CCANGKUNAW 12
Baebu Pou Ccangkukhonaw Lang Pawnynhmou Ae Bung Cih?
Baebu ccangkupaw tuh zungzae zoi khyh zemah a thane. Thuasalama, pou ka ccangkuh kho vemah cite na tua kho. Pawcce pou ccangkuh nape a tuh? Ruunaw hae laku pou ccangkuh lang pawnynhmou ae bung cih?
1. Baebu ccangkupaw tuh pawcce a phute?
“Pachia Bya tuh ahiinpaw, athungpaw” nynh thua. (Hebru 4:12) Baebu tuh Pachia a tuanaw, na tungvaw kya Pachia sungsakunaw kha a langsah keiccuze a phute. Nynaw yn hoisah a piaze amepaw hawnaw te ngaehoinaw mah yn pya kho. Abapi hua tuh, Baebu nynh Zahova vaeccaw tang lang ae bung kho. Baebu na ccangkuh ze na hingnaw houh yn hoyhua vae cih.
2. Baebu byaccing phutenaw kha ny lang pawcce azici?
Baebu byaccing tuh a phutepaw sisua te nynh a loku. Tuhkeiccuze Baebu nynh “byaccing kha rekuh lah, zua nan vae” cite thaw yn pya. (Phungtangbya 23:23) Baebu byaccing phutenaw kha ny vae ze ruunaw tung zemah—ungtaw leite pou ccangkuh lang ah zuakuh oh.—Phungtangbya 2:4, 5 kha ria.
3. Pou ccangkukhonaw lang Zahova nynh pawtemou ae bung cih?
Aening yn raetupaw athung huaccepaw Zahova nynh amaw kong pou yn ccangsah kuh ry. Amaw nynh “ry khylan te cyi khylan” ae pya kho. (Filipi 2:13 kha ria.) Ccangkuh rynaw thinglung, ccangkupaw hae kha zui rynaw thinglung ungnaw lang ae bung kho. Ruunaw hae, rawsenaw hae kha teingkhonaw lang thawzung mah ae pya kho. Tuhkeiccuze Baebu pou ccangkukhonaw lang Zahova kalang amete sawsangnaw te bungnaw ngia.—1 Thesalon 5:17.
HOUH CCANGKUH LANG HOUH MUIH LANG
Ryalaw lungnaw laku, rawsenaw hae laku Baebu pou ccangkukhonaw zia te ungtaw leite Baebu ccangkuh lang Zahova nynh ae bungnaw kong kha ccangkuh tua.
4. Baebu ccangkunaw kha abapi lang nung
Ryalaw eih lung zah Baebu ccangkuh lang a ccyh ungkhyh cite na tua ze pawmou na cyi kho. Filipi 1:10 kha ria tuhkoute e bakhianaw hae kha hokuh oh:
Hingnaw kya pawhaemou ‘abapi huaccepaw uccaw hae’ cite na tua?
Baebu ccangkunaw kha pawtemou abapi lang nung kho lang?
Pung lungkhu kya laesaria hae ruin kou te lung hae na ruin zetuh ccung lang khyh
Lung hae na ruin tou zetuh laesaria hae a lunghua a ccung vae cih. Tuhhawte hingnaw kya “abapi huaccepaw uccaw hae” kha masaty lang na nung ze tuh-e hae kha na cyih kho cih zah ccangpaw hae hanglang mah accyh na hoi cih
Baebu ccangkunaw nynh Pachia doliakuh lang hoonaw—thuakhyhze Pachia kha nyte beih rynaw thinglung kha yn hoisah cih. Matthai 5:3 kha ria tuhkoute e bakhianaw kha hokuh oh:
Baebu ccangkunaw kha abapi lang nung ze pawtemou thanenaw mue lang?
5. Rawsenaw tung ccyh kya ungtaw nang
Abang nynh Baebu pou ccangkuh khyh nawlang ae khee cih hae. Francesco kong kha do tua. VIDEO kha pia, tuhkoute akaw lang-e bakhianaw hae kha hokuh oh.
E video kya, a ccangkuh hae paw kha Francesco nynh bua a hopah hae tuh a nung te a bang hae nynh pawtemou a liaru hae?
A ungtaw khyh keiccuze paw thanenaw mou a mue?
2 Timote 2:24, 25 kha ria tuhkoute e bakhianaw hae kha hokuh oh:
Baebu na ccangkupaw kha na innbyng te na bang hae nynh pawtemou a tua hae?
E Baebu ccaw liate maw Baebu ccangkupaw kha lukhakheit nynh a ry khyhze pawtemou cyi lang? Pawkeiccumou?
6. Zahova kha doliakuh
Zahova te houh naekuh lang zetuh Pachia rynaw muerynaw thinglung yn lungthung cih. Thuasalama, hingnaw kya Pachia phunglang hae te ung lang rulaekuh lang a ruu kho. Tuhte thua langze ungtaw nang. Zahova nynh ae bung cih. VIDEO kha pia, tuhkoute akaw lang-e bakhianaw hae kha hokuh oh.
E video kya, Zahova rynaw mue lang Jim nynh pawhaemou a la rulaekuh?
Amaw akong kyate pawkhamou na ry?
Hebru 11:6 kha ria tuhkoute e bakhianaw hae kha hokuh oh:
Zahova nynh “amaw a ccung hae paw”—amaw kha nykaleih te amaw rynaw mue lang a zuakuh hae paw hanglang pawmou yn cyipah cih?
Baebu ccangkuh lang na zuakupaw kha Zahova nynh a muih lyakhe pawtemou a ung cih cite mou na tua?
CCUNGCCAW LUKHEIT NYNH KHIAPAW: “Zahova Ccaeccei hae te pawcce Baebu na ccangkuh?”
Pawtemou na phi cih?
ADYNGNAWTE
Baebu ccangkupaw tuh zungzae zoi khyh zemah lungpaw te zungzae hing lang yn bung kho. Zahova kha pou na doliakuh ze lasung ae pya cih.
Bua Liathuinaw
Baebu byaccing tuh pawcce na hanglang a phute?
‘Abapi huaccepaw uccaw hae’ ny vae ze pawmou cyi lang a ccang?
Baebu pou ccangkukhonaw lang pawcce Zahova kalang sawsangte bungnaw ngia lang a ccang?
HOUH CCUNGCHIH
Accyh kha thanenaw ung lang mangnaw zia ccangpali kha tuatua.
“Accyh Kha Thanenaw Ung Lang Pawtemou Mang Lang” (Thaekuh!, February 2014)
Avawpaw nynh a rawsenaw laku nopinung lukheit Baebu pou ccangkukhonaw lang Zahova nynh a bungnaw kong kha do tua.
Aungtaw leipaw azu keiccuze avawpaw thanenaw la muenaw kong kha do tua.
Zahova Ccaeccei hae tuh innbyng phiatu hae cite a seisah hae. Tuh-e tuh ame tou?
“Zahova Ccaeccei Hae Tuh Innbyng Phiatu Hae Tou Tuhkhyhze Ahoysahtu Hae Tou?” (Website ccaw)