CCANGKUNAW 17
Zisu Tuh Pawtecihpawmou?
Laevaw lang Zisu la cyipaw, la ho hae paw kha ccangkuh langze Zisu a ziazae hae kha ny lang. Tuh-e nynh Zisu te a Paaw Pachia Zahova temah houh naekuh rynaw a ungsah cih. Zisu e ahoypaw ziazae hae abang tuh pawhaemou? Zisu kha pawtemou dosuinkuh kho lang?
1. Zisu tuh a Paaw Pachia te pawtemou a lokuh?
Vaawlang kya Zisu tuh sungsakunaw hoipaw a Paaw Zahova kyate kum ccang patae la ccangku. Tuhkeiccuze a Paaw hawte tua zah a cyih thya vae. (Johan 5:19 kha ria.) Zisu nynh a Paaw a ziazae hae kha pheccing lang a dosuinkuh keiccuze hynhte a ho kho: “Kae yn muih vae paw ccungccaw tuh Paaw kha mah a muih vae.” (Johan 14:9) Zisu e ziazae hae kha na ccangkuh lang zetuh Zahova kha houh nae nyh kaleih vae cih. Tousenawze, ccungccaw hae kha Zisu pekinaw nynh namaw kha Zahova nynh myarya pe ae ki cipaw a langsah.
2. Zisu nynh Zahova a sungsah cipaw kha pawtemou a langsah?
Zisu nynh hynhte a ci: “Kae nynh Paaw kha ka sungsah cipaw laephi nynh a ny nawlan Paaw nynh kaw yn pya thyhawte kae nynh ka cyi.” (Johan 14:31) Zisu laevaw ung lya ruunaw ccyh kya zemah a Paaw kaw ngaenaw liate a Paaw kha myarya a sungsah cipaw a langsah. Zisu nynh a Paaw kha myarya a sungsah keiccuze a Paaw kong kha ccungccaw hae hopah hae zah a Paaw Pachia te ahoypaw vaeccawkunaw hoi kho lang a bung hae.—Johan 14:23.
3. Zisu nynh ccungccaw hae a sungsah cipaw kha pawtemou a langsah?
Zisu tuh ‘cungccaw hae kha myarya a sungsah hae’ cite Baebu nynh a ci. (Phungtangbya 8:31) Ccungccaw hae kha myarya a sungsah hae keiccuze thawpyanaw bya ho zah amaw hoynaw tuakuh leite a bung hae. Ngae-angnaw hae a cyipaw nynh thungnaw kele thua leite ngaethyaungsakunaw mah ahoi cipaw a langsah. (Marka 1:40-42) Ccungccaw hae kha ngaethyaungsah hae zah mae do khyh. A bya ngae hae paw thinlung me hae paw kha a bya nynh soihbianaw pya hae zah ngaehoinaw mah a hoisah hae. Ccungccaw hae, abapite amaw ccangpyanaw hae a zui hae paw kha a sungsah hae keiccuze vawsawnaw te chii lang cia a ry.—Johan 15:13, 14 kha ria.
HOUH CCANGKUH LANG HOUH MUIH LANG
Zisu a ziazae hae kong te Zisu hawte sungsakunaw te hysahnaw langsakhonaw kong kha ccangkuh tua.
4. Zisu nynh a Paaw kha a sungsah
Pachia ah sungsanaw langsahkhonaw kong kha Zisu hingnaw zia nynh yn ccangpya. Luka 6:12 te Johan 15:10; 17:26 kha ria. Baebu ccaw ccangkheit cci ria koute e bakhianaw kha hokuh oh:
Zisu kha dosuikuh liate Zahova kha ah sungsah oh cipaw pawtemou langsah kho lang?
Zisu nynh vaawlang khua ungpaw a Paaw kha sungsah zah sawsang te bya leih a ho
5. Zisu nynh bungnaw ahoo hae paw kha peki hae
Zisu nynh amaw hoynaw laeze minccang paw hae hoynaw kha abapi lang a nung. A bang zemah a ccyh te thawzung mangte ccungccaw hae kha a bung hae. Marka 6:30-44 kha ria tuhkoute e bakhianaw hae kha hokuh oh:
E Baebu ccaw liate minccang paw hae kha Zisu nynh pawtemou peki hae?—Adihpaw 31, 34, 41, te 42 kha do tua.
Ccungccaw hae bung lang Zisu kha pawnynhmou a lung a thosah?—Adihpaw 34 kha do tua.
Zisu tuh Zahova a ziazae hae kha a dosuinkupaw thua zah e kong nynh Zahova konglang pawmou ae ccangpya?
Ccungccaw hae tungvaw Zisu pekinaw kha dosuinkuhkhonaw zia hae tuh pawhaemou?
6. Zisu tuh a hysahpaw nynh thua
Zisu tuh ahoi khyh zemah myarya a hysah. Tuhkeiccuze aening mah hysah lang thaw yn pya. Locceihtu 20:35 kha ria tuhkoute e bakhianaw kha hokuh oh:
Zisu bya liate lungpawnaw lang pawmou cyi lang?
VIDEO kha pia, tuhkoute akaw lang-e bakhianaw kha hokuh oh.
Sisua uccaw patae hoi khyh zemah pyakhonaw zia abang tuh pawhaemou?
Na nyh tou?
Baebu nynh Zisu minte Zahova kalang sawsang lang yn ccangpya. (Johan 16:23, 24 kha ria.) Tuhte sawsangpaw tuh Zahova te naekuh kho nawlang Zisu nynh yn la cyipya hae paw kha lungtuanaw langsapaw nynh thua.
CCUNGCCAW ABANG NYNH HO HAE PAW: “Pachia nynh vawsawnaw ah tung oh paw kha peki khyh.”
A Paaw ziazae hae kha a dosuinkuhpaw Zisu cyisahnaw hae nynh aening kha Zahova nynh pe yn ki cipaw pawtemou a langsah?
ADYNGNAWTE
Zisu nynh Zahova te ccungccaw hae kha a sungsah. A Paaw alopaw ccaw thuapaw Zisu kong houh ny vae zetuh Zahova kong mah houh ny lang vae.
Bua Liathuinaw
Zisu hawte Zahova kha ah sungsah oh cipaw pawtemou langsah kho lang?
Zisu hawte ccungccaw hae kha ah sungsah oh cipaw pawtemou langsah kho lang?
Zisu e paw ziazae mou na ryhua?
HOUH CCUNGCHIH
Dosuinkuh langpaw Zisu ziazae abang kha ria tua.
“Zisu Kha Dosuinkuh . . .” (Zisu—Langpi, Byaccing, Hingnaw, ccahmae 317)
Zisu minte pawcce sawsang lang?
“Zisu Minte Pawcce Sawsang Hae?” (Rawvianaw, February 1, 2008)
Zisu muinsang kong Baebu kya pawmou a ho?
Zisu nynh nopi hae a ccuepenaw zia kyate pawmou ccangkuh kho lang?
“Pachia Nynh Nopi Hae Kha Phutesah Lang A Ccang Cite A Muih” (Rawvianaw, September 1, 2012)