Puizia Hae Te Ccawku Thyanaw

Inn te ung cipaw tuh innbyng thaw paw thotakaw nynh thua. Nung te paw hynh sungsah lang zah sawtua lang cipaw tuh ame, thuasalama atu tuh na zu thuakhyhze na vawpaw kha nynh azici hua vae. E hynh na puizia hae nynh ry leite mah a ung kho. Innbyng thaw paw athah dang sah vae oh ze hawkheih hawkheih lang-e puizia hae ryte ccaw ku kho nawlang Baebu bya nynh yn bung kho.

1 PUIZIA HAE KHA AHOY NAWLANGTE MUIHNAW HOI

BAEBU HOPAW: “Na nung te na paw kha sawtua.” (Efesa 6:2) Na kum hozeih hozeih na ci vae zemah nung te paw kha zungzae sawtua hae a ho. Na zu a nung te a paw thuakhyhze na vawpaw a nung te a paw hae kha mah sawtua a ho cih cipaw ning nang. “Sungsakunaw tuh ei ung khyh,” cite Baebu nynh a ci. Tuhkeiccuze na zu na vawpaw nynh a nung a paw te a ccuepeku hae paw kha lunghoy leite mazii ung nang.—1 Korin 13:4; Galati 5:26.

NA CI LANGPAW:

• “Na puizia hae nynh zungzae yn do thatheih hae” thuakhyhze “Na nung nynh rya ka law paw miakaw ahoy nawlang te mazii yn muih pah boi khyh” citahawpaw bya ho mang nang

• Zu te vaw lungrynaw nythya zua kuh

2 AHONAW KYA VARYNG HO

BAEBU HOPAW: ‘Pise nynh a nung te a paw cciataw zah azu te a ung kheih vae hae tuh miming tuh chikheih sawkheih nynh a thua vae hae.’ (Genesis 2:24) Inn te na ung vae zemah na nung te na paw nynh na tungvaw taevue kae hoi ung cite a tua kho hae. Tuhpiaze na innbyng kya a thungkubua haepaw kha eih ae bungry hae keiccu mah a thua kho.

Hawlang hawlang e nung paw hae kha e kyacia tuh hobua hae sah cite byapaekuh oh lah miming kha sawtuate ho pah oh. Sawtuate hoyrarite na ho pah kho oh. (Phungtangbya 15:1) Zakawsangsahkunaw, thawccinaw te lungsaenaw hae kha na hoi zetuh nae puizia hae te ccuepekunaw ahoy cih, apiaze lukheih te lukheih na ngaekuhthya cih oh zah “sungsahkunaw” mah houh na hoi kho cih oh.—Efesa 4:2.

NA CI LANGPAW:

• Innbyng kya puizia hae te thaeku seinaw a ung seivae ze zuvaw hae nynh adae lya ccyh khe hoyte ho ku lang a ccang

• E kong hynh pawtemou phishing lang cipaw bya kha nae luhning te byapae oh