ˈˈDhinaan ˗dho ɲën ˗mën yi ˈka?: ˈMën Biblö ˗ya pö?

Pë ˈö Antonio Guterɛsö ˈö ˗kë Nashiɔn zuni ˗bha ˈsëëdhɛ ˗bɛnzëmɛn ˈka ˈö˗ pö ˈö ˗gban pë ˈö Iran ˗mɛn ˗nu ˗wa ˗kë Izraɛdhömɛn ˗nu ˈka ˗kwɛ 2024 ˈˈSɩyi Avlidhö 13 ˈka ˗a ˗bha, yö ꞊nɛn: «Zuʋ̈ˈˈ ˗kun ö ˗bha ˗sü waa ˈˈdhinaan ˈduannu ˈˈtʋ̈ŋ ˈnën ˈkwa˗ ˈgü yö.»

ˈWɔn ˈö kë ˗ni ˈgü ˈˈkpɔnŋtaadhɛ ˈˈpian ˈö ˈɲaan˗ go ˗ʒian ˈka ˗a ˈgü, ˈnën kë ˗ni ˈgü ˗dhɛ ꞊gban ˈgü ꞊dɛɛ.

«ˈÖ sü ˗gblü ˈkpii˗ 2 ˗naan ˈö ˗da ˈˈkpɔnŋ ꞊taa ˗a ˗bha ˈö yö˗ ˈka ꞊dɛɛ ˗bha, ˗gblü ˗yö gɔn ˗ni ˈgü ˗dhɛ ꞊gban ˈˈpɛpɛ ˈgü. ˈYö ˗a ˗gblü ˗nu ˈwo ˈˈdhʋ̈ ˗wo ˗yɛ mɛn ˈˈmliya 2 ꞊nën˗ ˗bha. ˗A ˗pö ˗kɔ ˈˈwɛɛ ˈgü ˗sü ˈka ˗wa ˈˈkpɔnŋtaamɛn ˗nu ˈˈpɛ˗ ˈgü ˗yiishiö, ˗a ˈˈpian do ˈnën ˗gblü ˈdhö ˈˈyɛ ˗sü ˈka ˗a ˗bha.»—˗Kwɛ 2023 Zanvie 26, Conseil de sécurité des Nations unies.

˗Dhɛ ˗nu ˈö ˗gblü ˈˈgblʋ̈gblʋ̈ ˗nu ˈwo gɔn ˗ni ˈgü ˗an ˗bha ˈˈtʋ̈ŋ yö˗ ˈgü ˈyö ˈwo ˈtɔ˗ Izraɛdhö, Gaza, Sidhi, Azɛɛbaiʒan, Üklɛnö, Sudan, Etiopi, Niʒɛɛ, Biimani waa Aiti ˗sɛ ˗nu.a

ˈˈDhinaan ˗dho ɲën ˗mën yi ˈka? ˈˈSɛgɔdhiʋ̈mɛn ˗nu ˗kɔ ˗dho ꞊mɔɔn ˗gblü ɲën ˗sü ˗bha ˗ee? ˈMën Biblö ˗ya pö?

˗Gblü ˗yö ˗dhɛ ꞊gban ˈgü

ˈˈDhinaan ˈˈgblʋ̈gblʋ̈ ˗nu ˈwo ˈˈkpɔnŋ ꞊taa ꞊dɛɛ ˗wa ˗zɔn ꞊dhɛ ˗gblü ˗nu ɲën ˈˈtʋ̈ŋ ˈyaa ꞊gblɛɛn ˈzüdho. ˗Gblü ˗nu ˈwo bhë ˗wo pë ˈö Biblö ˗ya to ˈˈdhiʋ̈ ˈö˗ pö ˈö ˗gban ˈˈtʋ̈ŋ ˈö ˈkwa˗ ˈgü yö ˗a ˗bha, ˗a ˗yö ˈko ˈˈdhiʋ̈. ˗A ˈˈtʋ̈ŋ ˈö ˈˈdhʋ̈ Biblö ˗ya ˗dhɛ «ˈˈkpɔnŋtaadhɛ ɲën ˈˈtʋ̈ŋ.» —Matiö 24:3.

• «˗Gblü ˗dho ˗da ka ˗züzü ˗dhɛ ˗nu ˈgü ˈö ˈka˗ man, ˈö ˗da ˗dhɛ ꞊gblɛɛn ˗nu ˈgü ˈpö ˈö ˈka˗ ˗tɔɔ man. [...] ˈˈSɛgɔ ˗nu ˗dho ˗puö wo ˈko ˗nu ˗ta ˈö ˈwo ˗gblü gɔn, ˈö ˗gblüdë ˗nu ˗wo nu wo ˈko ˗gɔ.»—Matiö 24:6, 7.

˗Bhö ˈwɔn ˗gɔ « Quel est le signe des « derniers jours », ou « temps de la fin » ? » ˗wo pö kö ˗kɔ ˈö ˗gblü ˗nu ˈwo bhë ˗wo pë ˈö Biblö ˗ya to ˈˈdhiʋ̈ ˈö˗ pö ˗a yö ˈko ˈˈdhiʋ̈ ˗a ˈka, ˈü˗ yö.

˗Gblü ꞊gban ɲën ˗gblü

Biblö ˗ya ˗pö ꞊dhɛ ˗gblü ˗nu ˗dho ɲën. ˈˈKɛɛ ˗wo ˗dho ɲën ˗kɔ ˗kë ꞊dhɛ? Mɛnbhɩɩdhe ˗nu ˈwaa ˈnën ˈwo dho ˗a kë ˈö ˈwo ɲën. ˈˈKɛɛ ˗wo ˗dho ɲën «˗glu ˈö dho kë ˗Zlan ˈpiigbeezë ˗bha yi ꞊va ˈka,» ˈö ˈwo˗ ˗dhɛ Aamagedɔn bhë ꞊nën˗ ˈsaa˗ ˈgü. (˗Dhɛkpaɔ dhiaˈˈ ˈsëëdhɛ 16:14, 16, NTBL) ˗Zlan ˗dho bɔ ˗gblü ˈö bhë ˗ta ˈö ˗yadeflëëgüsü ꞊dede nu mɛnbhɩɩdhe ˗nu ˗dhɛ ꞊dhɛ ˗kɔ ˈö˗ ˈˈplüün bho ˗a ˈka ˗an ˗dhɛ bhë, ˗a ˈdhö.—Psaume 37:10, 11, 29.

ˈBha˗ pö ˈü ˈwɔn ˈö ˗gban ˗Zlan ˗bha ˗gblü ˈö dho ˗gblü ˈˈpɛpɛ ɲën ˗a ˗bha, ˗a ˈbha ˈgüman, ˗bhö ˈwɔn ˗gɔ « Qu’est-ce que la bataille d’Armaguédon ? » ˗wo pö.