Phua Mangthyanaw Zia

Phua hoi lang zetuh innbyng aho abounaw kha bung kho a thua. (Phungtangbya 30:8) Tuhpiaze, ‘phua nynh ynthungkhaw kho’ cite Baebu nynh a ci. (Phunghotu 7:12) Zuvaw hae nynh phua mangnaw kong hynh nae hanglang ruusah lahzemah hoku leite ung nang oh. Innbyng kya phua kong keiccu maekuh nang oh. (Efesa 4:32) Zuvaw hae nynh pawtemou phua mang lang cipaw byapaekunaw rae vae ze lukheih te lukheih zynku te hokheih oh.

1 AHOYTE PACCYNGKU TUA

BAEBU HOPAW: ‘Nang ning lukhahkheih nynh inn sah a ry ze phua a zaw cih tou zawngaw khyh tou cite tuatou leite a ung cih tou?’ (Luka 14:28) Phua hynh pawtemou mang lang cipaw pyngkheih lang hokukheih paw hynh myarya azici. (Amos 3:3) Pawmou relang aho cipaw te hozeimou phua mang lang cipaw kha byapaeku oh. (Phungtangbya 31:16) Phua mang a ung cining kae te ruarua relang cipaw thua khyh. Na hoi paw phua khate re. Lae ung nang oh.—Phungtangbya 21:5; 22:7.

NA CI LANGPAW:

• Sawpaw he thang kya phua alae ung langze, paw rya mou lawnaw lang cipaw kha pynkheih lang byapae kheih oh

• Muepaw laeze mangpaw alung hua zetuh mang lang paw kha zyasah hua lang cite ahoyte paccyng kuh. Tousenaw langze, atolang aepaw laeze naemaw inn kya hyngku te ae oh

2 DING LAH ACIKU THYANAW HAWTE UNG

BAEBU HOPAW: ‘Zahova Pachia muihnaw kya lya thua leite, ccungccaw mih muihnaw kya mah dingnaw te ung oh.’ (2 Korin 8:21) Hozeihmou ka mue zah hozeihmou ka mang cipaw kha merarih te ho pah kuh oh.

Phua kong azicipaw byapaenaw na rae maw khe lukheih te lukheih hoku ty oh. (Phungtangbya 13:10) Innbyng kya phua kong na hoku ty oh zetuh nae innbyng kya maekunaw ung vae lang khyh. Na muepaw phua kha ka maw phua cite tua leite innbyng phua cite tua.—1 Timote 5:8.

NA CI LANGPAW:

• Byapaeku ho leite  hozeihmou phua mang lang cipaw kha nae luning te khyakuh oh

• Maekunaw a ung maw khe phua kong kha hoku ty oh