eliza tuh a ccue vae! Rangkaw lungkarung lungkhu lang khe nynh a re ku. Paw keiccumou a ccue?— A ri keiccu. Thuasalama Eliza ri ho khyh. Pawkeiccu mou? Zahova nynh ynbungcih cipaw kha a ny keiccu. Langmaw mah Zahova nynh a thungnaw kha ala muih sah boi vae. Eliza nynh vawlang te mae khua raw salang saw la sang zah Zahova nynh a sawsangnaw kha thae pa za mae khua la raw sa boi vae. A tu mah Zahova nynh a bung kho!

Eliza lungkarung kya a reku lya khe, Zahova nynh bya a khia vae: ‘E kya pawmou na ci?’ Eliza nynh bua a phi: ‘Na maw aebeih paw tuh kaerou nynh ka ung vae. Pung Chia kou vae hae, chii raw ka ri keiccuze nynh ka ccue’ a ci pya. Thuasalama Zahova nynh Eliza kha hynh te aho pya: ‘Chih khyh hae. Kae ynbeih paw 7,000 hang a ung ung hae. Ri nang. Rya na hae langpaw patae a ung ung’ a ci pya! E bya a thae tuh Eliza a lung koutua cihpaw na lo sa oh tou?—

Eliza kyate pawmou na lawku kho bua oh?— Hoh tuh hoh tuh mah kamakhae cite tua ku nang, ri mah rih nang. Nang ae sungsah hae paw Zahova te bang rui patae na hoy. Thungnaw hoypaw Zahova kha do lia kulah zungzae ae bung cih! Zahova nynh zungzae ynbung ry cipaw ny naw liate nae lungtua ohtou?—