ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

4 Mɛn ˗nu dua ˗mü kö ˗wo yi ˈsü ꞊dhɛ yö ˗kë Klito ˈˈdhiʋ̈ ˗mɛn ˗nu waa mɛn ˗nu ˈwo wo ˗zoto ˗Zlan ˗bha pë ˈö ˗bin ˗sü ˈka ˗a ˈˈpiʋ̈ ˗an ˈdhö. 2 ˈMɛn ˈwo ˗zo ˗kë mɛn ˗bha pë ˈˈpiʋ̈ ˗mɛn ˗nu ˈka, ˗an dua ˗mü kö ˗wo kë kpɛnŋdhö wo ˗bha yö ˈgü. 3 ˈˈKɛɛ man ˗zë, ka ˗bha za ˗dɔ n ˗bha ˗sü ɛɛnˈˈ mɛnbhɩɩdhe ˗nu ˈö ˈwo zakanmɛn ˗nu ˈka ˗an ˗bha za ˗dɔ n ˗bha ˗sü ˈyaa n ˈgü ˈwɔn ˈbhaa ˈka. ˈMaan za dɔ n ˗de ˗bha ˗ʒiaanwo. 4 ˗A ˗gɛn ˗mü ꞊dhɛ ˈwɔn yaa ˈa ˗dho ˗a kë kö n zuʋ̈ˈˈ ˗yö za dɔ n ˗bha ˗a ˗wɔn ˈgü ˈyaa ˈdhö. ˈˈKɛɛ ˗a ˗kë ˈˈdhʋ̈ ˗sü ˈyaa ˈnën ˈö˗ ˗zɔn ꞊dhɛ pö ˈyaa n ˗bha. ˈYö sü ꞊dhɛ mɛn ˈö n ˗ga ˗mɛn ˈka, ˈyö ˗tɔ Zoova. 5 ˈKaa ˗dho ˗a pö ˈka ˈˈtʋ̈ŋ ˈto ˈˈdhiʋ̈ ˈka za dɔ mɛn ˈˈoo ˗mɛn ˗bha, ˗yö ˈto ˗a ˈka ˈˈdhʋ̈ ˗yö yö ˗a ˈka Dëmɛn nu ˗yi ˗bha. ˗Ya nu, ˗yö ˗dho ˗dhɛ ˈˈpʋ ˈwɔn ˗nu ˈwo ˗bin ˗sü ˈka ˗dhɛtiidhɛ ˈgü ˗an ˗ta, ˈö ˈˈdhɛ bho pë ˈö mɛn ˗nu zuʋ̈ˈˈ ˈgü ˗a ˗ta. ˗Ya kë ˈˈdhʋ̈, ˈyö ˗Zlan dho mɛn ˈö ˈdhö ˗a ˗bha ˈtɔbhɔdhe ˈö˗ ˗man kun ˗a nu ˗a ˗dhɛ.

6 ˈˈKɛɛ n ꞊dhegblü ˗nu, ˈwɔn ˗nu ˈwo bhë a ˗an ˗gban n ˗de ˗bha, ˈa ˗an ˗gban ˈpö Apodhɔsö ˗bha, ka ˗bha ˈwɔn ˗së ˗wɔn ˈgü. ˗Yö ˗kë ˈˈdhʋ̈ kö ˈka bɔ yi ˗ta ˈka ˈto ˈtɔŋ˗ ˈö yö ˗a ˈˈpiʋ̈: «˗Ka ˈto pë ˈö ˗bɛnzë ˗sü ˈka ˗a ˈˈpiʋ̈,» kö ˈkaa ˗dho ka ˗de ˈsü ꞊va ˈö ˈka mɛn ˈbhaa sü ˈkpii˗ mɛn ˈbhaa ˗bha. 7 ˗Mën ˈö ü ˗kë ꞊bhlëësü mɛn ˈˈwɛɛ ˗nu ˗bha? ˗Mën ˈö ü ˗gɔ ˈö ˈyaa pë ˈwo˗ nu ü ˗dhɛ ˗a ˈka? Pë ˈö ˗a nu ˈnën ˈwo˗ wo ü ˗dhɛ bhë, ˈmën ˗kë ˈü ü ˗de sü ꞊va ˗a ˗wɔn ˈgü, ˈü˗ ˗kë ꞊dhɛ ˈpë wo ˈti˗ nu ü ˗dhɛ ˗a ˈdhö?

8 Ka ˈgwü ˗ya dɔ ˈsaadhö ˗ee? ˈKa kë ꞊bhɔɔmɛn ˗nu ˈka ˈsaadhö ˗ee? ˈKa dɔ yi ˈˈdhiʋ̈ ˈka ˗ya ˗gblüdëdhɛ kë ˗sü ˗bha ˗ee? A˗ ˈˈpiʋ̈ ꞊dedewo kö ˈka ˗ya ˗gblüdëdhɛ kë ˗sü ˗bha, kö yi ˗de ˈpö ˈyi ˗gblüdëdhɛ kë ka ˈˈpiʋ̈. 9 ˈYö sü ꞊dhɛ ˈman ˗dhɛ ˗ga ˗a ˈgü, ˗yö ˗kë ꞊dhɛ ˈmɛn ˈyi ˗kë bɔmɛn ˗nu ˈka bhë yi ˈnën ˈyi ˗tɔ mɛn ˗totaabhasü ˗nu ˈö ˗Zlan ˗yö ˗an dɔ mɛn ꞊gban ˈˈpɛpɛ ꞊zinŋgü ꞊dhɛ mɛn ˗nu ˈö za ꞊yaa˗ ˗an ˈkun, ˈö ˈwo ˗dho ˗an zë ˗an ˈdhö. ˗A ˗gɛn ˗mü ꞊dhɛ ˈya kë ˈˈkpɔnŋtaamɛn ˗nu, ˈˈkiö ˗nu waa mɛnbhɩɩdhe ˗nu ˗bha ˗gapë ˈka. 10 Yi ˈˈblɔɔnsü Klito ˗wɔn ˈgü, ˈˈkɛɛ ˈyö ka ˗zë ˈka ꞊kpɔɔsü kaa Klito ˗nu ka ˗kɔ ˗bha ˗kë ˈkoo ˗sü ˈgü. Yi ˈˈtëëtë, ˈˈkɛɛ ka ˗zë ka ˈˈgbɩɩ˗. ˗Wo ka ꞊bhlëë ˗ya, ˈˈkɛɛ yi ˗zë ˗wo yi ˗sü ˈyaa˗. 11 Dɔ ˈö ˈkwa˗ wo ꞊dɛɛ, din˗ waa ˈˈyi mü ˗dhɔ ˗wo ꞊kun yi ˗bha, ˈö sɔ ˈyaa yi ˗gɔ, ˈö ˈwo ꞊kun yi ˗man, ˈö yi wɔdhɛ ˈyaa ˈdhö. 12 Yi ꞊sëë ˗yö ꞊kun bho ˗ni ˈgü yö ˗kë yi ˗kɔ ˈˈdhiʋ̈ ˗sü ˈka. Mɛn ˗nu ˗wa ˈsi bho yi ˗gɔ, yi ˈdhuëë˗ ˗kpɔ ˗an ˗bha. ˗Wa yi ˈˈklʋʋbhɔ, yi˗ ˗kun yi ˗bha zuʋ̈saadhɛ ˈka. 13 ˗Wa ꞊suawɔn ˗nu blɛɛˈˈ yi ˗bha, yi˗ ˗daa ˗kë ˗wo ˈˈnɛɛnnɛn ˗nu ˈka. ˗Wo yi ˗sü ꞊dhɛ ˈˈdunŋtaapë* ˗nu ˈö ˈwo ˈˈkpɔnŋ ꞊taa, ˈö ˗an ˗san ˗yö mɛn ꞊gban ˗kë ˗an ˈdhö ˈö nu ˈö yö ˗a ˈka ꞊dɛɛ ˗bha.

14 N ˈti pë ˗nu ˈwo bhë ˗an pö ˈˈdhʋ̈ kö ˈa ˈlëë˗ dɔ ka ˗bha, a˗ ˗kë ˈˈdhʋ̈ ꞊ʒiaan kö ˈa ka ꞊kpɔɔ ꞊dhɛ n ˗man ˈnën dhɔɔbhaasü ˗nu ˈdhö. 15 ˈKö ˗kë ꞊dhɛ ˗zoto ka ˈˈpiʋ̈ ˗mɛn ˗nu ˈwo Klito ˗bha ʒiaan ˗ta ˗wo ˗mɔn ˈˈgblü ˗kɔŋ do (10.000) ˗bha, ka dë ˗nu ˈwaa ꞊va. Man ˈnën ˈa ꞊dhɛ ka dë ˈdhö, ˈa nɔɔn˗ ˗së pö ka ˗dhɛ ˈö ˈka ˗ʒiö Yesu Klito* ˈˈpiʋ̈. 16 ˈDhɛ ˈö ˈˈdhʋ̈, a ka ꞊faanmën kö ˈka ˈto n ˗man ˈwɔnzuan ˈˈpiʋ̈. 17 Yö ˈnën ˈö˗ ˗wɔn ˈgü ˈa Timote bɔ ka ˈˈpiʋ̈, ˗a ˗gɛn ˗mü ꞊dhɛ ˗yö n ˗man ˈnën dhɔɔbhaasü ˈö ˗klu Dëmɛn ˗bha ˗a ˈka. ˗Yö ˗dho ka ˗zo ˗buö ˗kɔ ˈa ˈwɔn ˗nu ˗kë ˗a ˈka Yesu Klito ˗bha ʒiaan ˗ta, ˈa mɛn ˗nu ꞊klaŋ ˗kë ˗a ˈka ˗dhɛ ꞊gban ˗bha, ˗zlanwokɔdhi ˈˈpɛpɛ ˈgü bhë ˗a ˈka.

18 Mɛn ˈbhaa ˗nu ˗wo wo ˗de ˗sü ꞊va, ˈyö sü ꞊dhɛ ˗an ˗bha ˈgü n ˈti ˗dho nu ka ˈˈpiʋ̈ ˈmü ˈzü. 19 ˈˈKɛɛ ˗a yi ˈyaa ꞊gblɛɛn ˈzü kö ˈa nu ka ˈˈpiʋ̈ ˈmü. Zoova ˗ya ˈˈwɩ ˗a ˗bha ˈman nu, pë ˈa ˗dho n ˈˈtʋ̈ŋ kë ˗a ˈgü ˈyaa ˈnën ˈö ˗tɔ mɛn ˗nu ˈwo wo ˗de ˈsü ˗ni ˈgü ꞊va bhë ˗an blɛɛˈˈ ˗wɔn ˗nu. A ˗dho ˗a ˈˈslö mɛɛnˈˈ ꞊ʒiaan kö ˗ya kë ꞊dhɛ ꞊faan ˈö go ˗Zlan ˈˈpiʋ̈ yö ˈnën ˈˈdhiʋ̈sü ˗an ˈka, ˈa˗ ˈwɔn dɔ. 20 ˗A ˗gɛn ˗mü ꞊dhɛ mɛn blɛɛˈˈ ˗wɔn ˈyaa ˈnën mɛn ˗kë ˗Zlan ˗bha ˗Gblüdëdhɛ ˈgümɛn ˈka. Mɛn ˈö ˗Zlan ˗bha ˗Gblüdëdhɛ ˈgümɛn ˈka, ˗wo ꞊faan ˈö go ˗Zlan ˈˈpiʋ̈ ˗a ˗yö ˗a këwɔn ˗nu ˈgü. 21 ˈMën ˈö ka ˗dhɛ ˗së? ˈA nu ka ˈˈpiʋ̈ ˈmü ˈˈdhünën ˈka ˗ee, ɛɛnˈˈ ˈa nu ˗dhɔ waa ˗kë ꞊dhɔŋsü ˗sü ˈka?