CCANGKUNAW 15
Zisu Tuh A Hungmou?
Zisu tuh ccungccaw phungpaw kya a min thanghuapaw lukheit nynh thua. Zisu cihkuhpaw min kha ccungccaw patae nynh a ny hae zemah amaw konglang eih nyh khyh hae. Zisu te asekute aphuinphuin a tua hae. Baebu kya Zisu kong pawmou a langsah?
1. Zisu tuh a hungmou?
Zisu tuh vaawlang khua ungpaw myarya thungpaw muihsaw pyng lukheit nynh thua. Zahova nynh pawpaw kha a rae maw Zisu kha a la rae. Tuhkeiccuze “raepaw balyn kyaze ccatawccaw” cite a ko. (Kolose 1:15) Zisu lukheit kele kha Zahova amaw maw nynh la rae keiccuze Pachia “a Ccapaw lu kheit kyalyapaw” cite Baebu nynh a ci. (Johan 3:16) Ccangpaw uccaw miakaw kha raenaw kya a paaw Zahova te Zisu tuh pynkheih lang rya lah kheih hae. (Phungtangbya 8:30 kha ria.) Zisu tuh Zahova te ahoypaw ccuepekunaw a hoi. Pachia bya hotu, “bya” lang zyntyng te rya lah zah Pachia bya te langhroinaw hae kha a ho.—Johan 1:14.
2. Zisu laevaw lang pawcce yn thua?
A thang vae paw kum 2,000 leikaw kya Zahova nynh thyamuisaw mangte vaawlang khua ungpaw Zisu a hingnaw kha a thyaapaw Mary vue lungkhu lang ngae-angnaw te a nue. E liate Zisu tuh ccungccaw lukheit lang yn pui. (Luka 1:34, 35 kha ria.) Zisu laevaw lang yn thuapaw tuh byaking paw Messiah, Khrih langte ccungccaw hae kha khung khy lang nynh thua.a Messiah te asekupaw Baebu hotypaw miakaw tuh Zisu kya a ccing. Tuh-e nynh Zisu tuh ‘Khrih, a hiinpaw Pachia ccapaw’ cipaw yn nysah.—Matthai 16:16.
3. Zisu atu pawkyamou a ung?
Zisu a chih koute muihsaw pyng lang thothui zah vaawlang bua a kae. “Pachia nynh mah amaw kha kou hangthung.” (Filipi 2:9) Atu, Zisu tuh Zahova koute—kaw a hoihuaccepaw nynh thua.
HOUH CCANGKUH LANG HOUH MUIH LANG
Zisu tuh a hungmou, Zisu kong ccangkuh lang pawcce azici cipaw houh ccung tua.
4. Zisu tuh Athung Huaccepaw Pachia thua khyh
Zisu tuh vaawlang kya athungpaw muihsaw pyng thua zemah a paaw Pachia Zahova kaw a ngae cite Baebu nynh yn ccangpya. Pawcce tuhte ah ho kho oh? Zisu te athung huaccepaw Pachia lokuh khyh cipaw Baebu hopaw kha ny kho lang VIDEO kha pia.
Akaw lang-e Baebu ccaw hae nynh Zahova te Zisu tuh lokuh khyh cipaw yn thaesah thya. Baebu ccaw ccangkheit cci kha ria, tuhkoute akaw lang-e bakhianaw hae kha hokuh oh.
Luka 1:30-32 kha ria.
Zisu te “Ahang Huaccepaw” Zahova tuh lokuh khyh cipaw vawccungccapaw bya nynh pawtemou a langsah?
Matthai 3:16, 17 kha ria.
Zisu tuipi-ing lya vaawlang kyate paw bya mou thae a thua?
A hung roi citemou na tua?
Johan 14:28 kha ria.
A kum tanghua zah kaw hoihuapaw tuh a paaw tou thuakhyhze a ccaw tou?
Zisu nynh Zahova kha ka Paaw cite a kopaw tuh paw suilangmou?
Johan 12:49 kha ria.
Zisu nynh amaw te a paaw Pachia tuh lukheit kele paw cite tou a tua? Nangso pawtemou na tua?
5. Zisu tuh Messiah nynh thua cipaw a langsah
Ccungccaw hae khung lang Pachia nynh a popaw Messiah tuh a hongmou—yn nysapaw hotypaw bya patae Baebu kya a ung. Zisu laevaw a ung lya a la ccingpaw hotypaw bya abang kha ny kho lang VIDEO kha pia.
E Baebu hotypaw bya hae kha ria tua, tuhkoute akaw lang-e bakhianaw hae kha hokuh oh:
Messiah pawkyamou a pui cih cipaw ny kho lang Mikah 5:2 kha ria.b
Zisu a pui lya e hotypaw bya accing tou?—Matthai 2:1.
Messiah chiinaw kong akaw aleih hotypaw bya hanglang Sam 34:20 te Zekhariah 12:10 kha ria.
E hotypaw bya hae a la ccing tou?—Johan 19:33-37.
E hotypaw bya hae accing nawlang Zisu nynh a paccyn ty cite na tua tou?
E nynh Zisu te asekute pawmou a langsah?
6. Zisu kong ccangkunaw kyate thanenaw ah mue oh
Zisu te amaw nynh a la cyi hae paw kha ccangkuh lang azici cite Baebu kya a langsah. Johan 14:6 te 17:3 kha ria tuhkoute e bakhianaw kha hokuh oh:
Zisu kong ccangkuh lang pawcce azici?
Pachia te vaeccaw thua kho nawlang Zisu nynh lang a uasah. Zahova kong byaccing mah yn ccangpya. Zisu liate zungzae hingnaw ah mue kho oh
CCUNGCCAW ABANG NYNH HO HAE PAW: “Zahova Ccaeccei hae tuh Zisu kha zyn khyh hae.”
Nang pawtemou bua na phi cih?
ADYNGNAWTE
Zisu tuh athungpaw muihsaw pyng, Pachia ccapaw te Messiah nynh thua.
Bua Liathuinaw
Zisu kha “raepaw balyn kyaze ccatawccaw” cite pawcce a ko?
Laevaw yn thua maw Zisu pawmou la cyi?
Zisu tuh Messiah nynh thua cipaw pawtemou ah ny oh?
HOUH CCUNGCHIH
Messiah lang Zisu pawmou la cyi cipaw houh ccangkuh tua.
Ccungccaw hae nynh ccaw ah sah hae hawte Pachia nynh Zisu kha a sah cite Baebu nynh yn ccangpah tou cipaw kha ccung tua.
“Zisu Kha Pachia Ccapaw Cite Pawcce Ko A Thua?” (Website ccaw)
Luthungpy Pachia Lukheit tuh Baebu ccangpyakunaw thua khyh cipaw tuatua.
Zisu kong Baebu kya a ccangkuh koute nopinung lukheit a rulaekunaw kong kha ria tua.
“Zudah Nung Lukheit A Beihnaw E Zynnaw Kha Pawcce Bua La Dokhia” (Thaekuh!, May 2013)
a Messiah, Khrih cipaw tuh ccungccaw hae khung lang Pachia nynh a popaw kha nynh a ho ry. Ccungccaw hae hynh pawcce khung ahoo, Zisu nynh pawtemou a khung hae cipaw kha ccangkunaw 26 te 27 kya hokuh lang.
b Zisu laevaw lang yn thuacihpaw a ccyh kong a kyhpaw hotypaw bya kha Ccaesanaw 2 kya do tua.