ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ

9 ˗Potaadhe ˈyaa n ˗gɔ ˗ee? ˈMaan bɔmɛn ˈka ˗ee? N ˈti ˗kpan kwa Dëmɛn Yesu ˗bha ˗ee? Yö ˈa˗ kë ˗ni ˈgü Dëmɛn ˗dhɛ bhë, ˈkaa ˈnën ˈka ˗tɔ ˗a ꞊trɔɔn ˈö go ˗a ˈgü ˗ee? 2 ˈKö ˗kë ꞊dhɛ mɛn ˈˈwɛɛ ˗nu ˗bha ˈgü ˈmaan bɔmɛn ˈka, ˈyaa za ˈgü ꞊dhɛ ka ˗zë a bɔmɛn ˈka ka ˗bha ˈka. ˗A ˗gɛn ˗mü ꞊dhɛ ka ˈnën ˈka ˗tɔ pë ˈö˗ ˗zɔn ˈkpakpadhö ꞊dhɛ a bɔmɛn ˈka Dëmɛn ˗bha yö ˈgü.

3 Pë ˈa˗ ˈˈpiʋ̈ ˈa˗ pö mɛn ˗nu ˈwo za dɔ ˗ni ˈgü n ˗bha bhë ˗an ˗dhɛ ˈyö ꞊nɛn: 4 ˗A ˈˈse ˈyaa yi ˗dhɛ kö ˈyi pë ˗bhö ɛɛnˈˈ kö ˈyi müpë ˗nu mü ˗ee? 5 ˗A ˈˈse ˈyaa yi ˗dhɛ kö dhe ˈö ˗zo ˗yö Yesu ˗dhɛ ˗mɛn ˈka ˈyi˗ ˈsü, kö ˗yö dɔ yi ˗gɔ ꞊dhɛ ˗kɔ ˈö bɔmɛn ˗nu ˈwo to waa Dëmɛn ꞊dhegblü ˗nu waa Sefasö ˗nu ˈwo˗ ˗kë ˗a ˈka bhë ˗a ˈdhö ˗ee? 6 Ɛɛnˈˈ yaa Baanabasö yi dosɛnŋ ˈnën yi dua ˈdhö ˗mü kö ˈyi yökë, kö ˈyi ꞊kun ˗tosɛta ˗kë ˗a ˗ta ˗pë ꞊slɔɔ˗ ˗ee? 7 ˈˈSɔdha ˗mɛɛn ˈö ˗dho ö ˗de ˗bha ˈwëëga ˈsü kö ˗yö ö ˗bha ˈˈsɔdha ˗dhɛ kë ˗a ˈka? De ˈö ˗drɔɔn ˗dhü ta ˈö ˈyaa˗ ga ˗bhö? Ɛɛnˈˈ de ˈö ˗tuëë ˗maankë ˈö ˈyaa ˗tuëë ˗nu ˈwo ˈˈdhʋ̈ ˗an ˈɲɔn ˈˈyi ˈbhaa mü?

8 Pë ˈa˗ blɛɛˈˈ ˗ni ˈgü bhë, mɛnbhɩɩdhe ˗nu ˗bha ˈwɔn yö ˗kɔ ˗mü ˗ee? Pë ˈö ˈTɔŋ˗ ˈsëëdhɛ ˗ya pö ˈpö ˈyaa ˗mü ˗ee? 9 ˗A ˗gɛn ˗mü ꞊dhɛ ˈtɔŋ˗ ˈö ˗Zlan ˗ya nu Moizö ˗dhɛ bhë, pë ˈö ˗bɛnzë ˗sü ˈka ˗a ˈgü ˈyö ꞊nɛn: «Ü dua ˈyaa ˗mü kö ˈü pë* yö ˗du ˈö ˈble˗ ˗man ˗ni ˈgü ˗a ˈˈdhi ˗bha.» ˗Du ˗nu ˈnën ˈö ˗an ˗wɔn ˗yö kun ˗Zlan ˗gɔ ˈˈgbɩɩ˗ ˈyö˗ pö ˈˈdhʋ̈ ˗ee? 10 Ɛɛnˈˈ kwa ˈnën ˈö kwa ˗wɔn ˈgü ˈö˗ pö ˈˈdhʋ̈? Kwa ˈnën ˈö kwa ˗wɔn ˈgü ˈö Moizö ˗yö ˈtɔŋ˗ ˈö bhë ˗a ˗bɛnzë. -A ˗gɛn ˗mü ꞊dhɛ mɛn ˈö ˗dhɛ bɔ waa mɛn ˈö pë ˈö go ˈbhlaa ˗a ˗man, pë ˈö ˗an ꞊plɛ ꞊gban ˗zo ˈˈpiʋ̈ ˈyö ˗tɔ ˈwo pë ˈnën ˈbhaa ꞊slɔɔ ˗a ˈgü.

11 Yi ˈö ˈyi pë ˗së ˗nu ˈö ˈwo go ˗Zlan ˈˈpiʋ̈ ˗an ga ta ka ˈˈpiʋ̈ ˈmü bhë, pë ˈbhaa ˈö yi ˗bhawɔn ˈdhö˗ ˗bha ˈka˗ nu yi ˗dhɛ, kö ˈwɔn yaa ˗mü ˗ee? 12 Mɛn ˈˈwɛɛ ˈbhaa ˗nu ˗wa kë mɛn ˗nu ˈö ka dua ˈdhö ˗mü kö ˈka˗ kë ˈˈdhʋ̈ ˗an ˗dhɛ ˗an ˈka, ˈyö yi ˗zë ꞊wɛ? Ka dua ˈyaa ˗mü ˈpö kö ˈka˗ kë ˈˈdhʋ̈ yi ˗dhɛ kö ˗yö ʒiö ˗a ˈka mü ˗ee? ˈˈKɛɛ ˈkö ˗kë ˈˈdhʋ̈, pë ˈö yi ꞊duaa ˈka bhë, ˈyaa˗ ˗dhɛ ka ˗gɔ. Yi ˈwɔn ꞊gban ˈˈpɛpɛ ˗kun yi ˗bha ꞊ʒiaan zuʋ̈saadhɛ ˈka, ˗yö kë ˈˈdhʋ̈ kö ˈyaa ˗dho ʒiaan ta nɔɔn˗ ˗së ˈö ˗gban Klito ˗bha bhë ˗a ˗gɔ. 13 ˈKaa˗ ˈwɔn dɔ ꞊dhɛ mɛn ˗nu ˈö ˈwo ˗Zlan ˗bha yökëmɛn ˗nu ˈka, ˗wo pë ˗nu ˈwo ˗Zlan ˗dhɔkë ˗a ˈgü ˗kɔ ˈgü ˗an ˗bhö, ˈö mɛn ˗nu ˈwo yökë ˈˈsaabhodhɛ ˈgü ˗kplawo bhë ˈˈsaapë ˈbhaa ˗nu ˈdhö ˗an ˗bha ˈka ˗ee? 14 ˗Kɔ do ˈö bhë ˗a ˈka ˈpö, Dëmɛn ˗ya ˗pö ꞊dhɛ mɛn ˗nu ˈwo nɔɔn˗ ˗së pö ˗mɛn ˗nu ˈka, ˗an dua ˗mü kö ˗wo wo ˗bhöpë ꞊slɔɔ nɔɔn˗ ˗së pö ˗sü ˈgü.

15 ˈˈKɛɛ man ˗zë n ˈti ꞊trɔɔn ˈsü pë ˗nu ˈwo bhë ˗an ˈˈwɛɛ ˈbhaa ˈgü. ˗A blɛɛˈˈ ˈa˗ wo ˈsëëdhɛ ˈö yö ˗a ˈgü bhë, n ˈti˗ kë ˈˈdhʋ̈ ˈpö kö ˈka pë ˈbhaa kë n ˗dhɛ. ˗A ˗gɛn ˗mü ꞊dhɛ n ˗man ga ˗sü ꞊fiëë ˗yö ˗dhö ˈö ˗ʒiö ˗a ˈka... A n ˗de ˈgü ˈˈgɔɔgɔ ˗a ˗dhɛ ˈö bhë ˗a ˈgü, ˈö mɛn ˈˈwɛɛ ˈbhaa ˈyaa ꞊mɔɔn˗ ˗bha kö ˗yö ꞊bhlëë bho n ˗bha. 16 ˈˈKɛɛ nɔɔn˗ ˗së ˈa˗ pö ˗ni ˈgü bhë, pë ˈa ˗dho n ˗de ˈsü ꞊va ˗a ˗wɔn ˈgü ˈyaa ˗mü. ˈYö sü ꞊dhɛ yö ˈö n dua ˈdhö ˗mü kö ˈa˗ kë yö ˗mü. N ˈti nɔɔn˗ ˗së pö ˈyaa ˗së n ˗bha ˈka! 17 Kö n zuʋ̈ˈˈ ˗yö ˈˈwɩ ˗a ˗bha ˈa˗ kë, a ˗dho ˗a ꞊trɔɔn yö. Ɛɛnˈˈ ˈkö ˗kë ꞊dhɛ a˗ ˗kë ˗kpla ˗bha, yö ˈwo˗ ˈˈklɔɔn bho n ˗bha kö ˈa˗ kë yö ˗mü. 18 ˗A ꞊trɔɔn ˈa˗ ꞊slɔɔ ˗a ˈgü ˈyö ˗tɔ ˗mën ˈsa? ˗A ꞊trɔɔn ˈa˗ ꞊slɔɔ ˗a ˈgü ˈyö ˗tɔ ˈman nɔɔn˗ ˗së pö, ˈa˗ pö ˈˈwɛɛwɛ, kö pë ˈö nɔɔn˗ ˗së pö ˗mɛn ꞊duaa ˈka bhë ˈmaan ˗dho ˗a pö ˈˈgbɩɩdhɛ ˈka ꞊dhɛ ˗wa kë n ˗dhɛ.

19 ˈMaan mɛn ˈˈoo ˗mɛn ˗gɔ ꞊dhuëŋdhɛ ˈgü, ˈˈkɛɛ a n ˗de ˗kë mɛn ꞊gban ˈˈpɛpɛ ˗bha ꞊dhuëŋ ˈka, kë ˈˈdhʋ̈ kö n ˗kɔ ˗yö ˗mɔn mɛn ꞊va ꞊dede ꞊slɔɔ ˗sü ˗bha. 20 ˈMan kë Zuifö ˗nu ˈˈpiʋ̈, a n ˗de ˗kë ꞊dhɛ Zuifö ˈdhö, ˗yö kë ˈˈdhʋ̈ kö ˈa Zuifö ˗nu ꞊slɔɔ ˈa nu ˗an ˈka Yesu ˗bha ʒiaan ˗ta. ˈMan kë mɛn ˗nu ˈwo ˈtɔŋ˗ ˗kɔ ꞊löö ˗an ˈˈpiʋ̈, a n ˗de ˗kë ꞊dhɛ mɛn ˈö ˈtɔŋ˗ ˗kɔ ꞊löö ˗a ˈdhö, ˈˈkɛɛ kö ˈmaan ˈtɔŋ˗ ˗kɔ ꞊löö. A˗ ˗kë ˈˈdhʋ̈ kö ˈa mɛn ˗nu ˈwo ˈtɔŋ˗ ˗kɔ ꞊löö ˗an ꞊slɔɔ ˈa nu ˗an ˈka Yesu ˗bha ʒiaan ˗ta. 21 Mɛn ˗nu ˈö ˈwaa ˈtɔŋ˗ ꞊bhlëë ˗ya ˗mɛn ˗nu ˈka ˈman kë ˗an ˈˈpiʋ̈, a n ˗de ˗kë ꞊dhɛ mɛn ˈö ˈyaa ˈtɔŋ˗ ꞊bhlëë ˗ya ˗a ˈdhö, ˈˈkɛɛ kö a ˗to ˗Zlan ˗bha ˈtɔŋ˗ ˗nu ˈˈpiʋ̈, ˈö ˈa Klito ˗bha ˈtɔŋ˗ ˗kɔ ꞊löö ˈpö. A˗ ˗kë ˈˈdhʋ̈ kö mɛn ˗nu ˈö ˈwaa ˈtɔŋ˗ ꞊bhlëë ˗ya bhë, ˈa ˗an ꞊slɔɔ ˈa nu ˗an ˈka Yesu ˗bha ʒiaan ˗ta. 22 Mɛn ˗nu ˈö ˈwo ˈˈtëëtë ˈman kë ˗an ˈˈpiʋ̈, a n ˗de ˗kë ꞊dhɛ mɛn ˈö ˈˈtëëtë ˗a ˈdhö, ˗yö kë ˈˈdhʋ̈ kö ˈa ˗mɔn mɛn ˗nu ˈwo ˈˈtëëtë ˗an ꞊slɔɔ ˗sü ˗bha ˈa nu ˗an ˈka Yesu ˗bha ʒiaan ˗ta. ˈMan kë pë ꞊suu ꞊gban ˈˈpɛpɛ ˈka mɛn ꞊suu ˈˈpɛpɛ ˗dhɛ, ˗yö kë ˈˈdhʋ̈ kö ˈa ˗mɔn mɛn ˈbhaa ˗nu dha ˗sü ˗bha. 23 A ˈwɔn ˈˈpɛpɛ ˈwo bhë ˗an ˗kë ˈˈdhʋ̈ nɔɔn˗ ˗së ˗wɔn ˈgü, kö ˈa˗ pö mɛn ˈˈwɛɛ ˗nu ˗dhɛ.*

24 ˗A ˈwɔn ˈnën ˈö ˈkaa˗ dɔ ꞊dhɛ ˗wa ˗bia ˗ya, ˗bialömɛn ˗nu ˗wo ˗kë ꞊va, ˈˈkɛɛ ˈö mɛn dosɛnŋ ˈnën ˈö˗ ga ˈsü ˗ee? ˈDhɛ ˈö ˈˈdhʋ̈, ˗kɔ ˈö ˈka ˗dho ˗bialö ˗a ˈka kö ˈka˗ ga ˈsü, ˗kaa ˗lö ˗a ˈka. 25 Mɛn ˈˈpɛpɛ ˈö ˈwo ˗bia ga mɛɛnˈˈ ˗ni ˈgü, ˗wo wo ˗de ˗kun ˈwɔn ꞊gban ˈgü. ˗Wo pë ˗nu ˈwo bhë ˗an ˗kë ˈˈdhʋ̈ kö ˗bia ga ˈö shiʋ̈ˈˈ ˗pë ˈka bhë ˈwo˗ ˈsü. ˈˈKɛɛ kwa ˗zë kwa kwa ˗bha ˗kë ˈˈdhʋ̈ kö ˗bia ga* ˈdhɛ ˈö ˈyaa shiʋ̈ˈˈ ˗pë ˈka bhë ˈkwa˗ ꞊slɔɔ. 26 ˗A ˗wɔn ˈgü, n ˗man ˗bia ˈa˗ ˗lö ˗ni ˈgü bhë, ˈmaan˗ ˗lö ˈˈwɛɛwɛ. A n ˗kɔ kpö ˗zuö, ˈˈkɛɛ ˈmaan˗ ˗zuö ˗dhɛfuöödhɛ ˈgü. 27 A ˗kɔ kpö ˗zuö n ˗de ˗bha,* ˈa ˈˈdhiʋ̈sü n bun ˈka ꞊dhɛ mɛn ˈˈdhiʋ̈sü ꞊dhuëŋ ˈka, ˗yö kë ˈˈdhʋ̈ kö ˈman ˗zlanwopö mɛn ˈˈwɛɛ ˗nu ˗dhɛ, ˈmaan ˗dho ˈgo mü ˈa pë ˈˈwɛɛ ˈbhaa ˗kë ˈö ˗Zlan ˗yö ö ˗kɔ bho n ˈgü.