Matio

7 “Ta di ho tɔsoba sɛrɛɛ, ka ba ta di ho meŋ sɛrɛɛ; 2 bonso lɛ na hoŋ dire ho taaba sɛrɛɛ na, lɛ la ka ba na di ho meŋ sɛrɛɛ. Lɛ na ho naŋ manna boma korɔ ho tɔsoba, lɛ ka ba na mannaa ko ho meŋ. 3 Bonso ka ho nyɛ muri naŋ be ho yɔɔ nimiriŋ a kyɛ ba nyɛ a wɛge naŋ be ho meŋɛ nimiriŋ? 4 Kyɛbee bonso ka ho yelko ho yɔɔ ka, ‘Vɛŋ ka N iri a muri naŋ be ho nimiriŋ,’ kyɛ ka wɛge be ho meŋɛ nimiriŋ? 5 Hooŋ bampuori-kombampoɔ neɛ! Daŋ iri a wɛge naŋ be a ho nimiriŋ bare, ka lɛ vɛŋ ka ho nyɛrɛ soŋ a toɔ̃ iri a muri naŋ be ho yɔɔ nimiriŋ na. 6 “Yɛ ta de boma naŋ e forifori lɔɔ eŋ baare, kyɛbee a de bonnanɛɛ lɔɔ eŋ dobaare, ka lɛ naane a na neɛ a la sãã bare, a kyɛ leɛ nyɔge ho meŋ tage kyore. 7 “Yɛ moɔ̃ niŋe soorɔ, ba na ko yɛ la; yɛ moɔ̃ niŋe boɔrɔ, yɛ na nyɛ la; yɛ moɔ̃ niŋe kpaara, ba na yuo ko yɛ la; 8 neɛzaa naŋ soorɔ, ba na koo la, neɛzaa meŋ naŋ boɔrɔ, o na nyɛ la, neɛzaa naŋ kpaara, ba na yuo koo la. 9 Yɛ buo soba la be kyɛ ka o bidɔɔ na sɔre boroboro ka o de kuurii koo? 10 Kyɛbee ka onaŋ sɔre zommo, o na de la waabo koo bee? 11 Azuŋ, ka yɛnee naŋ waa neŋfaareŋ baŋ ka yɛ de kyɔɔta-sonne ko yɛ bibiiri, lɛ meŋ la ka yɛ Saa naŋ be sazuŋ na de bonsonne ko neɛzaa naŋ sɔroo! 12 “Azuŋ, yelzaa yɛ naŋ boɔrɔ ka noba erɛ korɔ yɛ, yɛ meŋ erɛ a lɛ korɔ ba. A Bege ane a Daŋyelba wuluu tɛgɛ la lɛ. 13 “Tu a denoɔre naŋ e fogloo na kpɛ, bonso a denoɔre naŋ gɛrɛ saammo poɔ eɛ yɛloŋ ka o tuubu meŋ e mɔlɔ, ka noba yaga tuuroo; 14 kyɛ a denoɔre naŋ gɛrɛ nyɔvore poɔ waa la fogloo, ka a sori meŋ waa feelii, ka noba fẽẽ tuuroo. 15 “Yɛ taa yɛ menne velaa ne a zirii daŋyelba yɛlɛ, ba maŋ pillee pegama a wa yɛ zie, kyɛ ba pooreŋ ba eɛ gboŋgboe. 16 Ba yel-eree ka yɛ na de baŋ ne ba. Neɛzaa daŋ ba pɔre zemberemɛ yi gɔteere zuŋ, bee a pɔre kaŋkanne yi gɔzaŋaa teɛ zu, kyɛbee? 17 Lɛ neŋ o zu la, teɛ zaa naŋ soma maŋ wɔŋɛɛ wɔŋ-sonne, kyɛ teɛ zaa naŋ waa faa maŋ wɔŋɛɛ wɔŋ-faare. 18 Teɛ naŋ soma koŋ baŋ wɔŋ wɔŋ-faare, teɛ naŋ waa faa meŋ koŋ baŋ wɔŋ wɔŋ-sonne. 19 Teɛ zaa naŋ ba wɔnɔ wɔŋ-sonne, ba na ŋmaa o la a de o lɔɔ eŋ vũũ poɔŋ. 20 Yelmeŋɛ zaa, ba yel-eree yɛŋ na de baŋ ne ba. 21 A ba e ka neɛzaa naŋ boɔlɔ ma, ‘Daana, Daana,’ la na kpɛ a sazu Naaloŋ na, kyɛ neɛ na yoŋ naŋ erɛ N Saa naŋ be sazu boɔbo la na kpɛ be. 22 Noba yaga na wa la N zie ana bebiri na a wa yelko ma ka: ‘Daana, Daana, te da ba daŋyel yɛlɛ ho yuoriŋ, a de ho yuori digi ne malekefaare bare, a de ho yuori meŋ toŋ ne tonkpeɛne yaga bee?’ 23 Lɛ la ka N pãã na yelko ba ka: ‘N daŋ ba baŋ yɛ! Yɛ yi be te gaa, yɛnee yelfa-erebɛ ŋa!’ 24 “Azuŋ, neɛzaa naŋ kyɛlle N yelyaga ŋa a de a tonɔ neŋ toma waa ŋa dɔɔ yembaŋna kaŋa naŋ mɛ o die piiri zuŋ. 25 Ka saa da mi yaga, ka lɛ vɛŋ ka kɔmpiiri wa, ka sasɛkpeɛne meŋ da ŋmɛ a die yaga zaa, kyɛ a die da ba le, bonso o da are la piiri zuŋ. 26 Kyɛ neɛzaa naŋ kyɛllɛ N yelyaga ŋa, a ba de a tonɔ neŋ toma waa ŋa dɔɔ dambol kaŋa naŋ mɛ o die biiree zuŋ. 27 Ka saa da mi yaga, ka lɛ vɛŋ ka kɔmpiiri wa, ka sasɛkpeɛne meŋ da ŋmɛ a die yaga zaa ka lɛ vɛŋ ka a die le a baare o zaa kpɛlɛŋkpɛlɛŋ.” 28 Saŋa na Yezu naŋ da wa yeli a yɛlɛ ŋa zaa baare na, a nembeɛoŋ nɔɛ zaaŋ da mãã ne sori na o naŋ da tu kyɛ wulo ba na, 29 bonso o da wulo baŋ aŋa neɛ naŋ taa kpeɛ̃o, o ne a bege wulwulibo wuluu da ba yi taa.