Yɛlɛ Naŋ Na Baŋ Soŋ Pɔgeba Naŋ Tuore Yɛlɛ Naŋ Ba Soma
“NOBA maŋ erɛɛ pɔgeba ane pɔgsaree naŋ be a donɛɛ lombori zaa yɛlɛ naŋ ba seŋ neŋ. A yɛlɛ ŋa taa daaŋ pɔgɛɛ ho meŋ bee? Kanne a nyɛ bon nanso ho gomeŋɛ yɛlɛ naŋ fɛrɛ Naaŋmen yaga zaa, ane yɛlɛ oŋ na e a vɛŋ ka yelfaare na noba naŋ maŋ de erɛ pɔgeba na baare.”
Ka hooŋ kaa jw.org zuŋ, ho na nyɛɛ a yelzu ŋa, “Pɔgeba Gomeŋɛ Yɛlɛ—Yɛlɛ A Baabole Naŋ Yeli Kyaare A Yɛlɛ Ŋa.” Yɛlɛ naŋ be ana yelzu na piilee la be a piilee yɛlɛ na hoŋ kanne na. Ka hooŋ kaa ana yelzu na baaraa, ho na nyɛɛ link kaŋa hoŋ na baŋ tɔ a tage a yɛlɛ PDF poɔŋ. Ka hooŋ printi a PDF gane, ho na baŋ gurooŋ eŋ ziiri anaare ka o leɛ gampɛlee. Te yɔɔpɔge Stacy naŋ be United States paaloŋ yeleeŋ ka, “N printɛɛ a gampɛlɛ ŋa, ka N neŋ te yɔɔpɔge kaŋa de a gaaneŋ ziiri na baŋ kaara pɔgeba naŋ tuore yɛlɛ naŋ ba soma.”
A toŋtonɔ kaŋa da yeleeŋ ka o boɔrɛɛ a gampɛlɛ mine ka o de tɔre ko noba naŋ kpeɛrɛ ana zie na. Azuŋ, ba da de la a gampɛlɛ 40 ane jw.org gampɛl-bilii na 30 a te ko ba. Saŋa na baŋ da leɛ gaa a zie na, a toma zukaara da yeleeŋ ka o boɔrɔŋ ka te yɔɔmine na manne sori na teŋ maŋ tu ka te neŋ noba zanna a Baabole ko noba naŋ be o tomazie naŋ.
Stacy neŋ te yɔɔpɔgeba bayi da lɛ gaaɛ ziyuo kaŋa a te tɔre a gampɛlɛ anuu ko ba. Ba da deɛ a gampɛlɛ, a gba yelka ba wa ko ba mine a poɔ. A toŋtonɔ kaŋa da yeleeŋ ka, “A gampɛlee ŋa na soŋɛɛ a pɔgeba naŋ be a zie ŋaŋ na. A somaŋ te nu naŋ kpɛ a.” A puoriŋ ba da lɛ gaaɛ be. Ba da wulee a noba naŋ laŋ na sori teŋ maŋ tu ka te neŋ noba zanna a Baabole. Noba bayi naŋ be ba poɔŋ da yeleeŋ ka ba boɔrɔŋ ka ba wa a daagbuli baaraa lammo na.
Stacy yeleeŋ ka: “Te poɔ pɛlɛɛŋ yaga neŋ lɛ na noba naŋ sagede a gampɛlee ŋa na. Ka hooŋ printoo a nyɔge guri ka o leɛ gampɛlee, ho na baŋ de oŋ manne a Naaloŋ duorisoŋ ko pɔgeba naŋ tuore yɛlɛ naŋ ba seŋ neŋ. Lɛ na a gampɛlee poɔ yɛlɛ naŋ maŋ tɔ noba sukyie na maŋ vɛŋeŋ ka te poɔ zaa pɛle. Te kaarɛɛ soriŋ ka te nyɛ lɛ na Jehoova naŋ na soŋ te ka te toɔ̃ moɔle a duorisoŋ ko a noba ŋa.”