Akong 6
Ccaw Sah Vae Ze Tuh Innbyng Kya A Rulaekuh Kho
‘Ccaw hae hynh Zahova Pachia kyate a mue oh paw ro nynh a thua hae.’—Sam 127:3
Zu te vaw nynh ccaw he a sah kuh vae tetuh a lungtua sah la zemah vawsawnaw mah a tung kho oh. Nung paw lang tang takaw tuh imua do-oih paw hynh pawcihmou a lah ru cipaw yn ny thya hae tuh mihngae mih ang solei a thua cih. Lung rulaekunaw a ung vae hawte ii-byng khyh naw keiccuze thinriakunaw a ung kho. Imua do-oihnaw keiccuze sungsahkunaw athang khyh nawlang zu te vaw nynh rya law syngriaku lang aho cih. Innbyng vawsawnaw phishing kho nawlang Baebu nynh pawcihtemou yn bung kho?
1 CCAW SAH VAE ZE INNBYNG KYA A RULAEKUH KHO CIPAW KHA NING NANG
BAEBU HOPAW: ‘Sungsahkunaw tuh a lungsae, thawccinaw a hoi, a maw hoynaw hanglang kyalya ccung khyh, a thin riathya khyh.’ (1 Korin 13:4, 5) Ccaw asah takaw paw nung lukheih nynh a ccaw hanglang a rya asuh paw hynh ngae-ang lang paw thua khyh. Hynhte vae tuh na vawpaw kha a ung bua huataw paw cite na tua kho. Thuasalama saw phah nang, ccaw do-oihnaw kya vawpaw mah ase bua. Ahonaw kya ae bung kho nawlang lungsaenaw te na ho pah kho.
‘Vawpaw hae . . . zu hae lungrynaw kha nythyanaw zua ku oh.’ (1 Piter 3:7) Zu hae tuh ccaw hae do-oihnaw rya kya nynh mih ccyh phe athang cipaw kha thaepyathya a ho. Ryalaw thawpaw a mue vae oh keiccuze lungriathae vawsawnaw, bangnaw, thawzyanaw mah a ung kho. Na zu nynh na tungvaw alung ccingkhyhnaw a ung langze ‘alungsae paw tuh athawsae paw laeze ahoy hua’ a cih kuh paw Baebu bya kha tua lang. (Phungtangbya 16:32) Zu nynh alaw lang paw rya aho abounaw kha bung.—Phungtangbya 14:29.
NA CI LANGPAW:
Paw hae: Ccaw hae kha ninthu mah khuazi mah ngaw khae lang hae. Zu hae te ccaw hae hanglang a ccyh alae lang pya kho nawlang a ccangpaw ryalaw hae kha nung bang
Nung hae: Nae paw nynh ccaw hae ae ngaw khae paw rya kha phute sah pah. Imua hae hynh hoyte ado-oih thya khyh zemah seisah nang. Hynh te nynh ci lang cipaw kha nebaleih te ho pah
2 NAE INNBYNG SUNGSAHKUNAW RUI KHA TYNG SAH OH
BAEBU HOPAW: ‘Miming tuh chikheih sawkheih nynh a thua hae.’ (Genesis 2:24) Nae innbyng kya ccaw nae sah vae oh zemah nang ning luning tuh “chikheih sawkheih” nynh kae thua ung cipaw kha ning nang oh. Nae innbyng sungsahkunaw rui kha houh tyng kho nawlang zua kuh oh.
Zu hae, nae vawpaw hae nynh ae bung oh paw te ae do-oih oh paw kha nae lung tua sah. Na lungtuanaw na langsahnaw nynh nae luning houh sungsahkunaw lang ae bung cih oh. (Phungtangbya 12:18) Vawpaw hae, nae zu hae kha pawcih ciatemou kae sungsah zah phu kae tesah cipaw kha ho pah. Zu nynh innbyng a do-oihnaw kha thehoy sah oh.—Phungtangbya 31:10, 28.
‘Hunghung ccungccaw zemah a maw hanglang kyalya ccungku leite mingccang paw hoynaw hanglang ccung bia sah.’ (1 Korin 10:24) Na innbyng hanglang ahoy nawlang paw rya kha a zungzae te lah. Nae luning te bya ho ku kheih lang, thehoy sah ku kheih lang, lukheih te lukheih bya ngaepyaku lang a ccyh pya kuh oh. Zu vaw thuanaw kya na maw rynaw hanglang kyalya tua nang. Na zu na vawpaw rynaw kha mah tua pya bia. Baebu nynh: ‘Luning nawccawte zu te vaw tangnaw rya kha lah oh,’ a ci. (1 Korin 7:3-5) Tuhkeiccuze e rya hynh nae luningte hoyrarihte ho pakuh kalang oh. Lungsaenaw te thaepyaku thyanaw liate nae innbyng sungsahkunaw rui kha houh atyng cih.
NA CI LANGPAW:
Nangning zuvaw hanglang a ccyh accangte nung ku oh
Zu te vaw sungsahkunaw langsakunaw lang ccawky ku te lahsung hangkhakheih pya ku oh
3 IMUA HAE KHA CCANGPAH HAE
BAEBU HOPAW: ‘Nang tuh na dih taraw lya mawte Baebu bya kha na nyh vae. Tuh-e Baebu bya nynh khungnaw mue nawlang nang kha hawnaw ae pya.’ (2 Timote 3:15) Imua hae kha pawtemou ccang pya lang cipaw kha ho ku kalang oh. Ccaw hae hynh nungvue lungkhu unglya mawte ngae-ang lang ciate ccangku khonaw ahoy hae. E ccyh lya mawte nung te paw roi kha a ny vae hae. A nung cyisahnaw ozia kha ccaw hae tungvaw kya cia a thua kho. Matei a zulya maw khate ccaw kha ria pah. Na ria paw ccaw kha thae thya lakhyh sahlah zemah yn le tetuh ccaw ria rynaw thinlung ynhoi kho.
Imua hynh myarya dih ung salazemah Pachia kong hopyapaw bya a thae kho. Tuhkeiccuze imua nynh phe thae langte Zahova kalang khe sawsang. (Deuteronomi 11:19) Imua hae na zuekhae lya khe mah raetu Pachia kong kha hopya bia. (Sam 78:3, 4) Hynhte na cyinaw liate imua kha yn le vae tuh Zahova Pachia na sungsahnaw kha yn nyh cih zah imua nynh mah yn sungsah bua vae cih.
NA CI LANGPAW
Imua hae ccangpya kho nawlang hawnaw yn pya cite sawsang kuh
Ccaw hae na ny sah rypaw akong kha vaeleih vaeleih ho pah. Tuhte ze thang nynh matei azulya maw khate a ccang kuh kho vae cih hae