Pachia Beih Lang Pokuh

1, 2. Ah maw te ah maw paw bakhianaw mou khiaku lang, e tuh pawccemou azici?

BAEBU nae ccangkuh tetuh ccungccaw patae hae nynh Pachia beih lang a ccangpyaku hae paw kong te mih cyisanaw hae tuh Pachia rynaw thua khyh cipaw nae nyh vae cih. (2 Korinhae 6:17) Zahova nynh aening kha ame leipaw beihnaw, “Alesaepaw Babilon” kyate pou oh yn ci. (Byaphy 18:2, 4) Nang so pawtemou na cyih cih? Aening lukheih raveih nynh poku te ah maw te ah maw kha hynhte khiaku lang, ‘Pachia a rynaw hawte tou ka beih, tukhyhze kamaw rynaw hawte tou ka beih?

² Ame leipaw beihnaw kyate na toiku lang thua ze, tuh-e tuh ahoypaw nynh thua. Thuasalama ame leipaw beihnaw kya ah ung lya oh ze ah cyisanaw oh te hoysanaw hae kha tuh ah thinlung kya khe pei a ung maming ung cih. Tuh-e cyisanaw te hoysanaw hae hynh Zahova a muih hawte muih thya bua lang azici keiccuze e kong hynh hoku tua oh sih.

AZUH TE MINGNUNG MINGPAAW BEIHNAW

3. (a) Abang nynh mih beihnaw kya azuh mangpaw kha vua lang pawccemou a ruusah cih hae? (b) Pachia beihnaw kya azuh mangpaw hynh Baebu nynh pawtemou a ho?

³ Ccungccaw abang nynh azuh tukhyhze Pachia beihnaw khang hae kha mih inn kya kum hynhsepi beihnaw lang a la mang hae. Tuh-e tuh ame cite na tua lang thua ze, azuh mang leite Pachia na beih vae ze na thinlung kya hynhte beihpaw hynh me lang khyh cite na tua kho. Thuasalama, amaw kha pawte nynh beih lang cipaw Zahova nynh yn ccangpya paw kha ning nang. Zahova nynh ah beihnaw oh kya azuh mangpaw hynh mazii ry khyh cipaw ccaeteccae lang Baebu nynh yn ccangpya.—Exodas 20:4, 5 ria; Sam 115:4-8; Isaiah 42:8; 1 Johan 5:21.

4. (a) Mingnung mingpaaw hae kha pawccemou beih leilang hae? (b) Zahova nynh a ccungccaw hae kha a chih hae paw te bya hoku leilang pawccemou kawbya a pya hae?

⁴ Abang ccungccaw hae nynh a chih vae hae paw mingnung mingpaaw hae hanglang mih hoirung, mih ccyh te mih thawzung kha patae a thangpya hae. Miming kha beih maw haehei a beih hae. Thuasalama a chih vae hae paw nynh aening kha bungnaw te ruunaw yn pya kho vae khyh hae cipaw kha ah ccangku vae oh. Sangkhakheih kya mah hing vae khyh hae. Ame tetuh a chih vae hae paw te ccuepeku lang zuakupaw tuh rilang myarya ung paw nynh thua. Pawccecize a chih hae paw kyate yng lang kuh paw cyisanaw hae tuh muihsaw hoylei hae paw ryalawnaw nynh thua. Tukeiccuze Zahova nynh Israel hae kha michii hae te bya hokunaw te Setan thyahawnaw hae kha saung kuh oh cite kawbya a la pya hae.—Deuteronomi 18:10-12; Piachihpaw 26 te 31 kya do.

5. Azuh hae te mingnung mingpaaw beih vae khyh nawlang pawnynhmou yn bung cih?

⁵ Azuh hae te mingnung mingpaaw beih vae khyh nawlang pawnynhmou yn bung cih? Baebu kha ria lang zah Zahova nynh kha-e hae kha pawtemou a muih cipaw kha hoyte tua lang ahoo. Amaw nynh kha-e hae kha ‘anungsikupaw’ tukhyhze hualang ung paw cite nynh a muih. (Deuteronomi 27:15) Zahova nynh kha-e hae a muih hawte muihthya nawlang te a rynaw langpi te beih kho nawlang Zahova kalang nintakyh sawsangku lang. (Isaiah 55:9) Ame leipaw beihnaw kya-e cyisanaw miakaw kha ah hingnaw kyate vua kho nawlang ahoo paw thawzung kha Zahova nynh yn pya cih cite zynngang kho a thua.

CHRISTMAS PUAI TUAA LANG CCANG TOU?

6. December 25 nin kha Zisu a puinaw nin lang pawccemou a khya hae?

⁶ Laephi pyngpi kya, Christmas tuh a min thangpaw puai hae kyaze ccangkheih nynh thua bua, te Zisu pui nin cite ccungccaw alunghua nynh a tua hae. Thuasalama Christmas tuh ame leipaw beihnaw kyate yng thopaw nynh thua. Laephipi kong azeikupaw (encyclopedia) ccah-uh nynh December 25 nin kha Romhae hae nynh khuaning a pui nin cite puai a la tuaa hae a ci. Zisu tuh December 25 nin a pui khyhze mah beihnaw cciakhaetu hae nynh Zisu pui nin cilang cite bya la pae hae zah Khrihccaw puai lang a tang sah hae. (Luka 2:8-12) Zisu nynh tuh Christmas puai tuaa lang cipaw yn ccang pah khyh. Ccah-uh ccangkheih nynh “Zisu a pui koute kum 200 lae aro kyacia, a pui nin ccahccing kha ccungccaw azya nynh pe la ki hae zah tuh-e kha hunghung mah la ny khyh hae” a ci. (Sacred Origins of Profound Things) Zisu laevaw la hing koute kum a zalu a ro te nynh Christmas puai hynh a la tuaa hae.

7. Amepaw Khrihccaw hae nynh pawccemou Christmas puai a tuaa khyh hae?

⁷ Ccungccaw patae hae nynh Christmas puai yng thokeinaw te Christmas puai kyaze lasung pyakunaw a mang hae cipaw a ny hae. Tousenawze, England te America pepang kyaze Christmas puai kha ame leipaw thokeinaw a thua keiccuze tuh-e puai kha a khe hae. Puai a tuaa paw a ung ze de a la tah hae. Thuasalama ccungccaw hae nynh nyalang tuh Christmas puai kha bua a tuaa maming hae. Amepaw Khrihccaw hae nynh pawccemou Christmas puai a tuaa khyh hae? Pawccecize Pachia lung a tung ry hae keiccu nynh thua.

PUI NIN PUAI HYNH TUAA LANG CCANG TOU?

8, 9. Masaty Khriccaw hae nynh pui nin puai kha pawccemou a la tuaa khyh hae?

⁸ Ccungccaw patae hae hanglang a min thangpaw puai ccangkheih tuh pui nin puai tuaapaw nynh thua. Khrihccaw hae nynh pui nin puai tuaa lang ccang tou? Baebu kya Zahova a beih lei hae paw rou nynh pui nin puai hynh a la tuaa hae (Genesis 40:20; Marka 6:21) Ame leipaw Pachia sithoinaw lang pui nin puai kha la tuaa hae. “Lukhakheih puinaw nin puai tuaapaw tuh azuh beihnaw puai hawte nynh a loku.” Tukeiccuze masaty Khrihccaw hae nynh a la tuaa khyh naw hae paw a thua.—The World Book Encyclopedia.

⁹ Langmaw lya-e Romhae hae te Greek hae nynh lukhakheih a pui vae ze a pe kya muihsaw nynh ungnua zah a hing lungkhu a do-oih cite a zyn hae. “A puipaw ccungccaw te khohzii pachia tuh nythya leilangte a ccuepe kuh hae,” cite The Lore of Birthdays ccah-uh nynh a ci.

10. Atushe Khriccaw hae nynh pawccemou pui nin puai tuaa lang a ccang khyh?

¹⁰ Zahova nynh ame leipaw beihnaw te a kyngkuh paw puai tuaapaw hynh a ry cih tou? (Isaiah 65:11, 12) Ry khyh. Pui nin puai, ame leipaw beihnaw te a kyngkuh paw puai miakaw kha tuaa leilang.

E-HYNH AZICI CCAHCCING TOU?

11. Ccungccaw abang nynh pawccemou puai hae kha a tuaa hae? Na hanglang pawmou azici hua?

¹¹ Ccungccaw abang tuh Christmas puai te a ccangpaw puai hae hynh yng thokeinaw kong kha a ny hae ze mah palei a tuaa maming ung hae. Tuh-e nin vae ze mih innbyng balyng te a ccyh pyate leih ahoy sah hae. Tuh-e tuh nang so pawtemou na thinlung kya a ung? Na innbyng hae hanglang a ccyh na pyapaw tuh sei khyh. Innbyng raetu tuh Zahova a thua thyh hawte amaw nynh na innbyng hae te ccuepeku thya hae sah ci ae ry. (Efesahae 3:14, 15) Thuasalama, puizia hae ryte ame leipaw puai tuaa kheih paw hae laeze aening hanglang abapi hua paw tuh Zahova te ah ccuepekunaw oh ahoy lang paw kha nynh thua. Zuitu Paul nynh hynhte a ho: “Bawipaw lunghoynaw ccunglang kha zuaku tua.”—Efesahae 5:10.

12. Zahova nynh a ry leipaw paw puai hae kha mou tuaa leilang?

¹² Ccungccaw patae hae nynh pawpaw puai thua sah bapi thua khyh cite a tua hae, thuasalama Zahova nynh khatahawpaw kha ry khyh. Zahova nynh ame leipaw beihnaw kyate yng thua paw puai tukhyhze minphuin syntawnaw citahawpaw hae kha ry khyh. Tousenawze, Izip hae nynh ame leipaw mih Pachia hae hanglang puai patae a la tuaa pya hae. Israe hae nynh Izip rang kyate a toikuh kou hae te puai kha la tuaa bua hae zah kha-e kha “Zahova puai” a ci hae. Thuasalama Zahova nynh khatahawpaw puai a tuaa hae keiccuze de a tah hae. (Exodas 32:2-10) Profeh Isaiah nynh hynhte a ho: ‘anungsikuh paw kha na kuih te sang mah hae nang!’—Isaiah 52:11 ria.

MINGCCANGPAW HAE KHA SUNGSAHKUNAW TE CCUEPE

13. Ame leipaw puai tuaa leilang te bya na paeku vae ze paw bakhianaw hae mou na khiakuh cih?

¹³ Ame leipaw puai tuaa leilang bya na paeku vae ze tuh, na khiaku langpaw bakhianaw patae a ung cih. Tousenawze: Rya kae hae kheih hae paw nynh pawcce Christmas puai na tuaa khyh oh cite yn khia basi hae ze pawtemou ka khung cih hae? Lukhakheih nynh Christmas lasung yn pya ze pawtemou ka cyih cih? Ka innbyng hae nynh puai tuaa a ry bua lang hae ze pawtemou ka cyih cih? Ame leipaw puai kae tuaa bua khyh keiccuze ka ccaw hae mih ngaethya khyh nawlang pawtemou ka bung cih hae?

14, 15. Lukhakheih nynh puai kya lasung ae pya lang ze pawtemou na cyih cih?

¹⁴ Pawtenynh ho lang, pawtenynh cyi lang cipaw bya paeku vae ze ah luhboh kha mangku thya lang azici. Tousenawze, ccungccaw hae nynh ame leipaw puai kya hoysah bua sah ci ae ry cih hae, kha-e kha ka lah nyh khyh cipaw olang te ung saku leilang. Zoibaheih te hynhte na ho kho, “Ka lung tua.” Thuasalama, khacih hawpaw ccyh kya lukhakheih nynh houh a ny ry lang ze paw keiccuze nynh ame leipaw puai kae tuaa khyh cipaw kong na ho pah kho. Thuasalama, zungzae bane te, sawtuanaw te, ahoy te nynh hopya lang hae. Baebu nynh, “Nae bya hopaw tuh ngaery ungpaw te apuithyapaw ah thualanghaepaw nynh a thua. Ming hae kha pawtemou amete ka leih kho cih hae cipaw hynh mah na nylang ohpaw nynh a thua,” cite a ho. (Kolosehae 4:6) Bangrui ryte lasung pyakupaw, a ccyh mang kheih paw hynh ka ry cipaw kha ho pah hae, thuasalama khacih hawpaw puai te a kyngkuh paw kha cyi leilang pokuh.

¹⁵ Lukhakheih nynh lasung ae pya lang thua ze pawtemou na cyih cih? Baebu nynh lasung pyakunaw te asekuhte akaw aleih yn ho pya khyh ze mah, athah ahoy phiathyanaw thinlung mangte na cyih cih cite a ho. (1 Timote 1:18, 19) Lukhakheih nynh lasung ae pyapaw kha ame leipaw puai na tuaa khyh keiccuze na lawkuh khyh. Amaw nynh hynhte ae ci kho, “Puai na tuaa khyh oh cipaw tuh mang ka nyh, thuasalama e lasung tuh kae pya ry keiccu nynh a thua.” Lasung kha lawku lang, lawku leilang cipaw tuh na maw nynh bya paeku lang paw nynh thua vae. Thuasalama pawpaw te na paeku ze mah, athah ahoy phiathyanaw thinlung athyanaw lang, hoyte bya na paeku ahoo cih. Zahova te ah ccuepekunaw oh a ro sah lang paw miakaw pawpaw mah ah cyih ry lang khyh oh.

NA MAW TE NA INNBYNG

16. Na innbyng hae nynh puai a tuaa ry hae ze pawtemou na cyih cih?

¹⁶ Na innbyng hae nynh puai a tuaa ry hae ze pawtemou na cyih cih? Miming te maeku hoo khyh. Miming nynh a cyi ry hae paw cyilang bya a paekuh kho hae cipaw kha ningnang. Na pokunaw kha saw yn tua pah hae sah ci na ry hawte mih pokunaw kha mah sawtua pya hae ahoo. (Matthai 7:12 ria.) Thuasalama na innbyng hae nynh puai kya mihming ryte pyngkheih lang mangkheih a la ry lang hae ze, nang paw cyilang mou a ccang? Bapaenaw na rae mawkhe, amepaw bapaenaw na rae kho nawlang Zahova kalang sawsangku te bungnaw ngia kuh. Akong lang kha tua lah phishingnaw zia kha ccung. Zahova kha a lung zungzae ka paw sah ry cipaw kha ningnang.

17. Na ccaw hae nynh ame leipaw puai kalang a ccia bua ry hae ze pawtemou na cyih cih?

¹⁷ Na ccaaw hae nynh puai kalang a ccia bua ry vae hae ze pawtemou na cyih cih? Kha-e ccyh lya kha pyngkheih lang looh ae kheihnaw na mang khae hae ze myarya hoypaw nynh thua. Lasung mah na pya kho hae. Thuasalama, na ccaw hae na pya kho hae paw lasung lungkhuze ahoyhua ccepaw lasung tuh a ccyh te na sungsah hae paw kha nynh thua.

AMEPAW BEIHNAW THYHTE LAH

18. Khrihccaw pungkunaw hynh pawccemou pungku lang a ccang?

¹⁸ Zahova lung tung khylang, ame leipaw beihnaw kha vualang zah amepaw beihnaw kya ung bua lang ahoo cih. Thuasalama amepaw beihnaw thyhte lawbia cyibia ahoo cih. Pawtemou law lang? Langpi ccangkheih tuh Khrihccaw pungkunaw kha merarih lang pungku lang. (Hebruhae 10:24, 25 ria.) Pungkunaw hae hynh amepaw beihnaw kya myarya azici paw nynh thua. (Sam 22:22; 122:1) Ah pungku vae oh ze pungkunaw kya lukheih te lukheih thawzung ah pya kuh kho oh.—Romhae 1:12.

19. Baebu kong na ccangkupaw kha ming hae ho pya bua lang pawccemou azici?

¹⁹ Ame te beihnaw langpi a ccangpaw ccangkheih tuh Baebu kya-e na ny hae paw kha ming hae na hopya bua hae paw kha nynh thua. Laephivaw lang a cyihkuh paw hoyleinaw keiccuze ccungccaw patae hae tuh lung vawsawnaw a tung hae. (Ezekiel 9:4) Khacih hawpaw ruunaw a te ing hae paw lukhakheih kha na nyh kho. Ngae-ang lang ung paw malang-e na ngaehoinaw kong kha ho pah bua hae. Khrihccaw pungkunaw kya pungku bua te amepaw Baebu kong kha ming hae na hopya bua hae ze tuh, na thinlung kya ung paw ame leipaw beihnaw kya-e cyisanaw hae kha rakyhrakyh yng zo vae cih. Ame te Zahova beihlang nae pokuh vae tetuh lungpawnaw mah nae mue cih zah Zahova hythuanaw mah patae nae mue vae cih.—Malakhi 3:10.