Matio

9 O da kpɛ la a maŋ-gbori a lɔŋ a koɔ̃ gaa o meŋɛ tegɛ. 2 Nyɛ! Ba da de la dɔɔ kaŋa eŋdaa naŋ kpi oŋ gaŋ pane zuŋ waneŋ o zie. Saŋa na oŋ da nyɛ lɛ ba naŋ taa sagediibu na, Yezu da yelko la a dɔɔ naŋ taa a eŋ-kũũ baaloŋ na ka: “Bie, nyɔge ho meŋɛ! ho nyɛ la ho yelbebe sudi.” 3 Ka a bege wulwulbo mine da yele ba pooreŋ ka: “A dɔɔ ŋa toorɛɛ Naaŋmen zuma.” 4 Yezu naŋ da baŋ ba teɛrɛ na zuŋ, o da yelko baŋ ka: “Bonso yɛŋ teɛrɛ yelfaare yɛ sukyie pooreŋ? 5 Aŋa mannoo poɔŋ, a buo soba yeluu la e mɔlɔ, maŋ na yelka, ‘Ho nyɛ la ho yelbebe sudi,’ kyɛbee maŋ na yelka, ‘Vaa iri kyɛnɛ’? 6 Kyɛ ka yɛ na baŋ ka a nensaalaa Bidɔɔ taaɛ kpeɛ̃o a teŋɛzuŋ ka o di nensaaleba yelbebe suuri ko ba—” beŋ la oŋ da yelko a dɔɔ naŋ taa a eŋ-kũũ baaloŋ na ka: “Vaa iri, de ho pane na a gɛrɛ die.” 7 Ka a dɔɔ da vaa iri a gaa o die. 8 Saŋa na a nembeɛoŋ naŋ wa nyɛ a yɛlɛ ŋa na, dabeɛ̃ da kpɛ baŋ, ka ba pugi Naaŋmen, onaŋ ko nensaaleba a kpeɛ̃o ŋa tɔ na. 9 Saŋa na Yezu naŋ wa yi be a gɛrɛ na, o da nyɛɛ dɔɔ kaŋa ba naŋ boɔlɔ Matio ka o zeŋ a zuyɔɔ tomazie, ka Yezu yelkoo ka: “Wa tuuro ma.” A tɔntɔbaalɛ ka o iri tuuroo. 10 A puoreŋ, saŋa na oŋ da be a die dire bondirii na, nyɛ! zuyɔɔ derebɛ yaga ane yelbe-erebɛ da wa la be a wa poɔ Yezu neŋ o potuuribo na poɔŋ ka ba zaa laŋ dire a bondirii. 11 Kyɛ saŋa na a Faraziimine naŋ wa nyɛ lɛ na, ba da yelko la o potuuribo na ka: “Bonso ka yɛ wulwulo laŋ dire ne zuyɔɔ derebɛ ane yelbe-erebɛ?” 12 O da woŋee a yɛlɛ ŋa, azuŋ o da yeleeŋ ka: “Noba naŋ taa laafeɛ ba boɔrɔ tegtegrɛ, kyɛ noba naŋ beɛrɛ yɛŋ boɔrɛɛ tegtegrɛ. 13 Yɛ gaa te zanne a yɛlɛ ŋa tɛgɛ: ‘N boɔrɛɛ nembaalonzoe, a ba e sareka iri.’ Bonso N ba wa ka N boɔle sontuuribo, kyɛ N waɛŋ ka N boɔle yelbe-erebɛ.” 14 Beŋ la ka Gyɔɔn potuuribo da wa o zie a wa sooroo ka: “Bonso ka te ne a Faraziimine maŋ leŋ nɔɛ kyɛ ka ho potuuribo na yɛŋ ba maŋ leŋ nɔɛ?” 15 Ka Yezu deɛ yelko ba ka: “A pɔgderɛ zɔmenne ba seŋ ka ba koŋ saŋa na a pɔgderɛ naŋ be ba zieŋ, kyɛbee? Kyɛ bebie mine waana la ka ba na de a pɔgderɛ yi ba zieŋ, beŋ la ka ba pãã na leŋ nɔɛ. 16 Neɛzaa koŋ sage de pɛmpaalaa sɛ mare kparoo naŋ kore eŋɛŋ, bonso a pɛmpaalaa na kyeɛ yi la a kpar-koraa eŋɛŋ ka lɛ vɛŋ ka o kyeɛre yaga zaa a gaŋ lɛ oŋ da kyeɛre na. 17 Noba ba maŋ de waiŋ paalaa eŋ dãã woore naŋ kore poɔŋ. Ka ba naŋ e lɛ, a dãã woore na puriŋ, ka a dãã kyiri yaare, ka a dãã woore meŋ sãã. Kyɛ ba maŋ de la waiŋ paalaa eŋ dãã woore naŋ e paalaa poɔ, lɛ maŋ vɛmeŋ ka a zaa ayi ba sãã.” 18 Saŋa na oŋ da naŋ yele a yɛlɛ ŋa korɔ ba na, nyɛ! a puoruudie neŋkpoŋ kaŋa da wa la o zie a wa gbi-dumo o nimitɔɔreŋ a yelkoo ka: “A wa ta ŋaa yɛŋ N pɔgeyaa na na kpi la, kyɛ hooŋ wa de ho nu dɔgle o zuŋ, ka o leɛ nyɛ nyɔvore.” 19 Beŋ la ka Yezu ne o potuuribo na da vaa iri a tuuroo. 20 Nyɛ! pɔge kaŋa naŋ da dire dɔgɛɛ ne pɔg-pɛgɛ baaloŋ a da maŋ kyire zĩĩ faa zaa yuomo 12 da gyeerɛɛ Yezu puore a sɔgle wa seene o bonsuuri baaraa zie na, 21 bonso a pɔge da yele korɛɛ o meŋɛ ka: “Ka maaŋ seene o bonsuuri yoŋ gba, kyɛ N na nyɛɛ laafeɛ.” 22 Yezu da leɛ la o puore a nyɛ a pɔge, a yelkoo ka: “N pɔgeyaa, nyɔge ho meŋɛ! Ho sagediibu vɛŋɛɛŋ hoŋ nyɛ laafeɛ.” A yi ana saŋa na, a pɔge da nyɛɛ laafeɛ. 23 Saŋa na oŋ wa ta a puoruudie neŋkpoŋ yiri na, o da nyɛɛ noba naŋ peɛlɛ welee, ane a nembeɛoŋ naŋ gɔnɔ gɔmɔ yaga zaa, 24 Ka Yezu yelko ba ka: “Yɛ yi a zie ŋa, bonso a pɔglee ba kpi, o gbireŋ.” Beŋ la ka ba zaa da piili eroo laara. 25 Saŋa na a nembeɛoŋ naŋ wa yi a yeŋe baare na, o da kpɛ la a die poɔ a te nyɔge a pɔglee nu ka o da leɛ iri voorɔ. 26 Yelmeŋɛ zaa, ba pãã da yelee a yɛlɛ ŋa ka a yaare a teŋɛ zaa poɔŋ. 27 Saŋa na Yezu naŋ yi be a gɛrɛ na, dɔba bayi mine naŋ e zɔnne da tuuroo la, a de kɔkɔkpeɛŋaa a yele ka: “Zo te nembaaloŋ, Deevid Bidɔɔ.” 28 Saŋa na oŋ wa kpɛ a die poɔ na, a dɔɔ zɔnne da wa la o zie, ka Yezu soore ba ka: “Yɛ taaɛ sagediibu ka N na baŋ eɛ a yɛlɛ ŋa?” Ka ba deɛ yelkoo ka: “Ɛɛ, Daana.” 29 Beŋ la oŋ da seene ba nimie, a kyɛ yelka: “Aŋa lɛ yɛ sagediibu naŋ wuli na, a e a lɛ ko yɛ.” 30 Beŋ la ka ba nimie da yuore baŋ piili nyɛrɛ zie. Kyɛ Yezu da kpãã baŋ nimizeɛ̃, a yelko ba ka: “Yɛ kaara soŋ a ta wa yele a yɛlɛ ŋa korɔ neɛzaa.” 31 Kyɛ saŋa na baŋ da yi a yeŋe baare na, ba da vɛŋɛɛŋ ka o yɛlɛ yaare ta a teŋɛ noba zaa. 32 Saŋa na baŋ da wa yire be a gɛrɛ na, nyɛ! noba da taa la dɔɔ kaŋa naŋ da e muu a kyɛ taa sefaa o eŋɛŋ waneŋ o zie; 33 saŋa na oŋ wa digi a sefaa bare na, a dɔɔ muu da piili yelee yɛlɛ. A nembeɛoŋ nɔɛ zaaŋ da mãã, ka ba yelka: “Te daŋ ba nyɛ a yɛlɛ ŋa tɔ zaa Izerayɛl paaloŋ poɔŋ.” 34 Kyɛ ka a Faraziimine da yele ka: “A sefaare naa zie la ka o maŋ tu kyɛ digre a sefaare bara.” 35 Beŋ la ka Yezu da tuuli a teŋ-bɛrɛ neŋ a korehi zaa pooreŋ, a wulo noba naŋ be a puoruuderi pooreŋ, a moɔlɔ a Naaloŋ duorisoŋ korɔ ba, a kyɛ saŋna baaloŋ boorɔ zaa ane yelwonaa zaa. 36 Saŋa na oŋ da wa nyɛ a nembeɛoŋ na, ba nembaaloŋ da kpɛ oŋ, bonso ba da waa ŋa peere naŋ ba taa kyeenɛ, baŋ dɔgraa aŋ pere nimizeɛ̃ kyɛ gyɛ a bare meŋ. 37 Ka Yezu yelko o potuuribo na ka: “Ɛɛ, a weɛ boma waa la yaga a seŋ neŋ deebo, kyɛ a tontonneba eɛ fẽẽ lɛ. 38 Azuŋ, yɛ sɔre a weɛ boma deebo Neŋkpoŋ na ka o toŋ tontonneba ka ba te toŋ a weɛ boma deebo toma.”