Zisu Kong Kha La Zei Hae

Azuh lungkhu e ccungccaw hae hynh a hung hae mou?— Mihming tuh Matthai, Marka, Luka, Johan, Piter, James, Jude te Paul hae nynh thua. Mihming tuh Zisu ahing lya la hing hae zah Zisu kong la zei hae paw nynh a thua. E hae kong ria tua oh sih.

Luhthung tuh Zisu zuitu hae nynh a thua hae. Tuh e luhthung hae tuh ahung hae mou?— Matthai, Johan te Piter hae nynh thua. Zuitu Matthai te Johan tuh Zisu kong myarya a nyh hae. Zisu kong kha luhkheih rah veih te la zei hae. Zuitu Johan nynh Byaphy te ccah-uh uh thung a la zei. Tuh e hae tuh kykheihnaw Johan, kyningnaw Johan te kythungnaw Johan hae nynh thua. Zuitu Piter tuh uh ning a la zei. Tuh e hae tuh kykheihnaw Piter te kyningnaw Piter a cih kuh. Kyningnaw kyaze Zahova nynh vawlang te Zisu kha: ‘E paw tuh ka sungsahpaw ka ccapaw, ka lungry yntung paw’ cite a ho paw balyng a zei kuh.

Azuh kya amuih oh hawte minccangpaw hae mah Zisu kong la zei bua hae. Luhkheih tuh Marka nynh thua. Zisu a kyng lya hae la ungbua zah athangnaw cia a muih bua paw nynh a thua. Accangpaw lukheih tuh Luka nynh thua. Amaw tuh Sibawi thuazah Zisu a chih kou tenynh khrihccaw lang a la tang.

Azuh kya a muih oh paw Baebu zeitu hae luhning tuh Zisu neitaw hae nynh a thua. Mih min na nyh oh tou?— James te Jude a cih kuh hae. Atakaw lya tuh Zisu kha zyn khyh hae. A ngae vae cite atua hae. Thuasalamah nyalang tuh Zisu kha yn zyn hae zah khrihccaw lang yn tang vae hae.

Azuh kya e nyathya Baebu zeitu paw tuh Paul nynh thua. Khrihccaw a la thuamaw tuh Sawl ala cih kuh. Khrihccaw kha phe lahhuazah vawsaw pya tu nynh lathua. Paul tuh pawtemou khrihccaw lang yn tang?— Ninkheih tuh, khyhcce la ccia lya ze vawlang te bya ho paw roi ala thae. Bya aho tu tuh Zisu nynh thua! Zisu nynh: ‘Kae yn zyn hae paw kha pawcce vawsawnaw na pya hae’ cite a khia. Tuhkoutetuh Paul tuh alung pahleih kuzah khrihccaw lang la tang vae. Rom ccah-uh kyate Hebru kya cia uh 14 la zei kho.

Baebu ccaw nintakyh a ria oh tou?— Baebu ccaw a ria oh ze tuh Zisu kong houh ny lang. Imua hae Zisu kong houh na nyh ry khyh oh tou?—