Zosiah Tuh Bangrui Hoipaw A La Hoy

Imua hae, ame paw rya law hynh aru cih tou?— Ccungccaw alunghua nynhtuh aru aci hae. Baebu kya e imoh paw Zosiah mah ame paw rya lawlang la zoi sa khyh. Thuasalamah Zosiah tuh bangrui hoipaw a la hoy. Abang hae nynh Zosiah kha ame paw rya alaw kho nawlang a la bung hae. Zosiah te a bang hae kong kha ria tua oh sih.

Zosiah apaw tuh Zudah siapharang Amon aci kuh. Amon tuh myarya hoi khyh. Azuh a beih paw nynh thua. Amon he chih tuh Zosiah nynh siapharang lang yn tang. Thuasalamah Kum tarya nynh a cih ung! Zosiah soh apaw hawte ahoi leipaw tou a thua?— Thua khyh, amaw tuh ahoi paw imua nynh a thua!

Zosiah a dihtaraw lya mawte Zahova Pachia bya kha a ngae. Tuhkeiccuze Zahova Pachia asungsah hae paw kele tenynh a mungku hae. Abang hae nynh Zosiah kha ame paw rya law kho nawlang la bung hae. Imua hae Zosiah abang hae tuh ahung hae mou na nyh ry oh tou?

Abang lukheih tuh Zefaniah acih kuh. Amaw tuh malang yn cih kulang paw ahoty paw profeh nynh thua. Zudah ccungccaw hae azuh na beih oh zetuh runaw naetung cih oh cite raeringnaw apya hae. Zefaniah bya khah Zosiah nynh ngae zah azuh hae kha beih khyh. Zahova Pachia rou nynh a beih.

Accang paw Zosiah abang lukheih tuh Jeremiah acih kuh. Jeremiah te Zosiah tuh mih kum lo kuh zah, myarya asungsakuh hae paw bangrui haenynh thuahae. Pawcih ciatemou asungsaku hae cize tuh Zosiah achih tuh Jeremiah nynh law lakheih te a la phua. Jeremiah te Zosiah tuh ame paw rya law kho nawlang te Zahova Pachia bya kha ngae kho nawlang lukheih te lukheih thawzung pya kute ala bung ku hae.

Zosiah kyate paw hawnaw mou na lawku kho?— Zosiah a dihtaraw lya mawte ame paw rya nynh alaw ry. Zahova Pachia asungsah hae paw banghae tenynh mungku lang cipaw mah a ny. Imua hae nang ning mah Zahova Pachia sungsah te ame paw rya law kho nawlang aebung kho hae paw bang hae te na mung kuh ci oh i!