Innbyng Ahoy Kho Nawlang Pachia Kha Dolia Kuh

Zahovaa Pachia tuh innbyng a raetupaw nynh a thua. Ccangkheihnaw nopi nung Evua kha a rae koute ‘ccungccahpaw’ kalang khe a cciakhae cite Baebu nynh a ci. Tetuh pise paw Adam nynh alung eih tua kae sy zah ‘e ccungccaw tuh karu kya-e lawpaw ru kasaw kya-e lawpaw saw’ cite a ci. (Genesis 2:22, 23) Zahova tuh atunin kyacia innbyng hynh hoysah hae sah ci a ry.

Inn te ungvaeze ary abounaw pheccing vae cite na tua kho. Thangccangte holang ze tuh myarya rykuh hae zah a ungkheih hae paw maw mah piahccahnaa a tung mah ming hae. (1 Korin 7:28) E ccaw kya hing innbyng hoysah kho nawlang hopyapaw bya hae kha na muih mah ming cih. Hopyapaw bya zuilang zetuh zu te vaw kya, innbyng lungkhu kya solei na hoysah vae cih.—Sam 19:8-11.

1 ZAHOVA NYNH AEPYA PAW NA RYALAW KHA EI NANG

BAEBU HOPAW: Vawpaw tuh zu lu nynh a thua.—Efesa 5:23.

Nang tuh vawpaw na thualangze na zu kha thawccinawte do-oih lang Zahova nynh ae ngia. (1 Piter 3:7) Na hingnaw kya bungtu lang zu kha Zahova nynh ae pya. Tukeiccuze zu kha sawtuanaw sungsahkunaw te ungkhae sah ci ae ry. (Genesis 2:18) Amaw hoynaw elang laeze azu hoynaw elang kha tuahua langzah sungsah lang a ccang.—Efesa 5:25-29.

Nang tuh zu na thuaze na vawpaw kha saw myarya tuate a taevue kha alaw kho nawlang bunglang Zahova nynh ae ngia. (1 Korin 11:3; Efesa 5:33) Tukeiccuze vawpaw byapaenaw kha thohkhang te pyngkheih lang lawkheih lang a ccang. (Kolosa 3:18) Tuh-te na cilang athuaze vawpaw malang thuasah Zahova malang balyng a phutepaw nopi lukheih na thua cih.—1 Piter 3:1-6.

NA CI LANGPAW:

• Vawpahoy thuakhyhze zuhoy pawtemou thua kho lang cipaw zu te vaw khiaku tua oh. Ahopaw bya kha ahoyte ngae lah tuhawte ci khonaw zua ku tua

• Na lung sae sah. Nae luningte accyh lawkute zu te vaw lungpaw kho nawlang pawtemou cilang cipaw nynaw zua kuh oh

2 ZU TE VAW LUNGRYNAW KHA PEKI KUH KALANG OH

BAEBU HOPAW: Zu te vaw lukheih te lukheih peki ku aho. (Filipi 2:3, 4) Lukheih te lukheih phutesakuh oh. “Ccungccaw balyng kya nevyalya” paw thua aho cite Zahova nynh ynngia cipaw kha ning nang oh. (2 Timote 2:24) ‘Ccezung te thuin hawte tuatou leite aho hae paw ccungccaw abang a ung. Ahaw hae paw munglae tuh vaemaw adang sah’ cite Baebu nynh a ci. Tukeiccuze ahoyte tuatou te na ho cih. (Phungtangbya 12:18) Sungsakunaw, thawccinaw te hothya nawlang Zahova Pachia thyamuisaw nynh ae bung cih.—Galati 5:22, 23; Kolosa 4:6.

NA CI LANGPAW:

• Zu te vaw lukheih raveih azicipaw kong na ho ku maw oh thinlung adae kho nawlang, ahoyte tua kho nawlang sawsang tou

• Pawmou holang, pawtemou holang cipaw ahoyte tua tou

3 RYA KHA PYNGKHEIH LANG LAKHEIH OH

BAEBU HOPAW: Nang innte na ung vae ze zu te vaw tuh ‘chikheih sawkheih’ nynh na thua vae oh. (Matthai 19:5) Thuasalama nangning tuh pyng pyngning paw na thua keiccu ohze muihnaw lokuh lang khyh. Tukeiccuze nae tuanaw, nae lungloku kho nawlang zuaku aho cih. (Filipi 2:2) Nae lungngingze rou nynh byapaenaw kha lunglokute na pae kho cih oh. ‘Hokheihpaw nynh tuanaw ahoy sah’ cite Baebu nynh a ci. (Phungtangbya 20:18) Baebu hopaw zuituh azicipaw byapaenaw kha lungngingte pae kho a thua.—Phungtangbya 8:32, 33.

NA CI LANGPAW:

• Na zu thuakhyhze na vawpaw kha piahccahnaa, tuanaw kele kha hung ho pah nang

• Bya na pae oh maw khe zu te vaw hokuh tou oh