Sawsangnaw Te Pachia Kalang Nae Kuh

1, 2. Sawsangnaw hynh aphu myarya tepaw lasung cite pawcce na tua, te sawsangnaw kong Baebu nynh a hopaw kha pawcce ny lang a ccang?

VAWLAEPI te touselangze laephi tuh myarya a dihpaw nynh thua. Zahova malang, rangtakyh kya-e ccungccaw hae tuh tuipung kya-e a ccawpaw tuidangdy te nynh a loku. (Sam 115:15; Isaiah 40:15) Athua, aening tuh vawlaepi te touselangze pawsang mah a thua khyh oh. Thuasalama, Sam 145:18, 19 nynh hynhte a ho: ‘Zahova Pachia kalang thinlung ccaccing te sawsang hae paw tuh mih pe khe nynh a ung nua hae. Amaw raw a rihpaw ccungccaw tuh a rynaw kha a ccingsah pya. A konaw hae roi kha thae zah a khung hae.’ Tuh-e tuh pawcihmou ngae-ang thua lang a ung! Athung huaccepaw Raetu Zahova nynh yng naekuh hae sah ci a ry, te ah sawsangnaw oh kha mah yn ngae pya ry. Athua, Zahova nynh lukheih raveih sawsang khonaw yn pyapaw tuh a phu myarya tepaw lasung nynh thua.

² Thuasalama Zahova tuh a rynaw hawte saw ah sang oh ze rou nynh yn thae pah cih. Athualangze pawtemou sawsang lang? Sawsangnaw kong Baebu nynh pawtemou a ho cipaw kha dotua oh sih.

ZAHOVA KALANG PAWCCE SAWSANG LANG?

3. Zahova kalang pawcce sawsang lang a ccang?

³ Zahova nynh ka kalang khe saw yng sang hae sah la, bya yng ho pah hae sah ci a ry. Pawtemou ah ny oh? Thawccinawte Filipihae 4:6, 7 riatua. Thaw yn ccih zah tuhte yn cyi paw kong kha tua tua. Na tungpaw ruunaw hae te na tuanaw hae kha amaw ho pya lang vawlaepi Uhtupaw nynh pe myarya a ki.

4. Zahova te pei vaeccawkunaw lang pawtemou sawsang lang?

⁴ Sawsangkunaw liate Zahova vaeccaw lang ah tang kho oh. Myarya a sungsahkuh hae paw bang luning hae nynh lukheih te lukheih mih thinlung kya ung paw, mih tuanaw hae kha a ho pyaku vae hae ze mih sungsahkunaw kha houhhouh a tyng. Tuhawte nynh Zahova kalang sawsangpaw mah a loku. Ah tuanaw, ah thinlung kya ung paw te malang ze yn cyi pya lang paw kong kha Baebu nynh yn ho pya. Nang mah na thinlung kya ung paw na tuanaw hae miakaw kha pei na ho pah kho. Tuhte na cyi lang ze Zahova te na vaeccawkunaw oh kha yng lethung cih zah houhhouh yng tyng vae cih.—James 4:8.

PACHIA NYNH YN THAE PYA NAWLANG PAWTEMOU CYI LANG?

5. Zahova nynh sawsangnaw miakaw thae khyh cipaw pawtemou ah ny oh?

⁵ Zahova nynh sawsangnaw miakaw kha ngae tou? Ngae khyh. Profeh Isaiah she lya ze, Zahova nynh Israel hae kha, ‘Kuih hang te saw na sang oh ze mah, ngawhyh lang kae hoitaw cih oh, zapi te saw nae sang oh ze mah kaengae pah lang khyh oh, pawccecize nae kuih tuh chise te nynh phe a bia,’ a ci pya hae. (Isaiah 1:15) Tukeiccuze sawsangnaw kha hoyte pe ah kiku khyh oh lang thua ze, Zahova te ah sawkuh cih oh zah ah sawsangnaw hae mah yn thae pah lang khyh.

6. Zynnaw hynh pawccemou myarya azici? Na zynnaw kha pawtemou na lang sah cih?

⁶ Zahova nynh ah sawsangnaw yn thae pah sah ci ah ry oh ze, amaw tungvaw zynnaw varyng tyng lang. (Marka 11:24) Zuitu Paul nynh,“Zynnaw leite hung nynh sangma Pachia lungccingsah kho thua khyh, pawccecize Pachia a naekuhpaw nynh Pachia a ung cipaw te amaw a ccunghaepaw tuh lasung a pya hae cipaw ah zyn hae ahoo,” a ci. (Hebruhae 11:6) Thuasalama ka zyn ci kyalya te zaw khyh. Ah zynnaw oh kha Zahova kaw nintakyh ah ngaenaw lia oh te lang sah ahoo.—James 2:26 ria.

7. (a) Zahova kalang saw ah sang vae oh ze zakawsangsaku te sawtuate pawccemou sang lang a ccang? (b) Saw ah sang vae oh ze muihdoh sadoh lang te ka sang khyh cipaw pawtemou lang sah lang?

⁷ Zahova kalang saw ah sang vae oh ze zakawsangsaku te sawtuate sang ahoo cih. Pawccemou? Siapharang tukhyhze uhtu lukheih malang bya ho lang ze sawtuanaw te ho a thua hawte nynh thua. Zahova tuh Athung Huaccepaw Pachia thua keiccuze zakawsangsaku lang zah sawtuate sang lang houh a ccang vae kha zaw? (Genesis 17:1; Sam 138:6) Zahova kalang sawsang lang ze muihdoh sadoh lang te sang leite ah thinlung ccahccing te sang lang zah homaepaw bya kha vaeleih vaeleih ho leilang.—Matthai 6:7, 8.

8. Hangkhakheih kong saw ah sang vae oh ze, pawmou cyi lang ahoo cih?

⁸ Hangkhakheih konglang saw ah sang vae oh ze, ah law lang oh paw te ah cyi lang oh paw kong miakaw hanglang mah saw ah sang kho oh. Tousenawze, nintakyh ah hingnaw kya ahoobou paw hanglang Zahova kalang saw ah sang oh ze, Zahova nynh solei yn pya maming cih cite lungthang leite ngaehoinaw hoi lang. Pawpaw ryalaw thua ze mah aening nynh lawlang a ccangpaw kha zuakute law ahoo. (Matthai 6:11; 2 Thesalonhae 3:10) Ahoy leipaw hangkhakheih kha cyisei vae khyh nawlang Zahova kalang sawsang te bungnaw ah ngiaku oh ze hoyleinaw kha ah sibia kho cih oh. (Kolosehae 3:5) Sawsangnaw te asekuhpaw bakhianaw abang hae kha atu dotua oh sih.

SAWSANGNAW TE ASEKUHPAW BAKHIANAW HAE

9. A hung kalang mou sawsang lang a ccang? Johan 14:6 nynh sawsangnaw kong pawmou yn ccangpya?

⁹ A hung kalang mou sawsang lang? Zisu nynh a zuitu hae kha “vaawlang khua ungpaw kaening Paw” cite sawsang lang a ccangpya hae. (Matthai 6:9) Amaw nynh, “Kae tuh langpi, baccing te hingnaw nynh ka thua; kaekah kyate holeite tuh Paw kalang hung sangma thua kholang khyh hae,” a ci. (Johan 14:6) Tukeiccuze Zisu minte rou nynh Zahova kalang sawsang lang a ccang. Zisu minte sawsang lang cipaw tuh paw suilang mou? Zahova nynh ah sawsangnaw yn thae pya nawlang, Zahova nynh kaw a pyapaw Zisu kha sawtuanaw langsah ahoo. Zisu tuh seinaw te chiinaw kyate aening kha khung khylang nynh laevaw lang yn rung cipaw ah ccangku vae oh. (Johan 3:16; Romhae 5:12) Zahova nynh Zisu kha Rangpibawi, Lupi lang te Bapiatu lang a khang vae.—Johan 5:22; Hebruhae 6:20.

10. Saw ah sang vae oh ze ungtuzia hoo tou? Ho tua.

¹⁰ Saw ah sang vae oh ze ungtuzia hoo tou? Hoo khyh, Zahova nynh saw ah sang vae oh ze ah ccukharuu tung lang, ha-ung lang tukhyhze thadyng lang yn ngia khyh. Baebu nynh ungtuzia miakaw te Zahova kalang sawtuate sawsang kho a thua cite yn ccangpya. (1 Sherianaw 17:16; Nehemiah 8:6; Daniel 6:10; Marka 11:25) Zahova kalang saw ah sang vae oh ze azici hua paw tuh ungtuzia thua leite, ah thinlung ccahccing te sangku paw kha nynh bapi a thua. Pawpaw kya ah ung oh ze mah ninthu, khuazi lae leite lungkaw te mah, accae lang te mah saw ah sangkuh kho oh. Zahova kalang saw ah sang vae oh ze, ah sawsangnaw kha hung ccungccaw nynh a thae khyh ze mah amaw nynh tuh phe yn thae pya kou.—Nehemiah 2:1-6.

11. Zahova kalang pawpaw kong lang mou sawsang kho a thua?

¹¹ Paw hanglang mou saw ah sang kho oh? Zahova a rynaw thyhte pawpaw miakaw hanglang ah sang kho oh. Baebu nynh,“Amaw a rynaw hawte ah ngia ohpaw balyng oun thaepya cipaw ccaerarih ah ny oh,” a ci. (1 Johan 5:14) Paraeveih hanglang soh ah sangkuh kho oh tou? Ah sangkuh kho oh. Zahova kalang sawsangku paw tuh bang lukheih te bya hokupaw te nynh a loku. Aening ah thinlung tukhyhze ah tuakunaw oh miakaw kha Zahova ah ho pah kho oh. (Sam 62:8) Amepaw ryalaw kho nawlang, a thyamuihsaw te yn bungnaw lang saw ah sangkuh kho oh. (Luka 11:13) Ahoy te byapaeku kho nawlang hawnaw te ruunaw ccyh kya mah te-ing kho nawlang thawzung yng pya cite ah ngiakuh kho oh. (James 1:5) Zahova nynh ah seinaw yn ngaeethya nawlang mah ngiaku lang a ccang. (Efesahae 1:3, 7) Mingccangpaw hae hanglang, ah innbyng hae hanglang te abu kya-e unonung unopaw hae hanglang mah sawsang pya lang hae a ccang.—Zuituhae 12:5; Kolosehae 4:12.

12. Ah sawsangnaw kya pawmou azici sah hua lang a ccang?

¹² Ah sawsangnaw kya pawmou abapi lang naung lang? Zahova te amaw a rynaw hae kha abapi lang naung lang. Zahova nynh yn cyi pyapaw hae hanglang ah thinlung ccahccingte ah lungtuanaw kha langsah lang a ccang. (1 Sherianaw 29:10-13) Zisu laevaw lang la ung lya ze, a zuitu hae kha hynhte saw nae sang cih oh cite a la ccangpya hae keiccuze aening mah ah ny bua oh. (Matthai 6:9-13 ria.) Zisu nynh saw nae sang vae oh ze Pachia min sawtua nawlang, athyaa nawlang masaty hoty lang a ccang a ci. Tukoute Pachia Penaw yng thuanaw e-lang te Zahova a rynaw kha laephipi yng ccingnaw e-lang saw nae sang cih oh a ci. Abapi huapaw tuh-e hae kong ah sang kou oh tenynh pyngsaw hanglang ahoo paw kha sangku lang a ccang cite Zisu nynh a la ho. Saw ah sang vae oh ze Zahova te amaw rynaw kha masaty lang ah hoty oh paw tuh kha-e hae kha ah hanglang azici hua cipaw ah lang sah oh paw nynh thua.

13. Ah sawsangnaw hohsemou saelang a ccang?

¹³ Ah sawsangnaw hohsemou saelang a ccang? Baebu nynh ho khyh. Saw ah sang vae oh ze adyng langte thua sah, asae langte mah sang kho a thua. Tousenawze, aedyng ah sawsangnaw tuh ah dyng cih zah, Zahova kalang lungtuanaw bya te lungvawsawnaw kong ah sangku vae oh ze tuh asae kho. (1 Samuel 1:12, 15) Zisu she lya-ze abang tuh ccungccaw hae nynh hangthungku a ry hae keiccuze asae langte sawsang hae hawte ah sang ry lang khyh oh. (Luka 20:46, 47) Zahova nynh tuhcihhawpaw sawsangnaw kha ry khyh. Thinlung ccahccing te ah sang oh paw kha nynh Zahova nynh a ry.

14. Vae hohzeihmou sawsang lang a ccang, tuh-e nynh Zahova kong pawmou yn ccangpya?

¹⁴ Vae hohzeihmou sawsang lang a ccang? Zahova nynh amaw kalang saw pei yng sang oh yn ci. Baebu nynh ‘a paekuh leilang te sawsang oh’ te “zungzae sawsang” lang a ccang a ci. (Matthai 26:41; Romhae 12:12; 1 Thesalonhae 5:17) Zahova tuh ah sawsangnaw kha zungzae yn thae pya. Yn sungsahnaw te a hoynaw hanglang nintakyh lungtuanaw bya ah ho kho oh. Cciakhaenaw, thawzung, te lungngaengangnaw hanglang mah ah ngia kho oh. Zahova kalang sawsang khonaw kha phu ah tesah oh ccaccing ze, a kalang khe zungzae sawsang lang.

15. Saw ah sang oh ze athangnaw kya kha pawccemou “amen” cilang a ccang?

¹⁵ Sawsang vae ze a thangnaw kya kha pawccemou “amen” cite ho lang a ccang? E “amen” cipaw baccang a suilang tuh “kanawccah” tukhyhze “tuhawte thua sah” cipaw nynh thua. Ah sawsangnaw kya “amen” cite ah ho oh paw kha kanawccah cipaw ah lang sah oh paw nynh thua. (Sam 41:13) Ccungccaw patae te sawsangnaw a thangnaw kya ze “amen” cite roi accae lang tukhyhze accae leilang te thua sah hopaw tuh, a sangtupaw sawsangnaw kha kanawccah cipaw lang sah paw nynh thua cite Baebu nynh yn ccangpya.—1 Sherianaw 16:36; 1 Korinhae 14:16.

AH SAWSANGNAW HAE KHA PACHIA NYNH YN THAEPYANAW

16. Zahova nynh ah sawsangnaw kha aphi yn pya ccahccing tou? Ho tua.

¹⁶ Zahova nynh ah sawsangnaw kha aphi yn pya ccaccing tou? Yn pya ccaccing. Baebu nynh amaw kha ‘Sawsangnaw hae a ngaetu’ cite a ci. (Sam 65:2) Zahova nynh ccungccaw ccaang patae hae nynh mih thinlung ccaccing te saw ah sangnaw hae kha, a phuinphuin te aphi a pya hae.

17. Zahova nynh ah sawsangnaw hae kha a phi pya lang vawccungccaw hae te laevaw e asee hae kha pawtemou a mang hae?

¹⁷ Zahova nynh ah sawsangnaw hae kha vawccungccaw hae te laevaw e asee hae mangte aphi yn pya. (Hebruhae 1:13, 14) Baebu thaethyanaw lang yng bung cite saw he a sangkuh kou hae te aromaw khe Zahova Ccaeccei lukheih te atung kuh hae paw ccungccaw patae a ung hae. Vawccungccaw hae nynh laephipi “thehoypaw” kong honaw kya yn cciakhae hae cite Baebu nynh accae sah. (Byaphy 14:6 ria.) Piahccahnaa tukhyhze ahoo abou paw e-lang Zahova kalang saw ah sangku vae oh ze, Khrihccaw unonung unopaw hae kyate bungnaw palou ah mue oh.—Phungtangbya 12:25; James 2:16.

18. Zahova nynh ah sawsangnaw hae kha yn phipyanaw lang a thyamuihsaw te Baebu kha pawtemou a mang?

¹⁸ Zahova nynh ah sawsangnaw hae kha aphi yn pya nawlang a thyamuihsaw kha a mang. Piahccahnaa phishing kho nawlang sawsang te bungnaw ah ngiaku vae oh ze, thawzung te cciakhaenaw pyanaw khylang a thyamuihsaw kha a mang. (2 Korinhae 4:7) Zahova nynh ah sawsangnaw aphi pya nawlang te amepaw byapaeku kho nawlang Baebu kha mah a mang. Baebu ria vae ze, yn bung kho lang paw mah ah muih kho oh. Pungkunaw kya lukhakheih nynh aphi a pyanaw hae liate tukhyhze abu kya-e Khrihccaw piccang lukheih nynh Baebu kya-e a hopaw bya liate Zahova nynh thawzung yn pya.—Galatihae 6:1.

19. Zahova nynh ah sawsangnaw kha pawccemou yn phipya leipaw a lo?

¹⁹ Vaekhakheih tuh, ‘Zahova nynh ka sawsangnaw hynh pawccemou atucia aphi yn pya khyh?’ cite na tua kho. Ah sawsangnaw kha paw ccyh te pawtenynh aphi pya lang a ny cipaw kha ningnang. Amaw nynh ah hoo ah bou oh paw kha phe a ny kou. Apaekuh leilang te saw pei ah sangnaw oh nynh ah ngia oh paw kha ah ry ccaccing oh cipaw te amaw kha ah zyn ccahccing oh cipaw ah langsah oh paw nynh thua. (Luka 11:5-10) Ccyh khakheih tuh Zahova nynh ah sawsangnaw hae kha ah tua lei oh paw langpi te aphi kha leih yn pya. Tousenawze, ruunaw vawsaw ah tung oh lya saw ah sangku vae oh ze, kha-e ruunaw vawsawnaw hae kha yn zo sah pya khyhze mah, ngaesang kho naw thawzung yn pya.—Filipihae 4:13 ria.

20. Zahova kalang pawccemou saw pei sangku lang a ccang?

²⁰ Zahova kalang sawsangnaw kaw ah mue oh paw tuh ngae-ang lang myarya a ung kha zaw! Ah sawsangnaw kha yn thae pah ccaccing cih cite ah zyn kho oh. (Sam 145:18) Zahova kalang thinlung ccaccing te saw pei ah sangku oh ze tuh, amaw te ah vaeccawkunaw oh kha houh yng tyng vae cih.