CCANGKUNAW 14
Pachia Nynh A Rypaw Beihnaw
A thang vae paw ccangkunaw kya hokuh hawte beihnaw miakaw kha Pachia nynh a rypaw thua khyh. Thuasalama, Raetu Pachia nynh a rypaw ziate beih kho a thua. Paw “beiknaw” mou Pachia nynh a ry? (James 1:27) Baebu ccangpyakunaw kha tuatua.
1. Pachia nynh a rypaw beihnaw tuh pawmou abapi lang nunglang a ccang?
Pachia nynh a rypaw beihnaw tuh Baebu kha abapi lang nunglang a ccang. Zisu nynh Pachia kalang hynhte a ci: “Na bya tuh byaccing nynh thua.” (Johan 17:17) Beihnaw abang nynh Pachia bya Baebu lungkhu e byaccing kha pawlang ria khyh hae. Minming nynh Baebu kha ccungccaw ccangpyakunaw hae te phunglang hae te a rulae hae. “Pachia kawbya vua” hae paw kha Zahova nynh ry khyh. (Marka 7:9 kha ria.) Thuasalama, Baebu bya zui lang zetuh a ry.
2. Zahova kha pawtemou beih lang a ccang?
Raetu Zahova kele rou nynh beih lang a ccang. (Byaphy 4:11) Zahova kele rou nynh sungsah te beih lang. Zohtuh hae te sahkhung hae manglang ccang khyh.—Isaiah 42:8 kha ria.
Ah beihnaw tuh Zahova hanglang ‘athyapaw te lehkhan lang ccang paw’ beihnaw thua lang a ccang. (Rom 12:1) Asuilang tuh ah hingnaw kya Pachia phunglang hae kha zui lang. Tousenawze, Zahova kha a sungsah hae paw tuh innbyng te asekupaw Pachia phunglang hae kha phutesah hae zah a zui hae. Maezu zupaw, kuinza aepaw, ruipaw ihsei hae mangpaw te arah samaw nialuepaw cita hawpaw ahoy leipaw ziazae hae kha a sihaekuh hae.a
3. Zahova kha zyntu hae ryte pawcce beihkheih lang a ccang?
Naw takyh pungkunaw hae nynh ‘zapi pumkunaw kya . . . Zahova kha thehoysahnaw’ yn muesah. (Sam 111:1, 2) Tuhte cyikhonaw ccangkheit tuh thehoysahnaw law sahpaw nynh thua. (Sam 104:33 kha ria.) Zahova nynh aening kha yn sungsah zah lungpaw te zungzae hing kho lang yn bungpaw pungkunaw hae kha yn pungsah kuh ry. Pungkunaw hae kya lukheit te lukheit thaw ah pyakuh kho oh.
HOUH CCANGKUH LANG HOUH MUIH LANG
Zohtuh beihpaw kha Zahova nynh pawcce a ry khyh, Pachia thehoysah khopaw azicipaw konglang abang kha ccangkuh tua.
4. Beihnaw kya zohtuh hae manglang ccang khyh
Zohtuh beihpaw kha Pachia nynh ry khyh cipaw kha pawtemou ny kho lang? VIDEO kha pia, tuhkoute akaw lang-e bakhianaw kha hokuh oh.
Baebu she lya Pachia minphuin abang nynh zohtuh a beih hae tuh pawmou la cyihkuh?
Ccungccaw abang nynh Pachia te houh naekuh ry hae zah beihnaw kya zohtuh hae a mang hae. Thuasalama Pachia te a naesakuh kho ccaccing tou? Exodus 20:4-6 te Sam 106:35, 36 kha ria tuhkoute e bakhianaw hae kha hokuh oh:
Beihnaw kya paw zohtuh hae, sahkhung hae a mang hae paw mou na muih boi?
Zohtuh beihpaw kha Zahova nynh pawtemou a tua?
Nangso pawtemou na tua?
5. Zahova kele beihnaw nynh ame leipaw tuanaw hae kyate yn luesah
Zahova kha merarihte beihnaw nynh ame leipaw tuanaw hae kyate yn luesakhonaw kong kha do tua. VIDEO kha pia.
Sam 91:14 kha ria tuhkoute e bakhianaw kha hokuh oh:
Zahova nynh amaw kele kha sungsah te a beih hae paw kha paw byaking mou a pya hae?
6. A buu pungkunaw hae kya Pachia kha kae beih
Pungkunaw hae kya lawsahnaw, aphi pyanaw liate Zahova kha thehoysah te lukheit te lukheit thaw kae pyakuh. Sam 22:22 kha ria tuhkoute e bakhianaw hae kha hokuh oh:
Pungkunaw hae kya aphi pya hae paw kha na ngae ry tou?
Aphi pya lang na paccynkuh ry tou?
7. Ny hae paw kong bua hopya lang Zahova nynh a ry
Minccang paw hae kha Baebu byaccing kong bua hopya khonaw zia patae a ung. Sam 9:1 te 34:1 kha ria tuhkoute e bakhianaw kha hokuh oh:
Baebu kyate na nypaw kha minccang paw hae bua na hopya ry hae paw akong hae a ung tou?
CCUNGCCAW ABANG NYNH HO HAE PAW: “Beihnaw miakaw tuh Pachia nynh a ry, tuhkeiccuze pawpaw te beih zemah pawtua ung khyh.”
Nangso pawtemou na tua?
ADYNGNAWTE
Raetu kele beihpaw, pungkunaw hae kya Pachia thehoysahpaw te nypaw hae bua hopyapaw kha Pachia nynh a ry.
Bua Liathuinaw
Pachia nynh a rypaw beihnaw tuh pawmou abapi lang nunglang a ccang?
Zahova kele pawcce beih lang a ccang?
Pachia rynaw a mue ry hae paw te pawcce beihkheih lang a ccang?
HOUH CCUNGCHIH
Zohtuh beih vae khyh zah a lungpaw paw nopinung lukheit kong kha “Langmaw Beihnaw See Ka Thua Vae Khyh” cihkuhpaw ccaw kya ria tua.
“Baebu Nynh Hingnaw Hae Kha A Rulaesah Kho” (Rawvianaw, July 1, 2011)
Pungkunaw hae kya aphi pya lang pawnynhmou ae bung kho cipaw ria tua.
Pungkuh lang a ruu zemah a pungkuh keiccuze thanenaw la muepaw ngawphuepaw lukheit kong kha do tua.
Vaelangtung tuh Khrihccaw syntawnaw cite a tua hae, thuasalama vaelangtung manglang a ccang tou?
“Zahova Ccaeccei Hae Tuh Vaelangtung Kha Pawcce A Mang Khyh Hae?” (Website ccaw)
a E konglang hae kha malang ccangkunaw hae kya hokuh lang.