Akong 2

Lukheih te Lukheih Nae Lungzi Sah

“Pachia nynh a suelua hae paw zu te vaw kha, hung ccungccaw nynh mah phia nang hae sah.”—Marka 10:9

Zahova nynh aening kha ‘zynku te unglang zah lungzi lang yn ngia. (Mikah 6:8) E hynh na innbyng hanglang azi myarya a ci. Pawccecize lungzinaw ungkhyhze zynkunaw cipaw mah ung kho lang khyh. Zynkunaw a ungkhyhze sungsahkunaw mah ung kho lang khyh.

Atunin ccyh kya, chii mahkhia ungkheih lang cipaw byakinkunaw a ro sah kho paw cisanaw a tung hae, Tukeiccuze na innbyng kha ae khung kho cihpaw akong ccangnin kha zui kho nawlang byapaeku a ho.

1 NA ZU THUAKHYHZE NA VAWPAW HANGLANG TUA HUA

BAEBU HOPAW: ‘Azici hua paw hae kha hoyte nynaw zua kuh oh.’ (Filipi 1:10) Na hing lungkhu azici hua paw tuh na zu thuakhyhze na vawpaw nynh a thua. Tukeiccuze zu te vaw lukheih te lukheih masaty lang nung a ho.

Zahova rynaw tuh zu te vaw peki kulang, ‘hing lungkhu kya hoysahkheih’ lang nynh a thua. (Phunghotu 9:9) Zu te vaw lukheih te lukheih pawlang riaku leite unglei lang, lukheih te lukheih lungpawnaw hanglang ccung oh cite ccaete ccaelang a ho. (1 Korin 10:24) Na zu thuakhyhze na vawpaw tuh ka hanglang a ho, amaw kha phu ka tesah cipaw ny sah.

A vawpaw nynh a zu elang nialangpaw alawpah; a vawpaw innlang ynki lyakhe a zu nynh ang ahyng tiamang paw kha amuih

NA CI LANGPAW:

Na zu thuakhyhze na vawpaw te accyh pyakute bya ho kuh oh, pyngkheih lang rya lakheih oh lah ahoyte peki kuh oh
“Kamaw” cite tualeite “aening” cite tua

Zu te vaw nynh picnic ccia te a ccyh amang kheih lya hae

2 NA THINLUNG KHA DO-OIH KUH

BAEBU HOPAW: “Nopinung kha seikhae rynaw te ado langze a thinlung khate seinaw phe a rae vae.” (Matthai 5:28) Ziazae ahoy sah lei paw tualangze zu te vaw tungvaw kya phuinccang langte lungzi khyhnaw paw nynh a thua.

‘Na thinlung kha ahoyte do-oih’ kuh cite Zahova nynh a ci. (Phungtangbya 4:23; Jeremiah 17:9) Thinlung do-oih ku kho nawlang pawmou ka do hae cipaw raering ku a ho. (Matthai 5:29, 30) Baebu kya-e Zawbah kha dosuin kuh. Amaw tuh accangpaw nopinung kha seikhae rynaw thinlungte mazii ka do nangsah cite bya a pae ku. (Job 31:1) Nangmah anungsikuhpaw azuh te ccaw hae kha mazii do leilang bya pae kuh. Na zu thuakhyhze na vawpaw laelang a hung hungtemah rykunaw rae sei nang.

A vawpaw e ryalaw ccaboi vawlang a zu sahkhung kha a nung

NA CI LANGPAW:

Zu te vaw tungvaw kya na lungzinaw kha ccungccaw hae kha ny sah hae
Na zu thuakhyhze na vawpaw lungrynaw kha peki pah. Na zu na vawpaw athualei paw te eih ccawkupaw kha na zu thuakhyhze na vawpaw nynh a rykhyhze tuh-e ccawkunaw kha a rang te roh kang maw