CCANGKUNAW 16
Zisu Laevaw Ung Lya La Cyi Hae Paw
Zisu kha pawmah cyih kho leipaw a pui takawpaw imua, ahawpaw Profeh, tuhkhyhze chiinaw anae vaepaw ccungccaw cite ccungccaw alunghua nynh a tua hae. Thuasalama laevaw Zisu a hingnaw kong tuakhia langze houh ny kho lang. E ccangkunaw kya, Zisu nynh a la cyipaw azici huapaw uccaw hae te tuh-e hae nynh na hanglang thanenaw ae muesahkhonaw kong kha hokuh lang.
1. Zisu abapi ryalaw tuh pawmou?
Zisu abapi ryalaw tuh “Pachia peenaw thehoypaw kha hopaw” nynh thua. (Luka 4:43 kha ria.) Ccungccaw piahccahnaa miakaw kha yn phishing pah cih paw peenaw liate accozah kha Pachia nynh yn thadynsah vae cih cihkuhpaw thehoypaw bya kha a la ho.a Zisu nynh e thehoypaw bya kha kumthung khoi cia zuakuhte a la ho.—Matthai 9:35.
2. Zisu nynh ngae-angnaw hae kha pawcce la rae?
Baebu kya “Pachia nynh amaw [Zisu] liate ngaeang lan umpaw ryalaw hae, khuaruarunaw hae te muihsahnaw hae” a cyi cite a ci. (Locceihtu 2:22) Zisu tuh Pachia nynh a pyapaw thungnaw te khise kha a daesah, ccungccaw a thung te a dang hae, a ccih hae paw kha dangsah hae zah mihchii mah a hingsah thui. (Matthai 8:23-27; 14:15-21; Marka 6:56; Luka 7:11-17) E ngae-angnaw hae nynh Zisu tuh Pachia nynh a sawpaw nynh thua cipaw yn nysah. Ccungccaw piahccahnaa miakaw kha Zahova nynh a phishing kho cipaw mah a langsah.
3. Zisu a hingnaw zia kyate pawmou ccangkuh kho lang?
Zisu tuh pawpaw miakaw kya Zahova kaw kha a ngae. (Johan 8:29 kha ria.) Rawsenaw hae laku a paaw nynh a cyisah rypaw kha a chiinaw ccyh cia zyntyng te a cyi. Tuh-e nynh ccungccaw hae tuh ruunaw hae laku kya Pachia rya a lakuh kho cipaw yn nysah. E liate Zisu nynh ‘a ccunoh kha ah zui oh ccaw cite dosuinku lanpaw yn cciatawpya sya.’—1 Peter 2:21.
HOUH CCANGKUH LANG HOUH MUIH LANG
Zisu nynh thehoypaw la honaw kong te ngae-angnaw hae la cyinaw kong kha tuatua.
4. Zisu thehoypaw la ho
Zisu tuh vuiping lungpaw langpi kya me azahte a ccute cceih zah ccungccaw patae kha thehoypaw a la hopya hae. Luka 8:1 kha ria tuhkoute e bakhianaw hae kha hokuh oh:
Zisu nynh a bya ngae lang yn cceih hae paw ccungccaw hae kele tou a hopya hae?
Ccungccaw hae kha ccung lang Zisu pawtemou la zuaku?
Messiah nynh thehoypaw a ho cih cite Pachia nynh a hoty. Isaiah 61:1, 2 kha ria tuhkoute e bakhianaw hae kha hokuh oh:
E hotypaw kha Zisu nynh pawtemou la ccingsah?
E thehoypaw kha atu she ccungccaw hae thaelang ahoo cite na tua tou?
5. Zisu nynh aphutepaw byaccing hae kha la ccangpya hae
Zisu nynh Pachia peenaw thehoypaw a ho apiaze zuilang ccangpaw kong hae kha mah la ccangpya hae. A minthangpaw muavaw ccangpyakunaw hae kya-e tousenaw abang elang Matthai 6:14, 34 te 7:12 kha ria. Tuhkoute e bakhianaw hae kha hokuh oh:
E Baebu ccaw kya Zisu nynh paw zuilang ccangpaw tuanaw mou yn pya?
E tuanaw tuh atu she kya athane ungcih cite na tua tou?
6. Zisu nynh ngae-angnaw hae a la cyi
Zahova nynh Zisu kha ngae-angnaw hae cyikhonaw paw thungnaw la pya. Tousenaw langze, Marka 5:25-34 kha ria tuhkhyhze VIDEO kha pia. Tuhkoute akaw lang-e bakhianaw hae kha hokuh oh.
E video kya a dang leinung nopinung nynh pawmou a zyn?
E ngae-angnaw kya pawkhamou na ry?
Johan 5:36 kha ria tuhkoute e bakhianaw kha hokuh oh:
Zisu a cyipaw ngae-angnaw hae nynh Zisu kong pawmou a langsah?
Na nyh tou?
Laevaw lang Zisu a hingnaw kong kha—Matthai, Marka, Luka te Johan Thehoypaw ccah-uh uh pali kya a zeikuh. Thehoypaw ccah-uh zeitu hae nynh Zisu kong a lokuh leipaw akaw aleih kha la zei hae. E Baebu ccah-uh ccangpali ria langze nyry ungpaw Zisu hingnaw kong kha ny kho lang.
MATTHAI
nynh masaty Thehoypaw ccah-uh kha a la zei. E ccah-uh nynh Zisu ccangpyakunaw, abapi langte Pachia Peenaw kong kha a langsah.
MARKA
nynh a dynhuapaw Thehoypaw ccah-uh kha a la zei. E ccah-uh nynh ah lung yn thosahpaw a cyihkuh hae paw patae kha a langsah.
LUKA
nynh sawsangnaw azicinaw kong te nopi hae kha Zisu nynh a ccuepenaw hae kong kha a langsah.
JOHAN
nynh vaeccaw hae, minccang paw hae ryte Zisu bya a hokuh hae paw kong kha a langsah. E nynh Zisu tuh pawtecihpaw ccungccaw mou a thua cipaw kha yn nysah.
CCUNGCCAW ABANG NYNH HO HAE PAW: “Zisu tuh ccungccaw hoypaw lukheit thua zemah Messiah tuh thua khyh.”
Nangso pawtemou na tua?
ADYNGNAWTE
Zisu tuh Pachia Peenaw kong a ho, ngae-angnaw hae la cyih zah pawpaw miakaw kya Zahova kaw a ngae.
Bua Liathuinaw
Laevaw lang ung lya Zisu abapi ryalaw tuh pawmou?
Zisu nynh a cyipaw ngae-angnaw hae nynh pawmou a langsah?
Paw zuilang ccangpaw kong hae mou Zisu nynh yn ccangpya?
HOUH CCUNGCHIH
Zisu pawkongmou a lunghua a ho?
“Pachia Peenaw Tuh—Zisu Hanglang Pawcce Azici” (Rawvianaw, October 1, 2014)
Zisu ngae-angnaw hae a la cyi cipaw zynkhonaw kong kha ria tua.
“Zisu Nynh A Cyipaw Ngae-angnaw Hae—Pawmou Na Ccangkuh Kho?” (Rawvianaw, July 15, 2004)
Zisu nynh amaw hanglang hoynaw a vuakuh keiccuze ccungccapaw lukheit a rulaekunaw kong kha ria tua.
“Ka Hanglang Kele Nynh Ka Lah Dokuh” (Rawvianaw, October 1, 2014)
Zisu nynh a la cyipaw abapi kong hae a langsapaw ccahzing kha do tua.
“Zisu Laevaw Hingnaw Kya Abapi Kong Hae” (Laephithaw Leihnaw Baebu, Piachihnaw A7)
a Ccangkunaw 31-33 kya Pachia Peenaw kong akaw aleih kha hokuh lang.