ˈSëëdhɛ ˗blɛɛsü ˈö Pɔdhö ˗ya bɔ Kolɛntö ˗mɛn ˗nu ˗dhɛ
8 ˗A ˈdhɛ ˈö ˗gban ˗bhöpë ˈö ˈwo ˈˈsaa˗ bho ˗a ˈka gbapë ˗nu ˗dhɛ ˗a ˗bha bhë, n ˗man ˈö n ˗gɔ kö ˈa˗ pö ˈyö ꞊nɛn: Kwa˗ ˈwɔn ˗dɔ ꞊dhɛ ˈwɔndɔdhe ˗yö mɛn ꞊gban ˈˈpɛpɛ kwa ˗gɔ. ˈWɔndɔdhe ˗yö ˗desüva ˗da mɛn ˈgü, ˈˈkɛɛ ˗dhɔ ˗yö mɛn ꞊faanmën. 2 ˗Ya kë mɛn ˈbhaa ˈgü ꞊dhɛ ö pë ˈbhaa ˗dɔ, kö ˈyaa˗ dɔ ꞊köŋ ꞊dhɛ ˗kɔ ˈö˗ dua ˈdhö ˗mü kö ˗ya dɔ ˗a ˈka ˗a ˈdhö. 3 ˈˈKɛɛ ˗ya kë ꞊dhɛ ˗Zlan ˗dhɔ ˗yö mɛn ˈbhaa ˗kë, kö ˗Zlan ˗yö mɛn ˈö bhë ˗a ˗dɔ.
4 ˗A ˈdhɛ ˈö ˗gban ˗bhöpë ˈö ˈwo ˈˈsaa˗ bho ˗a ˈka gbapë ˗nu ˗dhɛ ˗a ˗bhö ˗sü ˗bha bhë, ˗kwaa ˗wɔn blɛɛˈˈ. Kwa˗ ˈwɔn ˗dɔ ꞊dhɛ gbapë ˗nu ˈwaa pë ˈbhaa ˈka toŋtoŋdhö, ˈö ˗Zlan ˈˈwɛɛ ˈbhaa ˈyaa ˈdhö, kö yö ˈti kë ˗Zlan dosɛnŋ ˈö ˈdhö ˗a ˈka. 5 ˈKö ˗kë ꞊dhɛ pë ˗nu ˈö mɛn ˗nu ˗wo ˗an ˗dhɛ ˗zlan, ˈö ˈwo dhaŋ˗ ˈgü ɛɛnˈˈ ˈwo ˈˈsɛ ˗ta ˗wo ꞊va, ˈö ˈˈdhʋ̈ ˈpö ꞊dedewo ꞊dhɛ «˗zlan» ˗nu ˗wo ꞊va, ˈö «dëmɛn» ˗nu ˈdhö ꞊va, 6 kwa ˗zë kwa ˗bha ˈka ˗Zlan ˗yö dosɛnŋ, yö ˈnën ˈö ˗tɔ kwa Dë. Yö ˈnën ˈö pë ꞊gban ˈˈpɛpɛ ˗yö go ˗a ˈˈpiʋ̈, ˈö kwa ˗de ˈpö ˈkwa˗ ˗bha ˈka. ˗Ya ˈgo mü ˈzü, kwa Dëmɛn ˗yö dosɛnŋ, yö ˈnën ˈö ˗tɔ Yesu Klito, ˈö pë ꞊gban ˈˈpɛpɛ ˗wo bɔ ˗a ˗ta ˈö ˈwo ˗kë ˗dhö, ˈö kwa ˗de ˈpö ˈkwa ˗kë ˗dhö ˗a ˈsaa˗ ˈgü.
7 ˈˈKɛɛ ˈwɔn ˗nu ˈwo bhë mɛn ꞊gban ˈwaa˗ dɔ. Mɛn ˈbhaa ˗nu ˈwo ˈdhö, ˈdhɛ ˈö ˗kë ꞊dhɛ ˗wo ˗kun gbapë ˗nu ˗dhɔkë ˗ni ˈgü ˈˈdhiʋ̈ ˗be bhë, ˗bhöpë ˈwo ˈˈsaa˗ bho ˗a ˈka gbapë ˗nu ˗dhɛ ꞊waa˗ ˗bhö, ˈyö ˗kë ˗an ˈgü ꞊dhɛ wo gbapë ˗nu ˗dhɔkë ˗ni ˈgü, ˈö ˈˈsuʋ̈ ˗yö ˗an ˗kë, ˈö ˗an zuʋ̈ˈˈ ˗yö za dɔ ˗an ˗bha. 8 ˈˈKɛɛ ˗bhöpë ꞊suu ˈö ˈˈdhʋ̈ ˗a ˗bhö ˗sü ˈyaa ˈnën ˈö ˗dho kwa ꞊ɲɔɔn ˗Zlan ˗bha. ˈDhɛ ˈö ˈˈdhʋ̈ kwa ˈti˗ ˗bhö, pë ˈö ˗dho ˈgo kwa ˗bha ˈyaa ˈdhö, ɛɛnˈˈ ˈkwa˗ ˗bhö ˈpö, pë ˈö ˈkwa ˗dho ˗a ꞊slɔɔ ˗a ˈgü ˈyaa ˈdhö. 9 ˈˈKɛɛ ˗kaa kë ˗së kö ˈwɔn ˈö ka ˈgü ˗së ˗a kë ˗sü ˈyaa ˗dho mɛn ˗nu ˈö ˗an ˗zo ˈyaa ˗gban ˗sü ˈka ˗an ˗gɛn ˈˈdhiʋ̈ ˗zuö. 10 ˈYö sü ꞊dhɛ bhi ˈö ˈü ˈwɔn ˗nu ˈwo bhë ˗an dɔ bhë, mɛn ˈö ˗a ˗bha ˗zoyödhe ˗gɛn ˈyaa ˗gban ˗sü ˈka ˗ya ˗kpan ü ˗bha kö ü pë ˗bhö ˗ni ˈgü ꞊geebɔ ˗dhɔkëdhɛ ˈgü, ˗a zuʋ̈ˈˈ ˈti ˗dho yö ˈˈblü, ˈö pë ˈwo ˈˈsaa˗ bho ˗a ˈka gbapë ˗nu ˗dhɛ bhë ˈö˗ ˗bhö ˗ee? 11 ˗Ya kë ˈˈdhʋ̈ kö ü ˗bha ˈwɔndɔdhe ˗ya ü ꞊dhegblü ˈö Klito ˗yö ga ˗a ˗wɔn ˈgü, ˈö˗ ˗bha ˗zoyödhe ˗gɛn ˈyaa ˗gban ˗sü ˈka bhë ˗a bho ʒiaan ˗ta. 12 ˈBha ˈwɔn yaa kë ü ꞊dhegblü ˗nu ˈka ꞊dhɛ ˗kɔ ꞊suu ˈö bhë ˗a ˈdhö, ˈbha ˗an ꞊faanmën kö pë ˈö ˈyaa ˗an zuʋ̈ˈˈ ˗dhɛ ˗së ˗wa kë, kö ü ˈwɔn yaa kë ˗ni ˈgü Klito ˈka. 13 ˗A ˗wɔn ˈgü, ˗ya kë ꞊dhɛ ˗bhöpë ˗ya kë n ꞊dhegblü ˗gɛn ˈˈdhiʋ̈ ˗zuö ˗pë ˈka, n ˈti ˗dho wü ˗bhö ˈzü toŋtoŋdhö kö ˈmaan ˗dho kë n ꞊dhegblü ˗puö ˗mɛn ˈka.