Ccangkunaw ccang 13

Amepaw beihnaw kha pawte mou muih kho lang

Beihnaw miakaw Pachia lungry thua cih tou? (or) ccang kheih rou tou thua cih? (1)

Kriccaw bu hynh paw cce mou patae aung (2)

Amepaw kriccaw hynh pawte mou lae sa thya lang? (3-7)

1. Zisu nynh ame paw kriccaw bu bukheih atha dyng sah. Tuhkei ccuze atu ning Zahova Pachia abeih hae paw bubu kheih rou nynh a ung cih. (Zan 4:23, 24; Efesa 4:4, 5) Baebu nynh hing naw langpi by paw kya azui hae paw bu beih ta raw nynh acih hae ci.—Matu 7:13, 14.

2. Zuitu hae pungchih kou hae te tuh ccangpatu me lei paw ae kha Kri­ccaw bu lung khu lang zya zya yn te cih hae cite Baebu nynh phehoty vae. Mih­ming nynh zyn naw mepaw rote mihnuh lang zui hae sah cite yn soih cihhae aci. (Matu 7:15, 21-23; Zuitu 20:29, 30) Tuh kei ccu ze nynh Kri­ccaw bu ame lei paw patae a ung naw paw thua. Paw cih te mou ame paw bu ny kho lang?

3. Ame paw Kriccaw bucite ny kho naw syntaw naw ccang kheih tuh lukheih te lukheih sung sah kunaw. (Zan 13:34, 35) Mihming nynh minphun ccang paw hae lae ze. Nge saw ahoi hua cite ccang pakuh khyh hae. Rangccang paw hae na hua cih oh cite mah ccang pa kuh khyh hae. (Zuitu 10:34, 35) Tuh kei ccu ze rawtuhkuh naw kya pa bua khyh hae. Ame paw kriccaw tuh lu kheih te lu kheih uno ccah ccing hawte avae ccaw kuh hae.—1 Zan 4:20, 21.

4. Ame paw Kriccaw bu cite ny kho naw ccang kheih tuh abu hae nynh Baebu kha saw mya rya atua hae. Pachia bya cite leh khan hae zah azyn hae. (Zan 17:17; 2 Timote 3:16, 17) Pachia bya kha ccungccaw tuanaw, phung zae lae ze, azici hua cite azyn hae. (Matu 15:1-3, 7-9) Nin ta kyh mih hingnaw kha mah Baebu thyh te hing lang azua ku hae. Tuh kei ccu ze mih ming tuh ho paw phun ccang, cipaw phun ccang thua khyh hae.—Titas 1:15, 16.

5. Ame paw kriccaw bu nynh Pachia min kha saw atua. (Matu 6:9) Zisu nynh Pachia min kha aho pya hae. Tuh hawte ame paw kriccaw hae nynh acibua hae. (Zan 17:6, 26; Rom 10:13, 14) Na za kuet kya ze Pachia min aphy hae paw bu tuh ahung hae mou?

6. Amepaw kriccaw bu nynh Pachia penaw kong aho cih. Zisu mah tuh erya nynh alaw. Pachia penaw kong kha leih aho. (Luka 8:1) Lae phi pyngpi ho lang cite azuttu hae ataw sya hae. (Matu 24:14; 28:19, 20) Pachia penaw rou nynh lae phi vaw daenaw khynhnaw yn ung sah cih cite azyn hae.—Sam 146:3-5.

7. Zisu zui tu hae tuh ahoi lei paw lae phi apae kalia thua khyh hae. (Zan 17:16) Mih ming tuh setan nainganzi piat ccah na, eiku naw kya pabue khyh hae. Lae phi ccung ccaw hae nynh mae thya ny leite aci hae paw ovang mah asi hae ku hae. (Zeim 1:27; 4:4) Nae zakuet kya khe e haetuh ame paw Kriccaw hae cite na ccae sa thya hae tou.

[manthlak biu 26, 27]

Ame paw Kriccawbu hae tuh lu kheihte lukheih asung sah kuh hae, Baebu sawtuate Pachia penaw kong aho hae