Akong 3
Piahccahnaa Phishingnaw Zia
‘Lukheih te lukheih thinlung ccahccingte sungsakuh oh. Pawccecize sungsakunaw nynh tuh seinaw patae kha a fuu sung.’—1 Piter 4:8
Zu te vaw innte a ung kuh vae tuh haetapaw aphaeku paw langpi hawte tuh zungzae hoynaw ung kho lang khyh. Hingpaw hawte ruunaw aphuinphuin tung lang. Tuanaw aloku leinaw, rynaw aloku leinaw, ungtuzia aloku khyhnaw keiccuze piahccahnaa a ung kho. Atolang-e piahccahnaa tung kho athua hawte tualei roihlei paw piahccahnaa hae mah a lang kuh kho.
Piahccahnaa sihaeku rynaw thinlung a ung zemah phishing kulang Baebu nynh thaw yn pya. (Matthai 5:23, 24) Baebu phung hae hynh na zuilang athua zetuh piahccahnaa hae kha kou hoy langte na phishing kho cih oh.
1 PIAHCCAHNAA KONG HOKU OH
BAEBU HOPAW: ‘Bya ho ccyh. . . a ung.’ (Phunghotu 3:1, 7) A ccyh lawkute piahccahnaa kong hoku tua oh. Piahccahnaa te aseku paw kong kha tuanaw te muihnaw kha hoyrarih te ho pah kuh oh. “Zungzae amepaw bya” rou kha ho. (Efesa 4:25) Na thin eihria zemah bya lung khyh nawlang zua kuh. Nebaleih te hoyrarih phishing lang zetuh bya lung boi vae lang khyh.—Phungtangbya 15:4; 26:20.
Akong hang khakheihte zu te vaw lungloku khyhze nebaleih te bya na khung cih. Sungsakunaw te sawtualang paw kha ning nang. (Kolosa 4:6) Piahccahnaa kha arang te phishingnaw zua kuh. Lukheih te lukheih bya hoku leite ung nang oh.—Efesa 4:26.
NA CI LANGPAW:
Piahccahnaa kong hoku lang a ccangthyanaw ccyh kha po kuh
Bya aho lya kha ngae pah, bya hothing nang. Aho kou khate ho
2 NGAEPAH LAH THAEPAH THYA
BAEBU HOPAW: ‘Lukheih te lukheih thawcciku te sungsakuh oh. Lukheih te lukheih sawtua kuh oh.’ (Rom 12:10) Bya ngaepyaku cipaw tuh azi myarya ci. ‘Thawccikunaw, zakawsangsakunaw’ te na zu thuakhyhze na vawpaw muihnaw kha thaepyathya nawlang zua kuh. (1 Piter 3:8; James 1:19) Ka ngaepah paw langsahlah cite ung nang. Athuakhoze na law cciamang paw ryalaw kha nung hing lah na zu na vawpaw aho paw bya kha peki te ngae pah hing. Athuakhyhze nyalang hoku lang hoycihtou cipaw kha khia tua. Na zu na vawpaw kha taeku paw hawte thualeite a hingnaw kya a mungkuh kheih paw cite na muih zetuh ‘na thinria zoi vae lang’ khyh.—Phunghotu 7:9.
NA CI LANGPAW:
Na zu na vawpaw ahopaw bya kha na nawccaw khyh zemah lungsaete ngae pah
Na zu na vawpaw ahopaw bya kha pawmou ahory cipaw nynaw zua kuh. A ungtu ziazae te a baho kha mah raering kulang
3 BYAPAENAW HAWTE LAH
BAEBU HOPAW: ‘Zuakute ryalaw paw tuh thanenaw a ung. Abya kele paw tuh thanenaw ung khyh.’ (Phungtangbya 14:23) Piahccahnaa pawtenynh phishing lang ci kelete zaw khyh. Byapaenaw hawte lawbia cibia aho. Tuh-te ci kho nawlang zuaku zetuh zuakunaw me hoynaw solei mue lang. (Phungtangbya 10:4) Nae luningte pyngkheihlang zuakute na law oh zetuh ‘ahoypaw thanenaw’ kha solei na mue cih oh.—Phunghotu 4:9.
NA CI LANGPAW:
Piahccahnaa phishing kho nawlang lukheih rahveih law langpaw akong hae kha syntaw kuh
Na syntawnaw hawte na ci vae ze hoynaw ung tou ungkhyh tou cipaw atute atu khingkhia tua