“Yɛ Taa Noɔreyeni”
BITONTONA Pɔɔl da eŋɛɛ Kristabiiri naŋ da be Efesu na faŋa ka ba “taa taa yɛlɛ ne nɔmmo, kyɛ moɔrɔ [ba] moɔbo zaa ka [ba] taa noɔreyeni a vooroŋ soŋ poɔ, ka emmaaroŋ laŋ [ba] taa.”—Efe. 4:2, 3.
Naaŋmen “vooroŋ soŋ” na la maŋ soŋ te teŋ taa “noɔreyeni.” Kyɛ, Pɔɔl lɛ yeleeŋ ka te moɔrɔ ka te taa noɔreyeni. Aŋ mineŋ seŋ ka ba e lɛ? Aseŋ ka Kristabie zaa moɔrɔ ka noɔreyeni be o neŋ o taaba kpakyagaŋ.
Aŋa yɛlɛ mannoo poɔŋ, te de ka neɛ kaŋa daɛ lɔ-paalaa ko bo. Nembuoŋ seŋ ka o kaara a lɔɔre zu velaa? Te baŋɛɛŋ ka ho na iree a noɔre ka hooŋ. Ka hooŋ ba kaara a lɔɔre zu velaa ka lɛ vɛŋ ka o sãã, ho koŋ baŋ yelka neɛ naŋ da a lɔɔre ko bo na la vɛŋ oŋ sãã.
Lɛ neŋ o zu la, noɔreyeni naŋ be te kpakyagaŋ na eɛ kyɔɔtaa naŋ yi Naaŋmen zie. Kyɛ, aseŋ ka te kaŋa zaa erɛ yɛlɛ naŋ na vɛŋ ka a noɔreyeni ta sãã. Ka yelbawoŋtaaŋ be te neŋ te yɔɔ kaŋa kpakyagaŋ, ana somaŋ ka te soore te menne ka, ‘N moɔrɛɛ N moɔbo zaa ka N sɛgre a yɛlɛ ŋa, ka lɛ vɛŋ ka noɔreyeni be te kpakyagaŋ bee?’
YƐ MOƆRƆ KA YƐ NAŊ KYƐNƐ TAA NOƆREYENI
Aŋa lɛ na Pɔɔl naŋ yeli na, aseŋ ka te maŋ mɔɔ te moɔbo zaa saŋa kaŋa sɛre kyɛ na baŋ taa noɔreyeni neŋ te yɔɔmine. Aseŋ ka te e lɛ ka te yɔɔ kaŋaŋ wa e te yɛlɛ ka a kpɛ te. Te naŋ boɔrɔ noɔreyeni zuŋ, aseŋ ka te gaa o soba zie ka te ne o te di dama kyaare a yɛlɛ bee? Saŋa kaŋa lɛ eebo ba maŋ fɛre. Soore ho meŋɛ ka, ‘Ka maaŋ gaa o soba zie, a na vɛŋeŋ ka a yɛlɛ maale bee a na maaleŋ sããŋɛɛ a yɛlɛ?’ Saŋa kaŋa yɛlɛ naŋ na baŋ soŋ la ka te di suuri ko o soba a bare a yɛlɛ.—Yeng. 19:11; Mak. 11:25.
Soore ho meŋɛ ka, ‘Ka maaŋ tagra a yelbawoŋtaa ŋa, a na wanɛɛ noɔreyeni, kyɛbee a na maaleŋ sããŋɛɛ a yɛlɛ?’
Bitontona Pɔɔl da sɛgɛɛŋ ka te naŋ “taa taa yɛlɛ ne nɔmmo.” (Efe. 4:2) Gane kaŋa yeleeŋ ka a yɛlɛ ŋa na baŋ wuliŋ ka, “sagede ba aŋa lɛ na baŋ waa na.” Lɛ wuleeŋ ka aseŋ ka te sage ka te yɔɔmine eɛ noba naŋ ba pɛgeyi, aŋa lɛ na teŋ meŋ ba pɛgeyi na. Yelmeŋɛ la, te zaa moɔrɔŋ ka te de “a gyog-paalaa” su pɔge te menne. (Efe. 4:23, 24) Kyɛ, te naŋ eɛ noba naŋ ba pɛgeyi. (Uro. 3:23) Ka teneeŋ sage a yɛlɛ ŋa di, ana eɛ mɔlɔ ka te dire kannyiri korɔ taa, a vɛnɛ korɔ taa meŋ. Lɛ eebo na vɛŋeŋ ka noɔreyeni be te kpakyagaŋ.
Te na taaɛ noɔreyeni ka teneeŋ maŋ di suuri ko te yɔɔmine, a kyɛ lɛ inni yelfaa na baŋ e te na meŋ. A Giriki yelbiri na baŋ leɛre waneŋ ka “laŋ yɛ taa” Efesu 4:3 na baŋ lɛ wulee “gyiile naŋ nyɔge kɔbɔ ayi lantaa.” Ka hooŋ kanne Kolosi 2:19 ho na nyɛɛ a yɛlɛ ŋa. Lɛ neŋ o zu la, nɔmmo na teŋ taa ko te yɔɔmine na maŋ soŋ teŋ teŋ naŋ tage peɛle ba aneazaa ka saŋa kaŋa te ba maŋ nɔŋ ba yel-eree.
Azuŋ, ka ho yɔɔ kaŋaŋ wa e bo yɛlɛ ka a kpɛ bo, kyɛbee a dɔŋ ho suuri, ta wa derɛ ho teɛroŋ zaa eŋnɛ o gbɛ ŋmɛ na eŋɛŋ. Kyɛ, moɔrɔ ka ho zo o nembaaloŋ. (Kol. 3:12) Nensaalaa zaa kyebe a pɛgeyi, lɛ wuleeŋ ka ho meŋ eɛ yelkaŋa a sãã neɛ kaŋa poɔ saŋa kaŋa. Ka teneeŋ maŋ teɛre a yɛlɛ ŋa, ana soŋ teŋ ka te “moɔrɔ [te] moɔbo zaa ka [te] taa noɔreyeni.”