-Gblü ˈö Izraɛdhömɛn ˗nu waa ˈˈsɛ ˗nu ˈwo ˗an ˗züzü ˈwo˗ ˗gɔn ˗ni ˈgü: ˈMën Biblö ˗ya pö?

Mɛn ˗nu zuʋ̈ˈˈ dhiʋ̈ˈˈ ˗yö ˈˈtɛ ˗ni ˈgü ˗dhɛ ꞊gban ˈgü ˗gblü ˈö Zeta zuni, Izraɛdhö waa Ilan ˗mɛn ˗nu ˈwo˗ ˗gɔn ˗ni ˈgü bhë, ˗a ˗wɔn ˈgü. ˗A ˗gblü ˗dho ˗dadhiʋ̈ ˈö ˗kë ˈˈkpɔnŋtaadhɛ ˗todhʋ̈sü ˗bha ˈwɔn ˈka ˗ee? ˈˈSɛgɔdhiʋ̈mɛn ˗nu ꞊mɔɔn˗ ˗bha ˈwo˗ ˗kë ˈö ˗gblü ˗yö ɲën, ˈö ˈˈsɛ ˗yö ˈwaannu ˗tɛkpɛtɛkpɛdhö ˗ee?

Mɛn ˗nu ˈö pë ˈö Biblö ˈgü ˈwo˗ dɔ, ˗wo ꞊mɔɔn˗ ˗bha ˈwo˗ pö ꞊dhɛ -gblü ˈö Izraɛdhömɛn ˗nu waa ˈˈsɛ ˗nu ˈwo ˗an ˗züzü ˈwo˗ ˗gɔn ˗ni ˈgü bhë, ˗yö ˗dho kë Aamagedɔn ˗gblü ˈö ˈˈDhɛbhowɔnta ˈsëëdhɛ ˗ya ˗wɔn ꞊blɛɛ bhë, ˗a zübhodhɛ ˈka.

ˈMën Biblö ˗ya pö?

ˈˈSɛgɔdhiʋ̈mɛn ˗nu ˗dho -gblü ˈö Izraɛdhömɛn ˗nu waa ˈˈsɛ ˗nu ˈwo ˗an ˗züzü ˈwo˗ ˗gɔn ˗ni ˈgü bhë ˗a ˈduannu ˗ee?

Biblö ˗ya ˗pö: «ˈKa ˈdho ka ˗zoyö ˗gblüdë gbö ˗nu ɛɛnˈˈ mɛnbhɩɩdhe ˗dhɛ, ˈyö ˈtɔ˗ ˈyaa ꞊mɔɔn˗ ˗bha kö ˗yö mɛn dha.»—Psaume 146:3.

ˈˈSɛgɔdhiʋ̈mɛn ˗nu ˗dho ꞊mɔɔn˗ ˗bha kö -gblü ˈö Izraɛdhömɛn ˗nu waa ˈˈsɛ ˗nu ˈwo ˗an ˗züzü ˈwo˗ ˗gɔn ˗ni ˈgü bhë ˗wa ˈduannu, ɛɛnˈˈ ˈwii ˈdho ꞊mɔɔn˗ ˗bha ˗ee? ˗A ˗dhɛ ˈö bhë ˈˈtʋ̈ŋ ˈnën ˗dho ˗a pö kwa ˗dhɛ. ˈˈKɛɛ Biblö ˗ya ˗pö ꞊dhɛ ˗yö ˗kë ˈˈsɛkɔɔmɛn, mɛnbhɩɩdhe ˗nu ˗bha mɛnkɔɔnsü ɛɛnˈˈ ˗kɔlokota suu ˈˈʋʋ ˗su ˈka, ˗an ˈbha ˈwaa ꞊mɔɔn˗ ˗bha kö ˗wo ˗gblü ˗nu bho ˈˈshia˗ ˈpapadhö kö ˗yadeflëëgüsü ꞊dede ˗yö kë. ˗Zlan dosɛnŋ ˈnën ꞊mɔɔn˗ ˗bha ˈö «˗gblü ɲën ˈˈsɛ ˗todhʋ̈sü ˗ta.»—Psaume 46:9.

• ˈBha˗ pö ˈü˗ ꞊va ˈbha ˈgüman, ˗bhö ˈˈGlaadhiʋ̈ ˗tɔn ˈö˗ ˗gɔ ˗kë « La fin des guerres : Comment ? » ˈka bhë, ˗a ˗wo pö.

-Gblü ˈö Izraɛdhömɛn ˗nu waa ˈˈsɛ ˗nu ˈwo ˗an ˗züzü ˈwo˗ ˗gɔn ˗ni ˈgü bhë, ˗yö pë ˈbha ˈö Biblö ˗ya to ˈˈdhiʋ̈ ˈö˗ ꞊blɛɛ ˗a ˗yökodhiʋ̈ ˗ee?

Biblö ˗ya ˗pö: «˗Gblü ˗dho ˗da ka ˗züzü ˗dhɛ ˗nu ˈgü ˈö ˈka˗ man, ˈö ˗da ˗dhɛ ꞊gblɛɛn ˗nu ˈgü ˈpö ˈö ˈka˗ ˗tɔɔ man. [...] ˈˈSɛgɔ ˗nu ˗dho ˗puö wo ˈko ˗nu ˗ta ˈö ˈwo ˗gblü gɔn, ˈö ˗gblüdë ˗nu ˗wo nu wo ˈko ˗gɔ.»—Matiö 24:6, 7.

-Gblü ˈö Izraɛdhömɛn ˗nu waa ˈˈsɛ ˗nu ˈwo ˗an ˗züzü ˈwo˗ ˗gɔn ˗ni ˈgü bhë, ˗yö pë ˈˈwɛɛ ˈbha ˈö˗ ˗zɔn ꞊dhɛ kwa «ˈˈkpɔnŋtaadhɛ ɲën ˈˈtʋ̈ŋ,» ɛɛnˈˈ «ˈˈtʋ̈ŋ ˗totaabhasü» ˈgü, ˗a ˈka. (Matiö 24:3; 2 Timote 3:1) ˗Gblü ˗nu ˈwo ˗gɔn ˗ni ˈgü ꞊dɛɛ, ˗wa ˗zɔn ꞊dhɛ ˗a ˈˈtʋ̈ŋ ˈyaa ꞊gblɛɛn ˈzü kö ˗Zlan ˗yö ˗gblü bho ˈˈshia, ˈgo mü ˈzü kö ˗yö ˈwɔn ˈˈgbɩɩ˗ ˈˈwɛɛ ˈbha ˗nu ˈwo saanˈˈ ˗da ˗ni ˈgü mɛnbhɩɩdhe ˗nu ˗ta,˗an ˈˈɲan bhɔ.

• ˈBha˗ pö ˈü˗ ˈbha ˈgüman, ˗bhö ˈwɔn ˗gɔ « Quel est le signe des « derniers jours », ou « temps de la fin » ? » ˗wo pö.

Aamagedɔn ˗gblü zü ˗dho dɔ Izraɛdhö ˗ee?

Biblö ˗ya ˗pö: «˗Dhɛ ˈö ˈˈyina yaa ˗nu bha ˈwo ˗gblüdë ˗nu bha˗ ˗nu ꞊loo ˈko ˗ta ˗a ˗bha bha ˗wa ˗dhɛ ˗dhɛ eblö ˗wʋ ˈgü Aamagedɔn.»—ˈˈDhɛbhowɔnta ˈsëëdhɛ 16:16.

Aamagedɔn ˈyaa mɛnbhɩɩdhe ˗nu ˗bha ˗gblü ˈö˗ zü dho dɔ Izraɛdhö ˗a ˈka. ˗Gblü ˈö ˗dho ˗gɔn ˈˈkpɔnŋtaadhɛ ˗todhʋ̈sü ˈgü, mɛnbhɩɩdhe ˗bha mɛnkɔɔnsü ˗nu waa ˗Zlan ˗an ꞊zinŋ ˈgü, yö ˗mü.

• ˈBha˗ pö ˈü˗ ˈbha ˈgüman, ˗bhö ˈwɔn ˗gɔ « Qu’est-ce que la bataille d’Armaguédon ? » ˗wo pö.

ˈMën ˗dho ü ˗takun kö ˈü zuʋ̈ˈˈ ˈˈdhiʋ̈ ˈyaa ˈdho ˈˈtɛɛ?

Biblö ˗ya ˗pö: «ˈKa ˈdho ˗ya pë ˈˈʋʋ pë ˈbha ˗wɔn zuën ˗ta, ˈˈkɛɛ pë ˈˈʋʋ pë ˈö ka ˗mawɔn ˗yö zun˗ ˗bha, ˗kaa ˗gba ˗dhɛ ˗Zlan ˗gɔ, ˗bhɛa ˗dhɛ ˗sü waa˗ ˗gbɛʋʋ kë ˗sü, waa˗ nuɛˈˈ bho ˗sü ˈka.»—Filipö 4:6.

Zoovaa ˗ya ˈˈpiʋ̈ ˈü bhɛɛˈˈ ö ˗dhɛ. ˗Yö ˗dho ü ˗bha bhɛɛwo ˗daakë ˈö˗ ˗kë ˈö ü zuʋ̈ˈˈ ˗yö ˈwaannu, ˈyö ˗tɔ ꞊dhɛ ˗a ˈˈtʋ̈ŋ ˗yö ü ˈgü. (1 Piɛɛ 5:7) ˗Kɔ ˈö˗ ˗kë ˗a ˈka, ˗a do ˈbha ˈnën ˗tɔ ˗yö kwa ˗takun kö ˈpë ˗kë ˈö ˗gblü ˈyaa ɲën, ˗kɔ ˈö dho ɲën ˗a ˈka waa pë ˈö ˗dho ˗a kë kö ˗yö kwa ˗bha saanˈˈ ˈˈpɛpɛ bho kwa ˗bha, ˗a ˗zɔn kwa ˗dhɛ ˗sü.—ˈˈDhɛbhowɔnta ˈsëëdhɛ 21:3, 4.

• ˗Kɔ ˈö ˗Zlan ˗yö kwa ˗takun ˗a ˈka, ˈbha˗ pö ˈü˗ ˈbha dɔ, ˗bhö ˈwɔn ˗gɔ «La Bible peut-elle m’apporter du réconfort ?» ˗wo pö.