Ccangkunaw 10
Ame Paw Beihnaw Kha Pawtemou Ny Kho Lang?
1. Ame paw beihnaw cipaw hynh ccangkheih rou tou a ung cih?
Lingthya parofek hae kha raering ku oh.—MATTHAI 7:15.
Ame paw beihnaw hynh ccangkheih rou nynh aung cih cite zisu nynh azuitu hae kha aho pya hae. Tuh e beihnaw tuh hingnaw lang yncciakhae paw langpi tenynh alo ku. Tuh e langpi kya ‘acceihpaw ccungccaw tuh azya’ cih a ci. (Matthai 7:14) Baebu thyhte beihpaw nynh Pachia nynh leh a khang. Tuh e beihnaw kya a ungpaw ccungccaw balyng tuh zynnaw ccangkheih te milung a nging hae.—Johan 4:23, 24; 14:6; Efesa 4:4, 5 haekha ria tua.
Beihnaw Miakaw Kha Pachia Nynh Lehkhang Tou? video kha do.
2. Amelei paw khrihccaw kong Zisu pawtemou a ho?
“Pachia mangkanyh cihae zemah miziazae te amaw kha avua hae.”—TITU 1:16.
Amelei paw ccangpatu kha khrihccaw bu lungkhu kyamawte nynh ynlangkuh cih cite Zisu nynh phe laho ty vae. Avawlang te hungdo langzetuh ame paw khrihccaw hae maming. Athualangze pawtemou ny thya lang? Pachia nynh leh akhangpaw khrihccaw bu tuh ccangkheih kele athua keiccuze mih ungtu ziazae mihcisahnaw donaw liate khrihccaw mekhyh ame cipaw ny kho a thua.—Matthai 7:13-23 kha ria tua.
3. Ame paw khrihccaw bu cite pawtemou nythya lang?
Phuin pangaw te ny kho a thua:
Ame paw khrihccaw bu nynh Baebu tuh Pachia bya cite saw atua hae. Baebu byathyh te zuilang azuaku hae. Ame paw beihnaw tuh ccungccaw tuanaw roihnaw kya athahdang haepaw beihnaw haete lokuh khyh hae. (Matthai 15:7-9) Ame paw khrihccaw bu tuh hopaw phuinccang lawpaw phuinccang thua khyh.—Johan 17:17; 2 Timote 3:16, 17 haekha ria tua.
Pachia min Zahova kha khing a ung sah hae. Pachia min kha Zisu nynh aho pya hae. Ccungccaw nynh Pachia kong any khonaw lang haete, Pachia amin thyasa lang hangsahkhy lang saw ynsang oh cite accang pya hae. (Matthai 6:9) Naekhua naerang kya paw khrihccaw bu nynh mou Pachia min nylang ae bung oh?—Johan 17:26; Rom 10:13, 14 haekha ria tua.
Pachia Penaw kong kha leih aho hae. Pachia nynh Zisu hynh a Penaw kong holang nynh yn saw. Ccungccaw hae nynh ngaehoi langpaw tuh Pachia Penaw rou nynh thua. Zisu tuh achiidyng cia e kong nynh a ho. (Luka 4:43; 8:1; 23:42, 43) Pachia Penaw kong hynh kazuitu hae nynhmah laho cihhae a ci. Nang kha lukhahkheih nynh Pachia Penaw kong ae hopyaze amaw tuh paw khrihccaw bu mou athua cih?—Matthai 24:14 kha ria tua.
Laephi hoileinaw te kyngkuh khyh hae.Mi mingtuh nainganzi te minphuin rawkunaw kya ungbua khyh hae. (Johan 17:16; 18:36) Laephi ozia hoyleinaw te tuanaw roihnaw hoyleinaw kyamah ungbua khyh hae.—James 4:4 kha ria tua.
Lukheih te lukheih asungsah kuh hae. Minphuin takyh kyate ccungccaw saw tualang Baebu a ccang kuh hae. Amelei paw beihnaw hae nynh rawtuhku thaw pya hae sahlama, khrihccaw ame paw nynhtuh thaw pyakhyh hae. (Mikah 4:1-3) Khrihccaw ame paw nynhtuh ccungccaw hae bungkhy lang mih ccyh te mihthawzung kha a mang hae.—Johan 13:34, 35; 1 Johan 4:20 haekha ria tua.
4. Beihnaw mepaw kha na phiathya vae tou?
Baebu lungkhu e ccangpyaku te Pachia min khing ungsahza, ccungccaw nynh ngaehoi langpaw tuh Pachia Penaw rou cite aho hae paw bu tuh pawbu haemou athua cih? Sungsahkuh haeza raw atuh kuh leihaepaw bu tuh paw bu haemou athua cih?—1 Johan 3:10-12 kha ria tua.