ˈUtö

Mɛn ˗nu ˈö ˗an ˈwɔn blɛɛˈˈ ˗kɔ ˈgü ˈwo˗ ˗zɔn ꞊dhɛ wo ˗suʋ̈ Zoova ˗gɔ, ˈö ˈwo wo ˗zota ˗a ˈtɔ ˈwɔn ˈgü, ˈpë ˗kë ˈö Zoova ˗yö ˗an ˈtɔ ˗bɛnzë ö ˗bha ˈsëëdhɛ ˗be ˈgü, ˈka ka ˗zota ˗a ˈgü ˗ee? Kwa ˈˈdhiwo ˈnën pë ˈö kwa ˗zo ˈˈpiʋ̈ ˗a ˗zɔn. ˗A ˗wɔn ˈgü, Yesu ˗ya ˗pö: «ˈPë ˈö mɛ zuëˈˈ ˈˈpiʋ̈, ˈyö ˗wo mɛ ˈˈdhi ˗ta.» (Mat. 12:34) Zoova ˗ya ˈˈpiʋ̈ kö mɛn ˗nu ˈö ö ˗dhɔ ˗yö ˗an ˗kë, ˗wo ˗tosɛta ˈö yaa ɲën ˗a kë ˈˈkpɔnŋtaadhɛ ˗dɛɛ ˈgü. Kwa ˈwɔn blɛɛˈˈ ˗kɔ ꞊mɔɔn˗ ˗bha ˗ya kë kö Zoova ˗yö ˈˈwɩ kwa ˗bha ö ˗dhɔkësü ˗bha ɛɛnˈˈ ˗yö ˗kɔ ˗a ˈka. (Zak. 1:26) Mɛn ˈbha ˗nu ˈö Zoova ˗dhɔ ˈyaa ˗an kë, ˗wo ˈwɔn ˗blɛɛ ˈˈdhiwo yaa waa ˗desüva ˈka. (2 Tim. 3:​1-5) ˈKwaa˗ ˈˈpiʋ̈ ˈkwa kë ꞊dhɛ ˗an ˈdhö. Kwa˗ ˈˈpiʋ̈ ꞊ʒiaan kö kwa ˈwɔn blɛɛˈˈ ˗kɔ ˗yö kë Zoova ˗dhɛ ˗së. Kö ˈkwa kë kwa ˗bha ˗bhɔkwëë ˗nu ˗ta ɛɛnˈˈ ˗zlanwopödhɛ ˗nu ˈgü kwa ˈˈdhiwo ˗yö kë ˗së, ˈˈkɛɛ kö ˈkwa kë kwa ˗bha ˈkɔdhigümɛn ˗nu ˈˈpiʋ̈ kwa ˈˈdhiwo ˗yö kë ˈya˗, ˗yö ˗dho dhi Zoova ˗dhɛ ˗ee?—1 Piɛ. 3:7. w22.04 5 § 4-5.

˗Zlan ˗dho ö ˗zopiʋ̈wɔn ˗da wü ˈˈdhiʋ̈ ˗sö ˗kɔŋ do waa wü ˈˈdhiʋ̈˗ ꞊dede ˗an zuʋ̈ˈˈ ˈgü kö ˗wo Babidhɔnö ˗pö ˈkpii˗ ˈgü shiʋ̈ˈˈ. ꞊Ii, Zoova ˗dho ˈˈsɛgɔ ˗nu ˗blü kö ˗wo bɔ wü ˈˈdhiʋ̈ ˗zɔɔndhö ˈö ˗kë ONU ˈka bhë ˗a ˗ta, kö ˗wo nu ꞊sua ˗zlanwo ˗nu ˗lokotasü ˈö ˈˈkpɔnŋtaadhɛ ˗todhʋ̈sü ˈgü ˗an ˗gɔ, ˗wo ˗an ˈgü shiʋ̈ˈˈ ˈpapadhö. (˗Dhɛ. 18:​21-24.) ˗Yö ˗gban kwa ˗bha ˗kɔ ˗kë ꞊dhɛ? Kletiɛn ˗nu kwa dua ˗mü kö «[˗Zlan] ˗dhɔ kë ˗kɔ ˈdhɛ ˈö ˗dhi ˗dhɛ, ˈö˗ ˗zʋ kun ˈö ˗dhii ˈyaa˗ ˗bha ˗a ˈˈyan ˈgü,» ˈkwa˗ kë. (Zak. 1:27) Kwa dua ˈyaa ˗mü toŋtoŋdhö ˈkwa ˈto ꞊sua ˗zlanwo ˗nu ˗bha ꞊klaŋwo ˗nu ˈˈpiʋ̈, ˈkwa paɛn ˗nu ˗bha ˈwlaan˗ ˗nu kë, ˈkwa ˈˈtakɔ ˗nu ˈö ˈwaa ˗së ˗an kë, ɛɛnˈˈ ˈzü ˈkwa kwa ˗kɔ ˗da dükësü ˈgü. ˗Ya ˈgo mü, ˗kwa mɛn ˗nu ꞊kpɔɔ ˗kplawo kö ˗wo «ˈgo [Babidhɔnö ˗pö] bha˗ ˈgü,» kë ˈˈdhʋ̈ kö ˈwa ˗dho ˗dhii ˗ya wo ˗de ˗bha ˗Zlan ˈˈɲan ˈˈdhiʋ̈.—˗Dhɛ. 18:4. w22.05 11 § 17; 14 § 18.

ˈNënmɛn ˗nu, ˈwɔn ˈö ˗gban Zoova ˗bha ˗kaa ˗zɔn ka ˗bha ˈnën ˗nu ˗dhɛ ˗kɔ ꞊va mɛɛnˈˈ, kö ˈwɔn ˗së ˗nu ˈö ꞊yaa ˗an kë ka ˗dhɛ ˈka˗ ˗wɔn blɛɛˈˈ ˗an ˗dhɛ. (Deut. 6:​6, 7) ˈKa kë ˈkɔdhi ˈö˗ ˈgümɛn ˈˈplɛ ˈwaa Zoova ˗dhɔkë ˗a ˈgü, ˈö ˈkaa ꞊mɔɔn˗ ˗bha ˈka ka ˗bha ˈnën ˗nu draanˈˈ Biblö ˈka zoodhö zoodhö, ˗yö ˗dho kë ˗së kö ˈka˗ kë ˈˈdhʋ̈. Kwa ꞊dhegblüdhe do ˈwo˗ ˗dhɛ Klisinö ˗ya ˗pö: «Zoova ˗wɔn -blɛɛ n -man ˈnën ˗nu ˗dhɛ ˗sü ˈˈtʋ̈ŋ ˗së ˈyaa kë n ˗gɔ ꞊va. ˗A ˗wɔn ˈgü, ˈˈtʋ̈ŋ ˈˈoo ˗tʋ̈ŋ ˈö˗ ˈˈsɩ ˗zë ˗ya kë˗ ˈka n ˗dhɛ, a˗ ˗wɔn ˗blɛɛ ˗an ˗dhɛ.» ꞊Ya ˈgo ˗a ˈgü, ˗ka Zoova ˗bha ˗kɔlokota waa kwa ꞊dhegblü ˗nu ˗wɔn ˗së blɛɛˈˈ ˗an ˗dhɛ. ˈKa ˗dho mɛn zii ˗nu ˗dhiaŋ yaa zë. Ka blɛɛwɔn ˗nu ˈnën ˈwo dho ˗a kë kö dhiʋ̈ˈˈ ˗nu ö ꞊taabha ˗nu ˈka, ˗an ˗bhawɔn ˗ya yö mɛn zii ˗nu ˗bha ˗takundhe ˗bha, ˗wo ꞊ɲɔɔn ˗an ˗bha. ˗Kaa kë kö ˗dhikodhɛ kë ˈkɔɔ. ˗Kaa pö ka ꞊gɔɔn ɛɛnˈˈ ka ˗bha ˈnën ˗nu ˗dhɛ zoodhö zoodhö ꞊dhɛ ˗an ˗dhɔ ˗yö ka ˗kë. ˗Ka ˈwɔn blɛɛˈˈ ka ꞊gɔɔn ˗nu ˗dhɛ ˗së ˈka ˗an ꞊bhlëë ˈgü, ˈka ka ˗bha ˈnën ˗nu ꞊faanmën ˗a ˗kë ˈˈdhʋ̈ ˗sü ˗bha ˈpö. ˈKa˗ kë ˈˈdhʋ̈, ˗dhikodhɛ ˗dho kë ka ˗bha ˈkɔdhi ˈgü, ˈö ˈwɔn ˈö ˗gban Zoova ˗bha ˗a draansü ˗kë ka ˗bha ˈnën ˗kɔa ˈˈplëëplë.—Zak. 3:18. w22.04 18 § 10-11.

Nɔɔn˗ ˈö Yesu ˗ya bɔ Efɛzö ˗zlanwokɔdhigümɛn ˗nu ˗dhɛ bhë ˗a ˈgü, ˗ya ˗pö mü ꞊dhɛ ˗an zuʋ̈ˈˈ ˗yö ˗saa, ˈwo bɔ ˈwɔn ˈˈgbɩɩ˗ ꞊va ˈgü, ˈö ˗an ˈgü ˈti ga. ˈˈKɛɛ ˗an ˗bha Zoova ˗dhɔ ˈö kun ˗be ˗ya ˈdho ˈˈshia˗. ˗An dua ˗mü kö ˗wa ˗dadhiʋ̈, ˈyö sü ꞊dhɛ wo ˈti˗ kë ˈˈdhʋ̈, Zoova ˈti ˗dho ˈˈwɩ ˗an ˗bha ö ˗dhɔkësü ˗bha. ˗Kɔ do ˈö bhë ˗a ˈka ˈpö ꞊dɛɛ, ˗bɔ ˈwɔn ˈˈgbɩɩ˗ ˗nu ˈgü ˗sü dosɛnŋ ˈyaa ˈnën ˗tɔ ˈwɔn. ˈPë ˗kë ˈö ˈkwa bɔ ˈwɔn ˈˈgbɩɩ˗ ˗nu ˈgü, ˗a ˗gɛn ˗tiaandhö dua ˗mü kö ˗yö kë ˗dhö. ˈWɔn ˗nu ˈö ˈkwa ˗an ˗kë ˈyaa ˈnën kwa ˗bha ˗Zlan ˗yö ˗an ˗ga dosɛnŋ, ˗yö ö ˈˈtʋ̈ŋ ˗kë ˈpö ˈpë ˗kë ˈkwa ˗an ˗kë, ˗a ˈgü. Pë ˈö kwa ˗blü ˈwɔn ˗nu kë ˗sü ˗bha ˗a ˗wɔn ˗ya ˗gɔ ˈˈgbɩɩ˗, ˈyö ˗tɔ ꞊dhɛ ˗ya ˈˈpiʋ̈ kö kwa ˗bha ö ˗dhɔkësü ˗yö ˗gban ˗dhɔ waa ö ˈˈnuɛ bho zuʋ̈ga ˈö kwa ˗gɔ, ˗an ˗ta. (Prov. 16:2; Mak. 12:​29, 30) Kwa dua ˗mü ˈkwa ˗ya kwa ˈˈɲaan ˗kplawo. ˈWɔn ˈö kun Saadö ˗zlanwokɔdhigümɛn ˗nu ˗bha, ˈyaa ꞊dhɛ ˗zlanwokɔdhi ˗nu ˈwo to ˗an ˗bha ˈdhö. ˈKö ˗kë ꞊dhɛ ˗wo ˗kun ˗Zlan ˗dhɔkë ˗ni ˈgü wo ꞊faan ˈka ˈˈdhiʋ̈ ˗be, ˗an ˗kɔ ˗kun ꞊zɔɔ ˗ni ˈgü ˗a ˗bha. Yesu ˗ya ˗pö ˗an ˗dhɛ ˗wo ‹˗ya wo ˈˈɲaan›. (˗Dhɛ. 3:​1-3) ˗Yö ˈˈdhʋ̈ ꞊dhɛ Zoova ˗zo ˈti ˗dho bhɔ yö ˗nu ˈkwa˗ ˗kë ˗a ˗dhɛ ˗an ˈka.—Ebl. 6:10. w22.05 3 § 6-7.

Zuʋ̈gblüdhi ˈkwa ꞊mɔɔn˗ ˗bha ˈkwa˗ ꞊slɔɔ yökësü ˈgü bhë, Sadhomɔn ˗ya ˗pö «˗Zlan ˗bha gbɔɔdhe» ˗mü. (Eccl. 5:​18, 19) Pë ˈö kun ˗a pö ˗ni ˈgü bhë, ˗ya ˗dɔ ö ˗de ˗gɔ. ˗Yö ˗kun yökëmɛn ꞊dede ˈka. ˗Yö ˈkɔ ˗nu ˗dɔ, ˈö ˗drɔɔn ˗dhü ˗nu ta. ˗Yö ˈˈdhüdhɛɛdhɛ ˗nu ˗yökë, ˈö ˈˈyi ˗glu ˗nu pɔn. ˗Yö ˗dho ˗ʒianwo ˈö ˈˈkwipö ˈˈgblʋ̈gblʋ̈ ˗nu dɔ. (1 Rois 9:19; Eccl. 2:​4-6) ˈYaa za ˈgü ꞊dhɛ ˗an kë ˗sü ˗yö zuʋ̈gblüdhi ˗nu ˗a ˗dhɛ. ˈˈKɛɛ pë ˗nu ˈwo bhë ˈwaa ˈnën Sadhomɔn ö ˗zo yö ˗an ˗dhɛ kö ˗wo zuʋ̈gblüdhi nu ö ˗dhɛ. ˗Yo ˗go mü ˈzü ˈö yö ꞊va ˗kë Zoova ˗dhɛ. ˗A ˈwɔnzuan ˈnën ˗tɔ ˗yö ö ˈˈɲan ˗kë Zoova ˗dhɔkëgükɔ ꞊bhlëësü dɔ ˗sü ˗bha ˗kwɛ ˈˈsɔɔplɛ ˈˈpiʋ̈. (1 Rois 6:38; 9:1) ˈDhɛ ˗ya ö bo yö ˗nu ˈwo bhë ˗an ꞊gban kë ˗sü ˈka, Sadhomɔn ˗ya ˗yö ꞊dhɛ ˗Zlan ˗bha yökësü ˗wɔn ˗yö ˈˈgbɩɩ˗ ˈö ˗ʒiö ˗a ˈka yö ˈˈpɛpɛ ˈwo to ˗an ˗ta. Yö ꞊dede ˗ya ˗pö: «ˈWɔn ˈˈpɛpɛ ˈö ˈˈdhʋ̈ bhë -a -gɔ ˈö ˈdhö ˈyö -tɔ: -Bhö ˈˈsuʋ̈ -Zlan ꞊dede -gɔ, kö ˈü- -bha ˈtɔŋ- -nu ꞊bhlëë -ya.»—Eccl. 12:13. w22.05 22 § 8.

Mɛn ˗nu ˈwo ˈwɔn yaa ꞊gbɔɔnsü ˗nu ˗kë, ˈˈkɛɛ ˈö Zoova ˗yö ˗an ˗bhawɔn to ö zuʋ̈ˈˈ ꞊gban ˈka, ˗a ˈwɔnzuan ꞊va ˗wo Biblö ˈgü. De ˈö ˈka ka ˗zota ˗a ˈgü? ˗A ˈbha ˗ya kë kö ka ka ˗zota ˗gblüdë Manase ˗wɔn ˈgü. ˗Gblüdë ˈö bhë ˗yö ˈwɔn yaa ꞊va ꞊dede ˗kë Zoova ˈˈɲan ˈˈdhiʋ̈. ˗Yö ˗yö mɛn ˗nu ˗dhɛ ˈˈdhiʋ̈ ˈö ˈwo ꞊sua ˗zlan ˗nu ˗dhɔkë. ˗Yö ö ˗de ˗bha ˈnën ˗nu ˗zë, ˈö ˈˈsaa˗ bho ˗an ˈka ꞊sua ˗zlan ˗nu ˗dhɛ. ˗Yö ˗dho ˗ʒiaanwo ˈö ꞊sua ˗zlan ˈˈbin ˗yökë, ˈö˗ dɔ Zoova ˗dhɔkëdhɛ ˈˈslʋ̈ʋ̈slʋ̈ ˈgü. Biblö ˗ya ˗pö: «˗Yö ˈwɔn yaa ꞊gbɔɔnsü ˗kë Zoova ˈˈɲan ˈˈdhiʋ̈ ö ˗de ˈˈɲaan, kë ˈˈdhʋ̈ kö ˗yö ˈmën ˗a ˈka.» (2 Chron. 33:​2-7) ˈˈKɛɛ ˈdhɛ Manase ˗yö go ö ˗bha ꞊sɔnŋ yaa ˈgü ö zuʋ̈ˈˈ ꞊gban ˈka, Zoova ˗ya ˗bhawɔn ˗to. (2 Chron. 33:​12, 13) ˗A ˈbha ˗ya kë ˈpö kö ka ka ˗zota ˗gblüdë Davi ˗bha ˈwɔnzuan ˈgü. ˗Yö ˈwɔn yaa ꞊va ˗kë Zoova ˈˈɲan ˈˈdhiʋ̈, ˈö ˗da mɛn ˗nu ˗bha dhe ˈˈpiʋ̈ ˈö dho ˈö˗ ꞊gɔɔn zë. ˈˈKɛɛ ˈdhɛ ˗wɩ ˗a ˗bha ꞊dhɛ ˈwɔn ˗ya zë ö ˗gɔ, ˈö go ö ˗bha ꞊sɔnŋ yaa ˈgü ö zuʋ̈ˈˈ ꞊gban ˈka, Zoova ˗ya ˗bhawɔn ˗to. (2 Sam. 12:​9, 10, 13, 14) ˗Yö ꞊mɔɔn˗ ˗bha ˈö ga kwa ˈgü ꞊dhɛ Zoova ˗ya ˈˈpiʋ̈ ˈö kwa ˗bhawɔn ˈto. w22.06 3 § 7.

Kwa ˗bha ˗zoyödhe ˗gɛn ˗gban ˗sü ˈyaa ˈˈplëëplë ˈˈtʋ̈ŋ ꞊gban ˈka. ˈWɔn ˗nu ˈö ˗Zlan ˗yö ˗an ˈˈplüün bho bhë ˗an ˈˈdhiʋ̈gan ˗sü ˈö zuʋ̈saadhɛ ˈka ˗yö ꞊mɔɔn˗ ˗bha ˈö ˗kë kwa ˗kɔa ˈˈgbɩɩ˗. ˈˈKɛɛ ˈdhɛ ˗kë ꞊dhɛ ˗Zlan ˗yö ˗dhö ˈˈtʋ̈ŋ ꞊gban ˈka, ˗a ˗bha ˈˈtʋ̈ŋ ˈyaa ꞊dhɛ kwa ˗bha ˈdhö. (2 Piɛ. 3:​8, 9) ˈWɔn ˗nu ˈö ˗an ˈˈplüün bho kwa ˗dhɛ bhë, ˗yö ˗dho ˗an yö ˈko ˈˈdhiʋ̈ ˗së ˈka. ˈˈKɛɛ ˗yö ˈti ˗dho ˗an kë ˈtʋ̈ŋ ˈö ˗dhi kwa ˗zë kwa ˗dhɛ ˗a ˈka. Kwa ˗dhɛ ˈˈdhiʋ̈gan ˗ni ˈgü kö pë ˗nu ˈö ˗Zlan ˗yö ˗an ˈˈplüün bho ˗wo kë, ˈmën dho kwa ˗takun kö kwa ˗bha ˗zoyödhe ˈto ˈˈgbɩɩ˗? (Zak. 5:7) ˗Kwa ˈto Zoova ˈˈsuee, ˈyö ˗tɔ ꞊dhɛ yö ˈnën dho ˈwɔn ˗nu ˈö kwa ˈˈɲan ˈdhö ˗an ˗gɔ bhë, ˗an kë. ˈKwa˗ pö ˗zoyödhe ˗yö kë kwa ˗gɔ, kwa dua ˗mü ˈkwa˗ ˈwɔn dɔ ꞊dhɛ Zoova ˗yö ˗dhö, ˈgo mü «ˈmɛ ˈwo˗ ꞊mɔɔ, ˗ya ˈgü ˗wɔn ˗së ˗kë ˗a ˗nu ˗dhɛ.» (Ebl. 11:​1, 6) ˈKö ˈkwa kwa ˗zo yö ꞊dedewo ꞊dhɛ Zoova ˗yö ˗dhö, ˗yö ˗dho ga kwa ˈgü ꞊dhɛ pë ˗nu ˈö ˗an ˈˈplüün bho ˗yö ˗dho ˗an kë. ˈKwa˗ pö kwa ˗bha ˗zoyödhe ˗yö kë ˈˈgbɩɩ˗ ˗kplawo, ˗kwa bhɛɛˈˈ Zoova ˗dhɛ, ˈkwa Biblö ˗wo pö. ˈKö ˗kë ꞊dhɛ ˈkwaa ꞊mɔɔn˗ ˗bha ˈkwa Zoova yö, kwa ꞊mɔɔn˗ ˗bha ˈkwa ꞊ɲɔɔn ˗a ˈˈsuee. Kwa ꞊mɔɔn˗ ˗bha ˈkwa ˈwɔn ꞊blɛɛ ˗a ˗dhɛ bhɛɛsü ˈka, ˈö ga kwa ˈgü ꞊dhɛ ˗yö ˗dho ö ˈˈtʋ ˈto kwa ˗bha.—Jér. 29:​11, 12. w22.10 26-27 § 11-13.

˗Kwa kwa ˗zota kö Zɔbö ˗yö ˗ya ˗sü ˈka ˈˈyʋʋbi ˈgü, ˗a ˈˈklʋʋ ˗yö bhɔ ˗ni ˈgü ꞊dedewo. (Job 2:8) ˗A ˈˈtɔŋdë ˗nu ˗wa pö ˗ni ˈgü ˗a ˗dhɛ ˗kplawo ꞊dhɛ suuyaamɛn ˗mü ˗a ˈka, ˈgo mü pë ˈˈpɛpɛ ˈö˗ kë ˗ni ˈgü bhë ˗a ꞊bhlëë gbɛ˗ ˈyaa ˈdhö. ˗A ˗bha ˈwɔn ˈˈgbɩɩ˗ ˗nu ˗wa kë ˗a ˗ta ꞊dhɛ ˗gwë kpö ˈgbinŋ˗ ˈdhö. ˗A ˗bha ˈnën ˗nu ˈˈpɛpɛ ˗bha ga ˗sü ˗ya zuʋ̈ˈˈ ˈˈklʋʋ bhɔ ˗ni ˈgü. ˗A zübhodhɛ ˈgü, Zɔbö ˈyaa kun ˈˈwɩ ˗ni ˈgü. (Job 2:13) ˈˈKɛɛ ꞊ya kë ꞊dhɛ ˈˈwɩ ˈö ˈyaa kun ˗a wo ˗ni ˈgü bhë ˗a ˈˈtɛɛbɔ ˗nu ˗wa ˗ga ꞊dhɛ ˗ya ˈˈkan Zoova ˗bha, kö ꞊sua ˈnën ˈwo˗ ˗kë wo ˗de ˗gɔ. Zɔbö ˗yö ö ˗gɔ ˈˈdhiʋ̈ ˗wlüü ˈö ö ˈˈtɔŋdë ˗nu ˗ga, ˈö˗ pö: «ˈÖ dho ˈö yö ˗a ˈka n ga ˗yi ˗bha, n ˈti ˗dho n ꞊kwaa n ˗man ˗klu ˗Zlan ˗bha ˗sü ˗zü!» (Job 27:5) ˗Mën ˈö˗ ˗takun ˈyö ˗ya ˈˈklʋʋbhɔdhe suu ˈö ˈˈdhʋ̈ ˗a ˈgü, ˈö˗ ˈgü ˗kë ˈˈgbɩɩ˗? ˈKö ˗kë ꞊dhɛ ˗a ˈgü ˗kun ga ˗sü ˈka ꞊dedewo, ˈyii ö bo ˗zoyö ˗Zlan ˗dhɛ ˗sü ˈka ꞊dhɛ ˈwɔn ˈˈgbɩɩ˗ ˗nu ˈö bɔ ˗ni ˈgü ˗an ˈgü bhë ˗wo ˗dho ɲën. ˗Yö ˗kun ˗a ˈˈɲaan ꞊dhɛ ˈkö˗ ˗de ˈö ga, Zoova ˗dho ö bho ga ˈgü.—Job 14:​13-15. w22.06 22 § 9.

ˈˈSɛ waa dhaŋ˗ ˗an ˗Damɛn ˗yö ꞊bhlëë ˈkpii˗ ˈbha ˗ya ˗sü ˈka kwa ˗bha. ˗A ꞊bhlëë ˈö ˈˈdhʋ̈ ˈyö ˗tɔ ˗bhɛɛ ˗a ˗dhɛ ˗sü. ˗Kwa kwa ˗zota: Kwa ꞊mɔɔn˗ ˗bha ˈkwa kwa zuʋ̈piʋ̈wɔn ˗nu ꞊blɛɛ Zoova ˗dhɛ ˈˈtʋ̈ŋ ˈˈoo ˗tʋ̈ŋ ˈka, ˗wo suu ˈˈpɛpɛ ˈgü. ˈKö ˗kë ꞊dhɛ kwa ˗kë wɔ ˗sü ˈka ꞊dhɔtrɔɔplöö ɛɛnˈˈ ˗kasho ˈgü, ˗yö ga kwa ˈgü ꞊dhɛ ˈkwa bhɛɛˈˈ kwa Dë ˈö kwa ˗dhɔ ˗ya ˗kë ˗a ˗dhɛ, ˗yö ˗dho ö ˈˈtʋ ˈto kwa ˗bha. Kwa˗ ˈˈnuɛ ˗bho ꞊bhlëëwɔn suu ˈö bhë ˗a ˗bha. ˗Gblüdë Davi ˗yö bhɛɛsü ˗sü ꞊dhɛ ꞊bhlëëwɔn ˈdhö. ˗Yö ˈˈtan ˗bho Zoova ˗dhɛ ˈö˗ pö: «˗Bhö n ˗man bhɛɛwo ˈsü ꞊dhɛ ansansö ˈa ꞊baa ˗a ˗bha ˗a ˈdhö.» (Ps. 141:​1, 2) Davi ˗bha ˈˈtʋ̈ŋ ˈgü, ꞊dhasiklɔɔ suu ˈwo˗ ˗dhɛ ansansö ˈö ˈˈsaabhomɛn ˗nu kun ˗a ˈˈgʋ̈ ˗ni ˈgü ˗Zlan ˗dhɛ bhë, ˗wo ˗baa ˗a ˗bha ˗së ˈka ꞊dedewo. (Ex. 30:​34, 35) Davi ˗kun ˗a ˈˈpiʋ̈ kö pë ˈö dho ˗a pö Zoova ˗dhɛ bhɛɛwo ˈgü, ˈö baaˈˈ ˗a ˗bha ꞊dedewo ꞊dhɛ ˗kɔ ˈwo ꞊baa ˗a ˈka ansansö ˗bha ˗a ˈdhö. Pë ˈö kwa ꞊dede ˈkwa˗ ˈˈpiʋ̈ ˈpö ˈyö bhë. Kwa˗ ˈˈpiʋ̈ kö kwa ˗bha bhɛɛwo ˗nu ˗wo kë Zoova ˗dhɛ ˗së. w22.07 20 § 1-2; 21 § 4.

Zoova ˈnën dho kwa ˗bha ˈko zë. Zoova ˈti˗ pö kwa ˗dhɛ mɛn ˈö ˈwɔn yaa ˗kë kwa ˈka ˈkwa˗ ˈˈyoo bho ˗a ˗gɔ. (Wlɔ. 12:​20-21) Mɛnbhɩɩdhe ˗nu ˗mü kwa ˈka, ˈö kwa ˗bha ˈwɔn yö ˗kɔ ˈyaa ꞊zinŋgü. ˗A ˗wɔn ˈgü, ˈkwaa dɔ ˗sü ˈka ˗së kö ˈkwa ˈwɔn ˗nu ˈˈɲanbhɔ ˗së ˈka ꞊dhɛ ˗kɔ ˈö ˗Zlan ˗ya ˗kë ˗a ˈka ˗a ˈdhö. (Ebl. 4:13) ˈˈTʋ̈ŋ ˈbha ˗nu ˈka ˗ʒiaanwo, kwa zuʋ̈ga ꞊mɔɔn˗ ˗bha ˈö ʒiaan yaa sü kwa ˈka, ˈö ˈwɔn ˗së dɔ ˗sü ˗kë kwa ˗kɔa ˈˈgbɩɩ˗. Zoova ˗bɔ Zakö ˗ta ˈö˗ pö: «ˈWɔn ˗yɛ mɛ ˗bha ˗sü ˈö ˈˈdhʋ̈ bha ˈyaa mɛ kë ˈwɔn ˈö ˗dhi [˗Zlan] ˗dhɛ ˗a këmɛ ˈka.» (Zak. 1:20) ˗Yö ga kwa ˈgü ꞊dhɛ ˈwɔn ˈdhɛ ˈö ˗së Zoova ˗dho ˗a kë, ˈö ˈwɔn bhë ˗a ˈˈɲanbhɔ kpɛnŋdhödhɛ ˈgü. ˈKwa mɛn ˗nu ˗bhawɔn ˈto, kö kwa˗ ˗zɔn ꞊dhɛ kwa ˈdhaŋ˗ ˗bho Zoova ˗bha kpɛnŋdhödhɛ ˈˈdhiʋ̈. ˈKwa ˈwɔn ˗nu ˈto Zoova ꞊kwɛɛ˗, kö kwa˗ ˗zɔn ꞊dhɛ ˗yö ga ˗sü ˈka kwa ˈgü ꞊dhɛ ˗yö ˗dho ˈwɔn yaa ˈˈpɛpɛ ˈö ꞊sɔnŋ yaa nu ˗a ˈka kwa ˗ta, ˗an ˈˈɲanbhɔ. ˗A ˗bha ˈˈkpɔnŋtaadhɛ ˗dɛɛ ˈö˗ ˈˈplüün bho bhë ˗a ˈgü, ˈwɔn ˈˈdhiʋ̈˗ ˗nu ˈwo kë ˗ni ˈgü kwa ˈka ꞊dɛɛ, ‹kwa ˗zo ˈti ˗dho ˗da ˗an ˈˈpiʋ̈, ɛɛnˈˈ wo ˈti ˗dho nu kö ˗wo kwa zuʋ̈ˈˈ kaanˈˈ ˈˈkwöö ˈzü.›—Is. 65:17. w22.06 10-11 § 11-12.

Kwa ˗san zë ˗kɔ suu ˈö ˈˈdhʋ̈ ˗ya ˗zɔn ꞊dhɛ kwa ˈˈdhiaa ˗yö Zoova ˈgü. (Mat. 5:​11, 12) Dügɔmɛn ˈnën mɛn ˗nu ˗blü kö ˗wo ˗gban kwa ˗gɔ. ˈˈKɛɛ Yesu ˈgü ˗yö ˈˈgbɩɩ˗ ˈgbɛ ˈö ˗ʒiö ˗a ˈka Sɔtraan ˗ta. Yesu ˗bha ˗takundhe ˈsaa˗ ˈgü, nɔɔn˗ ˗së ˈö bhë ˗yö pö ˗ni ˈgü mɛn ˗nu ˗dhɛ ˈˈsɛ ˈˈpɛpɛ ˈgü. ˈPë ˗kë ˈkwa˗ pö ˈˈdhʋ̈, ˗kwaa ˗ga. Kwa ˗bha ˗zlanwopö ˗yö ˗dhɛ ˈˈgbɩɩdhɛ ˈbha ˈnën ˗tɔ dhiaŋzë mɛn ˗nu ˈö kwaa˗ ˗nu kwa ˗wo ˈyaa do ˗an ˗dhɛ ˗sü. ˈˈKɛɛ Yesu ˗ya ˗pö bɔmɛn Zan ˗dhɛ ˈˈɲɛɛn ˈgü ꞊dhɛ ˈwɔn ˈö bhë ˗yö ˈti dho kwa ˗kɔ ˈkun nɔɔn˗ ˗së pö ˗sü ˗bha. (˗Dhɛ. 14:​6, 7) ˗Kɔ ˗kë ꞊dhɛ? Kwa mɛn ꞊va ꞊dede ˗takun ˗ni ˈgü kö ˗wo ˗Gblüdëdhɛ nɔɔn˗ man. ˈˈKpɔnŋtaadhɛ ˗todhʋ̈sü ˈgü ꞊dɛɛ, mɛn ˗nu ꞊mɔɔn˗ ˗bha ˈwo kwa ˗bha ˈsëëdhɛ ˗nu ˗wo pö jw.org ˗ta ˗wo ˈö ˗ʒiö 1.000 ˗ta ˗an ˈgü. ˗A ˗de ꞊ʒiaan kwa ˗bha ˈsëëdhɛ ˗be Zuʋ̈gblüdhi ꞊slɔɔ ˗toëpö ˈka! ˈö ˈkwa bɔ ˗a ˗ta ˈkwa Biblö ˗zɔn mɛn ˗nu ˗dhɛ bhë, kwa ˈˈdhiʋ̈ʒiöwomɛn ˗nu ꞊waa˗ kë ˈkwa˗ dhiëëta ˗wo ˈö ˗ʒiö 700 ˗ta ˗an ˈgü. w22.07 9 § 6-7.

Yesu ˗kun mɛn ˗nu ˗wëëzë ˗ni ˈgü. Matiö ˗ya ˗pö ˗dhɛkpaɔyi do ˈka ˈdhɛ ‹˗kpan mɛn kpö ˈbha ˗bha, ˗wëë ˗yö ˗da ˗a ˗ta, ˗a ˗gɛn ˗mü ꞊dhɛ kö ˗an ˈgü ya ga, kö faan ˈyaa˗ ˗nu ˈgü ˈzü, kö ꞊wa kë ꞊dhɛ ˈˈbhlaa ˗nu ˈö˗ ˗nu ˗maakëmɛ ˈyaa ˈdhö ˈö ꞊wa ˗pɛn ˗a ˈdhö.› (Mat. 9:36) Zoova ˗zë ꞊wɛ, ˗yö ˗kë ö ˗de ˈgü ꞊dhɛ? Yesu ˗ya ˗pö: «Ka Dë ˈö ˗ya ˗sü ˈka dhang˗ ˗nu ˈgü bha, ˈyaa˗ ˈˈpiʋ̈ ꞊dhɛ ˈmɛ ˈwo ꞊dhɛ ˈnë ˗nu ya ˈdhö bha˗ mɛ doseng ˗zian ˗yö ꞊dhɛng.» (Mat. 18:14) ˗Wo ˗nu bhë ˗wo kwa zuʋ̈ˈˈ ꞊nii ˗da, ˈyö ˗tɔ ˗wa ˗zɔn ꞊dhɛ kwa ˗dhɔ Zoova ˗kë ꞊dedewo. ˈKwa Yesu dɔ ˗së ˈka, Zoova ˗dhɔ ˈö kwa ˈgü ˗yö ˗dho ˗dadhiʋ̈. ˈKa˗ pö ˈzü ˗dhɔ ˈö ka ˈgü ˗yö ˗dadhiʋ̈ kö ˈka kë kletiɛn ˈö ˗ya ˗kian ˗a ˈka, ka dua ˗mü kö ka ꞊dhegblü ˗nu ˈö ˗wa ˗kian ˗zlanwokɔdhi ˈgü ˈka ˗an dɔ ˗së ˈka. Zuʋ̈gblüdhi ˈö ˗an ˗gɔ, ˗ka ka ˗zota ˗a ˈgü. ˗An zuʋ̈ˈˈ ˈyaa ˈto ˗sü ˈka ˈzlöö Zoova ˗dhɔkësü ˗wɔn ˈgü. ˗Kaa pö ˗an ˗dhɛ ˈwɔn ˈbha ˗nu ˈwo bɔ ˗an ˈgü Zoova ˗dhɔkësü ˈgü, ˗wa pö ka ˗dhɛ. ˈKa˗ pö ˈka ˗da ˈwɔn ˈˈgblʋ̈gblʋ̈ ˈbha ˗nu ˗ʒian ˗ta, ˗ka ꞊ɲɔɔn ˗an ˗bha ˈka ˗dhioo ˗dhɛ ˗an ˗gɔ. ˗Yö kë ka ˈˈɲaan ꞊dhɛ «˗dhioodɔmɛn ˗nu ˗wa kë ꞊va, ˈwɔn ˗nu ˗wo ˗ɲan.» w22.08 3 § 6-7.

Mɛn ꞊gban ˈˈpɛpɛ kwa ˗dho bɔ ˈwɔn ˈˈgbɩɩ˗ ˗nu ˈgü. ˈˈKɛɛ ˗yö kë kwa ˈˈɲaan ꞊dhɛ ˈkwaa kwa do ˈka. ꞊Dhɛ ˈnëndë ˈö˗ ˗bha ˈnën ˗nu ˗dhɔ ˗ya ˗kë ˗a ˈdhö, Zoova ˗zo ˗yö kwa ˈˈpiʋ̈. ˗Yö kwa ꞊kee˗, ˈö˗ ˈˈpiʋ̈ ꞊dedewo kö ˈö ö ˈˈtʋ ˈto kwa ˗bha bhɛɛwo ˗nu ˗bha, ˈö kwa ˗takun. (Is. 43:2) ˗Yö ga ˗sü ˈka kwa ˈgü ꞊dhɛ kwa ꞊mɔɔn˗ ˗bha ˈkwa bɔ ˈwɔn ˈˈgbɩɩ˗ ˗nu ˈgü, ˈyö ˗tɔ ꞊dhɛ pë ˈˈpɛpɛ ˈö kwa ˗bhawɔn ˈdhö˗ ˗bha kö ˈkwa ˗an bun, Zoova ꞊yaa˗ nu kwa ˗dhɛ. ˗Yö ꞊bhlëëwɔn ˈkpii˗ ˈö ˗kë ˗bhɛɛ ˗a ˗dhɛ ˗sü ˈka ˗a ˈˈsɩ kë kwa ˗dhɛ, ˈö Biblö nu kwa ˗dhɛ. ˗Yö ˗go mü ˈzü ˈö ˗zuu ˈgü ˗bhöpë ꞊va waa kwa ꞊dhegblü ˗nu ˈö kwa ˗dhɔ ˗yö ˗an ˗kë ˗an ˗nu kwa ˗dhɛ, kö ˗wo kwa ˗takun ˈˈtʋ̈ŋ ˈˈgbɩɩ˗ ˗nu ˈgü. ˗A kë ˗sü kö kwa Dë ˈö dhaŋ˗ ˈgü ˗yö ö ˗zokë kwa ˈˈpiʋ̈ bhë, kwa˗ ˈˈnuɛ ˗bho ˗a ˗bha ꞊dedewo. «Kwa zuʋ̈ˈˈ ꞊nii ˗yö ˗da ˗sü ˈka ˗a ˗wɔn ˈgü.» (Ps. 33:21) ˈKwa˗ pö ˈkwa˗ ˗zɔn ꞊dhɛ ö ˗zo ˈö˗ kë ˗ni kwa ˈˈpiʋ̈ ˗dhɔ ˈgü bhë kwa˗ ˈˈnuɛ ˗bho ˗a ˗bha, kwa dua ˗mü kö pë ˈˈpɛpɛ ˈö˗ nu kwa ˗takunpë ˈka, ˈkwa˗ ˗wɔn ˈkun kwa ˗kɔ ꞊plɛ ˈka. Kwa dua ˗mü ˈpö kö ˈkwa pë ˈˈpɛpɛ kë ˈkwa ˈto ˗Zlan ˗kɔ ꞊wlöö. ˗A ˗pö ˗kɔ ˈˈwɛɛ ˈgü ˗sü ˈka, ˈkwa kwa ˈgü dɔ ˈˈgbɩɩ˗ ˈkwa ˈwɔn man Zoova ˗ta, ˈwɔn ˗nu ˈwo˗ ˗dhɛ ˗së ˈkwa ˗an kë, ˗yö ˗dho ö ˗zokë kwa ˈˈpiʋ̈ ˗toëpö ˈka. w22.08 13 § 15-16.

꞊Dɛɛ, ˈdhaŋ˗ ˗bho mɛn ˗nu ˈˈdhiʋ̈ ˗sü ˗yö mɛn ꞊vadhɛ ˗kɔa ˈˈgbɩɩ˗. ˗Wo wo ˗de dhɛɛˈˈ ˗kpɔ ˈni ˗ya kë ꞊dhɛ ˈˈsɛkɔɔmɛn ˗nu, ꞊klaŋ ˈˈgblʋ̈gblʋ̈ ˗nu waa soete ˗gɔdhiʋ̈mɛn ˗nu ˈwo ˗an ˈsü ˗ni ˈgü ꞊dhɛ mɛn ꞊bhlëësü ˗nu ˈdhö bhë, ˗wo wo ˗zota wo ˗wɔn ˈgü. ꞊Ya ˈgo mü, ˈwaa ˗zlanwo ˗gɔmɛn ˗nu ꞊bhlëë ˗ya ˈzü. ˗A ˗wɔn ˈgü, ˗a kë ˗sü kö ˗wo wo bo ˈdhaŋ˗ bho ˗sü ˈka Biblö ˈö ˗zlanwo ˗gɔmɛn ˗nu ˈwo ˈˈdhʋ̈ ˈwo˗ pö ꞊dhɛ wo˗ ˗ya ꞊bhlëë ˈgü ˗a ˈˈdhiʋ̈ bhë, ˗a ˈwɔn dua ˈyaa ˗mü kö ˗yö kwa ˈkun. Mɛn ˈö ˈkwa ˗kë Zoova ˗dhɔkëmɛn ˗nu ˈka, ˗yö ga ˗sü ˈka kwa ˈgü ꞊dhɛ ˗yö «gagade pö ˗Zlan» ˈö kwa ˗bha ˈwɔn ˗së ˈˈpiʋ̈, ˗a ˈka. (Ps. 31:5; Is. 48:17) Kwa˗ ˈwɔn ˗dɔ ꞊dhɛ kwa ꞊mɔɔn˗ ˗bha ˈkwa kwa ˗zo yö pë ˗nu ˈö ˈkwa ˗an ˗wo pö ˗ni ˈgü Biblö ˈgü bhë ˗an ˗dhɛ. Biblö ˈgüpʋmɛn do ˗ya ˗pö: «˗Wo ˗nu ˈö ˗Zlan ˗yö ˗an pö ˗a gbɛ˗ ˈyaa ꞊sua ˈka. ˗A ˈˈwɛɛ ˈbha kö˗ ˈgüwɔn dho ˈkun kë ˗sü ˈka, ˈyaa ˈdhö. ˗Zlan ˗dhɔkëmɛn ˗nu ꞊mɔɔn˗ ˗bha ˈwo wo ˗zo yö pë ˈö˗ pö ˗a ˗dhɛ, ˈyö ˗tɔ ꞊dhɛ ˗wo ˈdhaŋ˗ ˗bho ˗Zlan ˈö ˗wo ˗nu bhë ˗an pö ˗a ˈˈdhiʋ̈.» Pë ˈö˗ pö bhë kwa˗ ˗yö ꞊dhɛ gagade ˗mü. w23.01 2 § 1-2.

ˈKwa kwa ꞊dhegblü ˗nu ˗bha ˗zoyö Zoova ˗dhɛ ˗sü ˗gɛn ˗gban, ˗yö ˗dho ˗an ga ˗da ˗an ˈgü. ˗A mɛn ˈbha ˗nu ˈwo ˈdhö, mɛn ˗nu ˈö ˈwaa Zoova ˗dhɔkëmɛn ˗nu ˈka ˗wo ꞊wɛɛ ˗dɔ ˗an ˗bha. ˗A mɛn ˈbha ˗nu ˗de ˈpö ˈˈyua ꞊gbɔɔnsü ˗yö ˗an ˗bha ɛɛnˈˈ ˗wo ˈkozë ˗ni ˈgü ˗zotadhe yaa ˗nu ˈka. ˗A mɛn ˈbha ˗nu ˗de ˈpö ˗a yi ˗ya ꞊gwëë ꞊dedewo, ˈö ˈwo ˈˈkpɔnŋtaadhɛ yaa ˈö yö ˗a ɲën ˗yi ˈˈdhiʋ̈ ˈˈgan ˗ni ˈgü. ˈWɔn ˗nu ˈwo bhë ˗wo ꞊mɔɔn˗ ˗bha ˈwo ˗an ˗bha ˗zoyödhe ˗da ˈgüdandhe ˈgü. Kletiɛn ˈbha ˗nu ˈwo kun ˗kwɛ këŋ do ˗blɛɛsü ˈgü, ˗wo ˗kun bɔ ˗ni ˈgü ˈwɔn suu ˗nu ˈwo ˈˈdhʋ̈ ˗an ˈgü ˈpö. Bɔmɛn Pɔdhö ˗bɔ ˗Zlan ˗Wo ˗ta ˈö ö ꞊dhegblü ˗nu ˗bha ˗zoyödhe ˗gɛn ˗gban. ˗A ˈwɔnzuan ˈnën ˗tɔ Zuifö ˗nu ˈwo ˗kë kletiɛn ˈka bhë, ˗a ˈbha ˗ya kë kö pë ˈwo dho ˗a pö wo ˗mɛn ˗nu, ˈö ˗an ˗bha ˈgü Zuifö ˗nu ˗bha ˗zlanwo ˈnën ˗tiaandhö ˈö ˗ʒiö ˗a ˈka kletiɛn ˗nu ˗bha ˗ta ˗an ˗dhɛ, ˈwaa kun ˗a dɔ ˗ni ˈgü. ˈYaa za ˈgü ꞊dhɛ ˈsëëdhɛ ˈö Pɔdhö ˗ya bɔ Eblö ˗nu ˗dhɛ bhë, ˗yö kletiɛn ˗nu ˈwo ˈˈdhʋ̈ ˗an ꞊faanmën ꞊dedewo. (Ebl. 1:​5, 6; 2:​2, 3; 9:​24, 25) ˈWɔn ˈö Pɔdhö ˗ya ˗ta ˗pʋ ˗an ˗dhɛ ˈˈpuu ˈka bhë, ˗wo ꞊mɔɔn˗ ˗bha ˗wo bɔ ˗a ˗ta kö pë ˈwo dho ˗a pö ˗gban ˗an ˗gɔ ˗mɛn ˗dhɛ ˗wa dɔ. w22.08 23-24 § 12-14.

Sɔtraan ˗bha ˈˈkpɔnŋtaadhɛ ˈö yö ˗a ˈgü, mɛn ˈwo dho ˈdhaŋ˗ bho ˗a ˈˈdhiʋ̈ mɛn ˗nu ˈwaa˗ dɔ ˈzüdho. ˈˈDhoodɔmɛn ˗nu, ˈˈsɛgɔdhiʋ̈mɛn ˗nu waa ˗zlanwo ˗gɔdhiʋ̈mɛn ˗nu ˗wo ꞊sua ˗kë ˗an ˗gɔ ˈˈtʋ̈ŋ ꞊gban ˈka. Mɛn ˈbha ˗nu ˗de ˈpö ˈwaa ˈdhaŋ˗ bho wo ˈˈtɔŋdë ˗nu, wo ˗yayoo ˗nu waa wo ˗de ˗bha ˈkɔdhigümɛn ˗nu ˈˈdhiʋ̈ ˈzü. Kë ˈö˗ wo ˈˈdhʋ̈ bhë, ˗a ˈwɔn ˈyaa kwa ˈkun. Biblö ˗ya ˗to ˈˈdhiʋ̈ ˈö˗ pö ꞊dhɛ «ˈˈkpʋngtaadhɛ yën ˈˈtʋ̈ng ˈgü [ . . . ] mɛn ˗nu ˈwii ˈdho ˈˈsuʋ̈ [˗Zlan] ˗gɔ, [ . . . ] ˗wo ˗dho mɛ ˗nu yang kë, [ˈwo] ˗da mɛ ˗nu ˗dhɛ pë ˈˈpiʋ̈.» ˗Wo ˗nu ˈwo bhë ˗wa ˗zɔn ꞊dhɛ ˈˈkpɔnŋtaamɛn ˗nu ˈwɔn kë ˗kɔ ˗dho kë ꞊dhɛ Sɔtraan ˈö ˈyaa ˈdhaŋ˗ ˗bho ˗a ˈˈdhiʋ̈ ˗mɛn ˈka bhë, ˗a ˗bha ˈdhö. (2 Tim. 3:​1-4; 2 Ko. 4: 4) Kletiɛn ˗nu kwa˗ ˈwɔn ˗dɔ ꞊dhɛ kwa ꞊mɔɔn˗ ˗bha ˈkwa ˈdhaŋ˗ bho ꞊dedewo Zoova ˈˈdhiʋ̈. ˗Yö ga ˗sü ˈka kwa ˈgü ꞊dhɛ kwa ˗dhɔ ˗ya ˗kë, ˈö yö «ˈti ˗dho ˈˈkan toŋtoŋdhö» ö ˈˈtɔŋdë ˗nu ˗bha. (Ps. 9:10) Kwa ꞊mɔɔn˗ ˗bha ˈpö ˈkwa ˈdhaŋ˗ bho Yesu Klito ˈˈdhiʋ̈, ˈyö sü ꞊dhɛ ˗yö ö ˗de ˗nu kwa ˗wɔn ˈgü. (1 Piɛ. 3:18) ˗Ya ˈgo mü ˈzü, kwa ꞊dede ˈkwa˗ yö ꞊dhɛ Biblö ˗bha ˗dhioo ˗nu ˗wo ˗së kwa ˗bha ˈka.—2 Tim. 3:​16, 17. w22.09 2 § 1-2.

Zuʋ̈gblüdhi ꞊dede ˈyaa ˈnën ˗tɔ mɛn ꞊nii ˗bha ˗da ˗sü ˈö ꞊dɛɛ, ˈö dhiʋ̈ˈˈ kö ˗ya ɲën. ˗Yö ꞊mɔɔn˗ ˗bha ˈö ˗kë mɛn ˗gɔ ˗kplawo. ˗Kɔ ˗kë ꞊dhɛ? Yesu ˗ya ˗pö ö ˗bha ˈˈdhɛɛtadhiaŋ˗ ˈö˗ zë ˗tɔn ꞊troo ˗a ˈgü ꞊dhɛ «mɛ ˈwo˗ ˈwɔn dɔ wo zuëˈˈ ˈˈpiʋ̈ ꞊dhɛ ˈwaa pë ˈbha ˈka [˗Zlan] wëëdhö [ɛɛnˈˈ wo ˗bhawɔn ˗yö ˗Zlan ˗bha] bha˗ ˗nu ˗bha ˗së.» (Mat. 5:3) ˗A ˈwɔn ˗kun Yesu ˈˈɲaan ꞊dhɛ mɛnbhɩɩdhe ˗nu ˈö ˈkwa bhë, Zoova ˗Zlan ˈö kwa ˗Damɛn ˈka ˗a dɔ ˗sü ˈwo˗ ˗dhɔkë, ˗a ˗dhɔ kwa ˈgü ˈkwa bhɔ ˗a ˈka. Zoova ˗yö zuʋ̈gblüdhi ˗Zlan ˈka. ˗A ˗wɔn ˈgü, mɛn ˗nu ˈwo˗ ˗dhɔkë ˗an zuʋ̈ˈˈ ˈˈgblü ꞊mɔɔn˗ ˗bha ˈö dhi ˈpö. (1 Tim. 1:11) ˈMɛn ˈwɔn ˈˈgbɩɩ˗ ˈyaa˗ ˗bha, ˈyö˗ zuʋ̈ˈˈ ˈˈgblü ˗yö ˗dhi ˗ee? ˗Abin. Yesu ˗bha dhiaŋ ˈö˗ zë ˗tɔn ꞊troo ˗a ˈgü ˗ya ˗pö «ˈmɛ ˈwo ˈˈgbʋ bɔ sië» bhë, zuʋ̈gblüdhi ꞊mɔɔn˗ ˗bha ˗yö kë ˗an ˗gɔ. Pë do bhë ˈpö ˈyö˗ pö «mɛ ˈwo˗ ˗nu ˗wëëdhɛ bho sië [˗Zlan] dhɔɔbhaa kë ˗sü ˗wɔn ˈgü,» ˗an ˗bha. (Mat. 5:​4, 10, 11) Yesu ˗kun ˗a ˗zɔn ˗ni ˈgü kwa ˗dhɛ ꞊dhɛ zuʋ̈gblüdhi ˈyaa ˈsü ˈwɔn ˗nu ˈwo kwa ˗ta ˗an ˗bha. ˈKwa˗ ˈwɔn dɔ ꞊dhɛ kwa ˗bhawɔn ˗yö ˗Zlan ˗bha, ˈkwa ꞊ɲɔɔn ˗a ˗bha, ˈyö ˈkwa dho zuʋ̈gblüdhi ꞊slɔɔ.—Zak. 4:8. w22.10 6 § 1-3.

ˈWɔnbhokoodɔsü ˗dho kletiɛn ˗takun kö ˗yö «ˈˈtʋ̈ŋ ˈö dho dɔ˗ ˈka ö ˈˈtun waa ˈˈtʋ̈ŋ ˈö dho dhiaŋzë ˗a ˈka,» ˗an dɔ. (Eccl. 3:7) ˈˈSɛ ˈbha ˗nu ˈgü, mɛn ˗nu ˗bha ˈˈgɔɔn do ˗ya ˗pö: «Dhiaŋzë ˗sü ˗yö ꞊dhɛ ˈwëë˗ ˈdhö, ˈˈkɛɛ ˗dɔ ˈˈtun ˗sü ˗yö ꞊dhɛ ˈˈsënŋ ˈdhö.» ˗A ˗pö ˗kɔ ˈˈwɛɛ ˈgü ˗sü ˈka, ˈˈtʋ̈ŋ ˈbha ˗nu ˈka ˗yö ˗dho kë ˗së kö ˈkwa dɔ kwa ˈˈtun. ˗A ˈwɔnzuan do ꞊nɛn: Kwa ꞊dhegblü do ˈö mɛn zii ˈka ˈö˗ yi ˗ya ꞊gwëë, ˗ya kë ꞊shiöŋ ˗wa ˗dhɛ ˗zlanwokɔdhi ˈbha ˗nu ˈgü kö ˗yö ˈwɔn ˈbha ˗nu ˈˈɲan bhɔ. Pë ˈö mɛn zii do ˗ya ꞊blɛɛ ˗a ˗bha, ˗kwaa ˗ga. ˗Ya ˗pö: «˗Yö ˗kë ö ˈsuan˗ ˈka ˗kplawo kö ˈya ˗dho ˈwɔn ˗nu ˈwo ˗zlanwokɔdhi ˗nu ˈwo ˈˈdhʋ̈ ˗an ˈgü, ˗a ˗gɛn bho mɛn ˗nu ˗dhɛ.» ˗A ˗wɔn ˈgü, mɛn zii ˗nu ˈwo˗ ˗bha zlanwokɔdhi ˈgü ˗wa ꞊bhlëë ˗ya, ˈwo˗ ˈwɔn dɔ ꞊dhɛ ˈyaa ꞊mɔɔn˗ ˗bha kö ˗yö wo ˗bha ˗bin ˗wɔn ˗nu blɛɛˈˈ mɛn ˗nu ˗dhɛ. Gagade pö ˗sü ˗yö kwa ˗takun ˈö ˈkwa ˗kë ˈdhaŋ˗ ˗bho ˗a ˈˈdhiʋ̈ ˗mɛn ˗nu ˈka. Mɛn ˈö gagade pö ˗mɛn ˈka kwa ˈdhaŋ˗ ˗bho ˗a ˈˈdhiʋ̈, ˈyö ˗tɔ kwa˗ ˈwɔn ˗dɔ ꞊dhɛ ˗yö ˗dho gagade pö ˗kplawo.—Efɛ. 4:25; Ebl. 13:18. w22.09 12 § 14-15.

«꞊Kpɔɔdhɛ ꞊dede ˗yö ˈˈgbla ˗ni ˈgü ˗kpinŋ ˈˈpiʋ̈,» mɛn ꞊vadhɛ ˈwaa wo ˈˈtʋ ˈto ˗a ˗bha. (Prov. 1:20) Biblö ˗ya ˗pö mɛn kpö ˗yaaga ˈnën ˈwaa ˈˈwɩ ꞊kpɔɔdhɛ ˗bha: «Mɛn ˗nu ˈö ˈwaa ˈwɔn dɔ,» «꞊wɛɛdɔmɛn ˗nu» waa «ˈˈblɔɔnmɛn ˗nu.» (Prov. 1:​22-25) «Mɛn ˗nu ˈö ˈwaa ˈwɔn dɔ» ˈnën ˈwo ˗tɔ mɛn ˗nu ˈwo dhaŋ˗ bho ˈwɔn ˈˈpɛpɛ ˈˈdhiʋ̈, ˈö ˈˈkpënŋ˗ ˗kë ˗an ˗gɔ ˗dhɛ ˈdhö ˗së. (Prov. 14:​15, ztw.) ˗Kwa kwa ˗zota mɛn ˈˈmliɲɔn ꞊va ˈö ˗zlanwogɔmɛn ˗nu waa ˈˈsɛkɔɔmɛn ˗nu ˈwo ˈˈkpënŋ˗ kë ˗ni ˈgü ˗an ˗gɔ, ˗an ˈgü. ˗A mɛn ˈbha ˗nu ꞊waa˗ yö ꞊dhɛ ˈˈkpënŋ˗ ˈnën ˈwo kun ˗a kë ˗ni ˈgü wo ˗gɔ, ˗yö ˗mën ˗an ˈka. ˈˈKɛɛ mɛn ˗nu ˈö Proverbes 1:22 ˗yö ˗an ˗wɔn ꞊blɛɛ bhë, wo ˗zë ˗wo ˗wɩ ˗a ˗bha kö ˗wo ˈˈkpënŋ˗ kë wo ˗gɔ, ˈyö sü ꞊dhɛ ˗yö ˗an ˗dhɛ ˗së. (Jér. 5:31) ˈWaa˗ ˈˈpiʋ̈ kö ˈwo Biblö draanˈˈ ɛɛnˈˈ ˈwo˗ ˗ya ꞊bhlëë ˈgü. ˈKwaa˗ ˈˈpiʋ̈ ˈkwa kë ꞊dhɛ mɛn ˗nu ˈö ˈwaa ˈwɔn dɔ ˗an ˈdhö.—Prov. 1:32; 27:12. w22.10 19 § 5-7.

˗Zlan ˗bha ˗kɔlokota ˗yö ˗dhioo ˗nu ˈwo dho kwa dha ˗an ˗dɔ kwa ˗ta ˈpö. ˗Wa ˗pö ˗kplawo ꞊dhɛ ˈkwa kwa ˗bha telefɔnö ˈˈnimlɔn ˗nu nu mɛn zii ˗nu ˗dhɛ, kë ˈˈdhʋ̈ kö ˈwɔn ˈˈgbɩɩ˗ ˗ya ˗da ˗wo kwa ˗dhɛ. ˗Wo ꞊mɔɔn˗ ˗bha ˈpö ˈwo ˗dhɛ ˈö ˈkwa dho kwa ˗bin ˗a ˗bha, ˗dhɛ ˈö kwa dho bɔ ˗a ˗bha, kwa ˗bhawɔnyëëpë ˗nu, ˗kɔ ˈö ˈkwa dho ˈwɔn ˗nu kë ˗a ˈka waa ˈˈtʋ̈ŋ ˗nu ˈö ˈkwa dho nu ˗a ˈka mɛn ˈˈwɛɛ ˗nu ˗dhɛ, ˗an ˗zɔn kwa ˗dhɛ. Kwa ˈti kwa ˈˈtʋ ˈto ˗an ˗bha, kwa ꞊mɔɔn˗ ˗bha ˈkwa kwa ˗de ˗bha ˗tosɛta waa mɛn zii ˗nu ˈwo wo ˈˈɲan ˈto ˗ni ˈgü kwa ˗bha bhë ˗an ˗bha ˗tosɛta dɔ ga ˗yɛ ˈˈdhiʋ̈. (Ebl. 13:17) ˈWɔn ˈˈgbɩɩ˗ ˗nu ˈwo ˗kë ꞊dhɛ ˈˈsɛ ˗bha ꞊ziisü, ˈˈyi ˗bha pa ˗sü, ˗gblü ˗bha ˗da ˗sü, ɛɛnˈˈ mɛn ˗nu ˗bha ˗gban ˈˈsɛkɔɔnmɛn ˗nu ˗gɔ ˗sü ˈdhö bhë ˗wa ˗da, kwa ꞊dhegblü ˗nu ˗wo ˗go wo ˗gɔ ˈkɔɔ ˈwo dho ˗ya ˗dhɛ ˈˈwɛɛ ˗nu ˈgü. ˈKö ˗kë ˈˈdhʋ̈ ˗wo wo ˈgü ˗dɔ ˈˈgbɩɩ˗ ˗kplawo kö wo ˗kɔ ˗yö ˈto Zoova ˗bha yö ˈgü. ꞊Dhɛ kletiɛn ˗blɛɛsü ˗nu ˈwo kun ꞊duëë ˗ni ˈgü ˈˈklʋʋbhɔdhe ˗gɔ ꞊kwɛŋzü ˗an ˈdhö, ‹˗wo ˈwɔn ˗taɔng ˗së ˗pö ˗dhɛ ꞊gban ˈˈpɛpɛ ˈgü ˈwo dho˗ ˈka.› (Këw. 8:4) ˗Zlanwopösü ˗yö ˗an ˗takun ˈwo wo ˈˈɲan ˗klu ˗Zlan ˗bha ˗Gblüdëdhɛ ˗bha, ˈwo wo ˗zo bho ˈwɔn ˈˈgbɩɩ˗ ˗nu ˈˈpiʋ̈. ˗A ˗wɔn ˈgü, zuʋ̈gblüdhi waa zuʋ̈waannusü ˗to ˗an ˗gɔ. w22.12 19 § 12-13.

Zoova ˗yö mɛn ˈö ˗dhö ˗a ˗sü ꞊bhlëësü. ˈˈSanni ˗yö ö ˗bha gwëëˈˈ ˗nu bɔ kö wo ˗zlanwopö, Yesu ˗yö ˗an ˗takun kö ˈˈsuʋ̈ ˈya ˗dho ˗an kë ˗gban ˗an ˗gɔ ˗mɛn ˗nu ˗gɔ. (Mat. 10:​29-31) ˗Yö ˈwɔnzuan ˗sü zöŋ ˈö Izraɛdhömɛn ˗nu ˈˈpɛpɛ ˗wa dɔ, ˗a ˗bha. Yesu ˗bha ˈˈtʋ̈ŋ ˈgü, zöŋ ꞊bhlëë ˈyaa kun ꞊va. ˈKö ˗kë ˈˈdhʋ̈, ˗ya ˗pö ö bha ˗gwëë ˗nu ˗dhɛ: «[Zöng] do ˈyaa ˗pö ˈˈsia˗ ˈˈwɛɛwɛɛ kö ka Dë [˗Zlan] ˈyii ˈˈwɩ˗ ˗bha.» ˈÖ˗ ˗pö ˈzü: ‹Ka ˗wɔn ˗yö ˈˈgbɩɩ˗ ˈö ˗ziö ˗a ˈka zöng ˗nu ˗ta.› Yesu ˗yö ˗an ˗zogban ꞊dhɛ Zoova ˗yö ö ˈˈtʋ̈ŋ ˗kë mɛn ˈö ˈdhö ˗a ˈgü, kë ˈˈdhʋ̈ kö ˈwa ˗dho ˈˈsuʋ̈ ˈˈklʋʋbhɔdhe ˗nu ˗gɔ. ˈYaa za ˈgü ꞊dhɛ ˈdhɛ Yesu ˗bha ˈˈgwëë ˗nu kun ˗zlanwopö ˗ni ˈgü pödhɛ waa ˈˈkwipö ˗nu ˈgü ˗wa ˗kpan zöŋ ˗nu ˗bha, ˗an ˗zo ˗yö ˗bo Yesu ˗wo ˈka. Kwa ˗de ˈpö ˈkwa ˗kpan ˗mannën ˈsɛɛn˗ ˗nu ˗bha, kwa ˗zo ˗yö ˗bo ꞊dhɛ kwa ꞊bhlëë ˗yö ˈkpii˗ Zoova ˈˈɲan ˈˈdhiʋ̈ ˈö ‹kwa ˗wɔn ˈdhö ˈˈgbɩɩ˗ ˈö ˗ziö ˗a ˈka zöng ˗nu ˗ta.› ˈKwa˗ kë ˈˈdhʋ̈ ˗wa ˗gban kwa ˗gɔ, kwa ˈgü ˗dho kë ˈˈgbɩɩ˗. w23.03 18 § 12.

ˈˈTʋ̈ŋ ˈbha ˗nu ˈka, ˈwɔn ˈˈgbɩɩ˗ ˗nu ˈwo ˗kë ꞊dhɛ kwa ˗bha ˈkɔdhigümɛn ˗nu ˗bha ˗gban kwa ˗gɔ ˗sü ɛɛnˈˈ kwa ˗bha yö ˗bha shiʋ̈ˈˈ ˗sü ˗nu ˈdhö bhë, ˗wo ˗nu kwa ˗ta. ˈWɔn ˈˈgbɩɩ˗ ˗nu ˗wa ꞊gwëë kwa ˗ta, ˗wo ꞊mɔɔn˗ ˗bha ˈwo kwa ˗bha ˗zoyödhe ꞊shiʋ̈ ɛɛnˈˈ ˈwo kwa ˗gɔ ˈgü dɔ ˗gbɔudhö. ˈˈTʋ̈ŋ ˗nu ˈwo ˈˈdhʋ̈ ˗an ˈgü, Dügɔmɛn ˗ya ˈˈpiʋ̈ kö ˗yö kë kwa ˈgü ꞊dhɛ kwa ˗dhɔ ˈyaa Zoova kë. ˗Ya ˈˈpiʋ̈ ˈzü kö ˈkwa kwa ˗zota ꞊dhɛ Zoova waa ö bha ˗kɔlokota ˈnën ˗an ˗wɔn ˈgü ˈkwa saanˈˈ ˈsü ˗ni ˈgü bhë. ˈWɔn yö ˗kɔ suu ˈö ˈˈdhʋ̈ ˗yö ˗kë Izraɛdhömɛn ˈbha ˗nu ˗gɔ Eʒitö ꞊kwɛŋzü. ˗A züdɔdhɛ ˈgü, ˗wo ˗kun ˈdhaŋ˗ bho ˗ni ˈgü ꞊dhɛ Zoova ˈnën Moizö waa Aadhɔn ˗an bɔ kö ˗wo wo bho ꞊dhuëŋdhɛ ˈgü. (Ex. 4:​29-31) ˈˈKɛɛ ꞊taabha ˈdhɛ Fadhaɔn ˗yö ˈwɔn ˈˈgbɩɩ˗ ˗wɔ ˗an ˗ta, ˗wa ˗pö ꞊dhɛ Moizö waa Aadhɔn ˈnën ˈwo˗ kë. (Ex. 5:​19, 20) ˗Wo ˈwɔn yaa ˗blɛɛ ˗Zlan ˗dhɔkëmɛn ˗nu ˈwo ˗klu ˗a ˗bha bhë, ˗an ˗bha. ˗Yö ˗kun ˗wëësü! ꞊Ya kë ꞊dhɛ ˈbha ꞊gwëë ˈwɔn ˈˈgbɩɩ˗ ˗nu ˈgü, bhɛɛˈˈ Zoova ˗dhɛ ü zuʋ̈ˈˈ ˗gban ˈka, ˈü ˗takundhe ˗dhɛ ˗a ˗gɔ. w22.11 15 § 5-6.

Zoova ˈnën ˗këdhösü nu mɛn ˗dhɛ, ˗ya ˈgo mü ˈzü ꞊faan ˗ya ˗gɔ kö ˗yö mɛnbhɩɩdhe ˗nu bho ga ˈgü. ˗Yö ꞊faan ˗nu Edhi ˗dhɛ ˈyö ꞊gɛandhe do ˈö kun Sarepta ˗a gbö bho ga ˈgü. (1 Rois 17:​21-23) ꞊Taabha, ˗yö Edhize ˗takun ˈpö kö ˗yö dhebɔnën do ˈö go Shunamö ˗a gbö bho ga ˈgü. (2 Rois 4:​18-20, 34-37) ˈWɔn ˗nu ˈwo bhë ˗wa ˗zɔn ꞊dhɛ mɛn ˗nu ˗bho ga ˈgü ˗sü ˈˈsɩ Zoova ˗dhɛ. ˈDhɛ Yesu kun ˈˈsɛ ta, ˗ya ˗zɔn ˈpö ꞊dhɛ ꞊faan ˈö ˈˈdhʋ̈ bhë Zoova ꞊yaa˗ nu ö ˗dhɛ. (Zan 11:​23-25, 43, 44) ˈˈTʋ̈ŋ ˈö yö ˗a ˈgü Yesu ˗yö dhaŋ˗ ˈgü, ˗Zlan ‹˗ya ˗kɔ ˗ziö ˈˈsɛ waa˗ dhang˗ ˗nu ˈgü ˗pë ꞊gban ˈˈpɛpɛ ˗gɔ ˗sü ˗faan nu ˗a ˗dhɛ.› ˗A ˗wɔn ˈgü, ˗yö dɔ ˗sü ˈka ˗së kö ˗yö ˈˈplüün ˈö ˗Zlan ˗ya bho ꞊dhɛ ‹mɛ ˈˈpɛpɛ ˈö ˗wa ga ˈwo bun ˈgü ˗wo ˗dho ˗bö kö ˗tosɛta ˈö ˈyaa ɲën ˗wa kë› bhë, ˗a yökodhiʋ̈.—Mat. 28:18; Zan 5:​26-29. w22.12 5 § 10.

˗Wa gɔɔgbɩɩdhɛ kë Ezekiɛdhö ˗ta, kö ꞊waa˗ kë Zoova ˗ta. ˗Wo ˗nu ˈwo biblö ˈˈɲan ˈö ꞊dɛɛ ˗a ˈgü bhë, ˗wo Ezekiɛdhö ˗zogban ꞊dhɛ ˈˈsɛgümɛn ˗nu ˗bha gɔɔgbɩɩdhɛ kë ˗sü ˗gɛn ˈyaa ˈnën ˗tɔ ꞊dhɛ ˗Zlan ˗wodhiʋ̈lomɛn ˗së ˈyaa ˗mü ˗a ˈka. Zoova ˗yö Ezekiɛdhö ˗zogban ˈzü ꞊dhɛ ö ˗bha za nɔɔn˗ ˈö bhë yi ˈö dho yö˗ ˈka ˈkodhiʋ̈, ˈˈsɛgümɛn ˗nu «˗dho ˗a ˈwɔn dɔ ꞊dhɛ ˗Zlan ˗wodhiʋ̈lomɛn do ˈbha ˗kun wo kpö ˈgü.» (Ézéch. 2:5; 33:33) ˈYaa za ˈgü ꞊dhɛ ˗wo ˗nu ˈwo bhë ˗wo Ezekiɛdhö ꞊faanmën ˗Zlan ˗bha nɔɔn˗ pö ˗su ˗bha. Kwa ˗de ˈpö ˗a ˈwɔn dɔ ˗sü ö ꞊dhɛ Zoova ˈnën kwa bɔ bhë, ˗yö ꞊faan ˗nu kwa ˗dhɛ. ˗Yö kwa ˗sü ˗tiaandhö, ˈö kwa ˗dhɛ ö ˗bha «꞊gbɛkiö ˗nu.» (Is. 43:10) ꞊Bhlëëwɔn ˈkpii˗ ꞊dede ˗mü kwa ˗bha ˈka. ˗Ya ˗pö Ezekiɛdhö ˗dhɛ: «ˈˈSuʋ̈ ˈya dho ü kë.» ˗Wo do ˈö bhë ˈyö˗ pö ˗ni ˈgü kwa ˗dhɛ ˈpö ꞊dɛɛ. (Ezek. 2:6) ˈMën ˗kë ˈö kwa dua ˈyaa ˗mü ˈkwa ˈˈsuʋ̈ ˗gban kwa ˗gɔ ˗mɛn ˗nu ˗gɔ? ˈYö ˗tɔ ꞊dhɛ Zoova ˈö kwa bɔ ˈpö ꞊dhɛ Ezekiɛdhö ˈdhö bhë, ˗yö kwa ˈˈpiʋ̈.—Is. 44:8. w22.11 3-4 § 4-5.

꞊Dɛɛ, kwa ˗Zlan ˈˈnuɛ ˗bho mɛn zii ˗nu waa mɛn zii ˗kɔ ꞊löö ˗nu ˈwo ˈdhaŋ˗ ˗bho ˗a ˈˈdhiʋ̈ ˗mɛn ˗nu ˈka, ˗an ˗wɔn ˈgü. Kwa ꞊dhegblü ˗nu ˈwo ˗klu ˗Zlan ˗bha ˗mɛn ˗nu ˈka ˈˈdhʋ̈, ˗wo wo ˗zo ˗kë kwa ˈˈpiʋ̈ ˗së ˈka. ˗A ˗wɔn ˈgü, kwa Zoova ˈˈnuɛ ˗bho. ˗Kɔ ˗mɛɛn ˈö ˈkwa dho ˗a ˗zɔn ˗a ˈka ˈzü ꞊dhɛ kwa ˈdhaŋ˗ ˗bho ˗a ˈˈdhiʋ̈ ˗mɛn ˗nu ˈka? Kwa ꞊dhegblü ˗nu ˗dhɔ ˗yö kwa ˗kë, ˈö ˈkwa kwa ˈˈtʋ̈ŋ ˗kë ˗an ˈgü. ˈˈKɛɛ kwa dua ˗mü ˈkwa˗ kë kwa ˈsuan˗ ˈka, kö ˈkwa ˗dho kwa ˈˈdhi ˗da ˗an ˗bha ˈwɔn ˗nu ˈö ˈwaa ˗gban kwa ˗bha ˗an ˈgü. ˗Kwɛ këŋ do ˗blɛɛsü ˈgü, kletiɛn ˈbha ˗nu ˗kun ˗zlanwokɔdhi ˗nu ˈgü ˈö «dhiang ˗yö pa˗ ˗nu ˗ta, ˈyö dhiang ˈö ˈyaa˗ ˗nu zë ˗dhiang ˈka ˈwo˗ ꞊gban zë, ˈyö ˈwo wo ˗dɩ dɔ˗ ˈka mɛ ˗nu ˗bha ˈwɔn ˈgü.» (1 Tim. 5:13) ˈKwaa˗ ˈˈpiʋ̈ ˈkwa kë ꞊dhɛ ˗an ˈdhö. ˗Kwa kwa ˗zota kö mɛn ˈbha ˗yö ö ˗bha ˈwɔn ˈbha blɛɛˈˈ kwa ˗dhɛ, kö ˗ya pö kwa ˗dhɛ ꞊dhɛ ˈkwa ˗dho kwa ˈˈdhi bho˗ ˗ta mɛn ˈbha ˗dhɛ. ˗A ˈwɔnzuan ˈnën ˗tɔ kwa ꞊dhegblüdhe do ꞊mɔɔn˗ ˗bha ˈö ö ˗bha ˈˈyua ˗wɔn ɛɛnˈˈ ˈwɔn ˈö ö ˗ta ˗a ꞊blɛɛ kwa ˗dhɛ, ˈö˗ pö ˗yö ˈto kwaa˗ ˗nu kwa ꞊zinŋgü. ꞊Ya kë ˈˈdhʋ̈, pë ˈö˗ pö bhë ˗kwaa ꞊bhlëë ˗ya. w22.09 10 § 7-8.

Glɛkö ˗wo ˈö ˗kë «˗zotakɔ ꞊gban ˈˈgla» ˗sü ˈka bhë, kwa ꞊mɔɔn˗ ˗bha ˈkwa˗ ꞊dhiëëta ˈö ˗kë «˗zotakɔ baaˈˈ» ˗sü ˈka. ꞊Ya kë ˈˈdhʋ̈, kö ˗a ˗gɛn ˈyaa ˈnën ˗tɔ ꞊dhɛ kwa ˈwɔn ˗së ˈbha ˗nu kë kwa ˗bha ˗tosɛta ˈgü. Kwa dua ˗mü ꞊ʒiaan kö ˈmɛn ˈkwa˗ ˈka kwa zuʋ̈ˈˈ ˈgü ˈkwa˗ dɔ, ˈgo mü kö ˈkwa kwa ˈwɔn kë ˗kɔ ˗nu ˗bɛ Zoova ˗bha ˈtɔŋ˗ ˗nu ˗bha. ˈPë ˈkwa ˗dho ˗a ˗kë ˗gɛnɲan ˈka do ˈyaa ˗mü. Kwa dua ˗mü ˈkwa˗ kë ˈˈdhʋ̈ ˗kplawo. Yi ˈö ˈwɔn yaa kë ˗dhii dho ˈgo kwa ˗bha ˗a ˈka, kwa ˗dho ˗mɔn Zoova dhɔɔbhaawɔn ˗nu kë ˗sü ˗bha ˈwɔn ˈˈpɛpɛ ˈgü. ˈˈSanni ˗a ˈˈtʋ̈ŋ bhë ˗yö ˗wo, kwa dua ˗mü ˈkwa kwa ˈgü dɔ ˈˈgbɩɩ˗ kö ˈkwa kë Zoova ˗dhɛ ˗së. ˈKwa ˗dhɛ ˗ga Wlɔmö 12:2 ˈgü, Pɔdhö ˗ya ˗pö ꞊dhɛ kwa dua ˗mü ˈkwa kwa ˗zotakɔ ꞊gban ˈˈgla, kë ˈˈdhʋ̈ kö pë ˈö ˗Zlan ˈdhö˗ ˈˈpiʋ̈ ˈkwa˗ dɔ. ˈKwa ˈdho kwa ꞊kwaa ˈˈkpɔnŋtaadhɛ yaa ˈö yö ˗a ˗zü kö ˗yö kwa ˈwɔn kë ˗kɔ waa kwa ˗zotakɔ ˗nu shiʋ̈ˈˈ. ˗Kwa kwa ˗de ˗ga ˗së ˈka ꞊ʒiaan kö ˗ya kë ꞊dhɛ ˗Zlan ˗zopiʋ̈wɔn ˈnën ˈkwa ˗gban ˗a ˗ta ˈkwa ˗da ˈwɔn ˗nu ˗ʒian ˗ta kö ˈkwa˗ ˈwɔn dɔ. w23.01 8-9 § 3-4.

˗Gleŋ ˗mɛɛn ˈö Zozɛfö ˗bha ˗kwɛzlan ˗ya ˗da kwa ˗bha? Zoova ˗kɔ ˗yö ˈwɔn ꞊gban ˈˈpɛpɛ ˈwo nu kwa ˗ta, ˗an ˈgü ˗ee? ˗Yö ˈˈdhiʋ̈ ˗sü ˈwɔn ˗nu ˈka kwa ˗bha ˗tosɛta ˈgü kë ˈˈdhʋ̈ kö ˈwɔn ˈˈgbɩɩ˗ ˈˈpɛpɛ ˈwo ˗kë kwa ˈka, ˈkwa˗ pö ꞊dhɛ ˗a ˗gɛn ˗yö ˗dhö ˗ee? Biblö ˈyii˗ pö ˈˈdhʋ̈. (Eccl. 8:9; 9:11) ˈˈKɛɛ ˈwɔn ˈˈgbɩɩ˗ ˗nu ˗wa ˗nu kwa ˗ta, ˗yö kë kwa ˈˈɲaan ꞊dhɛ Zoova ˗ya ˈwɔn dɔ, ˈö ˈkwa ˗takundhe ˗dhɛ ˗a ˗gɔ, ˈö ö ˈˈtʋ to kwa ˗bha. (Ps. 34:15; Is. 59:1) ˗Ya ˈgo mü, Zoova ꞊mɔɔn˗ ˗bha ˈö nu kwa ˗dhɛ ˈkwa to ˗a ˈˈgbɩɩ˗ ˈka. ˗Kɔ ˗kë ꞊dhɛ? ꞊Ya kë ꞊shiöŋ Zoova ˗yö kwa ˗zogban ˈö kwa faanmën ö ˈˈtʋ̈ŋ ˗së ˗bha. (2 Ko. 1:​3, 4) Yi ˈö Zoova ˗yö ˗zogbandhe waa ꞊faanmëndhe ˗nu ˗a ˈka ka ˗dhɛ ö ˈˈtʋ̈ŋ ˗së ˗bha, ka ˗zo ꞊kun ˗a ˈˈpiʋ̈ ˗ee? ꞊Ya kë ꞊shiöŋ, ˈkwa bɔ ˈwɔn ˈˈgbɩɩ˗ ˗nu ˈgü ˈsaadhö ˈyö ˈkwa ꞊kun ˗a yö ꞊dhɛ Zoova ˗yö kwa ˗takun. w23.01 17-18 § 13-15.

Waa wü ˈdhɛ˗ ˗gɔ ˈdhö ˈˈsɔɔplɛ ˈkwa˗ ˗wɔn ꞊blɛɛ ꞊klöö˗ yö ˗an ˈˈpian ꞊vadhɛ ˗bhɔ wo ˈko ˗bha, ˈˈkɛɛ yö ˗zë ˗a kwi ˈˈɲan ˗zɔɔndhö. ˗Wa ˗pö «wü ˗blɛɛsü bha˗ ˈˈblɛɛn˗ ˈwo˗ ˗pë ˗kë» yö ˗mü, ˈgo mü ˈzü yö ˈnën ˗tɔ ‹˗gblüdë ˈˈsaaga ˗bha ˗naan.› (˗Dhɛ. 13:​14,15; 17:​3, 8,) Zan ˗ya ˗yö ꞊dhɛ «˗gblüdë» ˈö ˈˈdhʋ̈ ˈdhɛ ˈö nu ˈö ˈˈtʋ̈ŋ ˈnën ˈbha ˗kë ˗yö ˗dho, ˈö go mü ˈzü ˈö nu. Pë ˈö˗ yö bhë ˗yö ˗bɛ ꞊dedewo ˈˈkpɔnŋ ꞊taa ˗kɔlokota ˈkpii˗ ˈwo˗ ˗dhɛ ONU bhë ˗a ˗bha, ˈyö sü ꞊dhɛ ˗yö ˈˈsɛkɔɔnmɛn ˗nu ˈwo ˈˈkpɔnŋtaadhɛ ˗todhʋ̈sü ˈgü ˗an ˗bha ˈwɔn ˗nu ˗faan ˗sü. ˈDhɛ ˈwo˗ ˗ya ˗dɛɛ ˈgü, ˗wa ˗dhɛ Sosiete dɛ nashɔn, ˈˈkɛɛ ˈyö ˈˈkpɔnŋ ꞊taa ˗gblü ꞊plɛ ˗bha ˗naan ˈˈtʋ̈ŋ ˈka, ˈwo˗ wü. ꞊Taabha, ˗wo ˗kɔlokota suu do ˈö bhë ˗a ˗ya ˈzü, ˈyö ˈwo˗ ˗dhɛ ONU. ˈˈSɛkɔɔnmɛn ˗nu ˈwo ˗an ˗zɔn wü ˈˈdhiʋ̈˗ ˗nu ˈka bhë ˗wo mɛn ˗nu ꞊faan ˗mën kö ˗wo ˗gban Zoova waa ö ˗dhɔkëmɛn ˗nu ˗an ˗gɔ. Kwa ꞊mɔɔn˗ ˗bha ˈkwa˗ pö ꞊dhɛ ˗wo ‹˗gblüdë ˗nu ˈˈpɛpɛ ˈwo ˈˈkpɔnŋ ꞊taa› ˗an ˗lo ˗ni ˈgü ˈko ˗ta Aamagedɔn ˗gblü, ˈö ˗kë ‹˗Zlan ˈö˗ ˗fiëbhawɔn ˈyaa ˈdhö ˗a ˗bha ˗dhɛkpaɔyi ˈkpii˗› ˈka bhë, ˗a ˗bha ˈka.—Rev. 16:​13, 14, 16. w22.05 10 § 10-11.

ˈDhɛ Yesu yö ꞊dede ˈö ˗ya ˗Zlan ˗Wo ˈsëëdhɛ ˗wo pö ˗sü ˗bha ö ˗de ˈˈpiʋ̈, ˈyö˗ ˗dɔ ˗së ˈka ˈö˗ ˗dhɔ ˗ya ˗kë, ˈö ö ˈwɔn kë ˗kɔ ˗bɛ ˗a ˗bha. ˗A ˈwɔnzuan do ˈnën ˗tɔ ˈwɔn ˈö˗ ˗kë kö ˗a ˗kwɛ ˗ya kë 12. Mɛn ꞊klaŋkëmɛn ˗nu ˈwo ˗Zlan ˗bha ˈtɔŋ˗ ˈö Moizö ˗ya ˗bɛnzë bhë ˗a dɔ ˗së ˈka, ‹Yesu ˗bha ꞊kpaɔdhɛ waa˗ ˗bha dhɛɛˈˈ ˗nu ˗yɔ ˈwɔn ˗ya ˗nu ˗kɔn ꞊dedewo.› (Dhu. 2:​46, 47, 52) Kwa ˗de ˈpö ˈkwa Biblö ˗wo pö ˗kplawo, kwa ˗dho ˗a dɔ ˗së ˈka ˈö˗ ˗dhɔ kwa ˗kë. ˗Wo ˈö Yesu ˗ya pö ˈtɔŋgɔmɛn ˗nu, Fadhiziɛn ˗nu waa Saduse ˗mɛn ˗nu ˈwo kun ˗Zlan ˗bha ˈtɔŋ˗ ˗nu dɔ ˗ni ˈgü ˗së ˈka ˗an ˗dhɛ bhë, ˗yö ꞊mɔɔn˗ ˗bha ˈö ˗gleŋ ˗da kwa ˗bha. Mɛn ˗nu ˈwo ˈˈdhʋ̈ ˗wo ˗Zlan ˗bha ˈtɔŋ˗ ˈsëëdhɛ ˗wo pö yi ꞊gban ˈka, ˈˈkɛɛ ˈwaa kun ˗a ꞊trɔɔn ꞊slɔɔ ˗ni ˈgü. Pë ˗yaaga ˈö ˗an dua ˈdhö ˗mü ˗be kö ˗wa kë kö ˈtɔŋ˗ ˈsëëdhɛ ˗wopösü ˗yö ˈwɔn ˗së kë ˗an ˗dhɛ, Yesu ˗yö ˗an ˗zɔn. ˗Wo ˈö˗ pö ˗an ˗dhɛ bhë ˗yö ˗dho kwa ˗takun kö (1) ˈpë ˈkwa˗ ˗wo pö ˈkwa˗ ˈgüman ˗së ˈka, (2) ˈkwa ˗gleŋ ˗sɛŋbɔ ˗nu ˈsü ˗a ˈgü, (3) ˈkwa kwa ꞊kwaa ˗Zlan ˈˈDhiwo ˗zü kö ˗yö ˈˈdhiʋ̈sü kwa ˈka. w23.02 8-9 § 2-3.

ˈWɔn yaa ˗nu ˈö kwa dua ˈdhö ˗mü kö ˈkwa ˈˈkan ˗an ˗bha ˈnën ˈwo ˗tɔ dhe waa gɔn˗ ˈwii wo ˈko ˈsü ˗an ˗bha ꞊nënŋ ˈkwëë˗ ˗sü, we ꞊va mü ˗sü, ˗bhöpë ˗va ˗bhö ˗sü, ˈˈdhiwo yaa ˗pö ˗sü, ˈˈvaanvandhɛ trʋʋkë ˗sü, mɛn ˈkpee˗ ˈˈbin ˗ga ˗sü waa pë yaa ˈˈwɛɛ ˈbha ˗nu. (Ps. 101:3) Dügɔmɛn ˈˈɲan ˗yö kwa ˗bha kö ˈö kwaa Zoova kwa ˗bha ˗mlɛɛn shiʋ̈ˈˈ. (1 Piɛ. 5:8) Kwa ˈti kwa ˗zokë kwa ˗de ˈˈpiʋ̈, Sɔtraan ꞊mɔɔn˗ ˗bha ˈö zuʋ̈ˈˈ ˗bhɔ pë ˗bha ˗sü, ˈwɔn ˈö ˈyaa kpɛnŋdhö ˗a kë ˗sü, ꞊nɔɔn ˗dhɔ, ˈko ˗san, ˗desüva waa ˈwɔn ˗kun ö ˗zopiʋ̈ ˗sü ˗nu ˗da kwa zuʋ̈ˈˈ ˈgü. (Ga. 5:​19-21) Kwa ˈti˗ bho mü, ˗yö ˗dho ˈˈgla ˈö ˗kë ꞊dhɛ ꞊blëë yaa ˈdhö ˈö nu ˈwɔn ˈˈgbɩɩ ˈka kwa ˗ta. (Zak. 1:​14, 15) ˈWɔn yaa ˗nu ˈwo ˗bin ˗sü ˈka ˗a do ˈnën ˗tɔ ˗nënŋ mɛn yaa ˗bha ˗sü. Kwa dua ˗mü kö ˈkwa˗ ˈwɔn dɔ ꞊dhɛ ˈˈtʋ̈ŋ ꞊va ˗kë mɛn ˗nu ˈˈpiʋ̈ ˗sü ˗dho ˗a kë ˈö ˗an ˈˈtakɔ to kwa ˗bha. (1 Ko. 15:33) ˈKwa kwa ˗zokë kwa ˗de ˈˈpiʋ̈, kwa ˗dho ˈˈkan ˗nënŋ mɛn ˗nu ˈö ˈwaa Zoova ˗bha ˈtɔŋ˗ ˗nu ꞊bhlëë ˗ya ˗an ˗bha ˗sü ˗bha. (Dhu. 21:34; 2 Ko. 6:15) Kwa ˗dho ˗a yö ꞊dhɛ ˈwɔn yaa ꞊mɔɔn˗ ˗bha ˈö kwa ꞊slɔɔ, ˈö ˈkwa ˗kan mɛn ˗nu ˈwo ˈˈdhʋ̈ ˗an ˗bha. w23.02 16 § 7; 17 § 10-11.

ˈDhɛ ˈka ˗ya ˈwɔn ˈö ˗gban Zoova ˗bha ˗a draanˈˈ ˗sü ˗bha, ˗a ˗dhɔ ˈö ka ˈgü ˗yö ˗dadhiʋ̈. ˈYaa za ˈgü ꞊dhɛ ka˗ ˈˈpiʋ̈ ˈka ꞊ɲɔɔn ˗a ˗bha ꞊dɛɛ, kö ˈka ˈto ˗a ˈˈpiʋ̈ ˗kplawo. ꞊Ii, ka ˗mɔn ˗a ˗kë ˈˈdhʋ̈ ˗sü ˗bha. Zoova ka ꞊faanmën kö ˈka ö zuʋ̈ˈˈ ꞊nii ˗da. (Prov. 23:​15, 16) Ka ꞊mɔɔn˗ ˗bha ˈka˗ zuʋ̈ˈˈ ˈˈgblü dhi ka ˈˈdhiwo waa ka këwɔn ˗nu ˈgü. Ka ˗bha ˗tosɛta kë ˗kɔ ˗dho ˗a ˗zɔn ꞊dhɛ Zoova ˗dhɔ ka ˗kë ꞊dedewo. Pë ˗wɔngbɩɩsü ˈö ˈka ˗dho ˗a kë ˗sü ˗ya ka ˗zo ˈˈpiʋ̈ yö ˗mü. ˈMën ˈka ˗dho ˗a kë kö ˈka˗ ˗zɔn ꞊dhɛ Zoova ˗dhɔ ka ˗kë? ˗A ˗blɛɛsü ˈnën ˗tɔ ka ˗de ˗nu Zoova ˗dhɛ ˗sü ˈö bhɛɛwo ˈgü. (Ps. 40:8) ˗Ya ˈgo mü, ˈka bɔ ˈˈyi ꞊bhaa kö ˈka˗ ˗zɔn mɛn ˈˈpɛpɛ ˗dhɛ ꞊dhɛ ˈka ka ˗bha ˗tosɛta nu ˗a ˗dhɛ. Ka ˗bha ˗bɔyibhaasü ˗dho ka zuʋ̈ˈˈ ˈˈgblü dhi, ˈö ˗kë ˈwɔn ˗së ˈka ka ˗bha ˈka. Zoova dhɔɔbhaawɔn ˈnën ka dua ˈdhö ˗mü kö ˈka˗ kë, ka ˗de ˗bha ˈyaa ˗mü. (Wlɔ. 14:8; 1 Piɛ. 4:​1, 2) ˈWɔn ˈkpii˗ ˈö ˈka ꞊mɔɔn˗ ˗bha ˈka ˗da ˗a ˗ʒian ˗ta yö ˗mü, ˈyö sü ꞊dhɛ ˗yö ˗tosɛta ˗së ꞊dede kë ˗sü ˈˈkwɛɛ ˗pʋ ka ˗gɔ. w23.03 5-6 § 14-15.