Mɛndhɛkësü ˈwɔnyëë˗ ˈkpii˗ do ˗ya ˗pö ꞊dhɛ ˗kpankwëëdhɛ ˈö ɛntɛnɛtö ˗ta ˗yö ˈˈyua ˗ya ˗ni ˈgü wlüünën ˗nu ˗bha: ˈMën Biblö ˗ya pö?

˗Kwɛ 2023 ˈMɛn 23 ˈka, mɛndhɛkësü ˈwɔnyëë˗ ˈkpii˗ do ˈö Zeta zuni ˗yö mɛn ˗nu ˗kpɔɔ ˈö˗ pö ꞊dhɛ ˗kpankwëëdhɛ ˈö ɛntɛnɛtö ˗ta ˗yö ˈwɔn yaa kë ˗ni ˈgü wlüünën ˗nu ˈka.

• «Gagade ˗mü ꞊dhɛ ˗kpankwëëdhɛ ˈö ɛntɛnɛtö ˗ta ˗yö ꞊mɔɔn˗ ˗bha ˈö ˈwɔn ˗së ˗kë ˈnën ˗nu waa wlüünën ˈbha ˗nu ˗dhɛ, ˈˈkɛɛ pë ˈbha ˗nu ˗wo ˗mü ˈö ˈwo˗ ˗zɔn ꞊dhɛ ˗kpankwëëdhɛ ˈö ɛntɛnɛtö ˗ta ˗yö ꞊mɔɔn˗ ˗ba ˈpö ˈö ˈˈyua ˗ya ˈnën ˗nu ˗bha, ˈö ˗an ˗gɔ ˈgü dɔ ˗gbɔudhö.»—˗Kwɛ 2023, Social Media and Youth Mental Health: The U.S. Surgeon General’s Advisory.

ˈPë ˗kë ˈö ˈkwa ˗dho ˈwɔn ˈö bhë ˗a ˈsü kwa ꞊sɔbhɛɛ ˈka, ˈSëëdhɛ ˈö bhë ˗ya ˗blɛɛ.

• Wlüünën ˗nu ˈö ˗an ˗kwɛ ˈdhö 12 waa 15 ꞊zinŋ ˈgü, «ˈö ˈwo pë ˈö ꞊mɔɔn ˈˈlɛlɛ 3 ˗bha ˗a ˗kë ˗dhɛkpaɔyi do ˈgü ˗kpankwëëdhɛ ˈö ɛntɛnɛtö ˗ta ˗a ˗ta, ˗an ˗gɔ ˈgü ꞊mɔɔn˗ ˗bha ˈö ꞊shiö ˈˈvaandhö, ˈö zuʋ̈dhiʋ̈tɛɛ waa ˗gɔ ˈgü dɔ ˗gbɔudhö ˗yö ˗ya ˗an ˗bha.»

• Wlüünën ˗nu ˈö ˗an ˗kwɛ ˈdhö 14 ˗wa ˈdho ˗kpankwëëdhɛ ˈö ɛntɛnɛtö ˗ta ˗a ˗ta ˈgbɛ, ˈwaa yi zë ˗së ˈka. Mɛn ˗nu ˗wo ˗an sëë ˗bho ˈö ˈwo wo ˗de yö yaa ˈka. ˗Wo ꞊bhlëë ˗bho wo ˗de ˗bha ˈö ˗an zuʋ̈ˈˈ ˈˈdhiʋ̈ ˗yö ꞊tɛɛ. ˈYö ˗yö ˗kë ˈˈdhʋ̈ ˈnëndhoŋ ˗nu ˈka ꞊va ˈö ˗ʒiö ˗a ˈka ˈnëngɔɔn˗ ˗nu ˗ta.»

ˈNënmɛn ˗nu ˗dho wo ˗kɔ kpa wo ˗bha ˈnën ˗nu ˗ta ˈwɔn yaa ˗nu bhë ˗an ˗gɔ ˗kɔ ˗kë ꞊dhɛ? ˗Dhioo ˗së ˗nu ˈwo ˗dho ˗an ˗takun ˗wo Biblö ˈgü.

Pë ˈö ˈnënmɛn ˗nu ˈwo ꞊mɔɔn˗ ˗bha kö ˗wa kë

˗Ka ka ˗kɔ ˗da ˈwɔn ˗nu ˈwo˗ ˗kë ˗an ˈgü. ꞊Ya kë ꞊dhɛ ˈnënmɛn ˗nu ˗mü ka ˈka, ˈwɔn yaa ˈö ˗kpankwëëdhɛ ˈö ɛntɛnɛtö ˗ta ˈö ꞊mɔɔn˗ ˗bha ˈö˗ ˗kë ka ˗bha ˈnën ˗nu ˈka, ˗ka ka ˗zota ˗a ˈgü kö ꞊ya kë ꞊dhɛ ka ˗bha ˈnën ˗nu ˗dho ˈdho˗ ˗ta ɛɛnˈˈ ˈö ˈwii ˈdho ˈdho kö ˈka˗ pö ˗an ˗dhɛ.

• Biblö ˗bha ˈtɔŋ˗ ˗gɛngbandhɛ: «Ʒiaan ˈö ˈnën dho ˈdho ˗a ˗ta, ˗bhö ˗a ˗zɔn ˗a ˗dhɛ.»—Proverbes 22:6.

• ˈKa˗ pö ˈka ˈbha ˈgüman, ˗ka ˈwɔn ˗gɔ « Enfants et réseaux sociaux (partie 1) : Mon enfant devrait-il utiliser les réseaux sociaux ? » ˗wo pö.

꞊Ya kë ꞊dhɛ ˈka ˈˈwɩ˗ ˗bha kö ka ˗bha ˈnën ˗yö ˈdho ˗kpankwëëdhɛ ˈö ɛntɛnɛtö ˗ta ˗a ˗ta, ˈwɔn yaa ˈö ꞊mɔɔn˗ ˗bha ˈö˗ ꞊slɔɔ mü ˗yö kë ka ˈˈɲaan. ˈGo mü ˈzü ˗ka ka ˗kɔ ˗da pë ˈö ˗dho ˗a kë mü ˗a ˈgü. ˗Kɔ ˗kë ꞊dhɛ?

˗Ka ˗an ˗takun kö ˈwa ˈdho wo ˗kɔ ˗da ˈwɔn yaa ˈgü. ˗Ka ka ˗bha ˈnën ˗takun kö ˈwɔn yaa ˈö ˗kpankwëëdhɛ ˈö ɛntɛnɛtö ˗ta ˗a ˗ta, ˗ya dɔ kö ˗yö ˈˈkan˗ ˗bha.

• Biblö ˗bha ˈtɔŋ˗ ˗gɛngbandhɛ: «˗A ˗kë ˈˈdhʋ̈ ˗sü bha˗ ˈgü, ˗zua zë ˗sü ˗nu oo, ˈˈyan ˈgü yaa ˗dhɛ ˗nu bha waa˗ zuëˈˈ ˗bhɔ ꞊naɔ ˗bha ˗sü ˗nu bha, ˗ka ka bo˗ ˈka. Mɛ ˈbha ˈˈtʋ ˗zian ꞊në ˈya ˈdho ˗da ˈgü ka kwi ˗bha. ˗A ˗dhɛ ˈyaa˗ ˗bha ˈzü ꞊dhɛ ˈka ˈˈdhidhɛyaadhɛ kë, ˈˈɛɛn kö ˈka ˗tamadhɛ ˗dhiang ˗nu ˈˈɛɛn ˈˈgbɛata yaa ˗nu zë.»—Efɛzö 5:3, 4.

• ˗Ka ˈwɔn ˗gɔ « Enfants et réseaux sociaux (partie 2) : Protégez votre adolescent des dangers des réseaux sociaux » ˗wo pö kö ˈka ˗kpan ˗gleŋ ˗së ˈbha ˗nu ˗bha.

˗Ka ˗naan ˗ya. ˗A ˈwɔnzuan ˈbha ˗nu ꞊nɛɛn. ˈˈTʋ̈ŋ ˈö ka ˗bha ˈnën ˈö ˗dho ˈdho˗ ˈka ˗kpankwëëdhɛ ˈö ɛntɛnɛtö ˗ta ˗a ˗ta, ˈˈlɛlɛ ˈö ˗dho ˗a kë mü, ˗kaa ꞊gban ˗ya.

• Biblö ˗bha ˈtɔŋ˗ ˗gɛngbandhɛ: «꞊Dhɛ ˈö ˈˈdhʋ̈, ˗ka ˈˈta ka suanˈ ˈka. [...] ˗Kaa kë ˗glengdhɛ ˗bha. ˈKwa dɔ ˈya˗, ˈwɔn ˗së kë ˈˈtʋ̈ng ꞊në ziö sië bha, ˗a ˗wɔn ˈgü ˈˈtʋ̈ng ˈˈʋʋ ˈˈtʋ̈ng ˈö˗ ˈˈsɩ ˗zë ꞊ya kë˗ ˈka ka ˗dhɛ, ˗kaa kë.»—Efɛzö 5:15, 16.

• ˗Ka bɔ pë ˈˈbin video ˗Kpankwëëdhɛ ˈö ɛntɛnɛtö ˗ta, ˈbha kë ˗a ˗ta, ˗bhö ˗a kë ˗së ˈka ˗ta kö ˈka ka ˗bha ˈnën ˗takun kö ˈpë ˗kë ˈö˗ dua ˈdhö ˗mü kö ˗yö ˗kë ˗kpankwëëdhɛ ˈö ɛntɛnɛtö ˗ta ˗a ˗ta ˗sü ˗naan ˗ya, ˗ya dɔ.