ˈMën ˗kë ˈö mɛnbhɩɩdhe ˗nu ˈˈtakɔ ˈdhö kë ˗ni ˈgü ˈya˗?: ˈMën Biblö ˗ya pö?

Mɛnbhɩɩdhe ˗nu ˈˈtakɔ ˗yö kë ˗ni ˈgü ˈya˗. ˈˈYuadhi zuʋ̈dhiʋ̈sü ˗nu ˗wo ˗gbla ꞊dhɔtrɔɔ˗ ˗nu ˗ta. Pë ˗bhö makii ˈgümɛn ˗nu ˗wo ˈsi ˗bho ˗bhöpë ˗dan ˗mɛn ˗nu ˗gɔ. ˗Yagɔgümɛn ˗nu ˗wo ˈˈdhinaan ˗kë gɔʒiömɛn ˗nu ˈka. ˈNën gɔɔgbɩɩsü ˗nu ˗wo ˈˈyɩɩ ˗to ꞊klaŋgɔmɛn ˗nu ˗bha, ˈwo˗ pö ˗wo ˗dho pë ˈˈdhiʋ̈˗ kë ˗an ˈka ɛɛnˈˈ ˗wo ˗dho ˗an zë. ˈˈSɛgɔdhiʋ̈mɛn ˈbha ˗nu ˗kɔ ˗yö ˈwɔn yaa ˈgü, ˈyö˗ mɛn ˈbha ˗nu ˈwo˗ pö ꞊dhɛ wo ˈˈtakɔ ˗së.

Pë ˈö ˈwo˗ ˗dhɛ ꞊dedewo ˈˈtakɔ ˗së bhë, Biblö ˗ya ˗zɔn. ˗Yö ˈpë ˗kë ˈö mɛn ˗nu ˈˈtakɔ ˗ya kë yaa ꞊dɛɛ, ˗a pö.

ˈMën ˗kë ˈö mɛnbhɩɩdhe ˗nu ˈˈtakɔ ˈdhö kë ˗ni ˈgü ˈya˗?

Kwa˗ ˗yö ˗dhɛ ꞊gban ˈgü ꞊dɛɛ ꞊dhɛ ˈˈtakɔ ˗së waa ˈwɔn kë ˗kɔ ˗nu ˈö ˈwo mɛn ˗zokun ˗wo ˈdho ˗ni ˈgü ˈˈshia˗.

• ˈWɔn ˈbha ˈö Gallup ˗mɛn ˗nu ˈwo˗ pö ˈyö ˗tɔ ˗mlɛɛnkɛn ˗nu ˗wa ˗pö ꞊dhɛ wo ˗bha ˈˈsɛgümɛn ˗nu ˈˈtakɔ ˈö ꞊dɛɛ ˗yö yaa ˈgbɛ. ˈYö ˗yö ˈˈdhʋ̈ ˗a ˗kwɛ ˗ya kë ˗kwɛ 22.

• Mɛn 32.000 ˗dɛɛ ˈˈwɛɛ ˈbha ˈö ˈwo ˗an dhɛɛˈˈ kë ˈzü ˈˈsɛ 28 ˈgü bhë, ˗a mɛn 20.800 ˗wa ˗pö ꞊dhɛ mɛn ˗nu ˈö ˗an ˈˈtakɔ ˈdhö ˗së ꞊dɛɛ ˗wa kë ˈˈtɩtɩ ˗wa ʒiö ˗a ˈka ˈˈdhiʋ̈ ˗be ˗ta.

Biblö ˗yö mɛnbhɩɩdhe ˗nu ˈˈtakɔ ˈö ꞊dɛɛ, ˗a ˗to ˈˈdhiʋ̈ ˈö˗ ˗wɔn ꞊blɛɛ

• «ˈYaa n ˈˈpiʋ̈ ꞊dhɛ ˈwɔn ˈˈgbɩɩ˗ ˈö dho kë ˈˈkpʋngtaadhɛ yën ˈˈtʋ̈ng ˈgü bha ˈi kë˗ ˈgü i tii ˗bha. ˗A ˗gɛn ˗mü ꞊dhɛ ˗a ˈˈtʋ̈ng bha˗ ˈgü, ˈmɛ ˈwo ˗ya wo ˗dɩ ˗wɔn ꞊në˗ zuën ˗ta doseng bha ˗wo ˗dho pa. ˗A ˗nu ˗bha ˈwëëga ˗wɔn ˗dho kë ˈˈgbɩɩ˗ ˈö ˗ziö ˈwɔn ꞊gban ˈˈpɛpɛ ˗ta. ˗Wo ˗dho wo ˗dɩ zë ˈtɔ ˈka ˈö ˈwo wo ˗dɩ sü ˈkpii˗. [...] ˈö ˈwaa wo ˈkpɔmɛ ˗nu ˗wʋ ma, ˈö ˈwaa ˈwɔn ˗së dɔ. [...] ˗A ˗nu ˈˈgblü˗ ˗dho kë ˈya˗, ˈö ˈwɔnsëkëmɛ ˗nu ˗san ˗ya ˗nu ˗kë.»—2 Timote 3:1-3.

ˈBha˗ pö ˗kɔ ˈö ˗wo ˈö bhë ˈö yö ˗ni ˈgü ˗a ˈka ˈko ˈˈdhiʋ̈ ˈü˗ ˈbha dɔ, ˗bhö ˈwɔn ˗gɔ « La Bible a-t-elle prédit la mentalité et la conduite des gens de notre époque ? » ˗wo pö.

ˈˈDhiʋ̈ ˗sü mɛn ˈka pë ˗së

ˈKö ˗kë ꞊dhɛ mɛn ˗nu ˈˈtakɔ ˗yö kë ˗ni ˈgü yaa ꞊dedewo, mɛn ˈˈmliɲɔn ꞊va ˗wo Biblö ˗yö ꞊dhɛ ˈˈdhiʋ̈ ˗sü mɛn ˈka pë ˗së ˈö ꞊mɔɔn˗ ˗bha ˈö kwa ˈˈtakɔ ˗kë ˗se ˗a ˈdhö. ˗Dhioo ˗nu ˈwo˗ ˈgü «˗wo ˗zo ˗yö ˗a ˗dhɛ ˗pë ˗nu ˈka ˗kplawo, ꞊dɛɛ ˈwo˗ ˈka ˗toëpö ˈka.» (Psaume 111:8) ˗A ˈwɔnzuan ˈnënbha ꞊nɛɛn:

• Biblö ˗ya ˗pö: «Pë ˈˈpɛpɛ ˈö ˈka˗ ˈˈpiʋ̈ ꞊dhɛ mɛn ˗nu ˗wa kë ka ˗dhɛ, ka dua ˗mü kö ˈka˗ kë ˗an ˗dhɛ ˈpö.»—Matiö 7:12.

  ˗A ˗gɛn: Kwa dua ˗mü kö ˈkwa mɛn ˗nu ˈkun ˗së, ˈkwa ˗an ꞊bhlëë ˗ya ꞊dhɛ ˗kɔ ˈö ˈkwa˗ ˈˈpiʋ̈ kö ˗wa kë˗ ˈka kwa ˗dhɛ, ˗a ˈdhö.

• Biblö ˗ya ˗pö: «˗Ka ka bo ꞊sua kë ˗sü ˈka kö ˈka tɛanwɔn ꞊në˗ pö ka ˈko ˗nu ˗dhɛ. ˗A ˗gɛn ˗mü ꞊dhɛ mɛ ꞊gban kwa ˗gban ˗sü ˈka kwa ˈkwëë˗ ꞊dhɛ mɛ daɔ ˗nu ˈwo ˗gban mɛ ˗dhü ˗bha ˗kɔ ˈö˗ ˗bha bha ꞊në˗ ˈdhö.»—Efɛzö 4:25.

  ˗A ˗gɛn: Kwa dua ˗mü kö ˈkwa kpɛnŋdhö kwa ˈˈdhiwo waa kwa këwɔn ˗nu ꞊gban ˈgü.

ˈBha˗ pö ˈü˗ ˈgüman ˈzü ˗së ˈka, ˗bhö:

• ˈˈGlaadhiʋ̈ ˗tɔn ˈö˗ ˗gɔ ˗kë « Le bien et le mal : Où trouver un guide fiable ? » waa

• ˈwɔn ˗gɔ « Pë ˈö mɛn ˈˈwɛɛ ˗nu wo ˗kɔ ˗yɛ ˗a ˗bha ˗a ꞊bhlëë ˗ya ˗sü: Biblö ˗dho kwa ˗takun ˗kɔ ˗kë ꞊dhɛ? » ˗an ˗wo pö.